Ilaalu 2, 19 - Bibeli do fee

Ezekiasi í bɔ kubee bi walii Ezai

¹ Waati iyi ilaalu Ezekiasi í gbɔ baaui ideu bɛɛbɛ, ŋɔi í ga ibɔɛ ŋa, nɔ í so jĩnɛi inɔ kufɔ í dasi í bɛi í bɔ kpasɛ̃i Aɔ̃ Lafɛ̃ɛ.

² Ŋɔi í bɛ inɛ ŋa bi walii Ezai amai Amɔɔsuu. Inɛ ŋa iyi í bɛ ŋau wee. Eliakimu inɛ ngboi woo ce icɛi kpasɛ̃ɛu do Sebuna woo kɔ tiaɛu do inɛ ŋa iyi à ce inɛ ngbo si inɔi woo wee ŋau à re. Inɛ ŋau mɔ, jĩnɛi inɔ kufɔ ŋai à dasi à bɛi à bɔò bi walii Ezaiu.

³ Iyi à to bi tɛɛ ŋɔi à sɔ̃ɔ à ni, ilaalu Ezekiasi í ni ka sɔ̃ɛ iyi ajɔi nnyiu ihɛ̃, ajɔi inɔ kufɔi do ajɔi ijuukpã do ajɔi anyɔ. Í yɛi bɛi amu ŋa à tã sɔɔlu a fita wa hai inɔi iye nŋa ŋa, amma gbugbã kù wɛɛ iyi aa bí ŋaò wa si andunya.

⁴ Á yɔkɔ ku jɛ Aɔ̃ Lafɛ̃ɛɛ á gbɔ ide ŋa iyi inɛ ngboi soogei Asiri ŋau wa fɔ, nŋu iyi ilaalui Asiri lafɛ̃ɛɛ í bɛ wa ku naa ku bu Aɔ̃ Lafɛ̃ɛ iyi í wɛɛu. Á yɔkɔ ku jɛ Aɔ̃ Lafɛ̃ɛɛ á kpãa iju na ide ŋa iyi í fɔ nɔ í gbɔu. Na nŋu, ce kutɔɔ na zamaa iyi í gbeu.

⁵ Waati iyi woo bɛi ilaalu Ezekiasi ŋau à sɔ̃ Ezai ideu à tã,

⁶ ŋɔi Ezai í sɔ̃ ŋa í ni, i koo i sɔ̃ lafɛ̃ɛ nŋɛ i ni ŋa, Aɔ̃ Lafɛ̃ɛ í ni ku maà jɔ̀ zigiɛ ku da na arabu ŋa iyi í gbɔ woo ce icɛi ilaalui Asiri ŋau à bu nŋu.

⁷ Ilaalui Asiriu á gbɔ laabaau gɔ, nɔ Aɔ̃ Lafɛ̃ɛ á jɔ̀ ku dasi idɔ ku sinda ku maa nyi ilɛɛ, nɔ á jɔ̀ a kpaa si ilɛɛ bɛ.

Ilaalui Asiri wa fɔ idei ijuukpã má

⁸ Ŋɔi inɛ iyi í jɛ inɛ ngboi soogei ilaalui Asiriu í sinda wa, nɔ í ba wee ilaaluu wa ce igũ do inɛi Libuna ŋa. Wee í ko í tako í gbɔ tã wo iyi ilaaluu í dede hai Lakisi í tekĩ.

⁹ Ilaalui Asiriu í tako í gbɔ baau wo si gãmɛi Tiiraka ilaalui Etiopi, à ni wa naa igũ ku ce si nŋu. Iyi í gbɔ bɛɛbɛ gbakã, ŋɔi í bɛ inɛ ŋa bi Ezekiasi í ni a koo a baa ide ku fɔ.

¹⁰ Í ni, aa ba Ezekiasi ilaalui Zudaa ide ku fɔ ŋai i sɔ̃ɔ i ni, Aɔ̃ Lafɛ̃ɛɛ nŋu iyi ì dasi naanɛu ku maà lɛlɛɛ ku ni, Zeruzalɛmu kaa dasi awɔi ilaalui Asiri.

¹¹ N jɔ awɔ takaɛ ì gbɔ bɛi ilaalui Asiri ŋa à cea ilɛ ŋau fei ya. À ce nfe nŋai mam mam. Mà awɔ ì nɔ ì waa tamaa bɛi aa ba i fita si?

¹² Iwɛ̃i inɛi ilɛ ŋa iyi baam ŋa à ce nfe nŋa ŋau, à yɔkɔ à faaba inɛi Gozãa ŋa do inɛi Harãa ŋa do inɛi Retisɛfu ŋa ba. Nɔ baa amai Edɛni ŋa iyi à wa Telasaa, à yɔkɔ à faaba ŋa ba.

