Ilaalu 1, 8 - Bibeli do fee

À jilɛ kpakoi akabuuu kpasɛ̃i Aɔ̃ Lafɛ̃ɛ

¹ Ŋɔi ilaalu Salomɔɔ í tɔtɔɔ inɛ ngboi Izirɛli ŋau do inɛ ngboi dimi ŋau fei do inɛ ngboi kpasɛ̃ nŋa ŋau Zeruzalɛmu bi tɛɛ bɛ ku ba a koo a so kpakoi akabuui Aɔ̃ Lafɛ̃ɛu wa hai ilui Davidi iyi í jɛ Siɔ̃ɔ.

² Ŋɔi inɛi Izirɛli ŋau fei à tɔtɔɔ bi ilaalu Salomɔɔ si cukpai Etanimu iyi í jɛ cukpa mɛɛjesia si waatii jingau.

³ Iyi inɛ ngboi Izirɛli ŋau fei à to wa, ŋɔi woo wee ŋau à so kpakou.

⁴ Ŋɔi woo wee ŋau do inɛi Levii ŋau à so kpakoi Aɔ̃ Lafɛ̃ɛu do ilei acɔ bi kukou do jĩnɛi kuwee ŋa iyi à wa inɔ ilei acɔu fei à waa nɛò.

⁵ Ŋɔi ilaalu Salomɔɔ do inɛi Izirɛli ŋau fei à tɔtɔɔ si wajui kpakou. Nɔ à ce kuwee do angudã ŋa do kɛtɛ ŋa iyi a kaa yɔkɔ a mà jia nŋa na kukpɔ nŋa.

⁶ Ŋɔi woo wee ŋau à naaò kpakoi akabuui Aɔ̃ Lafɛ̃ɛu wa agbɛɛ inɔ kpasɛ̃i Aɔ̃ Lafɛ̃ɛu hee si ile iyi í má í reu si abɛi ikpai serubɛ̃ɛ ŋau.

⁷ Ikpai serubɛ̃ɛ ŋau í fũi si tengi bii kpakou í wa ku ba ku biiɛ nɔ ku bii hee do jĩi ŋa iyi à ya soò kpakou takaɛ fei.

⁸ Kusɔi jĩi ŋau í jɔ̀ à ya maa yɛ ŋa wa hai ile kumá iyi í wa wajui ile iyi í má í reu. Amma a kaa yɔɔ wa hai waduude. Nɔ à wa bɛ hee ku baa nnyi.

⁹ Nkãma kù wa inɔ kpakou í gbe kuta minji ŋa iyi Moizi í dasi hai Ɔrɛbu waati iyi Aɔ̃ Lafɛ̃ɛ í dĩ akabuuɛ do inɛi Izirɛli ŋa waati iyi à fita hai ilɛi Ezibitiu.

¹⁰ Waati iyi woo wee ŋau à waa fita wa hai ile kumáu, ŋɔi kudũi ijĩ í bii inɔ kpasɛ̃i Aɔ̃ Lafɛ̃ɛ.

¹¹ Woo wee ŋau à mɔngɔ ku leekĩ a ce icɛ nŋa na kudũi ijĩu, domi amboei Aɔ̃ Lafɛ̃ɛ í kɔ̃ ileɛu.

¹² Ŋɔi Salomɔɔ í ni, Aɔ̃ Lafɛ̃ɛ, si ilu kukui ì dasi idɔ i maa wa.

¹³ Amma amu ǹ maɛ ile jiida iyi á jɛ bi kuwaɛ, inya bii aa maa buba hee do ajɔ fei.

Salomɔɔ í saabu Ilaaɔ̃

¹⁴ Ŋɔi ilaaluu í sinda si inɛi Izirɛli ŋau í wee nŋa. Zamaai Izirɛliu fei wa leekĩ.

