Ilaalu 2, 11 - Bibeli do fee

Atali í gba bommau Zeruzalɛmu

¹ Iyi Atali iyei Ahazia í yɛ amai nŋu í ku ŋɔi í dede wa kpa dimii ilaaluu fei.

² Amma Yoseba ama inaaboi ilaalu Yoramu í so Zoasi amai wecĩɛ Ahazia si asii hai inɔi amai ilaalu ŋau waati iyi à waa kpa ŋa. Ŋɔi í koo í singaɛ ilaawa bi ku sũ, nŋu do abo iyi á maa woo. Bɛɛbɛi à singa amau ku ba Atali ku maà ba ku kpaa má.

³ Ŋɔi Yoseba í singaɛ bi tɛɛ adɔ̃ mɛɛfa si inɔ kpasɛ̃i Aɔ̃ Lafɛ̃ɛ. Waati bɛɛbɛ Atalii wa jɛ ilaalu inaabo si ilɛu.

À cica Zoasi ilaalu

⁴ Si adɔ̃ mɛɛjesiaɛ, ŋɔi Yehoyada woo weeu í bɛ ama koo kpe inɛ ngboi soogei ilɛi Azii ŋau wa do sooge woo degbe kabai ilaaluu do woo degbe kpasɛ̃i Aɔ̃ Lafɛ̃ɛ ŋau. Nɔ í jɔ̀ à naa bi tɛɛ kpasɛ̃i Aɔ̃ Lafɛ̃ɛ bɛ. Nɔ aŋaò ŋa à dĩ akabuu nɔ í jɔ̀ à fɔ do kugbasi si inɔ kpasɛ̃i Aɔ̃ Lafɛ̃ɛ nɔ í nyisi ŋa amai ilaaluu.

⁵ Nɔ í sɔ̃ ŋa í ni, bɛi aa ce ŋa wee. Si inɔi iŋɛ iyi ì ya bɔ icɛ ajɔi kusĩmiu ŋa i kpɛ̃ ara nŋɛ ikɔ mɛɛta. Ikɔ akã koo maa degbe kpasɛ̃i ilaaluu.

⁶ Ikɔ minjisiau mɔ koo maa degbe anu koofai Suu, mɛɛtasiau mɔ koo degbe anu koofa iyi í wa do anyii woo degbe kpasɛ̃ ŋau. Aa maa degbe kpasɛ̃u ŋai bɛi inɛ kãma kaa ba ku lɔò wa.

⁷ Wuaa minji ŋa iyi a kù nɛ icɛ si ajɔi kusĩmiu, aa ya naa a degbe kpasɛ̃i Aɔ̃ Lafɛ̃ɛ bi ilaaluui.

⁸ Aa ya kaako ilaaluu ŋai bii fei, inɛ fei do jĩnɛi igũɛ ŋa si awɔ. Inɛ iyi í naa kɔkɔ nŋɛ fei, aa ya kpaa ŋai. Kɔkɔi ilaaluui aa ya maa wa ŋa bii wa fita do bii wa baa.

⁹ Ŋɔi inɛ ngboi sooge cĩɔ ŋau à ce bɛi Yehoyada woo weeu í ni a ceu fei. Aŋa fei à cica inɛ nŋa ŋa iyi à ya so icɛ do iyi à ya kita icɛ ajɔi kusĩmi ŋau fei à bɔò ŋa bi Yehoyada woo weeu.

¹⁰ Ŋɔi woo weeu í na inɛ ngboi sooge cĩɔ ŋau kaka ŋa do tɛli ŋa. Jĩnɛ ŋau ilaalu Davidii í nɛ ŋa wo, nɔ à jilɛ ŋai si inɔ kpasɛ̃i Aɔ̃ Lafɛ̃ɛu.

¹¹ Woo degbe ŋau à kaako ilaaluu aŋa fei do jĩnɛi igũ nŋa ŋa si awɔ. À waa leekĩi kɔkɔi bi kuweeu, hai ikpa awɔ njɛi ileu hee ku baa ikpa awɔ cangai ileu.

¹² Ŋɔi woo weeu í koo í gbã Zoasi wa, nɔ í daa si fulai ilaaluu nɔ í naa tiai wooda. Ŋɔi í biiɛ bomma nɔ í tontooa ikpo si iri. Ŋɔi à dakpɛa à waa ni, Ilaaɔ̃ ku jɔ̀ hundeɛ ku sɔ, ilaalu.

¹³ Iyi Atali í gbɔ ibai woo degbe ŋau do ti zamaau, ŋɔi í bɔ bi tu ŋa kpasɛ̃i Aɔ̃ Lafɛ̃ɛ.

¹⁴ Ŋɔi í cɔ ilu, nɔ í ba wee ilaaluu wa leekĩ tengi bii ilaalu ŋa à ya gũ a bɛi a fɔ ide si bɛi à ya ce. Nɔ inɛ ngbo ŋa do woo fã kãakãakĩ ŋa à wa kɔkɔɛ. Zamaau fei í wɛɛò inɔ didɔ̃ nɔ à waa fã kãakãakĩ ŋa. Ŋɔi Atali í ga ibɔɛ nɔ í dɔ̃ anu wa ni, à zambam nii à zambam nii.

¹⁵ Ŋɔi Yehoyada woo weeu í sɔ̃ inɛ ngboi sooge cĩɔ ŋau aŋa iyi à ya jɛ irii igũu í ni a fitaò Atali waduude hai si inɔi inɛ ŋa. Nɔ í ni inɛ iyi wa tooɛ wa fei, a kpaa. Í ni bɛɛbɛi domi kù bi a kpaa si inɔ kpasɛ̃i Aɔ̃ Lafɛ̃ɛu.

¹⁶ Ŋɔi à fitaɛ à bɔòɛ kpasɛ̃i ilaalu do kpãa bi ku lɔòi acĩ ŋau. Tengi bɛi à koo à kpaa.

¹⁷ Si anyiɛ ŋɔi Yehoyada í dĩ akabuu do Aɔ̃ Lafɛ̃ɛ do ilaaluu do zamaau ku ba a jɛ zamaai Aɔ̃ Lafɛ̃ɛ. Nɔ í nyi í dĩ akabuu mmuɛ má si gãmɛi zamaau do ilaaluu.

¹⁸ Ŋɔi zamaau fei í lɔ inɔ ilei iwɛ̃ Baaliu nɔ à lɛgɛɛ, nɔ à lɛgɛ bi kuweeu do kuta ŋa iyi à lɔau fei mam mam. Nɔ à kpa Matãa woo weei Baali si wajui bi kuwee ŋau bɛ. Iyi à tã nɔ Yehoyada í jilɛ inɛ ŋa iyi aa ya maa degbe kpasɛ̃i Aɔ̃ Lafɛ̃ɛu.

¹⁹ Ŋɔi í tɔtɔɔ inɛ ngboi sooge cĩɔ ŋau wa do inɛ ngboi soogei ilɛi Azii ŋau do woo degbe ŋau do zamaau fei. Nɔ à fitaò ilaaluu wa hai kpasɛ̃i Aɔ̃ Lafɛ̃ɛu à too do anu koofai woo degbe ŋau à bɔòɛ kabai bommau. Ŋɔi Zoasi í buba si kitãi bommai ilaalu ŋau.

²⁰ Zamaai ilɛu fei í wɛɛò inɔ didɔ̃. Iluu í nɛ laakai ku sũ si na iyi í jɔ̀ à kpa Atali inɔ kpasɛ̃i ilaaluu.