Ilaalu 2, 14 - Bibeli do fee

Amasia ilaalui Zudaa

¹ Si adɔ̃ minjisiai bomma ku jɛi Zoasi amai Zoakazi ilaalui Izirɛlii Amasia amai Zoasi ilaalui Zudaau í jɛ bomma.

² Adɔ̃ kɔnfia do miiui í nɛ waati iyi í jɛ bommau. Nɔ í mu bommau adɔ̃ kɔnfia do mɛɛsã Zeruzalɛmu. Iyeɛi à ya kpe Yoadãa, inɛi Zeruzalɛmui.

³ Í ce iyi í dɔ̃a Aɔ̃ Lafɛ̃ɛ si baa bii kù to bɛi balaɛ Davidi, nŋu de í cei dee dee bɛi Zoasi baaɛ í ce.

⁴ Do nŋu fei bi kuweea iwɛ̃ ŋau a kù tã. Inɛ ŋa à ya kɔ̀ a koo a maa ce kuwee ŋa nɔ a maa jo tuae ŋa si antaii iri kuta ŋa.

⁵ Waati iyi bommaɛ í ce gbugbã, ŋɔi í kpa akawe ŋa iyi à tako à kpa baaɛu.

⁶ Amma kù kpa ama nŋa ŋa si bɛi Moizi í kɔɔ si tiai woodaɛ tengi bii Aɔ̃ Lafɛ̃ɛ í ni, a kaa kpa baa ŋa na dulum dii ama nŋa ŋa, nɔ a kaa kpa amu ŋa na dulum dii baa nŋa ŋa, amma aa kpa inɛ feii na dulum dɛɛ.

⁷ Si anyiɛ í bɔ igũ lɔɔmai imu nɔ í kpa inɛi Edɔmu ŋa aŋa dubu mɛɛwa (10.000). Ŋɔi í gba ilui Sela í sɔɔ Yokitɛli. Bɛɛbɛi à waa kpoo baa nnyi.

⁸ Ŋɔi Amasia í bɛ inɛ ŋa bi Zoasi ilaalui Izirɛliu ku naa wa aŋa a ce igũ. Zoasiu amai Zoakazii nɔ wa jɛ tɔkui Yehu.

⁹ Ŋɔi Zoasi í ni a koo a sɔ̃ Amasia a ni, agũi Libãa í ni a koo a sɔ̃ jĩi ndii sɛɛdii Libãa ku mua ama inɛmɔkɔi nŋu mudɛ̃ɛɛ. Ŋɔi mɛɛmui sako gɔ iyi í wa Libãa í koo í tɛɛsɛ agũu í kpaa.

¹⁰ Ntɔi, ì jɛ inɛi Edɔmu ŋa igũ nɔ ì waa tɔɔò fufu. Hanya i tɔɔ fufuɛ, amma gbeò ndɛɛ ideɛ bɛ. Na mii í ce ì waa bi i ce igũ iyi á ce nfei awɔ do inɛi Zudaa ŋau.

¹¹ Amma Amasia kù gbɔ ideɛu. Nɔ Zoasi ilaalui Izirɛliu í dede í koo, nɔ aŋaò à ce igũ Bɛti-Semɛsi si ilɛi Zudaa.

¹² Nɔ inɛi Izirɛli ŋau à kãmia inɛi Zudaa ŋau hee aŋa fei à sa à nɛ ide nŋa.

¹³ Nɔ Zoasi ilaalui Izirɛli í mu Amasia ilaalui Zudaa Bɛti-Semɛsi bɛ. Nɔ í bɔ Zeruzalɛmu í koo í lɛgɛ bindii iluu agbãawɔ cĩɔ mɛɛ hai bi gamboi Efaraimuu hee ku bɔ si gamboi gontau.

¹⁴ Ŋɔi í so wura do isɔ fũfũ do jɛɛ ŋa iyi à wa si kpasɛ̃i Aɔ̃ Lafɛ̃ɛu do ti kpasɛ̃i ilaaluu fei. Nɔ í mu aru ŋa mɔ í bɛi í sinda í nyi Samari.

