Ilaalu 2, 4 - Bibeli do fee

Elizee í faaba jaaɔ̃ gɔ

¹ Ajɔ nŋu aboi inɛ gɔ iyi í wa si igbɛi walii ŋau í koo í tɔɔ Elizee sobi í ni, Elizee, ì mà iyi mɔkɔm í jirima Aɔ̃ Lafɛ̃ɛ ntɔ ntɔ. Bɛbɛi í ku. Nɔ inɛ gɔ iyi à waa mu gbeseɛ í naa ama minjim ŋa ku mu aru si fiaɛ.

² Ŋɔi Elizee í ni, to, mii an yɔkɔ n ceɛ. Sɔ̃m mii iyi ì nɛ kpasɛ̃. Ŋɔi abou í ni, n kù nɛ nkãma, bii kù jɛ ikpo keeke gɔ si kpaaba.

³ Ŋɔi Elizee í ni, bɔ inɔ ilu i koo i tɔɔ jɛɛ ngbɛ ŋa wa hai bi kpaasiɛ ŋa fei. Nɔ i tɔɔ ku kpɔ.

⁴ Bii ì baa nɔ i cĩmbo si araɛ do amaɛ ŋau. Nɔ i so ikpou i maa sindaɛ si inɔ jɛɛ ŋau. Jɛɛ iyi í kɔ̃ i ya jilɔɔ ikã.

⁵ Ŋɔi abou í nɛ í koo í tɔɔ jɛɛ ŋa. Nɔ í baa í na í cĩmbo si araɛ, nŋu do amaɛ ŋau. Amu ŋau à ya maa toa jɛɛ ŋau nɔ ku maa dasi ikpou.

⁶ Iyi jɛɛ ŋau fei à kɔ̃, ŋɔi í ni ama akã ku na nŋu jɛɛ wa má. Amma í jɛaa í ni, jɛɛ kù gbe má. Ŋɔi gbakã ikpou í leekĩ, kù waa jo wa má.

⁷ Ŋɔi abou í koo í sɔ̃ waliii Ilaaɔ̃u. Ŋɔi í jɛaa í ni, koo ta ikpou nɔ i sãò gbeseɛ. Nɔ fia iyi í gbeu, awɔ do amaɛ ŋa i maa jɛ ŋa.

Elizee í wa ilui Sunɛmu

⁸ Ajɔ nŋu gɔ Elizee í too do ilui Sunɛmu. Nɔ abo ilu fia gɔ í wa bɛ í manteɛ í ni ku naa ku jɛ. Hai ajɔ nŋu, waati iyi wa lɔ bɛ fei í ya yaa idei aboui koo jɛ.

⁹ Ŋɔi abou í sɔ̃ mɔkɔɛ í ni, ǹ mà mɔkɔ iyi í ya maa yaa wa bi tu wa waati kãma feiu ihɛ̃ waliii Ilaaɔ̃i iyi í má.

¹⁰ Ka maa ile keeke si antaii ile nwa nɔ ka jilɛaa daayi do taabu do kitã do fitila ku ba ku ya sũ bɛ bii í naa bi tu wa.

¹¹ Ajɔ nŋu gɔ, Elizee í nyi wa Sunɛmu nɔ í koo í sũ si ileu.

¹² Ŋɔi í ni Gehazi woo ce icɛi nŋu koo kpe abou wa. Ŋɔi í koo í kpoo wa nɔ í naa bi tɛɛ.

¹³ Ŋɔi Elizee í ni Gehazi ku beeɛ ku ni, wee na iri nwai ì ce kookaaiu ihɛ̃ fei. Mii ì bi ka ceɛ. Kaa fɔ jiida ku jɛɛ bi ilaaluu de, mà bi inɛ ngboi sooge ŋau. Ŋɔi abou í jɛ í ni, aawo, si inɔi inɛm ŋai ǹ wa ihɛ̃ nɔ nkãma kù waa gaiziam.

¹⁴ Iyi abou í nɛ ŋɔi Elizee í bee Gehazi í ni, mii í sĩa ka cea. Ŋɔi Gehazi í jɛaa í ni, kù nɛ ama nɔ mɔkɔɛ í gbo.

