Ilaalu 2, 17 - Bibeli do fee

Ozee ilaalui Izirɛli

¹ Si adɔ̃ maateejisiai bomma ku jɛi Ahazi ilaalui Zudaaui Ozee amai Ela í jɛ bommai Izirɛli ilui Samari nɔ í ce adɔ̃ mɛɛsã si bommau.

² Ŋɔi í ce mii iyi kù dɔ̃a Aɔ̃ Lafɛ̃ɛ si, baa bii kù to bɛi ti ilaalu ŋa iyi à cuaɛ ŋau.

³ Samanasaa ilaalui Asiriu í koo í jɔɔ igũ. Nɔ Ozee í ya maa sãa fiai adɔ̃ do tilasi.

⁴ Amma ilaalui Asiriu í na í yɛ iyi Ozee wa dĩa nŋu sɔɔlui zamba wa, domi í bɛ inɛ ŋa bi So ilaalui Ezibitiu, nɔ kù waa sãa fiai adɔ̃u má. Ŋɔi í jɔ̀ à muu à dũu do sesee nɔ í cĩmboɛ si ile piisɔ̃ɔ.

⁵ Si anyiɛ ŋɔi í koo si ilɛi Izirɛli fei, nɔ í ce igũ si ilui Samari zakai adɔ̃ mɛɛta.

⁶ Si adɔ̃ mɛɛsãsiai Ozee, ilaalui Asiriu í jɛ ilui Samari igũ. Nɔ í mu inɛi Izirɛli ŋau aru í nɛò ŋa Asiri. Ŋɔi í koo í jilɛ ŋa ilɛi Hala do si itĩ idoi Habɔɔ si ilɛi Gozãa do si ilui inɛi Mɛɛdi ŋau.

Mii iyi í jɔ̀ bommai Izirɛli í kpa iri

⁷ Aɔ̃ Lafɛ̃ɛ í jɔ̀ à mu inɛi Izirɛli ŋa aru si na iyi í jɔ̀ à ce dulum bi tɛɛ, nŋu iyi í fitaò ŋa wa hai ilɛi Ezibiti í nya ŋa hai si awɔi Faraɔ̃ ilaaluu, do si na iyi í jɔ̀ à waa tɔɔ iwɛ̃ ŋa.

⁸ À waa too si kucei inɛi ilɛ ŋa iyi Aɔ̃ Lafɛ̃ɛ í lele si waju nŋau do kuce iyi ilaalui aŋa taka nŋa ŋau à jilɛ.

⁹ Inɛi Izirɛli ŋa à cea Aɔ̃ Lafɛ̃ɛ nŋa mii ŋa iyi kù sĩa si asii. À maa iwɛ̃ ŋa bi kuwee si ilu nŋa ŋau fei, hai ilu nla ku nɛ bindi nŋa ŋa hee ku bɔ si bi kuwai woo degbe ilu keeke ŋa.

¹⁰ Nɔ à lɔ kuta ŋa do jĩi ŋa si antaii iri kuta ŋa do si abɛi jĩi tũtũ ŋau fei na irii iwɛ̃ Asera.

¹¹ Si inya ŋau bɛ feii à jo tuae ŋa bɛi inɛi ilɛ ŋa iyi Aɔ̃ Lafɛ̃ɛ í lele si waju nŋau, nɔ à ce mii laalɔ ŋa à dedeò idɔɔkɔ̃i Aɔ̃ Lafɛ̃ɛ.

¹² À tɔɔ iwɛ̃ ŋa iyi Aɔ̃ Lafɛ̃ɛ í ganji ŋa í ni a maà na a ce dimiɛu.

¹³ Aɔ̃ Lafɛ̃ɛ í tako í sɔ̃ waliiɛ ŋau fei í ni a sɔ̃ inɛi Izirɛli ŋau do inɛi Zudaa ŋau a ni, i jɔ̀ kuce laalɔ nŋɛ nɔ i jirima woodam do idem ŋa. Nɔ i too si wooda iyi ǹ jɔ̀a bala nŋɛ ŋau do iyi ǹ bɛò walii woo ce icɛm ŋau wa mam mam ŋa.

¹⁴ Amma à ce itĩ ku yika a kù gbɔ ideu bɛi bala nŋa ŋa iyi a kù dasi Aɔ̃ Lafɛ̃ɛ naanɛu.

