Ilaalu 1, 9 - Bibeli do fee

Aɔ̃ Lafɛ̃ɛ í naa si Salomɔɔ isɛ gbeejisia

¹ Iyi Salomɔɔ í ma kpasɛ̃i Aɔ̃ Lafɛ̃ɛu do ti nŋu takaɛ do mii ŋa iyi í dasi idɔ ku ma fei í tã,

² ŋɔi Aɔ̃ Lafɛ̃ɛ í naa siɛ isɛ gbeejisia má bɛi í tako í naa siɛ Gabaɔ̃ɔ.

³ Ŋɔi í sɔ̃ɔ í ni, ǹ gba kutɔɔɛ. Kpasɛ̃u ihɛ̃ iyi ì ma, ǹ nyaa ikãi í jɛ titom. Bɛi an maa n wa waati kãma fei si anini nŋɛ, nɔ bɛi ijum do idɔm á maa wa.

⁴ Nɔ bii awɔ mɔ ì waa nɛ do amu bɛi Davidi baaɛ í nɛ do idɔ akã do dee dee ku jɛ wa ceò iyi ǹ dasiɛ ku ce fei, bii ì waa jirima woodam ŋa do ide ŋa iyi ǹ jilɛɛ,

⁵ an jɔ̀ bommaɛ ku ba gbugbã si ilɛi Izirɛli fei, bɛi ǹ cea Davidi baaɛ kuwãɛu wo ǹ ni kaa kua atɛkɛsi si kitãi bommai Izirɛli ajɔ kãma.

⁶ Amma bii awɔ do zamaaɛ do tɔku nŋɛ ŋa ì sinda hai bi tom ŋa, nɔ i kù waa jirima woodam ŋa do ide ŋa iyi ǹ jilɛ nŋɛ, nɔ ì na ì koo ì waa tɔɔ iwɛ̃ ŋa ì waa sɛɛbata si waju nŋa ŋa,

⁷ an kpa irii inɛi Izirɛli ŋai si ilɛ iyi ǹ mu nŋa. An nyɔ ile iyi ǹ cicaa irim na bɛɛrɛm nɔu ku jĩim nɔ ilɛi Izirɛli ku baa ku jɛ dɔ̃anyii dimi mmu ŋa fei do mii ku yaako nŋa.

⁸ Nɔ ileu á kpɔò bomma, nɔ inɛ iyi wa lɔ kɔkɔɛ fei á ya bitii nɔ ku fã foo ku maa niò, bɛirei í ce Aɔ̃ Lafɛ̃ɛ í cea ilɛu ihɛ̃ do ileu ihɛ̃ bɛ ihɛ̃.

⁹ Nɔ aa ya jɛaa a ni, si na iyi í jɔ̀ inɛi Izirɛli ŋa à kɔ̀si Aɔ̃ Lafɛ̃ɛ nŋa, nŋu iyi í nya bala nŋa ŋa wa hai ilɛi Ezibiti, nɔ à koo à sinda si iwɛ̃ ŋa, à waa gulɛ nŋa nɔ à waa tɔɔ ŋa. Na ŋɔi í ce Aɔ̃ Lafɛ̃ɛ í jɔ̀ laalɔu bɛ fei í ba ŋa.

Ilu ŋa iyi Salomɔɔ í na Hiramu

^10-11 Hiramu ilaalui Tii í na Salomɔɔ jĩi ndii sɛɛdi ŋa do ti sipɛrɛɛsi ŋa do wura bɛi í nɛ bukaataɛ si kumaɛ ŋau. Ŋɔi ilaalu Salomɔɔ í ce adɔ̃ kɔnfia í bɛi í ma kpasɛ̃i Aɔ̃ Lafɛ̃ɛ do ti nŋu takaɛu í tã. Nɔ í muaa Hiramu ilu kɔnfia si ilɛi Galilee.

¹² Ŋɔi Hiramu í dede hai Tii í bɔ ilu ŋa iyi Salomɔɔ í muau ku cɔ. Amma kù saabu si,

¹³ nɔ í ni, kpaasim, ilu ŋa iyi ì mum nii ihɛ̃? Nɔ í sɔ ilu ŋau Kabulu, waatɔ nfe. Nɔ hee ku baa nnyi, bɛɛbɛi à ya kpe ŋa.