¹⁵ Ŋɔi í ni, koo kpoo wa. Nɔ Gehazi í koo í kpoo wa nɔ í naa í leekĩ andɛ gambou.

¹⁶ Ŋɔi Elizee í sɔ̃ɔ í ni, adɔ̃ gɔ suku bɛ ihɛ̃, aa maa mu ama inɛmɔkɔ. Nɔ abou í ni, aawo, lafɛ̃ɛm waliii Ilaaɔ̃, maà lɛlɛm.

¹⁷ Ŋɔi abou í na í ba asĩ nɔ adɔ̃ ku kaɛ, í bí ama inɛmɔkɔ si waatiu bɛi Elizee í sɔ̃ɔu.

Elizee í jɔ̀ amai abo ilu ideɛ í baa si kuwɛɛ má

¹⁸ Ŋɔi amau í dede wa la. Ajɔ nŋu gɔ ŋɔi í koo í ba baaɛ bi woo da amaajɛ ŋa.

¹⁹ Ŋɔi í dɔ̃ anu wa ni, baaba, iri wa lam, iri wa lam. Ŋɔi baaɛu í ni woo ce icɛ akã ku soo ku bɔòɛ bi iyeɛ.

²⁰ Ŋɔi woo ce icɛu í so í kooɛ bi iyeɛu. Nɔ í wa si itãi iyeɛu bɛ hee dasã í bɛi í ku.

²¹ Ŋɔi abou í gũò ikuu lele si ilei Elizee nɔ í tɔɔ si daayiɛu. Ŋɔi í fita nɔ í cĩmbo siɛ.

²² Ŋɔi í koo ba mɔkɔɛ nɔ í sɔ̃ɔ í ni, ǹ wa n tɔɔɛi, bɛ woo ce icɛ akã wa do gbankɛlɛ n ba n kanju n bɔ bi Elizee nɔ n baa wa.

²³ Ŋɔi mɔkɔɛu í beeɛ í ni, kù jɛ cukpa titɔ̃ walakɔ ajɔi kusĩmi nnyi, na mii í ce ì waa dɛ ku bɔ bi Elizee. Ŋɔi í jɛaa í ni, ide kãma kù ce.

²⁴ Ŋɔi í jɔ̀ à dĩa gbankɛlɛu gaayi nɔ í sɔ̃ woo ce icɛu í ni, mu gbankɛlɛu ka nɛ. Maà na i leekĩ kpãa bii kãma bii n kù ni i leekĩ.

²⁵ Ŋɔi à dasi kpãa à waa bɔ bi Elizee si antaii iri kutai Kaamɛliu. Iyi Elizee í hɔ̃nnɛɛ wa, ŋɔi í sɔ̃ Gehazi woo ce icɛɛ í ni, aboi Sunɛmuu wee wa naa.

²⁶ Sɛi i koo nɔ i beeɛ i ni, ì waa nɛ baani? Mɔkɔɛ do amaɛ à waa nɛ baani? Ŋɔi abou í jɛaa í ni, oo. Baani í wɛɛ.

²⁷ Hai abou í to bi Elizee lelei iri kutau gbakã ŋɔi í ya isɛɛ ŋa. Ŋɔi Gehazi wa naa ku taleɛ. Amma Elizee í ni, jɔ̀ɔ bɛ, domi í wɛɛò inɔ kufɔi, nɔ Aɔ̃ Lafɛ̃ɛ í singaam kù jɔ̀ n kù wɛɛò kumàsiɛ.

²⁸ Gbakã ŋɔi abou í ni, lafɛ̃ɛm, amui ǹ tɔɔɛ amau ba. N kù ni i maà lɛlɛm?

²⁹ Ŋɔi Elizee í sɔ̃ Gehazi í ni, dĩ kpakaɛ i so golom nɔ i koo. Bii ì ko inɛ gɔ maà coo fɔɔ, bii inɛ gɔ í ceɛ fɔɔ mɔ, maà jɛaa. Bii ì to, nɔ i lea amau golou si waju.

³⁰ Amma iyei amau í ni, do irii Aɔ̃ Lafɛ̃ɛ fei do kuwɛɛɛ fei, n kaa n koo bii kù jɛ do awɔ takaɛ. Ŋɔi Elizee í dede í tooɛ.

