Ilaalu 2, 25 - Bibeli do fee

¹ Si adɔ̃ mɛɛsãsiai bomma ku jɛi Sedesiasi, si ajɔ mɛɛwasiai cukpa mɛɛwasia, Nebukanɛsaa ilaalui Babilɔniu í naa igũ si ilui Zeruzalɛmu nŋu do soogeɛ ŋau fei. Ŋɔi à ce asɔ kɔkɔi iluu nɔ à ce timtim à kaakoɛò.

² À bu iluu koei hee í koo í to adɔ̃ maatakãsiai bomma ku jɛi ilaalu Sedesiasi.

³ Ŋɔi ari í naa í caa si iluu, hee sɔnda iyi aa na zamaau ku jɛ kù wɛɛ má. Si ajɔ mɛɛsãsiai cukpa mɛɛsia,

⁴ inɛi Babilɔni ŋa à lu foo si bindii iluu. Waati iyi idũ í na í dũ, ŋɔi woo ja igũi Zudaa ŋau fei à sa. Baa do iyi inɛi Babilɔni ŋau à kaako iluu fei, inɛ ŋau à fita hai Zeruzalɛmui hai do bi gambo iyi í wa afei idĩ minji iyi í wa kɔkɔi lamboi ilaaluu. Ŋɔi à sa à too do kpãa iyi wa bɔ ikpa lɔɔmai Zuudɛ̃ɛ.

⁵ Amma soogei Babilɔni ŋau à lɔsi Sedesiasi ilaalui Zudaau ku lele, nɔ à koo à baa hee si lɔɔmai Zerikou. Ŋɔi soogeɛ ŋau fei à sa à jɔ̀ɔ.

⁶ Ŋɔi à muu à naaɛ wa Ribula bi ilaalui Babilɔniu. Nɔ à kiitia.

⁷ Ŋɔi à saka amaɛ ŋa si wajuɛ bɛ. Ŋɔi à lɛgɛ njɛi ijuɛ ŋa à bɛi à dũu do sesee à bɔòɛ ilɛi Babilɔni.

À gba ilui Zeruzalɛmu nɔ à mu inɛ ŋa iyi à gbe ŋau aru

⁸ Si adɔ̃ mɛɛwa do mɛɛsãsiai bomma ku jɛi Nebukanɛsaa, si ajɔ mɛɛjesiai cukpa miiusiaui Nebuzaradãa í naa Zeruzalɛmu. Inɛɛu, nŋui í jɛ inɛ ngboi woo degbe ilaalu ŋau, nɔ wa jɛ akawei ilaalui Babilɔniu.

⁹ Nŋui í jo kpasɛ̃i Aɔ̃ Lafɛ̃ɛu do kpasɛ̃i ilaaluu do ilei Zeruzalɛmu ŋau fei hee do ti ilu jirima ŋau.

¹⁰ Soogei Babilɔni ŋa iyi à wa bi inɛ ngboi woo degbe ŋau, à lɛgɛ bindii Zeruzalɛmu ŋau.

¹¹ Si anyii nŋu, Nebuzaradãa í mu inɛ ŋa iyi à gbe si iluu do inɛ ŋa iyi à na ilaalui Babilɔni ara nŋau í nɛò ŋa.

¹² Amma do nŋu fei í jɔ̀ ilu are gɔ ŋa si ilɛu ku ba a maa logoo iko ŋa do jĩi ndii rezɛ̃ɛ ŋau.

¹³ Inɛi Babilɔni ŋau à lɛgɛ sɔbei isɔ nkpa ŋa iyi à wa bi ku lɔi kpasɛ̃i Aɔ̃ Lafɛ̃ɛ hee do sarɛti ŋa, do dangala nla nla iyi à ce do isɔ nkpa iyi í wa bantumai kpasɛ̃u fei. Nɔ à ko isɔ nkpa ŋau fei à nɛò Babilɔni.

¹⁴ Ŋɔi à so bii ilúlu a maa nikã siu do mii ku ko ilúluu do kasɛ ŋau do kɔɔfu ŋau do jĩnɛi isɔ nkpa ŋa iyi à wa si kpasɛ̃i Aɔ̃ Lafɛ̃ɛ à ya maa ceò icɛu fei à nɛò.

¹⁵ Inɛ ngboi woo degbe ŋau í so mii iyi à ce do wura ŋau do ti isɔ fũfũ ŋau mɔ má, hai mii ku busi ina nyɛnyɛ ŋau do kɔɔfu ŋau fei.

¹⁶ Sɔbe minji ŋau do dangala nlau do sarɛti ŋa iyi Salomɔɔ í cea kpasɛ̃i Aɔ̃ Lafɛ̃ɛu, à ce ŋai do isɔ nkpa nɔ a kù mà bɛi kuwo nŋa í to.

