Ilaalu 2, 23 - Bibeli do fee

¹ Iyi Zoziasi í gbɔ idei inɛ ŋau, ŋɔi í tɔtɔɔ inɛ ngboi Zudaa do ti Zeruzalɛmu ŋau wa fei.

² Ŋɔi à dede à bɔ kpasɛ̃i Aɔ̃ Lafɛ̃ɛ aŋa do inɛi Zudaa ŋau fei do inɛi Zeruzalɛmu ŋau fei hai woo wee ŋau do walii ŋau hee do bɛi inɛ ŋa à wɛɛò ikã ikã fei. Nɔ Zoziasi í cio ide iyi í wa si tiai akabuu iyi à yɛ si kpasɛ̃i Aɔ̃ Lafɛ̃ɛu fei si waju nŋa bɛ.

³ Ilaaluu í wai si antaii bi ku tɛ ku gũò ileu, nɔ í teese í dĩ akabuu do Aɔ̃ Lafɛ̃ɛ í ni, an tooɛ nɔ n maa n jirima ideɛ ŋa do ikɔɛ ŋa do woodaɛ ŋa do idɔm fei do lasabum fei nɔ an ceò akabuu iyi à kɔ si tiau fei icɛ. Ŋɔi zamaau fei í jɛsi bɛɛbɛ.

Inɛi Zudaa ŋa à baa si kpãai Aɔ̃ Lafɛ̃ɛ má

⁴ Ŋɔi ilaaluu í ni Hilikiya woo wee nlau do atɛkɛsiɛ ŋau do woo degbe anu koofa ŋau a fitaò jĩnɛ ŋa iyi à cea iwɛ̃ Baali do Asera do inunu do cukpa do leleaɔ̃ ŋau wa fei hai inɔ kpasɛ̃i Aɔ̃ Lafɛ̃ɛu. Bɛi í fɔu bɛɛbɛi inɛ ŋau à ce, nɔ à koo à jo ŋa do alalai Zeruzalɛmu si lɔɔmai Sedorɔ̃ɔ. Nɔ à bu ilúluɛ à naaò wa Betɛli.

⁵ Ŋɔi í lele woo weei iwɛ̃ ŋa iyi ilaalui Zudaa ŋau à jilɛ a ya maa jo tuae si bi kuwee ŋa si antaii iri kuta ŋa iyi à wa kɔkɔi Zeruzalɛmu do ilɛɛkoɛ ŋa do ilu ŋa iyi à wa si ilɛi Zudaau fei. Nɔ í lele inɛ ŋa iyi à ya jo tuae ŋa na iwɛ̃ Baaliu do na inunu do na cukpa do leleaɔ̃ ŋau fei.

⁶ Ŋɔi í jɔ̀ à koo à nya jĩi iyi à gũa iwɛ̃ Aserau wa hai inɔ kpasɛ̃i Aɔ̃ Lafɛ̃ɛu. Nɔ à fitaò hai inɔ ilu Zeruzalɛmu à bɔò si lɔɔmai Sedorɔ̃ɔ à koo à joo bɛ í ce ilúlu. Nɔ à ko ilúluu à dikãɛ bii à ya si inɛ ŋa.

⁷ Ŋɔi í jɔ̀ à koo à lɛgɛ ile ŋa iyi à wa inɔ kpasɛ̃i Aɔ̃ Lafɛ̃ɛ. Si inɔ ile ŋau bɛi à ya tɔtɔɔ sɛ̃ɛ do woo ta icu ŋa, nɔ bɛi inaabo ŋa à ya wɔ̃ jĩnɛ ŋa iyi à ya dasi a tɔɔò iwɛ̃ Aserau.

⁸ Ŋɔi Zoziasi í jɔ̀ à koo à kpe woo weei Aɔ̃ Lafɛ̃ɛ ŋau fei wa hai si ilui ilɛi Zudaa ŋau, nɔ í jɔ̀ geete bii woo wee ŋau à ya jo tuae ŋau à so riisi hai Geba hee ku bɔ Bɛɛseba. Zoziasi í lɛgɛ bii à ya ce kuwee ŋa iyi à wa anu koofai iluu do ikpa anu koofai Zozue inɛ ngboi iluu ikpa awɔ canga.

⁹ Inɛ ŋa iyi à ya tako a ce kuwee si geete ŋau a ci ya jɛ nŋa si a ce kuwee si bi kuweei Aɔ̃ Lafɛ̃ɛ iyi í wa Zeruzalɛmu. Amma à ya jɛ nŋa si a jɛ pɛ̃ɛ hai nɛ levɛ̃ɛu do woo wee kpaasi nŋa ŋau.

¹⁰ Ŋɔi ilaaluu í lɛgɛ bi kuwee iyi í wa Tofɛti. Tofɛtiu si lɔɔmai Hinɔmui í wa. Í lɛgɛɛi ku ba inɛ kãma ku maà jo amaɛ ku ceaò iwɛ̃ Molɔku kuwee má.