¹⁵ À fũsi woodai Ilaaɔ̃ ŋau awɔ, a kù jirima akabuuɛ iyi í dĩ do bala nŋa ŋau, nɔ a kù saaluɛ waati iyi í ni a ce laakai. Nɔ à koo à waa tɔɔ iwɛ̃ nfe ŋa nɔ aŋa taka nŋa à baa à jɛ nfe. À waa too kucei inɛi ilɛ ŋa iyi à kaako ŋa iyi Aɔ̃ Lafɛ̃ɛ í ganji ŋa a sisiu.

¹⁶ À kɔ̀si woodai Aɔ̃ Lafɛ̃ɛ nŋau fei. Nɔ à yɔ isɔ à ceò ama kɛtɛ minji. Nɔ à ce iwɛ̃ iyi à ya kpe Asera. Nɔ à waa tɔɔ mii ndii lele ŋau fei do iwɛ̃ Baaliu.

¹⁷ À ya so ama inɛmɔkɔ nŋa ŋa do ama inaabo nŋa ŋa à ceò kuwee iyi à ya jo si ina. Nɔ à na ara nŋa si alisi ŋa ku ce do dobu dobu ŋa. À na ara nŋa à waa ceò laalɔ à dedeò idɔɔkɔ̃i Aɔ̃ Lafɛ̃ɛ.

¹⁸ Ŋɔi Aɔ̃ Lafɛ̃ɛ í fangaa inɛi Izirɛli ŋau fei si idɔɔkɔ̃ɛ hai si wajuɛ, nɔ í jɔ̀ dimii Zudaa ŋa aŋa akã.

¹⁹ Nɔ baa dimii Zudaa ŋau mɔ a kù waa jirima woodai Aɔ̃ Lafɛ̃ɛ nŋau, aŋa mɔ à waa too si kucei inɛi Izirɛli ŋau.

²⁰ Kuce laalɔu í jɔ̀ Aɔ̃ Lafɛ̃ɛ í fũsi dimii inɛi Izirɛli ŋau fei awɔ, nɔ í so ŋa í daa mbɛɛ nŋa ŋa si awɔ í dasi ŋa anyɔ nɔ í lele ŋa í jɔ̀ à jĩò bi tɛɛ.

²¹ Waati iyi Aɔ̃ Lafɛ̃ɛ í jɔ̀ inɛi Izirɛli ŋau à ga ara nŋa hai si kpasɛ̃i Davidi, Zeroboamu amai Nebatiui à so í jɛ ilaalu. Zeroboamuui í sinda ŋa hai bi Aɔ̃ Lafɛ̃ɛ, nɔ í jɔ̀ à dasi dulum nla nla ku ce.

²² À na ara nŋa si dulum ŋa iyi Zeroboamu í ceu fei, nɔ à kɔ̀ ku jɔ̀ ŋa

²³ hee í koo í to Aɔ̃ Lafɛ̃ɛ í lele ŋa hai si wajuɛ bɛi í tako í sɔ̃ walii woo ce icɛɛ ŋa í ni a fɔu wo. Ŋɔi à mu inɛi Izirɛli ŋau aru à nɛò ŋa hee jĩijĩ si ilɛi Asiri. Bɛi à wa hee ku baa nnyi.

Dimi mmu ŋa à naa à buba si ilɛi Samari

²⁴ Ŋɔi ilaalui Asiriu í jɔ̀ inɛ ŋa à naa hai Babilɔni do hai Kuta do hai Ava do hai Hamati do hai Sefaavaimu. Nɔ í na ŋa ilui Samari ŋa bii inɛi Izirɛli ŋau à tako à wa. Ŋɔi inɛ ŋau à buba si ilɛi Samariu à ce ide si iluɛ ŋa.

²⁵ Iyi à sinti ku buba si ilɛu ŋɔi a kù waa tɔɔ Aɔ̃ Lafɛ̃ɛ. Ŋɔi í bɛ si ŋa muusu nla ŋa wa à wasi ku kpa ŋa.

²⁶ Ŋɔi inɛ ŋa à koo à sɔ̃ ilaalui Asiriu à ni, inɛi ilɛ ŋa iyi ì jɔ̀ à naa à buba si ilui Samari ŋau a kù mà bɛirei aa ya tɔɔ iwɛ̃i ilɛu. Nɔ iwɛ̃u í tale si ŋa muusu nla ŋa à wasi ku kpa ŋa si na iyi í jɔ̀ a kù mà bɛi à ya tɔɔɛ.

