Ilaalu 2, 6 - Bibeli do fee

Isɔi dagba iyi í dasi inyiu nɔ à yɔɔ

¹ Ajɔ nŋu gɔ inɛi igbɛi walii ŋau à sɔ̃ Elizee à ni, inya bii à ya ka tɔtɔɔ si wajuɛu ihɛ̃ wee í mante.

² Jɔ̀ ka bɔ hee idoi Zuudɛ̃ɛ inɛ fei koo da jĩi wa ka na ka gũ bi kuwa mmu. Nɔ í ni a koo.

³ Ŋɔi inɛ akã nŋa í ni, jɔ̀ awɔ mɔ i sì awa woo ce icɛɛ ŋau. Nɔ í ni nŋu á koo.

⁴ Ŋɔi í too ŋa. Iyi à to idoi Zuudɛ̃ɛu, ŋɔi à waa da jĩi ŋau.

⁵ Si bɛi inɛ akã wa da jĩi nɔu, ŋɔi isɔi dagbaɛ í nya í dasi inɔ inyi. Ŋɔi í dɔ̃ anu í ni, lafɛ̃ɛm, dagbau ǹ kãayeɛ wai.

⁶ Ŋɔi Elizee í beeɛ í ni, tengi iwoi í dasi. Nɔ í nyisiɛ. Ŋɔi Elizee í da ama jĩi gɔ í sɔsi tengi bii isɔu í dasi inyiu, nɔ isɔu í yaa wa lele.

⁷ Nɔ í ni, nyaa wa. Ŋɔi í yɔ awɔ í mu isɔu í nyaa.

Elizee í mu soogei Siri ŋa

⁸ Ilaalui Siri do ti Izirɛli à wa si igũ. Ŋɔi ilaalui Siriu í tɔtɔɔ inɛ ngboi soogeɛ ŋa í ni, inya kasai aa ka ce asɔ.

⁹ Amma Elizee í bɛ inɛ gɔ koo sɔ̃ ilaalui Izirɛliu ku ni ku ce laakai ku maà bɔ bɛ, domi inɛi Siri ŋa à wa bɛ.

¹⁰ Ŋɔi ilaalui Izirɛliu í bɛ inɛ ŋa a koo a maa degbe tengi bii Elizee í ceaa nyindau. Nɔ tuuba nkpɔ nkpɔi dimiɛ í ce. Elizee í ya sɔ̃ ilaaluui nɔ nŋu mɔ ku ce sɔɔlu.

¹¹ Ŋɔi ilaalui Siriu í bitiò ideu, nɔ í kpe inɛ ngboi soogeɛ ŋa í bee ŋa í ni, i sɔ̃m inɛ iyi í wa inɔ nwa ihɛ̃ iyi í jɛ ti ilaalui Izirɛliu.

¹² Ŋɔi inɛ akã nŋa í jɛaa í ni, inɛ kãma kù jɛ tɛɛ, lafɛ̃ɛm ilaalu. Amma Elizee walii iyi í wa ilɛi Izirɛliui í ya maa sɔ̃ ilaalui Izirɛliu ide iyi ì fɔ hee ilaawa bi ku sũɛ.

¹³ Ŋɔi í ni, i koo i cɔ tengi bii í wa ŋa, nɔ n jɔ̀ a toò awɔ. Ŋɔi à naa à sɔ̃ɔ à ni, í wa Dotãa.

¹⁴ Ŋɔi í samba sooge nkpɔ nkpɔ í koo siɛ do acĩ ŋa do sarɛtii igũ ŋa. Ŋɔi à to idũ nɔ à kaako iluu.

¹⁵ Iyi woo ce icɛi Elizee í jĩ daakɔu, ŋɔi í fita. Nɔ í ba wee sooge ŋa à kaako iluu do acĩ ŋa do sarɛtii igũ ŋa. Ŋɔi í koo í beeɛ í ni, mɛɛtu, bɛirei aa ka ce.

¹⁶ Ŋɔi Elizee í jɛaa í ni, maà ce njo, domi inɛ nwa ŋa à kpɔ à re inɛ nŋa ŋa.

¹⁷ Ŋɔi í ce kutɔɔ í ni, Aɔ̃ Lafɛ̃ɛ, cĩ ijuɛ ku yɛ ilu. Ŋɔi Aɔ̃ Lafɛ̃ɛ í cĩ ijui woo ce icɛu, nɔ í ba wee acĩ ŋa do sarɛtii igũi ina nkpɔ nkpɔ à kaako Elizee si antaii iri kutau.

¹⁸ Ŋɔi inɛi Siri ŋau à waa naa si Elizee nɔ í ce kutɔɔ í ni, Aɔ̃ Lafɛ̃ɛ, jɔ̀ zamaau ihɛ̃ fei ku fɛɛju. Nɔ Ilaaɔ̃ í jɔ̀ à fɛɛju si bɛi Elizee í fɔu.

