Ilaalu 2, 13 - Bibeli do fee

Zoakazi ilaalui Izirɛli

¹ Si adɔ̃ kɔnfia do mɛɛtasiai bomma ku jɛi Zoasi amai Ahazia ilaalui Zudaai Zoakazi amai Yehu í jɛ bommai Izirɛli ilui Samari. Nɔ í ce si bommau adɔ̃ mɛɛwa do mɛɛje.

² Ŋɔi í ce mii iyi kù dɔ̃a Aɔ̃ Lafɛ̃ɛ si. Í ce dulum dimi akã iyi Zeroboamu amai Nebatiu í ce nɔ í tale si inɛi Izirɛli ŋau, nɔ í kɔ̀ ku jɔ̀ɔ.

³ Ŋɔi idɔɔkɔ̃i Aɔ̃ Lafɛ̃ɛ í dede si inɛi Izirɛli ŋa. Ŋɔi í so ŋa í daa Hazaɛli ilaalui Siriu si awɔ do si awɔi Bɛni-Hadadi amaɛ si waatii kuwɛɛ nŋa fei.

⁴ Ŋɔi Zoakazi í tɔɔ Aɔ̃ Lafɛ̃ɛ. Nɔ Aɔ̃ Lafɛ̃ɛ í gbɔ kutɔɔɛ, domi í yɛ bɛi ilaalui Siriu wa wahala inɛi Izirɛli ŋau.

⁵ Ŋɔi í dɛdɛa inɛi Izirɛli ŋau inɛ gɔ iyi á faaba ŋa. Nɔ inɛi Izirɛli ŋau à fita hai si awɔi inɛi Siri ŋau, nɔ à wɛɛò laakai ku sũ si kpasɛ̃ nŋa ŋa má bɛi tako.

⁶ Amma a kù jɔ̀ dulum dii kpasɛ̃i Zeroboamuu nŋu iyi í tale si inɛi Izirɛli ŋa dulum ku ce. Aŋa mɔ à na ara si, nɔ mɔm à jɔ̀ jĩi iyi à lɔa iwɛ̃ Aserau wa leekĩ ilui Samari bɛ.

⁷ Si woo ce igũi Zoakazi ŋau, ilaalui Siriu í kpa nkpɔ nŋa, í tɛɛsɛ ŋa mam mam bɛi sãa si kpãa. Masa ciitaa nŋu akãi í jɔ̀aa do sarɛtii igũ mɛɛwa do sooge dubu mɛɛwa (10.000) iyi à ya maa nɛò isɛ.

⁸ Faajii Zoakazi do mii mmu ŋa iyi í ce fei do kookaai iyi í ce si igũ ŋa fei à kɔɔ si tiai icɛi ilaalui Izirɛli ŋa.

⁹ Zoakazi í na í ku nɔ à suu bi balɛi balaɛ ŋa ilui Samari. Nɔ amaɛ Zoasi í jɛ bommau si agbɛɛ.

Zoasi ilaalui Izirɛli

¹⁰ Si adɔ̃ kuntaa do mɛɛjesiai bomma ku jɛi Zoasi ilaalui Zudaaui Zoasi amai Zoakazi í jɛ bommai Izirɛli ilui Samari. Nɔ í ce adɔ̃ maatũ do akã si bommau.

¹¹ Ŋɔi í ce mii iyi kù dɔ̃a Aɔ̃ Lafɛ̃ɛ si. Kù jɔ̀ baa akãi dulum dii Zeroboamu amai Nebati iyi í tale si inɛi Izirɛli ŋa dulum ku ceu. Í na araɛ si dulum ŋaui bɛi Zeroboamu.

¹² Faajii icɛi Zoasi ŋa, do mii mmu ŋa iyi í ce fei, do kookaai iyi í ce si igũ, do igũ iyi aŋaò Amasia ilaalui Zudaau à ce fei à kɔɔ si tiai icɛi ilaalui Izirɛli ŋa.

¹³ Zoasi í ku nɔ à suu Samari bi balɛi ilaalui Izirɛli ŋau. Ŋɔi Zeroboamu í buba si kitãi bommaɛu.

Elizee wa fɔ iyi aa jɛ inɛi Siri ŋa igũ

¹⁴ Waati iyi Elizee wa ce bɔ̃ɔ gɔ iyi á kpaa, hee ku maa ku, Zoasi ilaalui Izirɛliu í bɔ bi tɛɛ. Nɔ Zoasi wa kpata si wajuɛ wa ni, baam, baam, sarɛtii Izirɛli ŋa do masa ŋa.

¹⁵ Ŋɔi Elizee í ni ku so bioo do afa ŋa. Nɔ í so bioou do afa ŋau.

^16-17 Nɔ Elizee í ni ku cĩ fɛrɛntii nunui daakɔu. Ŋɔi í cũu. Nɔ Elizee í ni ku kã afau. Iyi í kã afau ŋɔi Elizee í lesi awɔɛ ŋa si awɔi ilaaluu. Ŋɔi í ni ku ta afau. Nɔ í taa. Ŋɔi Elizee í ni, afau bɛi í jɛ afai igũ ku jɛ. Wa nyisi iyi Aɔ̃ Lafɛ̃ɛ á nya ŋɛ hai si awɔi inɛi Siri ŋa. Awɔi aa jɛ ŋa igũ ilui Afɛki hee i kpa iri nŋa.

¹⁸ Ŋɔi Elizee í ni ku so afa ŋau má. Ŋɔi í so ŋa. Nɔ í ni ku taò ilɛ. Ŋɔi í ta ilɛ fii mɛɛta nɔ í leekĩ.

¹⁹ Ŋɔi idɔi waliiu í kɔ̃ siɛ nɔ í sɔ̃ɔ í ni, ì nɛ i taai wo bɛi fii miiu walakɔ fii mɛɛfa, nɔ i jɛ inɛi Siri ŋau hee i ce nfe nŋa. Amma, bɛbɛi isɛ gbɛɛtai aa kãmia ŋa.

²⁰ Si anyiɛ Elizee í ku nɔ à suu. Adɔ̃ ku kaɛ ŋɔi soogei Moabu ŋa à waa lɔ si ilɛu wa,

²¹ wee í ko inɛ ŋa à bɔ mɔkɔ gɔ ku si. Nɔ à hɔ̃nnɛ wuaa akãi sooge ŋau wa. Ŋɔi inɛ ŋau à so ikuu à sɔɔ si inɔ balɛi Elizeeu. Ŋɔi ikui mɔkɔu í koo í lu kũkũi Elizee ŋau nɔ mɔkɔu í jĩ í dede í leekĩ si kutɛɛ ŋa má.

À jɛ inɛi Siri ŋa igũ

²² Hazaɛli ilaalui Siriu í tako í wahala inɛi Izirɛli ŋau do igũ si waatii kuwɛɛi Zoakazi fei.

²³ Amma Aɔ̃ Lafɛ̃ɛ í na í ce araare nŋa, í sinda í cɔ ŋa na saabui akabuu iyi í dĩ aŋaò Aburahamu do Izaaki do Zakɔbu ŋa. Kù bi ku kpa iri nŋa nɔ kù jɛsi à mu ŋa aru waati bɛɛbɛ.

²⁴ Hazaɛli í ku nɔ amaɛ Bɛni-Hadadi í jɛ bommau si agbɛɛ.

²⁵ Zoasi amai Zoakazi í jɛ Bɛni-Hadadi igũ fii mɛɛta nɔ í gba ilu ŋa iyi Hazaɛli baaɛ í tako í gba si Zoakazi.