²⁷ Ŋɔi ilaalui Asiriu í ni, i bɛ nŋa woo wee gɔ iyi ì mu aru wa hai bɛ ŋa, koo buba bɛ, nɔ ku kɔ ŋa si bɛi aa ya tɔɔ iwɛ̃u.

²⁸ Ŋɔi à baaò woo wee akã iyi à mu aru hai Samariu wa ilui Betɛli. Nɔ í buba bɛ wa kɔ ŋa si bɛi aa ya tɔɔò Aɔ̃ Lafɛ̃ɛ.

²⁹ Amma inɛ ŋau, aŋa fei à ce mii iyi í jɔ iwɛ̃i ilɛ nŋa ŋa ikã ikã si ilu ŋa iyi à wa siu, nɔ à koo à jilɛ ŋa si inɔ ile ŋa iyi inɛi Samari ŋau à ma si antaii iri kuta ŋa tengi bii à ya ce kuwee ŋa.

³⁰ Inɛ ŋa iyi à naa hai Babilɔni ŋa à ce iwɛ̃ Sukɔtu-Benɔti, inɛi Kuta ŋa à ce Nɛɛgali, inɛi Hamati ŋa à ce Asima.

³¹ Inɛi Ava ŋa mɔ à ce Nibuhazi do Taataki. Inɛi Sefaavaimu ŋa à ya ceò ama nŋa ŋa kuwee iyi à ya jo si ina a saabuò Adaramelɛki do Anamelɛki iwɛ̃i ilɛ nŋa ŋau.

³² Inɛ ŋau à mà bɛɛrɛi Aɔ̃ Lafɛ̃ɛ à waa tɔɔɛ. Amma do nŋu fei à cica inɛ gɔ ŋa má si inɔ nŋa à jɛ woo wee ŋa iyi aa ya ce nŋa kuwee ŋa bi kuwee ŋa iyi à wa si antaii iri kuta ŋau.

³³ Bɛɛbɛi à waa tɔɔ Aɔ̃ Lafɛ̃ɛ à tɔtɔɔ à waa tɔɔò iwɛ̃ nŋa ŋa bɛi à ya ce si dedembai ilɛ hai bii à mu ŋa wa.

³⁴ Nɔ baa nnyi à waa too si dedemba nŋa ŋau. A kù waa tɔɔ Aɔ̃ Lafɛ̃ɛ do ntɔ. A kù waa jirima woodai aŋa taka nŋa ŋa nɔ a kù waa jirima woodai Aɔ̃ Lafɛ̃ɛ ŋa do ide ŋa iyi í jilɛa tɔkui Zakɔbu ŋa. Zakɔbuui Aɔ̃ Lafɛ̃ɛ í sɔ Izirɛli.

³⁵ Nɔ wee Aɔ̃ Lafɛ̃ɛ í dĩ akabuu aŋaò ŋa í sɔ̃ ŋa wo í ni, i maà tɔɔ iwɛ̃ ŋau ŋa. I maà gulɛ si waju nŋa i maa tɔɔ ŋa ŋa hee má jɛ i ce nŋa kuwee ŋa.

³⁶ Amma i tɔɔm amu Aɔ̃ Lafɛ̃ɛ nŋɛ iyi ǹ nya ŋɛ wa hai si ilɛi Ezibiti do gbugbã nla nlam. Si wajum nii aa gulɛ nɔ i ceem kuwee ŋa.

³⁷ Waati kãma fei, i ya jirima idem do woodam ŋau, nɔ i ya maa ceò woodam ŋa iyi ǹ kɔ ǹ jilɛu icɛ ŋa. I maà tɔɔ iwɛ̃ kãma ŋa.

³⁸ I maà gbɛjɛ akabuu nwau ŋa, nɔ i maà tɔɔ iwɛ̃ gɔ má ŋa.

³⁹ Amma i tɔɔ amu Aɔ̃ Lafɛ̃ɛ nŋɛ nɔ n faaba ŋɛ hai si awɔi mbɛɛ nŋɛ ŋau fei ŋa.

⁴⁰ Amma do nŋu fei a kù jirima ideu, nɔ à too si dedembai tako nŋa ŋau.

⁴¹ À waa tɔɔ Aɔ̃ Lafɛ̃ɛ nɔ à tɔtɔɔ à waa tɔɔò iwɛ̃ nŋa ŋau mɔ. Nɔ ama nŋa ŋa do tɔku nŋa ŋa à na à waa coo hee ku baa nnyi.