Ilaalu 2, 2 - Bibeli do fee

Ilaaɔ̃ í nɛò Elii lele, nɔ Elizee í sãsi agbɛɛ

¹ Aɔ̃ Lafɛ̃ɛ wa bi ku nɛò Elii lelei Aɔ̃ si fufu dabii. Bɛi í ce wee. Ajɔ nŋu gɔ, Elii do Elizee à nɛ hai Giligali.

² Si isɛɛnɛ nŋau ŋɔi Elii í sɔ̃ Elizee í ni, leekĩ ihɛ̃, domi Aɔ̃ Lafɛ̃ɛ í bɛm hee Betɛli. Ŋɔi Elizee í jɛaa í ni, bii Aɔ̃ Lafɛ̃ɛ í wɛɛ nɔ awɔ mɔ ì wɛɛ, n kaa n tɛkɛɛ n jɔ̀ɛ pai. Nɔ aŋaò à bɔ Betɛli.

³ Ŋɔi inɛi igbɛi walii ŋa iyi à wa Betɛli à naa bi Elizee nɔ à beeɛ à ni, ì mà iyi nnyi Aɔ̃ Lafɛ̃ɛ á so mɛɛtuɛ ikpa lelei Aɔ̃? Ŋɔi í jɛ nŋa í ni, amu mɔ ǹ mà tã. I yɔkɔ gɛlɛ nŋɛ.

⁴ Ŋɔi Elii í sɔ̃ɔ má í ni, Elizee, leekĩ ihɛ̃, domi Aɔ̃ Lafɛ̃ɛ í bɛm Zeriko. Ŋɔi Elizee í jɛaa í ni, bii Aɔ̃ Lafɛ̃ɛ í wɛɛ nɔ awɔ mɔ ì wɛɛ, n kaa n tɛkɛɛ n jɔ̀ɛ pai. Nɔ à to Zeriko.

⁵ Ŋɔi inɛi igbɛi waliii Zeriko ŋa à naa à bee Elizee à ni, ì mà iyi nnyi Aɔ̃ Lafɛ̃ɛ á so mɛɛtuɛ ikpa lelei Aɔ̃? Ŋɔi í jɛ nŋa í ni, amu mɔ ǹ mà tã. I yɔkɔ gɛlɛ nŋɛ.

⁶ Ŋɔi Elii í sɔ̃ɔ má í ni, leekĩ ihɛ̃, domi Aɔ̃ Lafɛ̃ɛ í bɛm idoi Zuudɛ̃ɛ. Nɔ Elizee í jɛaa í ni, bii Aɔ̃ Lafɛ̃ɛ í wɛɛ nɔ awɔ mɔ ì wɛɛ, n kaa n tɛkɛɛ n jɔ̀ɛ pai. Ŋɔi à dasi kpãa aŋa minji fei à waa nɛ.

⁷ Inɛ ciitaa í too ŋa wa si inɔi igbɛi walii ŋau nɔ à leekĩ à waa cɔ ŋa wa hai jĩijĩ, nɔ aŋa minji nŋa à koo à leekĩ itĩ idoi Zuudɛ̃ɛu.

⁸ Ŋɔi Elii í bɔ kumbooɛ í kaa nɔ í cãò inyiu. Nɔ inyiu í kpɛ̃ cingaa do cingaa. Ŋɔi aŋa minji fei à kua idou si ilɛ ngbɛ.

⁹ Iyi à kua ŋɔi Elii í sɔ̃ Elizee í ni, tɔɔm mii iyi ì bi n ceɛ hee a maa som hai bi tɛɛ. Ŋɔi í jɛaa í ni, ǹ bi i jɔ̀ɔm tubui walii ku ceɛu ikɔ minji.

¹⁰ Ŋɔi Elii í ni, ì tɔɔ mii kugaabu. Amma, bii ì yɛm waati iyi aa som ikpa lele hai bi tɛɛ, mii iyi ì tɔɔu á ce. Bii i kù yɛm mɔ, kaa ce.

¹¹ Si bɛi à fɔ ideu à waa nɛò, ŋɔi sarɛtii ina gɔ do acĩi ina gɔ ŋa à faata wa à na à fɛɛfɛ ŋa. Nɔ Elii í nɛ lelei Aɔ̃ si inɔi fufu dabii.