¹⁵ Ŋɔi í ni, ǹ saabu Aɔ̃ Lafɛ̃ɛi inɛi Izirɛli ŋa, domi do gbugbã nlaɛ í kɔ̃ kuwã iyi í cea baam Davidi waati iyi í ni,

¹⁶ hai ajɔ iyi ǹ nya zamaam inɛi Izirɛli ŋa wa hai ilɛi Ezibiti, n kù cica ilu gɔ si dimii inɛi Izirɛli ŋa tengi bii aa maam ile bii an maa n wa, amma Davidii ǹ cica ku jɛ ilaalui zamaam inɛi Izirɛli ŋa.

¹⁷ Baam Davidi í dasi idɔ nŋu ku ma ile wo iyi á jɛ ti Aɔ̃ Lafɛ̃ɛi inɛi Izirɛli ŋa.

¹⁸ Amma Aɔ̃ Lafɛ̃ɛ í sɔ̃ɔ í ni, si bɛi ì lasabu i maam ile, lasabuɛu í sĩa.

¹⁹ Nŋu de, kù jɛ awɔi aa ma ileu, amaɛ iyi ì bíi á maam ileu.

²⁰ Aɔ̃ Lafɛ̃ɛ í kɔ̃ kuwã iyi í ceu. Ǹ dede si agbɛi baam Davidi, nɔ ǹ buba si bommai Izirɛli bɛi Aɔ̃ Lafɛ̃ɛ í fɔu, nɔ ǹ ma ile iyi í jɛ ti Aɔ̃ Lafɛ̃ɛi inɛi Izirɛli ŋa.

²¹ Nɔ si inɔ ileu ǹ jɔ̀ inya bii kpakoi akabuui Aɔ̃ Lafɛ̃ɛu í wa, akabuu iyi í dĩ do bala nwa ŋa waati iyi í nya ŋa wa hai ilɛi Ezibiti.

Kutɔɔi Salomɔɔ

²² Ŋɔi Salomɔɔ í leekĩ wajui bi kuweei Aɔ̃ Lafɛ̃ɛ si wajui zamaai Izirɛliu fei, í wu awɔ lele í ce kutɔɔ.

²³ Si kutɔɔɛu í ni, Aɔ̃ Lafɛ̃ɛi inɛi Izirɛli ŋa, inɛ kãma kù wa lele walakɔ ilɛ iyi í yɛ bɛi awɔ. Ì ya kɔ̃ akabuuɛ nɔ ì ya leekĩ dee dee bi woo ce icɛɛ ŋa iyi à waa jirimaɛ do idɔ nŋa fei.

²⁴ Bɛɛbɛi ì cea baam Davidi kuwã, nɔ ideɛ iyi ì fɔ do gɛlɛɛ ì jɔ̀ í kɔ̃ nnyi do gbugbãɛ.

²⁵ Bɛbɛi, Aɔ̃ Lafɛ̃ɛi inɛi Izirɛli ŋa, kɔ̃ kuwã iyi ì nyi ì cea baam Davidi ì ni kaa kua inɛ iyi á tɛkɛ siɛ si bommai Izirɛli, bii amaɛ ŋa à waa mu ara nŋa dee dee si kuwɛɛ nŋa, nɔ à waa jirimaɛ bɛi nŋu mɔ í ce.

²⁶ Debɛi, Ilaaɔ̃ Lafɛ̃ɛi inɛi Izirɛli ŋa, jɔ̀ kuwã iyi ì cea woo ce icɛɛ baam Davidiu ku kɔ̃.

²⁷ Amma do ntɔ, aa ba bi kuwa si ilɛ ihɛ̃? Ntɔ ntɔ lelei Aɔ̃ í la í caa nɔ í mɔngɔ ku gbaɛ. Bɛirei ile iyi ǹ maɛu á ce ku toɛ.

²⁸ Do nŋu fei, Aɔ̃ Lafɛ̃ɛm, sinda wa ikpa bi tom, gbɔ kutɔɔm, gbɔ anu iyi amu woo ce icɛɛ ǹ wa n dɔ̃ siɛ nnyiu ihɛ̃.