¹¹ Ŋɔi í lele acĩ ŋa iyi à wa anu koofai kpasɛ̃i Aɔ̃ Lafɛ̃ɛ hai si ile ŋa iyi à wa kɔkɔi ilei Netãa-Melɛki inɛ ngboi woo ce icɛ ŋau, nɔ í jo sarɛti nŋa ŋa. Acĩ ŋau, ilaalui Zudaa ŋau à jilɛ ŋai à ya ceò icɛ si waatii inunu ku tɔɔ.

¹² Si anyiɛ nɔ í lɛgɛ bi kuwee ŋa iyi ilaalui Zudaa ŋa à ma si antaii ile sikifai Ahazi do bi kuwee ŋa iyi Manasee í ma si bantuma minjii kpasɛ̃i Aɔ̃ Lafɛ̃ɛ ŋau. Iyi í lɛgɛ ŋa í tã ŋɔi í ko buubuu nŋa í koo kosi lɔɔmai Sedorɔ̃ɔ.

¹³ Nɔ í lɛgɛ bi kuwee ŋa iyi Salomɔɔ í ma si antaii irii kutai Olivie iyi í wa wajui Zeruzalɛmu. Iri kutau bɛi à ya kpe iri kutai Nfe ku ce. Tengi bɛi Asitaate iwɛ̃ laalɔi inɛi Sidɔ̃ɔ ŋa í wa do Kemɔsi iwɛ̃ laalɔi inɛi Moabu ŋa do Milikɔmu iwɛ̃ laalɔi inɛi Amɔɔ ŋa.

¹⁴ Nɔ í lɛgɛ kuta ŋa iyi à gbea iwɛ̃ ŋau, nɔ í wu jĩi ŋa iyi à gũ na irii iwɛ̃ Aserau. Ŋɔi í kosi agbɛ nŋa ŋau kũkũi amanɛ ŋa hee í kɔ̃.

Inɛi Izirɛli ŋa à baa si kpãai Aɔ̃ Lafɛ̃ɛ má

¹⁵ Si anyiɛ nɔ Zoziasi í lɛgɛ bi kuwee iyi í wa Betɛliu mɔ má. Bi kuweeu, Zeroboamu amai Nebatii í maa si geeteu í tale siò inɛi Izirɛli ŋau dulum ku ce. Zoziasi í joo í jɔ̀ í ce ilúlu. Nɔ í jo jĩi iyi à gũ na irii iwɛ̃ Aserau.

¹⁶ Ŋɔi Zoziasi í sinda í cɔ ilu nɔ í yɛ balɛ ŋa iyi à wa si antaii iri kutau, ŋɔi í bɛ inɛ ŋa a koo a ko kũkũi balɛ ŋau wa. Nɔ í na í jo ŋa si bi kuweeu í jɔ̀ í riisi. Bɛɛbɛi Zoziasi í ce mii iyi Aɔ̃ Lafɛ̃ɛ í tako í ni waliiɛ ku sɔ̃ Zeroboamuu wo.

¹⁷ Ŋɔi Zoziasi í bee ŋa má í ni, kuta yoomai à lɔ ihɔ̃. Ŋɔi inɛi ilu ŋau à jɛaa à ni, balɛi waliii Ilaaɔ̃ iyi í naa hai Zudaa í naa í fɔ mii iyi á na ku ba bi kuweei Betɛliu mbɛ. Ide iyi í fɔ si gãmɛi bi kuweeu, nŋui ì ce bɛ nsɛi.

¹⁸ Ŋɔi í ni a jɔ̀ balɛu, nɔ inɛ kãma ku maà lu kũkũɛ ŋa. Bɛɛbɛi à jɔ̀ kũkũɛ do ti walii iyi í naa hai Samari.

¹⁹ Ilei iwɛ̃ ŋa iyi ilaalui Izirɛli ŋau à ma si antaii geete ŋau si ilui Samari ŋau fei à dedeò idɔɔkɔ̃i Aɔ̃ Lafɛ̃ɛ, Zoziasi í kpa iri nŋa. Í cea aŋa mɔi dee dee bɛi í cea ti Betɛli ŋau.

²⁰ Ŋɔi í saka woo wee ŋau fei si antaii bi kuwee ŋa iyi à wa bɛu, nɔ í jo kũkũi amanɛ ŋa si, í bɛi í nyi Zeruzalɛmu.

Zamaai Zudaa wa jɛ jingaui Iku ku kua

²¹ Ŋɔi ilaalu Zoziasi í ni zamaau fei ku jɛ jingaui Iku ku kuau do irii Aɔ̃ Lafɛ̃ɛ nŋa si bɛi à kɔɔ si tiai woodaɛ.

²² A kù jɛ jingaui Iku ku kua iyi í to zaka bɛɛbɛ titã hai waati iyi woo kiiti ŋau à waa mu ilɛu hee ku baa waatii bomma ku jɛi ilaalui Izirɛli do ti Zudaa ŋau fei.

