Ilaalu 2, 3 - Bibeli do fee

Yoramu ilaalui Izirɛli

¹ Yoramu amai Akabu í jɛ bommai Izirɛli si adɔ̃ mɛɛwa do mɛɛjɔsiai bomma ku jɛi Zozafati ilaalui Zudaau. Nɔ í ce si bommau adɔ̃ maateeji Samari.

² Ŋɔi í ce mii iyi kù dɔ̃a Aɔ̃ Lafɛ̃ɛ si, amma kù to ti iyeò baaɛ ŋa. Í lɛgɛ iwɛ̃ Baali ŋa iyi baaɛ í mau.

³ Amma í na araɛ si dulum ŋa iyi Zeroboamu amai Nebati í ce í tale siò inɛi Izirɛli ŋa dulum. Nɔ í kɔ̀ ku jɔ̀ɔ.

Igũ iyi sooge ŋa à bɔ ilɛi Moabu

⁴ Mesa ilaalui Moabu wa sɛ̃ angudã gaa ŋa. Nɔ í ya maa sãa ilaalui Izirɛli ama angudã dubu cĩɔ (100.000) do angudã kombo dubu cĩɔ (100.000) do nto nŋa si adɔ̃ akã fei.

⁵ Iyi Akabu í ku, ŋɔi ilaalui Moabuu í dedeò ide ku kɔ̀ bi ilaalui Izirɛliu.

⁶ Ŋɔi Yoramu í dede hai Samari nɔ í tɔtɔɔ soogei Izirɛli ŋau fei.

⁷ Ŋɔi í bɛ inɛ ŋa a koo a sɔ̃ Zozafati ilaalui Zudaau a ni, ilaalui Moabu wa ce ide ku kɔ̀ sim. I kaa naa i sim ka bɔ igũ ilɛi Moabu? Ŋɔi Zozafati í ni, oo, an koo. Awaɛ akãi, zamaam tɛɛi, acĩm ŋa tɛɛ ŋai.

⁸ Nɔ í beeɛ í ni, do kpãa yoomai aa ka kooò. Nɔ Yoramu í ni, do kpãai gbaai Edɔmu.

⁹ Ŋɔi ilaalui Izirɛli do ti Zudaa do ti Edɔmu à dasi kpãa à nɛ. Iyi à ce isɛɛnɛ ajɔ mɛɛje, ŋɔi a kù ba inyi iyi aa na sooge nŋa ŋa a mɔ hee má jɛ a na mɛɛmu nŋa ŋa.

¹⁰ Ŋɔi ilaalui Izirɛliu í ni, inɔ kufɔi. Aɔ̃ Lafɛ̃ɛ í kpe awa ilaalu mɛɛta ŋau ihɛ̃ wai koo daa inɛi Moabu ŋa si awɔ.

¹¹ Amma Zozafati í bee í ni, waliii Aɔ̃ Lafɛ̃ɛ baa akã gɔ kù wa ihɛ̃ iyi á ce nwa kubee wa bi Aɔ̃ Lafɛ̃ɛ? Ŋɔi inɛ akãi woo ce icɛi ilaalui Izirɛliu í ni, Elizee amai Safati í wa ihɛ̃ iyi aŋaò Elii njooi í ya fɛ ŋa.

¹² Ŋɔi Zozafati í ni, inɛ nŋu bɛ á mà idei Aɔ̃ Lafɛ̃ɛ ku sɔ̃ wa. Bɛ gbakã ŋɔi ilaalui Izirɛliu do ti Zudaa do ti Edɔmu à sinda à koo à ba Elizee.

¹³ Amma Elizee í bee ilaalui Izirɛliu í ni, na mii í ce ì naa ì waa bitandim. Koo ce kubeeɛ bi waliii iyeɛ ŋau walakɔ bi ti baaɛ ŋau. Ŋɔi ilaaluu í jɛaa í ni, aawo. Aɔ̃ Lafɛ̃ɛi í fa wa wa ihɛ̃ awa ilaalu mɛɛta ŋau fei ku ba koo dasi wa si awɔi inɛi Moabu ŋa.