¹² Ŋɔi Elizee í cɔɔ nɔ wa dɔ̃ anu wa ni, baam, baam, sarɛtii Izirɛli ŋa do masa ŋa. Nɔ kù yɔɔ má. Ŋɔi í mu ibɔɛ í gaa minji na inɔ kufɔɛ

¹³ nɔ í koo í so kumboo iyi Elii í jɔ̀ í cukuu. Ŋɔi í sinda í koo í leekĩ itĩ idoi Zuudɛ̃ɛu.

¹⁴ Nɔ í cã inyiu do kumbooi Eliiu í ni, iwoi Aɔ̃ Lafɛ̃ɛi Eliiu í wa. Waati iyi nŋu mɔ í cã inyiu ŋɔi í kpɛ̃ cingaa do cingaa, nɔ í kua.

¹⁵ Inɛi igbɛi waliii Zeriko ŋa iyi à wa jĩijĩ à waa cɔɔ wau à yɔɔ nɔ à ni, walii ku cei Eliiu í baa si Elizee. Nɔ à bɔ ku kòo, nɔ à koo à sɛɛbata si wajuɛ.

¹⁶ Nɔ à sɔ̃ɔ à ni, wee si inɔi woo ce icɛɛ ŋau ihɛ̃, inɛmɔkɔ kaasãanɛ ciitaa gɔ ŋa à wa ihɛ̃. Ì bi a koo a dɛdɛɛ mɛɛtuɛ wa? Á yɔkɔ ku jɛ hundei Aɔ̃ Lafɛ̃ɛ í soo nɔ í koo í nyɔɔ si antaii iri kuta gɔ walakɔ si lɔɔma gɔ. Ŋɔi í jɛ nŋa í ni, i maà bɛ inɛ kãma ŋa.

¹⁷ Amma à wasi ku manteɛ. Nɔ í ni, to, i bɛ ŋa ŋa. Ŋɔi à bɛ inɛ ciitaa ŋau. Nɔ à koo a dɛdɛ Elii zakai ajɔ mɛɛta a kù yɔɔ.

¹⁸ Iyi à baa Zeriko bi Elizee, ŋɔi í sɔ̃ ŋa í ni, n kù ni i maà koo ŋa ba.

Elizee í jɔ̀ inyii isɔ̃i Zeriko í má

¹⁹ Inɛi Zeriko ŋau à sɔ̃ Elizee à ni, wee kububai iluu í sĩa, nɔ awɔ mɔ lafɛ̃ɛ nwa ì waa yɔɔ. Amma inyiɛ kù ce ncɛɛ, ci ya jɔ̀ nkãma ku fita, nɔ amanɛ ŋa do mɛɛmu ŋa a ci ya bí.

²⁰ Ŋɔi Elizee í ni a naa nŋu jɛɛ titɔ̃ do imu si inɔɛ wa. Nɔ à naa wa.

²¹ Ŋɔi Elizee í bɔ bi isɔ̃u nɔ í dikã si imuu í ni, Aɔ̃ Lafɛ̃ɛ í ni, ǹ jɔ̀ inyii isɔ̃u ihɛ̃ í má, kaa kpa inɛ gɔ má, nɔ kaa ganji mii ŋa a fita hee má jɛ ku ganji amanɛ ŋa do mɛɛmu ŋa a bí.

²² Ŋɔi inyiu í má hee ku baa nnyi si bɛi Elizee í fɔu.

Ilaaɔ̃ í kpã ama awaasũ ŋa iyi à waa yaako Elizee iju

²³ Hai Zeriko ŋɔi Elizee wa bɔ ilui Betɛli. Si kpãau ŋɔi ama awaasũi inɔ ilu ŋau à naa à dɔ̃ anu à waa yaakoɛ à waa ni, koo pɔm dii iri, koo pɔm dii iri.

²⁴ Ŋɔi í sinda í cɔ ŋa nɔ í ceekpe ŋa do irii Aɔ̃ Lafɛ̃ɛ. Ŋɔi mɛɛmu kugaabu minji gɔ ŋa à fita wa hai inɔ agbo nɔ à gagaga ama awaasũ ciiji do minji si inɔ nŋa.

²⁵ Hai bɛ nɔ Elizee í bɔ iri kutai Kaamɛli í bɛi í nyi Samari.