Ilaalu 2, 5 - Bibeli do fee

Naama ilu bɔ̃ɔi batai arau í ba iri

¹ Naama inɛ ngboi soogei ilɛi Siri ŋau í nɛ bɛɛrɛ si wajui ilaalu nɔ ilaaluu í buu ntɔ ntɔ. Nɔ í jɛ ilu jirima nla nla, domi do saabuɛi Aɔ̃ Lafɛ̃ɛ í jɔ̀ inɛi Siri ŋa à jɛ igũ. Amma mɔkɔu do gbugbãɛ do kaasãanɛɛ fei wa ce bɔ̃ɔi batai ara.

² Inɛi Siri ŋa à bɔ ilɛi Izirɛli nɔ à mu ama mudɛ̃ɛ gɔ aru í koo wa cea aboi Naama icɛ.

³ Ŋɔi ama mudɛ̃ɛu í sɔ̃ abou í ni, bii í jɛ lafɛ̃ɛm í bɔ bi walii iyi í wa Samariu wo, á jɔ̀ ku ba iri.

⁴ Ŋɔi Naama í koo í sisia ilaalu bɛi ama mudɛ̃ɛu í fɔ.

⁵ Nɔ ilaalui Siriu í sɔ̃ɔ í ni, dede i koo si ilaalui Izirɛliu. An kɔ tia n naɛ i koo i naa. Ŋɔi Naama í so isɔ fũfũ zakai kiloo cĩɔ mɛɛta do wura kiloo kita do ibɔi jingau mɛɛwa í dasi kpãa.

⁶ Ŋɔi í koo í na ilaalui Izirɛliu tia si bii à kɔsi à ni, bii tiau ihɛ̃ í to wa bi tɛɛ, jɔ̀ i mà iyi ǹ jɔ̀ Naama woo ce icɛm í naa bi tɛɛi ku ba i jɔ̀ ku ba iri hai si bɔ̃ɔi batai arau.

⁷ Iyi ilaalui Izirɛliu í ka tiau í tã, ŋɔi í ga ibɔɛ ŋa na inɔ kufɔɛ nɔ í ni, amu Ilaaɔ̃i hee n jɔ̀ inɛ ku ku walakɔ n jɔ̀ ku wɛɛ iyi wa bɛ sim ilu bɔ̃ɔi batai ara wa n jɔ̀ ku ba iri? Iŋɛ mɔ ì mà ŋa iyi wa dɛ anum nii.

⁸ Iyi Elizee waliii Ilaaɔ̃u í gbɔ à ni ilaalui Izirɛliu í ga ibɔɛ ŋa, ŋɔi í bɛ inɛ ŋa a koo a beeɛ a ni, na mii í ce ì ga ibɔɛ ŋa. Jɔ̀ ku to wa bi tom. Á mà iyi walii gɔ í wa ilɛi Izirɛli.

⁹ Ŋɔi Naama í so acĩɛ ŋa do sarɛtiɛ í koo í leekĩ anu koofai Elizee.

¹⁰ Ŋɔi Elizee í bɛ inɛ gɔ koo sɔ̃ɔ ku ni, koo wɛ isɛ gbɛɛje inɔ idoi Zuudɛ̃ɛ, araɛ á baa nɔ i maaju.

¹¹ Ŋɔi idɔi Naama í kɔ̃. Nɔ í sinda wa nɛ wa ni, ǹ wa n tamaa bɛi á fita wa nŋu takaɛ ku naa ku cɔm, nɔ ku tɔɔ Aɔ̃ Lafɛ̃ɛɛi, nɔ ku to awɔ wo si tengi bii bɔ̃ɔu í wa nɔ n ba iri.

¹² Nɔ mɔm idoi Damasi ŋau, Abana do Paapaa, a kù tia idoi Izirɛli ŋau fei? An yɔkɔ n bɔ bɛ n koo n wɛ nɔ n ba iri n maaju. Ŋɔi í sinda wa nɛ do idɔɔkɔ̃.

¹³ Amma woo ce icɛɛ ŋa à sɔ̃ɔ à ni, lafɛ̃ɛ, bii í jɛ waliiu í ni i ce mii iyi í gaabu wo, debɛi i kaa coo? Í ni i koo i wɛ nɔ i maaju, iwoi kugaabuɛ í wa.

¹⁴ Ŋɔi Naama í bɔ idoi Zuudɛ̃ɛu nɔ í wɛ isɛ gbɛɛje bɛi waliii Ilaaɔ̃ í sɔ̃ɔu. Ŋɔi batai araɛ í baa í yɛ bɛi ti ama keeke nɔ í maaju.