¹³ Ilaalui Amati, do ilaalui Aapadi do ilaalui ilui Sefaavaimu do ti Henaa do ti Ivaa ŋau, hee iwoi à wa.

Kutɔɔi Ezekiasi

¹⁴ Ŋɔi Ezekiasi í gba tiau hai si awɔi inɛi Asiri ŋa iyi à bɛ wa ŋau í cioɛ. Waati iyi í cioɛ í tã, nɔ í soo í bɔò kpasɛ̃i Aɔ̃ Lafɛ̃ɛ í koo í fũu bɛ.

¹⁵ Si anyii nŋu, ŋɔi Ezekiasi í tɔɔ Aɔ̃ Lafɛ̃ɛ í ni, Aɔ̃ Lafɛ̃ɛi lele do ilɛ, Aɔ̃ Lafɛ̃ɛi inɛi Izirɛli ŋa, awɔ iyi ì waa buba si antaii serubɛ̃ɛ ŋa, awɔ akãi ì jɛ Aɔ̃ Lafɛ̃ɛi bomma ŋa fei si ilɛu ihɛ̃. Awɔi ì taka lele do ilɛ.

¹⁶ Aɔ̃ Lafɛ̃ɛ, sotĩ nɔ i gbɔ. Cĩ ijuɛ nɔ i cɔ. Gbɔ idei arabu ŋa iyi Senakeribu í bɛò inɛ ŋa wa ku ba a naa a fɔ si gãmɛi awɔ Aɔ̃ Lafɛ̃ɛ awɔ iyi ì wɛɛ.

¹⁷ Ntɔ ntɔi Aɔ̃ Lafɛ̃ɛ, ilaalui Asiri ŋa à ce nfei dimi mmu ŋa fei hee do ilɛ nŋa ŋa.

¹⁸ À ko iwɛ̃ nŋa ŋa à kosi ina. Iwɛ̃ nŋa ŋau, a kù jɛ Ilaaɔ̃, amma icɛi awɔi amanɛ ŋai. À ce ŋai do jĩi ŋa, do kuta ŋa, nɔ à ce nfe nŋa mam mam.

¹⁹ Amma awɔ Aɔ̃ Lafɛ̃ɛ nwa, faaba wa bɛbɛi hai si awɔi Senakeribu. Do yaase bɛɛbɛ, si bommai andunya ŋau fei, Aɔ̃ Lafɛ̃ɛ, inɛ ŋa aa mà iyi awɔ akãi ì jɛ Ilaaɔ̃.

Ezai wa fɔ ide iyi Aɔ̃ Lafɛ̃ɛ í jɛ wa

²⁰ Ŋɔi Ezai amai Amɔɔsuu í ni a koo a sɔ̃ Ezekiasi a ni, Aɔ̃ Lafɛ̃ɛ nŋu iyi í jɛ Lafɛ̃ɛi inɛi Izirɛli ŋau, í ni nŋu í gbɔ kutɔɔ iyi ì ce si gãmɛi Senakeribu ilaalui Asiriu.

²¹ Ide iyi í fɔ si gãmɛi Senakeribuu wee. Í ni, awɔ Senakeribu, Siɔ̃ɔ nŋu iyi í yɛ bɛi abo kusĩau wa buɛi nɔ wa yaakoɛ. Siɔ̃ɔ, waatɔ Zeruzalɛmu ilu kusĩau, wa nyaanyiɛ wa gbugbãò iri.

²² Yooi ì donda, nɔ yooi ì waa bu. Yooi ì waa lasi. Amu Aɔ̃ Lafɛ̃ɛ Inɛ Kumái Izirɛliui ì wu iju lele ì waa cɔ.

²³ Ì donda amu Aɔ̃ Lafɛ̃ɛi hai si ide ku fɔi amaabɛɛ ŋa, nɔ ì waa ni, amu Senakeribu, do sarɛti ku ce igũ nkpɔ nkpɔm ŋaui ǹ gũò hee antaii iri kuta ŋa iyi à wa hee do lelei Libãa. Nɔ ǹ bu jĩi ndii sɛɛdi kusĩaɛ ŋau do jĩi ndii sipɛrɛɛsi kugbokaɛ ŋau. An bɔi hee bi kumanji ankãanyiɛ do hee si kɔɔi agbo ku kukuɛ ŋau fei.

²⁴ Amu Senakeribu ǹ tu lɔgɔ ŋai ilɛ mmu ŋa bɛ ǹ bɛi ǹ ba inyi nŋa ǹ mɔ. Idoi Ezibiti iyi à ya kpe Niliu, do kutɛm ŋai ǹ jɔ̀ amaawɔɛ ŋau à gbɛ.