¹⁹ Ŋɔi Elizee í sɔ̃ ŋa í ni, kù jɛ kpãau ihɛ̃, kù nɔ kù jɛ iluu ihɛ̃. I toom wa ŋa, nɔ n bɔò ŋɛ bi inɛ iyi ì waa dɛdɛu ŋa. Ŋɔi Elizee í gbã ŋa í bɔò ŋa Samari.

²⁰ Iyi à lɔ inɔ ilu Samari, ŋɔi Elizee í ni, Aɔ̃ Lafɛ̃ɛ, cĩ ijui inɛ ŋau ihɛ̃ ku ba a yɛ ilu. Ŋɔi Aɔ̃ Lafɛ̃ɛ í cĩ iju nŋa nɔ à ba wee aŋa à wa aninii ilui Samari.

²¹ Iyi ilaalui Izirɛliu í yɛ ŋa, ŋɔi í bee Elizee í ni, baam, n kpa ŋa?

²² Nɔ í jɛaa í ni, aawo, maà kpa ŋa, domi i ci ya kpa inɛ iyi ì mu aru hai si igũ wa. Na ŋa pɛ̃ɛ do inyi a jɛ a mɔ nɔ a nyi bi lafɛ̃ɛ nŋa.

²³ Ŋɔi ilaalui Izirɛliu í jɔ̀ à ce nŋa sɔnda wa nla nla. Nɔ à jɛ à mɔ í bɛi í tale si ŋa kpãa à nɛ bi mɛɛtu nŋa. Ŋɔi soogei Siri ŋau a kù nyi wa ilɛi Izirɛli má.

Ari wa ce ilui Samari

²⁴ Si anyii nŋu, Bɛni-Hadadi ilaalui Siriu í tɔtɔɔ soogeɛ ŋa nɔ í koo í bu ilui Samariu koe.

²⁵ Ŋɔi ari nla nla í lɔ si iluu si na iyi í jɔ̀ à buu koe hee irii gbankɛlɛ akã wa jɛ kpɛkɛlɛ cinɛ nɔ imii ankasiidi zakai awɔ kutu mɔ wa jɛ fia kpɛkɛlɛ miiu.

²⁶ Ajɔ nŋu gɔ ilaalui Izirɛliu í gũ antaii bindiu wa nɛ, ŋɔi inaabo gɔ í sɔ̃ɔ í ni, faabam ilaalu lafɛ̃ɛm.

²⁷ Ŋɔi í jɛaa í ni, bii Aɔ̃ Lafɛ̃ɛ kù faabaɛ, mii amu an faabaɛò. N kù nɛ iya hee má jɛ atɛ̃ vɛ̃ɛ.

²⁸ Do nŋu fei í bee abou í ni, mii wa ceɛ. Ŋɔi í jɛaa í ni, abou ihɛ̃i í ni n naaò amam wa ka kpa ka ŋɔ nnyi, ala nɔ ka ŋɔ ti nŋu mɔ.

²⁹ Ŋɔi à se amam, nɔ awaò à ŋɔɔ. Iyi iju í má, ŋɔi ǹ ni ku naaò amaɛ wa ka ŋɔɔ. Amma í so ndɛɛ í singaɛ.

³⁰ Iyi ilaaluu í gbɔ ide ŋa iyi abou í fɔu, ŋɔi í ga ibɔɛ ŋa hai lelei bindi bii wa nɛ siu. Nɔ zamaau í yɛ wa dasi saaki iyi í jɛ jĩnɛi inɔ kufɔ si lɛlɛi ibɔɛ ŋau.

³¹ Ŋɔi ilaaluu í ni, bii ǹ jɔ̀ irii Elizee amai Safatiu wa kãsi kɔ̃ɔɛ nnyi, Ilaaɔ̃ ku kpãm iju iyi í re dimi baa yooma fei.

Elizee í ni ariu á tã

³² Wee í ko Elizee wa buba kpasɛ̃ɛ nɔ inɛ ngbo ŋau à waa buba bi tɛɛ. Ŋɔi ilaaluu í bɛ siɛ ama wa. Amma hee amau ku maa to wa, Elizee í sɔ̃ inɛ ngbo ŋau tã í ni, ì cɔ ŋa woo kpa inɛu í bɛ inɛ gɔ wa ku na ku bu irim wa. I gbɔ ŋa, bii woo bɛu wa to wa, i cĩmbo gambou, nɔ i maà jɛ ku lɔ wa ŋa. I kù gbɔ isɛɛnɛi mɛɛtuɛ iyi wa tooɛ wa ŋa?

³³ Hee Elizee ku fɔ ideu ku maa coko gbakã, ŋɔi amaabɛu í to wa bi tɛɛ nɔ í ni, laalɔu ihɛ̃ fei wa naai hai bi Aɔ̃ Lafɛ̃ɛ, mii an maa n cɔ siɛ má.