Ilaalu 2, 18 - Bibeli do fee

Ezekiasi ilaalui Izirɛli

¹ Si adɔ̃ mɛɛtasiai bomma ku jɛi Ozee amai Ela ilaalui Izirɛlii Ezekiasi amai Ahazi í jɛ bommai Zudaa.

² Adɔ̃ kaafɛtũi í nɛ waati iyi í jɛ bomma nɔ í mu bommau adɔ̃ kɔnfia do mɛɛsã ilui Zeruzalɛmu. Iyeɛi à ya kpe Abi ama inaaboi Zakari.

³ Ezekiasi í ce mii iyi í dɔ̃a Aɔ̃ Lafɛ̃ɛ si dee dee bɛi balaɛ Davidi í ceu.

⁴ Nŋui í lɛgɛ bi kuweea iwɛ̃ ŋau. Í lɛgɛ kuta ŋau nɔ í cɛ jĩi ŋa iyi à lɔ na iwɛ̃ Asera ŋau, nɔ í cã njoi isɔ nkpa iyi Moizi í ceu í coo buubuu, domi waati bɛɛbɛ fei inɛi Izirɛli ŋau à ya maa jo tuae ŋa si wajuɛ. Nɔ à sɔɔ Nehusitãa.

⁵ Ezekiasi í dasi naanɛɛ fei si Aɔ̃ Lafɛ̃ɛi inɛi Izirɛli ŋa. Nɔ si inɔi ilaalu ŋa iyi à jɛ bomma si anyiɛ fei do iyi à cuaa ŋau fei, baa akã nŋa kù tóo.

⁶ Í leekĩ do Aɔ̃ Lafɛ̃ɛi dim dim, kù fũsiɛ awɔ. Wa jirima wooda ŋa iyi Aɔ̃ Lafɛ̃ɛ í na Moizi fei.

⁷ Ŋɔi Aɔ̃ Lafɛ̃ɛ í wɛɛ do nŋu nɔ mii iyi wa ce fei í ya jɔ̀ ku cei dee dee. Ŋɔi í na í dedeò ide ku kɔ̀ bi ilaalui Asiriu í kɔ̀ ku sũaa iri ilɛ.

⁸ Si anyiɛ nɔ í jɛ inɛi Filisi ŋa igũ hee ku bɔ Gaza. Nɔ í gba ilɛ nŋau hai ilu nla ku nɛ bindi ku nɛ gbugbã ŋa hee ku bɔ si ile kugbokai woo degbe ilu keeke ŋa.

Idei Samari iyi à tako à jɛ igũu

⁹ Si adɔ̃ mɛɛsiai bomma ku jɛi Ezekiasi, iyi í jɛ adɔ̃ mɛɛjesiai bomma ku jɛi Ozee amai Ela ilaalui Izirɛliui Samanasaa ilaalui Asiriu í koo í bu ilui Samari koe.

¹⁰ Nɔ si adɔ̃ mɛɛtasia í gba iluu si adɔ̃ mɛɛfasiai bomma ku jɛi Ezekiasi iyi í jɛ adɔ̃ mɛɛsãsiai bomma ku jɛi Ozee si ilɛi Izirɛli.

¹¹ Ilaalui Asiriu í mu inɛi Izirɛli ŋau aru í nɛò ŋa Asiri. Ŋɔi í koo í jilɛ ŋa Hala do si itĩ idoi Habɔɔ si ilɛi Gozãa do si ilui inɛi Mɛɛdi ŋau.

¹² Aɔ̃ Lafɛ̃ɛ í jɔ̀ à mu ŋa aru si na iyi í jɔ̀ a kù jirima ideɛ ŋa nɔ à kua akabuu iyi aŋaò ŋa à dĩu. A kù gbɔ idei Moizi woo ce icɛi Aɔ̃ Lafɛ̃ɛu hee a ceò icɛ.

Senakeribu í naa igũ si ilɛi Zudaa

¹³ Si adɔ̃ maatɛ̃ɛsiai bomma ku jɛi Ezekiasi, Senakeribu ilaalui Asiri í bɔ igũ si ilu ku nɛ gbugbãi Zudaa ŋa fei nɔ í jɛ ŋa igũ.

¹⁴ Ŋɔi Ezekiasi í bɛ inɛ ŋa Lakisi a koo a sɔ̃ ilaalui Asiriu a ni, amu Ezekiasi ǹ ce kurarai. Maà naa igũ bi tom má. Mii iyi ì jilɛɛm fei an sã. Ŋɔi ilaalui Asiriu í ni ku sã isɔ fũfũ kiloo dubu mɛɛsã (9.000) do wura kiloo cĩɔ mɛɛsã (900).

