Ilaalu 2, 15 - Bibeli do fee

Azaria í jɛ ilaalui Zudaa

¹ Si adɔ̃ kɔnfia do mɛɛjesiai bomma ku jɛi Zeroboamu ilaalui Izirɛlii Azaria amai Amasia í jɛ bommai Zudaa.

² Adɔ̃ maatũ do akãi í nɛ waati iyi í jɛ bommau. Nɔ í ce si adɔ̃ ciitaa do minji. Iyeɛi à ya kpe Yekolia inɛi Zeruzalɛmu.

³ Ŋɔi Azaria í ce iyi í dɔ̃a Aɔ̃ Lafɛ̃ɛ si. Í ce mam mam bɛi baaɛ Amasia í ce.

⁴ Nŋu de, kù lɛgɛ bi kuweea iwɛ̃ ŋa. Zamaau í ya maa ce kuwee ŋa nɔ ku maa jo tuae ŋa si antaii iri kuta ŋau.

⁵ Ŋɔi Aɔ̃ Lafɛ̃ɛ í dasi ilaaluu bɔ̃ɔ kugaabu gɔ. Í jɔ̀ í nɛ bɔ̃ɔi batai ara nɔ à nyaa ileɛ ikã hee í toò ajɔi ikuɛ. Yotamu amai ilaalu iyi wa jɛ inɛ ngboi kpasɛ̃i ilaaluu nŋui wa mu ilɛu si agbɛɛ.

⁶ Faajii icɛi Azaria ŋau do mii mmu ŋa iyi í ce fei à kɔɔ si tiai icɛi ilaalui Zudaa ŋa.

⁷ Iyi Azaria í ku nɔ à suu bi balaɛ ŋa si ilui Davidi. Ŋɔi amaɛ Yotamu í jɛ bommau si agbɛɛ.

Zakari í jɛ bommai Izirɛli

⁸ Si adɔ̃ kuntaa do mɛɛjɔsiai bomma ku jɛi Azaria ilaalui Zudaaui Zakari amai Zeroboamuu í jɛ bommai Izirɛli ilui Samari. Nɔ í ce si bommau cukpa mɛɛfa.

⁹ Í ce mii iyi kù dɔ̃a Aɔ̃ Lafɛ̃ɛ si, bɛi balaɛ ŋa à ceu. Kù jɔ̀ dulum ŋa iyi Zeroboamu amai Nebatiu í ce í tale siò inɛi Izirɛli ŋa dulum ku ce.

¹⁰ Ŋɔi Salumu amai Yabɛsi í dĩaa sɔɔlui zamba wa. Nɔ í na í kpaa si wajui zamaa í bɛi í jɛ bommau si agbɛɛ.

¹¹ Faajii icɛi Zakari ŋa à kɔɔ si tiai icɛi ilaalui Izirɛli ŋa.

¹² Do yaase bɛɛbɛi ide iyi Aɔ̃ Lafɛ̃ɛ í sɔ̃ Yehuu í ce iyi í ni, amaɛ ŋai aa ya maa buba si kitãi bommai Izirɛliu hee ku koo si tɔku gbɛ̃ɛsiaɛ.

Salumu í jɛ bommai Izirɛli

¹³ Salumu amai Yabɛsiu í jɛ bommai si adɔ̃ kuntaa do mɛɛsãsiai bomma ku jɛi Oziasi ilaalui Zudaau. Nɔ í mu bommau zakai cukpa akã Samari bɛ.

¹⁴ Ŋɔi Menahɛmu amai Gadi í dede wa hai Tirisa í naa Samari nɔ í kpa Salumu bɛ, nɔ í jɛ bommau si agbɛɛ.

¹⁵ Faajii icɛi Salumu ŋa do sɔɔlui zamba ŋa iyi í ceu, à kɔɔ si tiai icɛi ilaalui Izirɛli ŋa.

¹⁶ Ŋɔi Menahɛmu í ce igũ wa hai Tirisa. Nɔ í kpa inɛi ilu ŋa iyi à wa hai bɛ fei hee ku bɔ Tifisa. Í ce igũ si iluui si na iyi í jɔ̀ à kɔ̀ ku cĩaa gambo. Nɔ í pũ inaabo bãasĩ ŋa iyi à wa si iluu fei.

Menahɛmu í jɛ ilaalui Izirɛli

¹⁷ Si adɔ̃ kuntaa do mɛɛsãsiai bomma ku jɛi Azaria ilaalui Zudaaui Menahɛmu amai Gadi í jɛ bommai Izirɛli. Nɔ í mu bommau adɔ̃ mɛɛwa Samari.

¹⁸ Ŋɔi í ce mii iyi kù dɔ̃a Aɔ̃ Lafɛ̃ɛ si si kuwɛɛɛ fei. Í kɔ̀ ku jɔ̀ dulum ŋa iyi Zeroboamu amai Nebati í ce í tale siò inɛi Izirɛli ŋa dulum ku ce.

¹⁹ Ŋɔi Pulu ilaalui Asiriu í naa si ilɛi Izirɛli nɔ Menahɛmu í mua isɔ fũfũ tɔnu kuntaa ku ba ku sobiɛ ku jɔ̀ bommaɛ ku nɛ gbugbã.