³¹ Gehazi í tako ŋa í to nɔ í lea amau goloi Elizeeu si waju. Amma ide kãma kù ce hee má yaga. Ŋɔi í sinda í ko Elizee nɔ í sisiaa ideu í ni, amau kù jĩ.

³² Iyi Elizee í to wa inɔ kpasɛ̃u, ŋɔi í ba wee ikui amau í wa si antaii daayiɛ.

³³ Ŋɔi í lɔ nɔ í cĩmbo si aŋa minji nŋa. Nɔ í tɔɔ Aɔ̃ Lafɛ̃ɛ.

³⁴ Ŋɔi í gũ si daayiu nɔ í sũ si amau. Nɔ í dasi gɛlɛɛ si gɛlɛi amau do ijuɛ ŋa do awɔɛ ŋa si ti amau í bɛi í tɛ araɛ siɛ. Ŋɔi arai amau í na í gbãa wa.

³⁵ Ŋɔi Elizee í dede wa dabii si inɔ ileu í bɛi í gũ antaii amau í sũ má. Ŋɔi amau í tisãa isɛ gbɛɛje nɔ í cĩ ijuɛ ŋa.

³⁶ Ŋɔi Elizee í kpe Gehazi wa nɔ í ni koo kpe iyei amau wa. Ŋɔi Gehazi í koo í kpoo wa. Iyi í naa bi Elizee, nɔ Elizee í ni, gba amaɛ.

³⁷ Ŋɔi í koo í sɛɛbata hee si isɛɛ ŋa. Nɔ í so amaɛ í fitaò.

Ayɛ iyi kaa jɛ

³⁸ Elizee í baa Giligali waati iyi ari wa ce si ilɛu. Ŋɔi igbɛi walii ŋau à naa à buba si wajuɛ nɔ í sɔ̃ woo ce icɛɛ í ni, tɛkɛ caka nlau nɔ i sea igbɛi walii ŋau ayɛ.

³⁹ Ŋɔi inɛ akã nŋa í fita í bɔ sako wua ku dɛ wa iyi á seò ayɛ. Nɔ si inɔi wua ŋau í ba dimii icĩi sako gɔ ŋa, nɔ í ka ŋa wa si ibɔɛ hee í kɔ̃. Iyi í bɔ, ŋɔi í koo í coo si inɔ caka bii à waa se ayɛu, amma inɛ kãma kù mà mii iyi í jɛ.

⁴⁰ Ŋɔi à buãa inɛ ŋau sɔndau a jɛ. Amma hai à tiɛ gbakã à ya dɔ̃ anui a ni, acĩi í wa inɔ cakau, waliii Ilaaɔ̃. Nɔ à mɔngɔ ku jɔɔ.

⁴¹ Ŋɔi Elizee í ni a naaò iyafũ wa. Ŋɔi í fãsi iyafũu si inɔ cakau nɔ í ni, buãa inɛ ŋau a jɛ. Nɔ mii laalɔ kãma kù wa si cakau má.

Elizee í wo amanɛ cĩɔ

⁴² Ajɔ nŋu gɔ mɔkɔ gɔ í naa hai Baali-Salisa. Nɔ í naa Elizee pɛ̃ɛ kɔnfia iyi à ce do iyafũi ɔɔzu titɔ̃ do ijui amaajɛ titɔ̃ ŋa iyi í dasi bɔgɔɛ wa. Ŋɔi Elizee í ni woo ce icɛi nŋu ku kpɛ̃a inɛ ŋau fei a jɛ.

⁴³ Ŋɔi woo ce icɛɛu í jɛaa í ni, bɛirei an kpɛ̃a inɛ cĩɔ andi pɛ̃ɛ ŋau ihɛ̃. Amma Elizee í ni, kpɛ̃ nŋa nɔ a jɛ, domi Aɔ̃ Lafɛ̃ɛ í ni aa ka jɛ nɔ mbɔɛ ku gbe nwa.

⁴⁴ Ŋɔi woo ce icɛu í kpɛ̃ pɛ̃ɛ ŋau aŋa fei à jɛ nɔ mbɔɛ í gbe, si bɛi Aɔ̃ Lafɛ̃ɛ í fɔu.