¹⁷ Kugbokai sɔbe akã fei í wɛɛi agbãawɔ mɛɛwa do mɛɛjɔ nɔ à ma fulai isɔ nkpa gɔ à kpaò iriɛ iyi kugbokaɛ í wɛɛ agbãawɔ mɛɛta. Si itĩɛ à ce si boodai annya do isoi jĩi ndii gerenadi à kaakoɛò. À ce fei ndɛɛi do isɔ nkpa. Nɔ bɛɛbɛ mɔi à cea sɔbe minjisiau do annyau.

¹⁸ Nebuzaradãa inɛ ngboi woo degbe kpasɛ̃i ilaalu ŋau í jɔ̀ à mu Seraya woo wee nlau do Sefania atɛkɛsiɛu, do woo wee mɛɛta ŋa iyi à ya maa degbe andɛ bi ku lɔi kpasɛ̃i Aɔ̃ Lafɛ̃ɛu.

¹⁹ Si anyii nŋu, nɔ í jɔ̀ à mu akawe gɔ iyi wa jɛ inɛ ngboi sooge ŋau do inɛ miiui woo mua ilaalu ikɔ ŋau do inɛi Zudaa ŋa aŋa kita, do woo kɔ tia inɛ ngboi sooge ŋa iyi í ya ce wũai sooge ŋa ku muu. Inɛ ŋau bɛ fei Zeruzalɛmu bɛi à tako à wa wo.

²⁰ Nebuzaradãai í gbã ŋa í nɛò ŋa Ribula bi ilaalui Babilɔni.

²¹ Nɔ tengi bɛi ilaaluu í jɔ̀ à kpa ŋa si ilɛi Amati. Do yaase bɛɛbɛi à mu zamaai Zudaa aru à nɛò ŋa à jĩò ilɛ nŋa.

Gedalia í jɛ woo mu ilɛi Zudaa

²² Ŋɔi Nebukanɛsaa ilaalui Babilɔniu í jɔ̀ inɛ gɔ ŋa à gbe si ilɛi Zudaau, nɔ í so Gedalia amai Ahikamu iyi wa jɛ tɔkui Safãau ku jɛ inɛ ngbo nŋa.

²³ Inɛ ngboi soogei Zudaa ŋau do sooge nŋa ŋa à gbɔ iyi ilaalui Babilɔniu í so Gedalia ku maa mu ilɛu. Ŋɔi à dede à bɔ bi tɛɛ Misipa bɛ. Inɛ ngbo ŋa iyi à koou wee. Isimaɛli amai Netania do Yohanaa amai Karea do Seraya amai Tãhumɛti inɛi Netofau do Yaazania amai Maakau.

²⁴ Ŋɔi Gedalia í sɔ̃ ŋa do kugbasi í ni, i maà ce njoi nkãma si gãmɛi inɛi Babilɔni ŋau ŋa. I wa si ilɛu ihɛ̃ ŋa nɔ i ya maa cea ilaalui Babilɔniu icɛ ŋa. Nɔ aa ba siɛ jiida ŋa.

²⁵ Amma si cukpa mɛɛjesiau Isimaɛli amai Netania tɔkui Elisama iyi í jɛ nyaanzei ilaaluu í dede í naa si Gedalia do sooge mɛɛwa. Nɔ à kpaa, nŋu do inɛi Zudaa ŋa do inɛi Babilɔni ŋa iyi à wa bi tɛɛ Misipa bɛu.

²⁶ Ŋɔi zamaau fei do inɛ ngboi sooge ŋau à dede à nɛ ilɛi Ezibiti, domi à waa ce njoi inɛi Babilɔni ŋau.

Ilaalui Babilɔniu í cea Zoakɛ̃ɛ didɔ̃

²⁷ Si adɔ̃ kuntaa do mɛɛjesiai kumui Zoakɛ̃ɛ ilaalui Zudaaui Evili-Merodaki í jɛ bommai Babilɔni. Si ajɔ kɔnfia do mɛɛjesiai cukpa maateejisia si adɔ̃u bɛi í cea Zoakɛ̃ɛ didɔ̃ í jɔ̀ à nyaa hai ile piisɔ̃ɔ.

²⁸ Ŋɔi í baa ide ku fɔ do jiida ku jɛ, nɔ í coo ilu bɛɛrɛ í re ilaalu ŋa iyi í mu aru wa aŋaò ŋa à wa Babilɔni bɛ fei.

²⁹ Zoakɛ̃ɛ í bɔ jĩnɛ iyi inɛi ile piisɔ̃ɔ ŋa à ya dasiu, nɔ hai waati bɛɛbɛ, aŋaò ilaalui Babilɔniui à ya jɛ si taabuɛ waati kãma fei hee í koo í kuò.

³⁰ Hai waati bɛɛbɛ, ajɔ fei Zoakɛ̃ɛ í ya ba bukaatai mii iyi í nɛi hai bi ilaalui Babilɔniu hee í koo í kuò.