¹⁴ Ŋɔi Elizee í ni, do irii Aɔ̃ Lafɛ̃ɛi lele do ilɛ iyi ǹ jɛ woo ce icɛɛ, bii kù jɛ na saabui Zozafati ilaalui Zudaau baasi wo, n kaa n ce laakaiɛ hee n cɔɛ mɔm.

¹⁵ Bɛbɛi, a kpe woo cã mɔɔlɔ wa. Ŋɔi à koo à kpe inɛɛu wa. Ŋɔi inɛɛu í lɔsi mɔɔlɔu ku cã, nɔ gbugbãi Aɔ̃ Lafɛ̃ɛ í naa si Elizee.

¹⁶ Nɔ Elizee í fɔ ide wa ni, Aɔ̃ Lafɛ̃ɛ í ni, i tu isa nkpɔ nkpɔ si lɔɔmau ihɛ̃ ŋa,

¹⁷ domi lɔɔmau á na ku kɔ̃ò inyi baa do iyi i kaa gbɔ ibai fufu nɔ i kaa yɛ ijĩ ŋa, do nŋu fei i mɔ ŋa, iŋɛ do mɛɛmu nŋɛ ŋa.

¹⁸ Amma iyi bɛ mii keekei bi Aɔ̃ Lafɛ̃ɛ. Á nyi ku da nŋɛ inɛi Moabu ŋau si awɔ má.

¹⁹ Nɔ i ce asɔɔi ilu ku nɛ gbugbã ŋau do ilu jiida ŋau fei ŋa. I kɛkɛ jĩi jiida ŋau fei ŋa nɔ i dĩ isɔ̃ ŋau fei nɔ i kosi iko jiida nŋa ŋau kuta i bɛjɛ ŋa fei ŋa.

²⁰ Ŋɔi daakɔ si waati iyi à ya ce kuweeu, à ba wee inyi wa cã wa hai do ikpa Edɔmu nɔ ilɛu í kɔ̃ do inyi.

²¹ Waati bɛɛbɛ, inɛi Moabu ŋau fei à gbɔ iyi ilaalu ŋau à waa naa igũ, ŋɔi à tɔtɔɔ inɛ ŋa iyi à to bɛi aa yɔkɔ a bɔ igũ fei, à koo à wa kɔɔi ilɛu.

²² Zakai amɛɛjuumá ŋɔi inɛi Moabu ŋau à jĩ. Si bɛi inunu wa daana si inyi ŋau ŋɔi inyiu í ya ce nkpa bɛi njɛ si iju nŋa.

²³ Ŋɔi à ni, njɛi. Ilaalu ŋau à na à yɔ taakuba nŋa ŋa à kpa njɛ aŋa duusɔ̃ɔ. I dede ka bɔ amani nŋa ŋa ku ko wa.

²⁴ Ŋɔi à waa koo si soogei Izirɛli ŋau. Amma inɛi Izirɛli ŋau à dede à waa kpa ŋa. Ŋɔi à waa sa, nɔ inɛi Izirɛli ŋau à too ŋa hee à dasi ilɛ nŋa à koo à kãmia ŋa mam mam.

²⁵ Ŋɔi à lɛgɛ ilu ŋau. À kosi ilɛ jiida nŋa ŋau fei kuta hee à kɔ̃ nɔ à dĩ isɔ̃ ŋau nɔ à da jĩi jiida ŋau fei. Si anyiɛ ŋɔi woo ta atavim ŋa à koo à kaako ilui Kii-Haresɛti iyi í gbeu, à lɛgɛɛ.

²⁶ Iyi ilaalui Moabuu í yɛ iyi nŋu kaa jɛ igũu má, ŋɔi í so ilu taakuba cĩɔ mɛɛje à koo si ilaalui Edɔmu. Amma à mɔngɔ.

²⁷ Ŋɔi ilaalui Moabuu í so ama yemmaɛ iyi á na ku jɛ bomma si agbɛɛ í ceò kuwee iyi à ya jo si ina fei sãa sãa si antaii bindiu. Ŋɔi inɛi Izirɛli ŋau à biti ntɔ ntɔ nɔ à sa a baa ilɛ nŋa.