²⁵ Senakeribu, i kù gbɔ iyi ǹ ce sɔɔlui mii ŋau bɛ hai ku kpɛ? Ǹ ce sɔɔlui mii ŋau bɛi hai si waati ŋa iyi à lɔ. Bɛbɛii ǹ wa n naaò ŋa wa, nɔ mii iyi awɔ ì nɛ ku cei í jɛ i jɔ̀ ilu ku nɛ gbugbã ŋau a ce bomma.

²⁶ Inɛi ilu ŋau à kua gbugbã. Nɔ zigiida do anyɔ í wɛɛ nŋa. À yɛi bɛi fɔfɔ tũtũ do bɛi wua tũtũ ŋa. À yɛi má bɛi fɔfɔ tũtũ kusĩa ŋa iyi à wa si antaii ile sikifa ŋa do ti iko ŋa hee a maa yɔ a ce akpa ŋa.

²⁷ Ǹ mà mii fei si gãmɛɛ. Bii ì waa dede walakɔ bii ì waa buba. Bii ì waa fita walakɔ bii ì waa lɔ wa, do bii ì waa ce idɔɔkɔ̃ do amu.

²⁸ Ntɔ ntɔ, ì waa ce idɔɔkɔ̃ do amu, nɔ inɛ ku dondaɛ í to wa hee si itĩm ŋa. Na nŋu, an daaɛ si isɔ bɛi lɛlɛawɔ si imɔɛi, nɔ n daaɛ si arezem si gɛlɛɛ. Si anyiɛ, an jɔ̀ i sinda i too kpãa iyi ì naaò wai i nɛò.

²⁹ Nɔ awɔ Ezekiasi, iyi ihɛ̃i á jɛɛ nyinda. Adɔ̃ɔyiu ihɛ̃, amaajɛ calɛ nŋu akãi aa jɛ ŋa. Si adɔ̃ minjisiaɛ má, bɛɛbɛi aa ce ŋa. Amma si adɔ̃ mɛɛtasiaɛ, i gbɛ̃ nɔ i da ŋa. I teese ikoi jĩi ndii rezɛ̃ɛ nŋɛ nɔ i jɛ isoɛ ŋa.

³⁰ Inɛi kpasɛ̃i Zudaa ŋa iyi aa ba a fita si ŋau, aa yɛi bɛi jĩi iyi icãɛ ŋa à mi ilɛ, nɔ amaawɔɛ ŋa à nɛ iso ŋa nkpɔ nkpɔ.

³¹ Hai Zeruzalɛmu si iri kutai Siɔ̃ɔi inɛ ŋa iyi à gbe ŋau aa fita wa. Mii iyi Aɔ̃ Lafɛ̃ɛ á ce mbɛ si kubi nla nlaɛ.

³² Na nŋu, ide iyi Aɔ̃ Lafɛ̃ɛ í fɔ si gãmɛi ilaalui Asiri wee. Í ni, kaa lɔ si iluu bɛ. Kaa taa afa, nɔ kaa naa siɛ igũ ku ce do tɛli. Nɔ kaa tɔtɔɔ sãa ku jɛ bɛi geete hai bii á lɔò inɔ iluu.

³³ Á sinda ku too kpãa iyi í naaò wai ku nɛò. Aɔ̃ Lafɛ̃ɛ í ni, kaa lɔ si inɔ iluu.

³⁴ Aɔ̃ Lafɛ̃ɛ í ni nŋu á bii si iluu awɔi nŋu ku faabaɛ, si na iyi í jɔ̀ nŋu í jɛ Ilaaɔ̃ do na irii Davidi amaacɛi nŋu.

Kunɛi inɛi Asiri ŋa do ikui Senakeribu

³⁵ Idũu bɛ ŋɔi amalekai Aɔ̃ Lafɛ̃ɛ í fita nɔ í koo í kpa inɛmɔkɔ dubu cĩɔ do cinɛ do miiu (185.000) si asɔi inɛi Asiri ŋa. Iyi iju í má daadaakɔ, ŋɔi à ba wee iku ŋa mbɛ fei.

³⁶ Ŋɔi Senakeribu ilaalui Asiri í sinda í nɛ í koo í buba Ninivu.

³⁷ Ajɔ nŋu gɔ, í koo wa ce kutɔɔ inɔ ilei iwɛ̃ɛ iyi à ya kpe Nisirɔku. Ŋɔi Adaramelɛki do Saresɛɛ à koo à kpaa. Waati iyi à kpaa à tã, à bɛi à sa à nɛ ilɛi Ararati. Ŋɔi amaɛ Asaradɔ̃ɔ í sãsi agbɛɛ.