Ilaalu 2, 1 - Bibeli do fee

Ilaaɔ̃ í yɛ taalei Ahazia

¹ Si anyii ikui Akabu ŋɔi inɛi Moabu ŋa à dedeò ide ku kɔ̀ si inɛi Izirɛli ŋa.

² Ajɔ nŋu gɔ Ahazia í ga í cuku wa hai do fɛrɛntii ile kugbokaɛ iyi í wa Samariu nɔ í ba kumɛɛ nla nla. Ŋɔi í bɛ inɛ ŋa kubee ku ce bi Baali-Zebu iwɛ̃i inɛi Ekorɔ̃ɔ ŋau mà nŋu á ba iri hai si mbiisi iyi í naa si nŋuu.

³ Amma amalekai Aɔ̃ Lafɛ̃ɛ í sɔ̃ Elii inɛi Tisibuu í ni, dede i bɔ amaabɛi ilaalui Samari ŋau ku ko. Nɔ i bee ŋa i ni, kù jɛ Ilaaɔ̃ kù wa ilɛi Izirɛli mái í jɔ̀ ì waa bɔ kubee ku ce bi Baali-Zebu iwɛ̃i inɛi Ekorɔ̃ɔ ŋau?

⁴ Na nŋu, ide iyi Aɔ̃ Lafɛ̃ɛ í fɔ wee. Ahazia kaa kita hai si daayi iyi í gũu bɛ má, domi á kui. Ŋɔi Elii í koo í ce bɛi amalekau í ni.

⁵ Ŋɔi gbakã amaabɛ ŋau à sinda à nyi bi Ahazia. Nɔ í bee ŋa í ni, bɛirei í ce ì sinda wa ŋa.

⁶ Ŋɔi à ni, mɔkɔ gɔ í naa í ko wa nɔ í sɔ̃ wa í ni, i sinda i nyi bi ilaalu iyi í bɛ ŋɛ wau ŋa. Nɔ i sɔ̃ɔ i ni, Aɔ̃ Lafɛ̃ɛ í ni, kù jɛ Ilaaɔ̃ kù wa ilɛi Izirɛli mái í jɔ̀ ì waa bɛ inɛ ŋa kubee ku ce bi Baali-Zebu iwɛ̃i inɛi Ekorɔ̃ɔ ŋau? Na nŋu, i kaa kita má hai antaii daayi iyi ì gũu, domi aa kui.

⁷ Ŋɔi Ahazia í bee ŋa í ni, bɛirei mɔkɔ iyi í naa í ko ŋɛ í sɔ̃ ŋɛ ideu í yɛ.

⁸ Ŋɔi à jɛaa à ni, mɔkɔu wa dasi jĩnɛi nto ŋa nɔ wa dĩ santiikii bata si kpakaɛ. Ŋɔi Ahazia í ni, Elii inɛi Tisibuu mbɛ.

Ahazia wa dɛ Elii ku mu

⁹ Ŋɔi Ahazia í bɛ sooge ciitaa do inɛ ngbo nŋa í ni a koo a mu Elii wa. Ŋɔi à koo à ba Elii bii wa buba si antaii iri kutau nɔ inɛ ngbo nŋau í sɔ̃ɔ í ni, awɔ inɛi Ilaaɔ̃, ilaalu í ni i kita wa.

¹⁰ Ŋɔi Elii í jɛaa í ni, bii amu inɛi Ilaaɔ̃i, ina ku naa wa hai lelei Aɔ̃ nɔ ku joɛ awɔ do sooge ciitaaɛ ŋa. Ŋɔi inau í naa hai lelei Aɔ̃ nɔ í joo, nŋu do sooge ciitaaɛ ŋau fei.

¹¹ Ŋɔi Ahazia í nyi í bɛ inɛ ngbo mmuɛ má do sooge ciitaaɛ ŋa. Ŋɔi inɛ ngbou í so ide í sɔ̃ Elii í ni, awɔ inɛi Ilaaɔ̃, ilaalu í ni i kita wa ńya ńya.

¹² Ŋɔi Elii í jɛaa í ni, bii amu inɛi Ilaaɔ̃i, ina ku naa wa hai lelei Aɔ̃ nɔ ku joɛ awɔ do sooge ciitaaɛ ŋa. Ŋɔi inai Ilaaɔ̃ í naa hai lele nɔ í joo, nŋu do sooge ciitaaɛ ŋa.

¹³ Ŋɔi Ahazia í nyi í bɛ siɛ inɛ ngboi sooge ciitaa ŋa isɛ gbɛɛtasia má nŋu do sooge ciitaaɛ ŋa. Inɛ ngbo mɛɛtasiau í koo bi tɛɛ. Iyi í to, ŋɔi í gulɛ si wajui Elii nɔ í sɔ̃ɔ do kurɔ í ni, awɔ inɛi Ilaaɔ̃, ǹ wa n tɔɔɛi, maà kpam nɔ i maà kpa sooge ciitaa woo ce icɛɛ ŋau ihɛ̃.

¹⁴ Ina í naa hai lelei Aɔ̃ nɔ í jo inɛ ngboi sooge ciitaa minji sinte ŋa iyi à naaò sooge nŋa ŋau wa fei. Amma bɛbɛi, maà kpam.

¹⁵ Ŋɔi amalekai Aɔ̃ Lafɛ̃ɛ í naa í sɔ̃ Elii í ni, kita iŋɛò, nɔ i maà ce njoɛ. Ŋɔi Elii í kita wa aŋaò à bɔ bi ilaaluu.

¹⁶ Nɔ í sɔ̃ ilaaluu í ni, Aɔ̃ Lafɛ̃ɛ í ni, si na iyi í jɔ̀ ì bɛ inɛ ŋa kubee ku ce bi Baali-Zebu iwɛ̃i inɛi Ekorɔ̃ɔ ŋau bɛi Ilaaɔ̃ kù wa ilɛi Izirɛli bii aa ce kubeei ideɛ, i kaa kita hai si antaii daayi bii ì gũu bɛ, domi aa kui.

¹⁷ Si anyiɛ Ahazia í ku si bɛi Elii í ni Aɔ̃ Lafɛ̃ɛ í fɔu. Si bɛi kù nɛ ama, ŋɔi Yoramu í jɛ bommau si agbɛɛ si adɔ̃ minjisiai Yoramu amai Zozafati ilaalui Zudaau.

¹⁸ Faajii Ahazia do mii mmu ŋa iyi í ce fei à kɔɔ si tiai icɛi ilaalui Izirɛli ŋa.