Ilaalu 2, 16 - Bibeli do fee

Ahazi ilaalui Zudaa

¹ Si adɔ̃ mɛɛwa do mɛɛjesiai bomma ku jɛi Peka amai Remaliai Ahazi amai Yotamu í jɛ bommai Zudaa.

² Adɔ̃ kɔnfiai Ahazi í nɛ waati iyi í jɛ bommau. Nɔ í mu bommau adɔ̃ maatũ do akã Zeruzalɛmu. Ŋɔi í ce iyi kù dɔ̃a Aɔ̃ Lafɛ̃ɛɛ si. Kù ce bɛi balaɛ Davidi í ce.

³ Í tooi si kucei ilaalui Izirɛli ŋau hee mɔm í kpa amaɛ í ceò kuwee. Bɛɛbɛi í ce í tooò si kuce laalɔi inɛi ilɛ ŋa iyi Aɔ̃ Lafɛ̃ɛ í lele si wajui inɛi Izirɛli ŋau.

⁴ Í ya koo ce kuwee ŋa nɔ í ya jo tuae ŋa si antaii iri kuta ŋa do si geete ŋa do si abɛi jĩi tũtũ ŋa fei.

⁵ Ŋɔi Resɛ̃ɛ ilaalui Siriu do Peka ilaalui Izirɛliu à koo si Ahazi igũ Zeruzalɛmu bɛ. Ŋɔi à koo à buu koe bɛ, amma à mɔngɔ ku kãmiaɛ.

⁶ Si waati nŋu bɛi Resɛ̃ɛ ilaalui Siriu í lele inɛi Zudaa ŋa iyi à wa Elati. Nɔ í gba iluu í baaò wa si bommai ilɛɛ. Nɔ inɛi Edɔmu ŋa à naa à buba Elati bɛ hee ku baa nnyi.

⁷ Ŋɔi Ahazi í bɛ inɛ ŋa bi Tigilati-Pilezɛɛ ilaalui Asiriu a koo a sɔ̃ɔ a ni, amu Ahazi ǹ jɛ amaɛ nɔ ǹ jɛ woo ce icɛɛ. Dede wa i naa i gbam hai si awɔi ilaalui Siri do ti Izirɛli ŋa iyi à dede sim.

⁸ Ŋɔi Ahazi í so isɔ fũfũ do wura iyi í wa inɔ kpasɛ̃i Aɔ̃ Lafɛ̃ɛ do si bi ku singa amanii kpasɛ̃i ilaaluu í ceaò ilaalui Asiriu amua.

⁹ Ŋɔi ilaalui Asiriu í jɛsi ideɛu. Nɔ í koo í jɛ ilui Damasi igũ í mu inɛi ilu ŋau aru í nɛò ŋa Kii. Ŋɔi í kpa Resɛ̃ɛ.

¹⁰ Ilaalu Ahazi í bɔ Damasi bi Tigilati-Pilezɛɛ. Iyi í koo í yɛ bi kuweei Damasiu ŋɔi í so yaaseɛ dee dee í sambaɛ wa bi Uri woo weeu.

¹¹ Hee ku maa baa hai Damasiu ŋɔi Uri woo weeu í ma bi kuweeu dee dee si yaase bɛi ilaaluu í sambaa wau.

¹² Iyi ilaaluu í baa, ŋɔi í yɛ bi kuweeu nɔ í bɔ bɛ.

¹³ Nɔ í koo í ce kuwee iyi à ya jo si ina fei sãa sãa do kuweei iyafũ do ti atɛ̃ vɛ̃ɛ. Ŋɔi í ce kuweei anu akã nɔ í fãsi njɛɛ si antaii bi kuweeu.

¹⁴ Ŋɔi í tekĩò bi kuwee iyi à ce do isɔ nkpa iyi í jɛ ti Aɔ̃ Lafɛ̃ɛu í bɔò awɔ njɛi kpãai inunu ku ba ku maà maa wa aninii bi kuwee titɔ̃u do kpasɛ̃i Aɔ̃ Lafɛ̃ɛu.

¹⁵ Ŋɔi ilaaluu í sɔ̃ Uri woo weeu í ni, hai nnyi, si bi kuwee nlaui aa ya ce kuwee iyi à ya jo si ina fei sãa sãa ti daakɔu do kuweei iyafũ ti alɛu. Si bɛi aa ya ce ti ilaaluu do ti zamaau fei hee do kuweei atɛ̃ vɛ̃ɛ fei. Bɛi aa ya fãsi njɛi kuwee fei. Amma bi kuweei isɔ nkpa iyi í jɛ ti Aɔ̃ Lafɛ̃ɛu, amui an mà ideɛ.

¹⁶ Nɔ Uri woo weeu í ce bɛi ilaalu Ahazi í sɔ̃ɔu fei.

¹⁷ Ŋɔi ilaaluu í nya isɔ nkpa ŋau nɔ í nya jɛɛ ŋa iyi à waa lesi antaii nŋau í jilɛ ŋa ilɛ. Nɔ í nya dangala nla iyi í wa si antaii kɛtɛi isɔ nkpa ŋau í jilɔɔ si kuta ŋa iyi à tɛ ilɛu.

¹⁸ Na irii ilaalui Asiriui í tekĩò andɛ koofai ilaalu do andɛ koofai ajɔi kusĩmi si inɔ kpasɛ̃i Aɔ̃ Lafɛ̃ɛu.

¹⁹ Faajii icɛi Ahazi ŋau do mii mmu ŋa iyi í ce fei à kɔɔ si tiai icɛi ilaalui Zudaa ŋa.

²⁰ Ahazi í ku nɔ à suu bi balaɛ ŋa si ilui Davidi. Nɔ amaɛ Ezekiasi í jɛ bommau si agbɛɛ.