²⁰ Menahɛmu í gba isɔ fũfũui hai bi ilu fiai Izirɛli ŋau fei ku ba koo na ilaalui Asiriu. Inɛ akã nŋa fei í ya sãi kpɛkɛlɛ ciitaa. Ilaalui Asiriu í gba isɔ fũfũu nɔ í sinda í nyi ideɛ.

²¹ Faajii icɛi Menahɛmu ŋa do mii mmu ŋa iyi í ce fei à kɔɔ si tiai icɛi ilaalui Izirɛli ŋa.

²² Iyi Menahɛmu í ku nɔ amaɛ Pekahia í jɛ bomma si agbɛɛ.

Pekahia í jɛ bommai Izirɛli

²³ Si adɔ̃ ciitaai bomma ku jɛi Azaria ilaalui Zudaaui Pekahia amai Menahɛmu í jɛ bommai Izirɛli Samari. Nɔ í ce si bommau adɔ̃ minji.

²⁴ Ŋɔi í ce iyi kù dɔ̃a Aɔ̃ Lafɛ̃ɛ si. Í kɔ̀ ku jɔ̀ dulum ŋa iyi Zeroboamu amai Nebati í ce í tale siò inɛi Izirɛli ŋau dulum ku ce.

²⁵ Ŋɔi inɛ ngboi sooge gɔ iyi à ya kpe Peka amai Remalia í dĩaa sɔɔlui zamba wa nŋu do sooge ciitaai ilɛi Galaadi ŋa nɔ í kpaa Samari bɛ si inɔ kpasɛ̃i ilaaluu, nŋu do Aagobu do Arie. Do yaase bɛɛbɛ í kpa Pekahia nɔ í jɛ bommau si agbɛɛ.

²⁶ Faajii icɛi Pekahia do mii mmu ŋa iyi í ce fei à kɔɔ si tiai icɛi ilaalui Izirɛli ŋa.

Peka í jɛ bommai Izirɛli

²⁷ Si adɔ̃ ciitaa do minjisiai bomma ku jɛi Azaria ilaalui Zudaai Peka amai Remalia í jɛ bommai Izirɛli Samari. Nɔ í ce adɔ̃ kɔnfia si bommau.

²⁸ Ŋɔi í ce mii iyi kù dɔ̃a Aɔ̃ Lafɛ̃ɛ si. Í kɔ̀ ku jɔ̀ dulum ŋa iyi Zeroboamu amai Nebati í ce í tale siò inɛi Izirɛli ŋau dulum ku ce.

²⁹ Si waatii Pekai Tigilati-Pilezɛɛ ilaalui Asiriu í naa í jɛ ilui Iyɔ̃ɔ igũ do Abɛli-Bɛti-Maaka do Yanoa do Kedɛsi do Hatisɔɔ do ilɛi Galaadi do Galilee do ilɛi dimii Nɛfitaliu fei. Nɔ í mu inɛi bɛ ŋau aru í nɛò.

³⁰ Ŋɔi Ozee amai Ela í dĩa Peka sɔɔlui zamba wa í na í kpaa nɔ í jɛ bommau si agbɛɛ si adɔ̃ kɔnfiasiai bomma ku jɛi Yotamu amai Oziasiu.

³¹ Faajii icɛi Peka ŋa do mii mmu ŋa iyi í ce fei à kɔɔ si tiai icɛi ilaalui Izirɛli ŋa.

Yotamu ilaalui Zudaa

³² Si adɔ̃ minjisiai bomma ku jɛi Peka amai Remalia si ilɛi Izirɛlii Yotamu amai Oziasi í jɛ bommai Zudaa.

³³ Adɔ̃ kaafɛtũi í nɛ waati iyi í jɛ bommau. Nɔ í ce si bommau adɔ̃ maatũ do akã ilui Zeruzalɛmu. Iyeɛi à ya kpe Yerusa amai Sadɔku.

³⁴ Ŋɔi í ce iyi í tɛ si wajui Aɔ̃ Lafɛ̃ɛ. Í cei dee dee bɛi baaɛ Oziasi í ce.

³⁵ Nŋu de, kù lɛgɛ bi kuweea iwɛ̃ ŋa. Zamaau í ya maa ce kuwee ŋa nɔ ku maa jo tuae ŋa si antaii iri kuta ŋa. Yotamui í ma anui ile lelei kpasɛ̃i Aɔ̃ Lafɛ̃ɛu.

³⁶ Faajii icɛi Yotamu ŋa do mii mmu ŋa iyi í ce fei à kɔɔ si tiai icɛi ilaalui Zudaa ŋa.

³⁷ Waati nŋu bɛi Aɔ̃ Lafɛ̃ɛ í jɔ̀ Resɛ̃ɛ ilaalui Siriu do Peka amai Remalia à sinti ku bɔ si ilɛi Zudaau igũ.

³⁸ Yotamu í na í ku nɔ à suu bi balaɛ ŋa si ilui Davidi balaɛu. Ŋɔi amaɛ Ahazi í jɛ bommau si agbɛɛ.