Ilaalu 2, 21 - Bibeli do fee

Manasee ilaalui Zudaa

¹ Manasee í nɛi adɔ̃ maateeji waati iyi í jɛ bomma. Nɔ í ce si bommau adɔ̃ ciitaa do miiu ilui Zeruzalɛmu. Iyeɛi à ya kpe Hɛfusiba.

² Ŋɔi í ce mii iyi kù dɔ̃a Aɔ̃ Lafɛ̃ɛ si. Í too si kuce laalɔi dimi mmu ŋa iyi Aɔ̃ Lafɛ̃ɛ í lele si wajui inɛi Izirɛli ŋau.

³ Nŋui í teese í ma bi kuwee ŋa iyi baaɛ Ezekiasi í lɛgɛ si antaii geete ŋau. Nɔ í maa iwɛ̃ Baali bi kuwee ŋa, nɔ í gũa iwɛ̃ Asera jĩi bɛi Akabu ilaalui Izirɛliu í tako í ceu wo. Nɔ í ya gulɛ ku maa tɔɔ cukpa do inunu do leleaɔ̃ ŋa fei.

⁴ Í maa iwɛ̃ ŋa bi kuwee ŋa si inɔ kpasɛ̃i Aɔ̃ Lafɛ̃ɛ, baa do iyi Aɔ̃ Lafɛ̃ɛ í fɔ wo í ni, ilui Zeruzalɛmui an ce bi kuwam.

⁵ Í ma bii à ya weea cukpa do inunu do leleaɔ̃ ŋa si inɔ bantuma minjii kpasɛ̃i Aɔ̃ Lafɛ̃ɛu.

⁶ Nɔ í so ama inɛmɔkɔɛ í joo í ceò kuwee. Í ya ce alisi nɔ í ce dobu dobu ŋa. Nɔ í jilɛ inɛ ŋa iyi à ya ba iku ŋa ide ku fɔ má nɔ à ya fɔ mii iyi á na ku ce. Í ce mii iyi kù dɔ̃a Aɔ̃ Lafɛ̃ɛ si í dedeò idɔɔkɔ̃ɛ.

⁷ Ŋɔi í so Asera iwɛ̃ iyi í ceu í jilɔɔ si inɔ kpasɛ̃i Aɔ̃ Lafɛ̃ɛu. Amma Aɔ̃ Lafɛ̃ɛ í tako í sɔ̃ Davidi do amaɛ Salomɔɔ í ni, si dimii Izirɛli fei Zeruzalɛmui ǹ cica do kpasɛ̃u ihɛ̃ n ce bi kuwam hee do ajɔ fei.

⁸ Bii inɛi Izirɛli ŋau à waa ceò ide iyi ǹ sɔ̃ ŋa fei icɛ, bii à waa jirima wooda iyi Moizi woo ce icɛm í na ŋa, n kaa n jɔ̀ a fita hai ilɛ iyi ǹ na bala nŋa ŋau.

⁹ Amma a kù jirimaɛ. Nɔ Manaseei í jɔ̀ à yaa hai si kpãa jiida à waa ce laalɔ iyi í re baa ti inɛi ilɛ ŋa iyi Aɔ̃ Lafɛ̃ɛ í ce nfe nŋa si wajui inɛi Izirɛli ŋa.

¹⁰ Ŋɔi Aɔ̃ Lafɛ̃ɛ í sɔ̃ walii woo ce icɛɛ ŋau í ni a sɔ̃ inɛ ŋa a ni,

¹¹ Manasee ilaalui Zudaau í ce daa sãmi nkpɔ nkpɔ, í ce laalɔ iyi í re ti inɛi Amɔre ŋa iyi à takoɛ à ce ŋau fei, nɔ í jɔ̀ inɛi Zudaa ŋa mɔ à ce dulum à waa tɔɔ iwɛ̃ɛ ŋa.

¹² Na nŋu, amu Aɔ̃ Lafɛ̃ɛi inɛi Izirɛli ŋa, an jɔ̀ ijuukpã ku naa si Zeruzalɛmu do ilɛi Zudaau fei nɔ inɛ baa yooma iyi á gbɔ ideu fei á ya bitii hee ku la gɛlɛ.

¹³ An ce nfei Zeruzalɛmu bɛi ǹ ce nfei Samari do nyaanzei Akabu ŋau. An jɔ̀ a ko inɛɛ ŋa fei, nɔ iluu á yɛi bɛi jɛɛ iyi à wiɛ nɔ à bii ijuɛ.

¹⁴ Inɛm ŋa iyi à gbe ŋau an fũsi ŋa awɔ, nɔ n so ŋa n daa mbɛɛ nŋa ŋau si awɔ. Mbɛɛ nŋa ŋau aa naa a ko mii ndu ŋa ŋa fei.

¹⁵ An ce bɛɛbɛi si na iyi í jɔ̀ à ce mii iyi kù dɔ̃ɔm si nɔ à dede idɔɔkɔ̃m hai ajɔ iyi bala nŋa ŋa à fita wa hai ilɛi Ezibitiu hee ku baa nnyi.

¹⁶ Manasee í tale si inɛi Zudaa ŋau dulum ku ce nɔ í jɔ̀ à ce mii iyi kù dɔ̃a Aɔ̃ Lafɛ̃ɛ si. Iyi í re mɔm, í kpa hai nɛ taale nkpɔ nkpɔ hee ilui Zeruzalɛmu í kɔ̃ do njɛ.

¹⁷ Faajii icɛi Manasee ŋa do mii mmu ŋa iyi í ce fei do dulum ŋa iyi í na araɛ si fei à kɔɔ si tiai icɛi ilaalui Zudaa ŋa.

¹⁸ Iyi í ku, nɔ à suu inɔ lamboi Uza si inɔ kpasɛ̃ɛ. Ŋɔi Amɔɔ amaɛ í jɛ bomma si agbɛɛ.

Amɔɔ í jɛ bommai Zudaa

¹⁹ Amɔɔ í nɛi adɔ̃ kɔnfia do minji waati iyi í jɛ bomma. Nɔ í ce si bommau adɔ̃ minji Zeruzalɛmu. Iyeɛi à ya kpe Mɛsulemɛti ama inaaboi Harusi inɛi Yotiba.

²⁰ Nɔ í ce mii iyi kù dɔ̃a Aɔ̃ Lafɛ̃ɛ si bɛi baaɛ Manasee í ceu.

²¹ Í too si kucei baaɛ fei mam mam. Wa tɔɔ iwɛ̃ ŋa nɔ wa gulɛ nŋa bɛi baaɛ í tako í ce.

²² Í kɔ̀si Aɔ̃ Lafɛ̃ɛi balaɛ ŋau, kù too si kpãaɛu.

²³ Ŋɔi akaweɛ ŋau à na à dĩa anu tɔɔsii zamba, nɔ à koo à kpaa inɔ kpasɛ̃ɛ.

²⁴ Amma zamaai ilɛu í kpa inɛ ŋa iyi à dĩa tɔɔsiu fei. Nɔ à so amaɛ Zoziasi í jɛ ilaalu si agbɛɛ.

²⁵ Faajii icɛi Amɔɔ ŋa do mii mmu ŋa iyi í ce à kɔɔ si tiai icɛi ilaalui Zudaa ŋa.

²⁶ Ŋɔi à koo à suu inɔ balɛɛ si inɔ lamboi Uza. Nɔ amaɛ Zoziasi í jɛ bomma si agbɛɛ.