Ilaalu 2, 22 - Bibeli do fee

Zoziasi ilaalui Zudaa

¹ Zoziasi í nɛi adɔ̃ mɛɛjɔ waati iyi í jɛ bomma. Nɔ í ce si bommau adɔ̃ kuntaa do akã Zeruzalɛmu. Iyeɛi à ya kpe Yedida ama inaaboi Adaya inɛi Bosikati.

² Zoziasi í ce mii iyi í dɔ̃a Aɔ̃ Lafɛ̃ɛ si, nɔ í too si kucei balaɛ Davidi fei dee dee, kù yaa si bii kãma.

Woo wee nlau í yɛ tiai woodau

³ Iyi Zoziasi í ce adɔ̃ mɛɛwa do mɛɛjɔ si bommau, ŋɔi í bɛ Safãa woo kɔ tiaɛu iyi í jɛ amai Asalia nɔ wa jɛ tɔkui Mɛsulamu ku bɔ kpasɛ̃i Aɔ̃ Lafɛ̃ɛ.

⁴ Í sɔ̃ɔ í ni ku koo bi Hilikiya woo wee nlau ku sɔ̃ɔ ku ni ku tɔtɔɔ fia iyi à naaò wa si inɔ kpasɛ̃i Aɔ̃ Lafɛ̃ɛ iyi woo degbe anu koofa ŋau à gba hai bi zamaau ku kaa.

⁵ Nɔ ku so fiau ku na inɛ ŋa iyi à jɛ inɛ ngboi kpasɛ̃u ku teese. Aŋai aa na woo ce icɛ ŋau,

⁶ hai woo gbe jĩi ŋau do woo ma ŋau do woo ce icɛ ŋau fei. Aŋai aa ya ra jĩi ŋa do kuta ŋa iyi à gbe iyi à nɛ bukaataɛ a teeseò kpasɛ̃u fei.

⁷ Amma a maà bee ŋa yaase bɛi à waa loo fiau, domi à jɛ ilu naanɛ ŋa.

⁸ Ŋɔi Hilikiya woo wee nlau í sɔ̃ Safãa woo kɔ tiau í ni, wee ǹ yɛ tiai wooda si inɔ kpasɛ̃i Aɔ̃ Lafɛ̃ɛu. Nɔ í so tiau í na Safãa í cioɛ.

⁹ Si anyii nŋu, Safãa í koo í sisia ilaalu ide ŋau í ni, woo ce icɛɛ ŋau à tɔtɔɔ fia iyi í wa inɔ kpasɛ̃i Aɔ̃ Lafɛ̃ɛu nɔ à koo à na inɛ ngboi woo teese kpasɛ̃i Aɔ̃ Lafɛ̃ɛ ŋau.

¹⁰ Nɔ í ni má, Hilikiya woo wee nlau í nam tia gɔ. Iyi Safãa í fɔ bɛɛbɛ í tã, nɔ í cioa ilaaluu tiau.

Zoziasi í jɔ̀ à bɔ kubee bi Huluda abo waliiu

¹¹ Iyi ilaalu Zoziasi í gbɔ idei tiai woodau í tã, ŋɔi í ga ibɔɛ ŋa ku nyisiò inɔ kufɔɛ.

¹² Ŋɔi í kpe Hilikiya woo weeu do Ahikamu amai Safãa do Akubɔɔ amai Misee do Safãa woo kɔ tiau do Asaya inɛ akãi woo ce icɛɛ ŋa,

¹³ í ni, i koo i bee Aɔ̃ Lafɛ̃ɛ wa ŋa na amu takam do na zamaam inɛi Zudaa ŋau ku ba ka gbɔ yaasei ide iyi í wa si tiau ihɛ̃ iyi à yɛ, domi idɔɔkɔ̃ nla nlai Aɔ̃ Lafɛ̃ɛ í dedei si wa ntɔ ntɔ, si na iyi í jɔ̀ bala nwa ŋa a kù jirima idei tiau nɔ a kù ceò mii iyi à kɔ na iri nwau icɛ.

¹⁴ Ŋɔi Hilikiya woo weeu do Ahikamu do Akubɔɔ do Safãa do Asaya à bɔ bi Huluda walii inaabou. Abou do mɔkɔɛ Salumu, Zeruzalɛmui à wa do ikpa ice titɔ̃u. Salumuu amai Tikivai, nɔ wa jɛ tɔkui Harasi. Nŋui í jɛ woo mu ibɔi woo wee ŋau. Iyi inɛ ŋau à to bi Huluda, ŋɔi à sɔ̃ɔ ideu.

¹⁵ Iyi Huluda í gbɔ ideu ŋɔi í sɔ̃ ŋa í ni, i koo i sɔ̃ inɛ iyi í bɛ ŋɛ wa bi tom wau i ni ŋa, Aɔ̃ Lafɛ̃ɛi inɛi Izirɛli ŋa í ni,

¹⁶ amu Aɔ̃ Lafɛ̃ɛ an jɔ̀ laalɔ ku naa si iluu do si inɛɛ ŋa si bɛi ide ŋa iyi ilaalui Zudaau í cio si tiau wa fɔ.

¹⁷ An ce bɛɛbɛi si na iyi í jɔ̀ à kɔ̀sim nɔ à koo à waa joa iwɛ̃ ŋa tuae, nɔ mii iyi à waa ce fei í dede idɔɔkɔ̃m nii. Idɔm í kɔ̃ si iluu bɛi nɔ kaa sũ pai.

¹⁸ Amma i nyi bi ilaalui Zudaau takaɛ ŋa, nŋu iyi í bɛ ŋɛ wa i naa i ce kubee bi Aɔ̃ Lafɛ̃ɛu i sɔ̃ɔ ŋa i ni, Aɔ̃ Lafɛ̃ɛi inɛi Izirɛli ŋa í ni, waati iyi ì gbɔ idei tiau

¹⁹ ideu í to siɛ. Ì kaye araɛ si wajum waati iyi ì gbɔ ide iyi ǹ ni á na ku ba iluu bɛ do inɛɛ ŋa fei. Ǹ ni an ceekpe ŋa nɔ n ce nfei ilɛ nŋa. Iyi ì gbɔ ideu, ì ga ibɔɛ ŋa na inɔ kufɔ nɔ ì kpata si wajum. Na nŋu, amu mɔ ǹ gbɔ kutɔɔɛu,

²⁰ nɔ an soɛi i nɛ ikpa bi balaɛ ŋau nɔ do laakai ku sũi aa lɔò balɛ. Nɔ ijuɛ kaa yɛ laalɔ ŋau bɛ fei iyi an naaò wa si iluu. Ŋɔi inɛ ŋau à koo à sɔ̃ ilaaluu ide ŋau fei.