¹⁵ Ŋɔi Ezekiasi í naa isɔ fũfũ iyi í wa inɔ kpasɛ̃i Aɔ̃ Lafɛ̃ɛu fei do iyi í wa si bi ku singa amanii kpasɛ̃i ilaaluu.

¹⁶ Waati bɛɛbɛ, Ezekiasi í da gambo ŋau do jĩi ndii andɛi kpasɛ̃i Aɔ̃ Lafɛ̃ɛ iyi í tako í bii do wura nɔ í jɔ̀ à koo à na ilaalui Asiriu.

Ide iyi inɛ ngboi soogei Asiri ŋa à jilɛ

¹⁷ Hai Lakisi ilaalui Asiri í bɛ inɛ ngboi sooge ŋa aŋa mɛɛta do sooge ku nɛ gbugbã nkpɔ nkpɔ bi Ezekiasi Zeruzalɛmu bɛ. Ŋɔi à dede à koo. Iyi à to nɔ à koo à leekĩ kɔkɔi kpãa iyi à ce bii inyi í ya too koo lɔò si bi ku jilɛ inyi gɔ iyi à ce iyi í wa do ikpa lele do ikpa bi kpãai ikoi woo mu icĩu.

¹⁸ Ŋɔi à ni a koo a kpe ilaaluu wa. Amma Eliakimu amai Hilikiya iyi í jɛ inɛ ngboi kpasɛ̃i ilaaluui í dede í koo í ba ŋa, nŋu do Sebuna woo kɔ tiau do Yoa amai Asafu iyi í jɛ woo ce wũai tia ŋa iyi à jilɛu.

¹⁹ Ŋɔi inɛ iyi í jɛ inɛ ngboi soogei Asiri ŋau í sɔ̃ ŋa í ni, i koo i sɔ̃ Ezekiasi i ni ŋa, ilaalu nlai Asiriu í ni, si mii ì dasi naanɛ wo ya.

²⁰ Nɔ í ni má, ì waa tamaa ide ŋa iyi à fɔ si fufuu bɛi á naɛ ikɔ do gbugbã iyi aa ceò igũ? To, nsɛi bɛbɛi, yooi ì dasi naanɛ ì bɛi ì waa ceò ide ku kɔ̀ sim.

²¹ Ǹ mà iyi sobii Ezibitii ì waa kaaba, nŋu iyi í yɛ bɛi akpa iyi á cɛ nɔ ku gũ awɔi inɛ iyi wa lɔkɔsiɛ. Bɛɛbɛi Faraɔ̃ ilaalui Ezibitiu í yɛ si gãmɛi inɛ ŋa iyi à dasiɛ naanɛ fei.

²² Á yɔkɔ ku jɛ aa sɔ̃m ŋa i ni, Aɔ̃ Lafɛ̃ɛ nwai à dasi naanɛ. Amma Ezekiasi í jɔ̀ à lɛgɛ bi kuweeɛ ŋa iyi à wa si geete ŋau. Waati bɛɛbɛi í sɔ̃ inɛi Zudaa ŋa do inɛi Zeruzalɛmu ŋau í ni, si wajui bi kuweei iluu ihɛ̃i aa ya naa i sɛɛbata ŋa.

²³ Bɛbɛi, ǹ wa n tɔɔɛi, jɔ̀ awɔ do lafɛ̃ɛm ilaalui Asiri i fɔ ide gɔ i jilɔɔ ŋa. Amu an naɛ acĩ dubu minji (2.000) bii í jɛ aa ba masa ŋa iyi aa gũ ŋa.

²⁴ Baa inɛ akãi soogei lafɛ̃ɛm iyi kù to kpaasi ŋa, i kaa yɔkɔ i nyiɛ do anyi. Ì dasi Ezibiti naanɛi ku ba i ba sarɛti ku ja igũ ŋa do masa ŋa.

²⁵ Nɔ mɔm, lafɛ̃ɛm nɔu í naa í ce igũ si ilɛu í ce asɔɔɛ iyi kù jɛ do idɔɔbii Aɔ̃ Lafɛ̃ɛi? Aawo. Aɔ̃ Lafɛ̃ɛ takaɛi í naa wooda.