¹⁴ Amma Hiramu í tako í sambaa Salomɔɔ wura tɔnu mɛɛta do bubu.

Icɛ ikã ikãi Salomɔɔ ŋa

¹⁵ Salomɔɔ í tilasi inɛ ŋa a ma kpasɛ̃i Aɔ̃ Lafɛ̃ɛu do ti nŋu takaɛ do Miloo do bindii Zeruzalɛmu do ilui Hasɔɔ do Mɛgido do Gezɛɛ.

¹⁶ Faraɔ̃ ilaalui Ezibitiu í tako í ce igũ ilui Gezɛɛ nɔ í joo nɔ í kpa inɛi Kanaã ŋa iyi à wa si iluu. Ŋɔi í so iluu í na ama inaaboɛ waati iyi Salomɔɔ wa soo abo.

¹⁷ Ŋɔi Salomɔɔ í teese í ma ilui Gezɛɛu má do Bɛti-Horɔ̃ɔ iyi í wa ilɛ ilɛu,

¹⁸ do Baalati do Tamaa iyi í wa si gbaai ilɛu,

¹⁹ do ilu bii à ya jilɛ ijɛ ŋa fei, do ilu bi ku jilɛ sarɛtii igũɛ ŋau do bi kuwai acĩɛ ŋau. Kuma iyi Salomɔɔ í dasi idɔ ku ce fei, si ilui Zeruzalɛmu bɛi í coo do si ilɛi Libãa do si ilɛ ŋa bii wa jɛ ilaalu fei.

²⁰ Andi zamaai inɛi Amɔre ŋa iyi à gbe do inɛi Hɛti ŋa do inɛi Ferɛzi ŋa do inɛi Hɛvi ŋa do inɛi Zebusi ŋa aŋa iyi a kù jɛ inɛi Izirɛli ŋau fei,

²¹ hai tɔku nŋa ŋa iyi à gbe si ilɛu iyi inɛi Izirɛli ŋa a kù yɔkɔ a kù kpa ŋau fei, Salomɔɔ í jilɛ ŋai bɛi aru nɔ í jilɛ nŋa icɛi tilasi. Nɔ hee ku baa nnyi, bɛɛbɛi à jɛ.

²² Salomɔɔ kù jilɛ inɛi Izirɛli ŋau bɛi aru, amma í so ŋai à jɛ soogeɛ ŋa, do akaweɛ ŋa do inɛ ngboi soogeɛ ŋa do ciikuɛ ŋa do woo mu sarɛtii igũɛ ŋa do masaɛ ŋa.

²³ Inɛ ngbo ŋa iyi Salomɔɔ í so si icɛu à wɛɛi aŋa cĩɔ miiu do ciitaa (550), aŋa iyi à waa cɔ woo ce icɛ ŋau.

²⁴ Ŋɔi ama inaaboi Faraɔ̃u í dede hai ilui Davidi í tekĩ si kpasɛ̃ɛ iyi Salomɔɔ í maau. Si anyiɛi Salomɔɔ í ma Miloou.

²⁵ Adɔ̃ akã fei, fii mɛɛtai Salomɔɔ í ya ce kuwee iyi à ya jo si ina fei sãa sãa do kuweei anu akã si antaii bi kuwee iyi í maa Aɔ̃ Lafɛ̃ɛu, nɔ í ya jo tuae ŋa má si wajui Aɔ̃ Lafɛ̃ɛ. Do yaase bɛɛbɛi à waa loo kpasɛ̃i Aɔ̃ Lafɛ̃ɛu si bɛi í nɛ ku jɛ.

²⁶ Ŋɔi ilaalu Salomɔɔ í ce akɔi inyi ŋa Ɛsiɔ̃-Gebɛɛ iyi í wa kɔkɔi Elɔti si itĩ Tenkui Njee si ilɛi Edɔmuu.

²⁷ Nɔ Hiramu í bɛ woo ce icɛɛ ŋa iyi à mà yaasei tenku do akɔi inyi ŋau bi woo ce icɛi Salomɔɔ ŋa.

²⁸ Ŋɔi à bɔ Ɔfii, nɔ à so wura iyi í re baa tɔnu maateeji à naaa ilaalu Salomɔɔ wa.