¹⁵ Ŋɔi Naama í nyi wa bi waliiu nŋu do inɛ ŋa iyi à waa tooɛ ŋau fei. Iyi í to wa, ŋɔi í koo í leekĩ wajuɛ nɔ í ni, bɛbɛi ǹ mà iyi iwɛ̃ kãma gɔ kù nɛ gbugbã bɛi Ilaaɔ̃ Lafɛ̃ɛi inɛi Izirɛli ŋa iyi í wa ilɛi Izirɛli. Nsɛi, ǹ wa n tɔɔɛi, i gba amua iyi ǹ wa n naɛ.

¹⁶ Ŋɔi Elizee í jɛaa í ni, do irii Aɔ̃ Lafɛ̃ɛ, nŋu iyi ǹ jɛ woo ce icɛɛ, n kaa n gba. Naama í manteɛ ku gba amuau, amma í kɔ̀si.

¹⁷ Ŋɔi Naama í ni, si bɛi ì kɔ̀si amuau, lafɛ̃ɛ, jɔ̀ a mua amu woo ce icɛɛ sãai ilɛ nŋɛ asoi mulee minji, domi n kù bi n cea iwɛ̃ gɔ kuwee má bii kù jɛ Aɔ̃ Lafɛ̃ɛ.

¹⁸ Mii iyi ǹ wa n tɔɔ Aɔ̃ Lafɛ̃ɛ ku ceem suuruɛ wee. Waati iyi lafɛ̃ɛm ilaalu wa lɔ ilei iwɛ̃ Rimɔɔu wa bɔ ku sɛɛbataa fei, awɔm nii í ya lɔkɔsi, nɔ amu mɔ ǹ ya n sɛɛbataa iwɛ̃u. Aɔ̃ Lafɛ̃ɛ ku yɔkɔɔm suuru waati iyi an koo n sɛɛbataa.

¹⁹ Ŋɔi Elizee í ni, koo nɛ do laakai ku sũ. Nɔ Naama í dasi kpãa í nɛ. Iyi Naama í nɛ, kù jĩò Elizee jiida,

Kurarai Gehazi

²⁰ ŋɔi Gehazi woo ce icɛi Elizee waliii Ilaaɔ̃u í fɔ si inɔɛ wa ni, wee Elizee mɛɛtum í cea Naama inɛi Siriu inɔ akã, domi í kɔ̀si amua iyi wa ceaa. Do irii Aɔ̃ Lafɛ̃ɛ fei, an sɛi n da hãmɛi, ku ba n ba siɛ ngɔgɔ wa.

²¹ Ŋɔi í sɛi wa da hãmɛɛ. Iyi Naama í yɛ wa da hãmɛi nŋu wa, ŋɔi í kita hai si sarɛtiu í bɔ ku koɛ, nɔ í beeɛ í ni, bɛirei í ce.

²² Nɔ í ni, ide kãma kù ce. Mɛɛtum nii í bɛm wa í ni n naa n sɔ̃ɛ awaasũ minji gɔ ŋai à to wa nsɛi hai iri kutai Efaraimu ŋau hai si inɔi igbɛi walii ŋau. Ŋɔi í ni i na ŋa isɔ fũfũ kiloo kuntaa wa do ibɔi jingau minji.

²³ Ŋɔi Naama í manteɛ í ni, jɔ̀ i gba kiloo kita. Ŋɔi í dasi isɔ fũfũ kiloo kitau si bɔgɔ minji, nɔ í náa ibɔi jingau minji. Nɔ í kãa woo ce icɛ minjiɛ gɔ ŋa à waa cua Gehazi.

²⁴ Iyi à to bi iri kutau, ŋɔi Gehazi í gba aso ŋau hai si awɔ nŋa í koo í jilɔɔ kpasɛ̃ nɔ í ni a koo a nɛ.

²⁵ Si anyiɛ nɔ í nyi bi mɛɛtuɛ. Nɔ Elizee í beeɛ í ni, hai iwoi ì waa baa Gehazi. Ŋɔi í ni, lafɛ̃ɛm, n kù bɔ bii kãma.

²⁶ Amma Elizee í sɔ̃ɔ í ni, ì waa tamaa waati iyi mɔkɔu í kita hai si sarɛtiu í bɔ ku koɛ n kù wa n yɛɛi? Ì tamaa bɛi waati iyi aa gba jĩnɛ ŋa do isɔ fũfũ nɔ i ra ikoi jĩi ndii olivi ŋa do ti rezɛ̃ɛ ŋa do mɛɛmu ŋa do woo ce icɛ ŋai ihɛ̃?

²⁷ Bɛbɛi siɛi bɔ̃ɔi batai arai Naamau á nyi wa do si tɔkuɛ ŋa hee do ajɔ fei. Ŋɔi Gehazi í fita hai bi Elizee, nɔ araɛ fei í bɔ waasu na bɔ̃ɔi batai arau.