¹⁵ Faajii Zoasi do mii mmu ŋa iyi í ce do kookaai iyi í ce si igũ do igũ iyi aŋaò Amasia ilaalui Zudaau à ce fei à kɔɔ si tiai icɛi ilaalui Izirɛli ŋa.

¹⁶ Zoasi í ku nɔ à suu Samari bi balɛi ilaalui Izirɛli ŋau. Ŋɔi amaɛ Zeroboamu í jɛ bomma si agbɛɛ.

¹⁷ Si anyii ikui Zoasi, Amasia í nyi í ce adɔ̃ maatũ má.

¹⁸ Faajii Amasia do mii mmu ŋa iyi í ce fei à kɔɔ si tiai icɛi ilaalui Zudaa ŋa.

¹⁹ Ŋɔi à dĩaa anu tɔɔsi a kpaa Zeruzalɛmu bɛ. Amma í sa í bɔ Lakisi, nɔ à tooɛ à koo à kpaa bɛ.

²⁰ Ŋɔi à so ikuɛ wa si sarɛti iyi acĩ ŋa à waa fa à na à suu Zeruzalɛmu bi balaɛ ŋa si ilui Davidi.

²¹ Nɔ zamaai Zudaau fei í so Azaria í jilɔɔ ilaalu si agbɛi baaɛ Amasia. Waati bɛɛbɛ í nɛ adɔ̃ maatũ do akã.

²² Si anyii ikui baaɛu ŋɔi í gba ilui Elati í baaò wa si awɔi inɛi Zudaa ŋa má, nɔ í teese í maa.

Zeroboamu minjisia í jɛ ilaalui Izirɛli

²³ Si adɔ̃ maatũsiai bomma ku jɛi Amasia amai Zoasi ilaalui Zudaaui Zeroboamu amai Zoasi ilaalui Izirɛliu mɔ í jɛ bomma ilui Samari. Nɔ í mu bommau adɔ̃ ciiji do akã.

²⁴ Ŋɔi í ce mii iyi kù dɔ̃a Aɔ̃ Lafɛ̃ɛ si. Kù jɔ̀ baa akãi dulum ŋa iyi Zeroboamu amai Nebatiu í ce í tale siò inɛi Izirɛli ŋa dulum.

²⁵ Nŋui í nyi í gba ilɛ ŋa iyi à tako à jɛ ti Izirɛliu hai anu koofai Amati hee ku bɔ Tenku ku da imuu, bɛi Aɔ̃ Lafɛ̃ɛ í tako í sɔ̃ walii woo ce icɛɛ Zonasi amai Amitai inɛi Gati-Hefɛɛu.

²⁶ Aɔ̃ Lafɛ̃ɛ í fɔ bɛɛbɛi si na iyi í jɔ̀ í yɛ wahala nla nla iyi inɛi Izirɛli ŋau à wa si. Nɔ inɛ kãma kù wɛɛ má iyi á faaba ŋa, kù wɛɛi baa akã.

²⁷ Amma Aɔ̃ Lafɛ̃ɛ njɛ kù jilɔɔ si nŋu ku kpa zamaau bɛ. Na ŋɔi í jɔ̀ í faaba ŋa do saabui Zeroboamu amai Zoasiu.

²⁸ Faajii icɛi Zeroboamu ŋa do mii mmu ŋa iyi í ce fei do bɛi í dasi kookaai si igũ ŋa fei, do bɛi í gba ilui Damasi do Amati ŋa wa hai si inɛi Zudaa ŋau fei à kɔɔ si tiai icɛi ilaalui Izirɛli ŋa.

²⁹ Ŋɔi Zeroboamu í ku nɔ à suu bi ilaalui Izirɛli balaɛ ŋau nɔ amaɛ Zakari í jɛ bommau si agbɛɛ.