²⁶ Ŋɔi Eliakimu amai Hilikiya do Sebuna do Yoa à sɔ̃ inɛ iyi í jɛ inɛ ngboi soogei Asiri ŋau à ni, à waa tɔɔɛi, ba wa ide ku fɔ do feei Arameɛ̃ɛ aa ka gbɔ. Maà ba wa ide ku fɔ do feei inɛi Zudaa ŋau si wajui inɛ ŋa iyi à wa si antaii bindiu ihɛ̃.

²⁷ Ŋɔi inɛ iyi í jɛ inɛ ngboi soogei Asiri ŋau í jɛ í ni, ì waa tamaa ide iyi lafɛ̃ɛm í sɔ̃m wau, ti lafɛ̃ɛɛ do ti awɔ akãi? Ideu í kã inɛ ŋa mɔ iyi à wa si antaii bindiu fei. Inɛ ŋau, iŋɛò ŋa fei, imi nŋɛ ŋai aa na i maa i jɛ ŋa, nɔ i maa mɔ itɔ nŋɛ ŋa.

²⁸ Ŋɔi inɛ ngboi soogei Asiri ŋau í dede í leekĩ, nɔ í dɔ̃ anu hee lele do feei Ebɛɛ í ni, i sotĩ i gbɔ idei ilaalu nlai Asiriu ŋa.

²⁹ Bɛi ilaaluu í fɔ wee. Í ni, Ezekiasi ku maà lɛlɛ ŋɛ, domi kaa yɔkɔ ku faaba ŋɛ.

³⁰ Ezekiasi ku maà jɔ̀ i dasi Aɔ̃ Lafɛ̃ɛ naanɛ i maa ni ŋa, à mà kãm kãm iyi Aɔ̃ Lafɛ̃ɛ á faaba wa, nɔ iluu ihɛ̃ kaa dasi awɔi ilaalui Asiri.

³¹ I maà gbɔ idei Ezekiasi ŋa, domi bɛi ilaalui Asiri í fɔ wee. Í ni, i jɔ̀ i dɛdɛ laakai ku sũ do amu nɔ i so ara nŋɛ i daam si awɔ ŋa ku ba inɛ fei ku ba isoi jĩi ndii rezɛ̃ɛɛ do ti figiɛ ku jɛ, nɔ inɛ fei ku ba inyii boonyiɛ ku maa mɔ,

³² hee n naa n to wa nɔ n so ŋɛ n nɛò ŋɛ si ilɛ iyi í yɛ bɛi ilɛ nŋɛu. Ilɛu í nɛ bilee ku ce pɛ̃ɛ do isoi rezɛ̃ɛ ku ce vɛ̃ɛ do jĩi ndii olivi iyi aa ceò ikpo nɔ í nɛ nyikɔ̃. Bii ì ce bɛɛbɛ ŋa aa maa wɛɛ nŋɛi, i kaa ku ŋa. Na nŋu, i maà gbɔ idei Ezekiasiu ŋa, domi á yɔkɔ ku lɛlɛ ŋɛ ku ni, Aɔ̃ Lafɛ̃ɛi á faaba wa.

³³ Iwɛ̃i ilɛ ŋa à yɔkɔ à faaba inɛi ilɛ nŋa ŋa hai si awɔi ilaalui Asiri?

³⁴ Hee iwoi iwɛ̃i Amati do ti Aapadi ŋau à wa. Hee iwoi iwɛ̃i Sefaavaimu ŋau do ti Henaa do ti Ivaa ŋau à wa. À yɔkɔ à nya inɛi Samari ŋa hai si awɔm?

³⁵ Si inɔi iwɛ̃i ilɛ ŋau bɛ fei, yooma nŋai í yɔkɔ í faaba ilɛɛ hai si awɔm, Aɔ̃ Lafɛ̃ɛ mɔ ku bɛi ku yɔkɔ ku faaba Zeruzalɛmu hai si awɔm.

³⁶ Ŋɔi aŋa fei à coko, a kù jɛaa ide kãma, domi ilaaluu í tako í na wooda wo í ni, i maà jɛaa ide kãma ŋa.

³⁷ Ŋɔi Eliakimu amai Hilikiya iyi wa jɛ inɛ ngboi kpasɛ̃u, do Sebuna woo kɔ tiau, do Yoa amai Asafu woo ce wũai tia ŋa iyi à jilɛu, à naa à ba Ezekiasi do ibɔ ku ga ŋa, nɔ à sɔ̃ɔ ide ŋa iyi inɛ ngboi soogei Asiri ŋau í fɔ.