²³ Si adɔ̃ mɛɛwa do mɛɛjɔsiai bomma ku jɛi Zoziasii à jɛ jingaui Iku ku kuau do irii Aɔ̃ Lafɛ̃ɛ si ilui Zeruzalɛmu.

Kɔɔi bomma ku jɛi Zoziasi

²⁴ Si anyii nŋu, Zoziasi ilaaluu í kpa woo ba iku ŋa ide ku fɔ do woo ce alisi ŋau. Nɔ í lɛgɛ mii ŋa iyi à ce à jɔ iwɛ̃ nŋa ŋau nɔ í bɛjɛ iwɛ̃ ŋa hee do jĩnɛi iwɛ̃ ŋau iyi à wa Zeruzalɛmu do ilɛi Zudaa fei. Í ce bɛɛbɛi ku ba ku ceò idei wooda ŋa iyi à kɔ si tia iyi Hilikiya woo wee nlau í yɛ si kpasɛ̃i Aɔ̃ Lafɛ̃ɛu icɛ.

²⁵ Si ilaalu ŋa iyi à cuaa Zoziasi wa, baa akã kù wɛɛ iyi í jirima woodai Moizi fei nɔ í tɔɔ Aɔ̃ Lafɛ̃ɛ do idɔɛ fei do gbugbãɛ fei do lasabuɛ fei bɛi Zoziasi. Nɔ si anyiɛ má, inɛ kãma kù wɛɛ iyi í tóo.

²⁶ Do nŋu fei, idɔɔkɔ̃ nla nlai Aɔ̃ Lafɛ̃ɛ kù sũ si inɛi Zudaa ŋau na laalɔ ŋa iyi Manasee í ce í dedeò idɔɔkɔ̃ɛu.

²⁷ Ŋɔi Aɔ̃ Lafɛ̃ɛ í ni, an kɔ̀si inɛi Zudaa ŋa mɔi bɛi ǹ kɔ̀si inɛi Izirɛli ŋau wo. Nɔ n fũsi Zeruzalɛmu iyi ǹ cicau awɔ, do kpasɛ̃ bii ǹ ni, ihɛ̃i an maa n wa.

²⁸ Faajii icɛi Zoziasi ŋa do mii mmu ŋa iyi í ce fei à kɔɔ si tiai icɛi ilaalui Zudaa ŋa.

²⁹ Si waatiɛi Faraɔ̃ Neko ilaalui Ezibitiu í dede wa bɔ ilaalui Asiri ku sobi si igũ ikpa idoi Efarata. Ŋɔi Zoziasi í dede wa bɔ ku daa kpãa. Amma iyi Faraɔ̃ í yɔɔ gbakã í kpaa Mɛgido bɛ.

³⁰ Ŋɔi woo ce icɛɛ ŋau à so ikuu si sarɛtiɛ hai Mɛgido à bɔò Zeruzalɛmu. Nɔ à suu si balɛɛ. Ŋɔi zamaai ilɛu í so Zoakazi amaɛ nɔ à tontooa ikpo si iri à biiɛ bomma si agbɛi baaɛ.

Zoakazi í jɛ bommai Zudaa

³¹ Zoakazi adɔ̃ kɔnfia do mɛɛtai í nɛ waati iyi í jɛ bomma. Nɔ í ce si bommau cukpa mɛɛta Zeruzalɛmu. Iyeɛi à ya kpe Hamutali amai Zeremii inɛi Libunau.

³² Ŋɔi í ce mii iyi kù dɔ̃a Aɔ̃ Lafɛ̃ɛ si dee dee bɛi balaɛ ŋau.

³³ Ŋɔi Faraɔ̃ Neko í muu í dasiɛ piisɔ̃ɔ Ribula si ilɛi Amati í nyaa si bommai Zeruzalɛmuu. Nɔ í daa inɛi Zudaa ŋau isɔ fũfũ kiloo dubu mɛɛta (3.000) do wura kiloo kuntaa iyi aa ya sãa adɔ̃ fei.

³⁴ Ŋɔi í so Eliakimu amai Zoziasi si bommau. Nɔ í kpaási iri Zoakimu. Nɔ í mu Zoakazi í nɛòɛ Ezibiti í koo í ku bɛ.

³⁵ Zoakimu í sãa Faraɔ̃ isɔ fũfũ do wurau. Amma í daa inɛi ilɛɛ ŋai bɛi inɛ fei à ya sã koo mungaò bɛi Faraɔ̃ í da nŋau.

Zoakimu í jɛ bommai Zudaa

³⁶ Adɔ̃ kaafɛtũi Zoakimu í nɛ waati iyi í jɛ bomma. Nɔ í ce si bommau adɔ̃ maatakã Zeruzalɛmu. Iyeɛi à ya kpe Zebuda amai Pedaya inɛi Rumau.

³⁷ Ŋɔi í ce mii iyi kù dɔ̃a Aɔ̃ Lafɛ̃ɛ si dee dee bɛi balaɛ ŋa à ceu.