²⁹ Jɔ̀ iju jiidaɛ ku maa kãsi kpasɛ̃u ihɛ̃ dasãò idũ, domi tengi bɛi awɔ takaɛ ì ni aa wa. Gbɔ kutɔɔm iyi ǹ wa n ceu ihɛ̃.

³⁰ Jɔ̀ i cea amu woo ce icɛɛ do inɛi Izirɛli inɛɛ ŋa mii iyi à waa tɔɔ waati iyi à naa tengi ihɛ̃. Jɔ̀ i ya gbɔ kutɔɔ nwa hai lelei Aɔ̃ tengi bii ì wa, nɔ i kpa idei dulum du wa.

³¹ Bii inɛ gɔ wa yɛ taalei inɛ mmu gɔ, aa tilasi inɛ iyi à waa yɛ taaleɛui a ni koo ce kugbasi do irii nŋu takaɛ. Bii í naa í ce kugbasiu si inɔ kpasɛ̃i Aɔ̃ Lafɛ̃ɛ si bi kuweeu,

³² ǹ wa n tɔɔɛ, de siɛ itĩ hai lelei Aɔ̃, nɔ i kiiti nŋa. Bii lafɛ̃ɛ í ce laalɔ do ntɔi, sãa kuce laalɔɛ, bii í nɔ í nɛ ntɔ, náa ntɔɛ.

³³ Waati iyi inɛi Izirɛli inɛɛ ŋa à ce dulum bi tɛɛ nɔ mbɛɛ nŋa ŋa à kãmia ŋa, bii à nyi wa bi tɛɛ nɔ à tɔɔɛ suuru nɔ à waa saabuɛ, bii à waa ce kutɔɔ à waa cɔò ikpa bi ileu ihɛ̃,

³⁴ gbɔ kutɔɔ nŋa wa hai lelei Aɔ̃, kpa idei dulum du ŋa, baaò ŋa wa si ilɛ iyi ì na bala nŋa ŋa.

³⁵ Bii ijĩ kù waa wɔ nɔ agbɛ í mu na dulum iyi à ce, bii à na a ce kutɔɔ si ileu ihɛ̃ nɔ à waa saabuɛ à tɔɔɛ suuru, nɔ à jɔ̀ dulum du ŋa si na iyi í jɔ̀ ì kpã ŋa iju,

³⁶ gbɔ kutɔɔi woo ce icɛɛ ŋa wa hai lele nɔ i kpa idei dulum du ŋa. Nyisi ŋa kpãa jiida iyi aa maa nɛ si nɔ i jɔ̀ ijĩ ku wɔ si ilɛ iyi ì mu nŋa í jɛ tubu nŋau.

³⁷ Waati iyi ari á naa walakɔ patapoo walakɔ ibũ tũtũ walakɔ bɔ̃ɔi amaajɛ mmu ŋa walakɔ angocange do kɛtɛngbo ŋa, walakɔ bii mbɛɛ ŋa à na à tɛsi ilɛu walakɔ wahala ŋa do bɔ̃ɔ dimi ikã ikã baa yooma fei,

³⁸ bii à ce kutɔɔ na irii zamaaɛ inɛi Izirɛli ŋa nɔ inɛ fei í mà kurara iyi nŋu í ce, nɔ à to awɔ nŋa wa ikpa bi ileu ihɛ̃,

³⁹ gbɔ kutɔɔ nŋa wa hai lelei Aɔ̃ bi kuwaɛ. Kpa idei dulum du ŋa, nɔ i cea inɛ fei bɛi daaɛ í yɛ, domi awɔ akãi ì mà idɔi amanɛ ŋa fei sãa sãa.

⁴⁰ Do yaase bɛɛbɛ, aa maa jirimaɛi si kuwɛɛ nŋa fei si ilɛ iyi ì mua bala nwa ŋa.

^41-42 Waati iyi aa maa fɔ idei kulai iriɛ do bɛi ì waa ce icɛ do gbugbã nla nla, inɛi ilɛ mmu ŋa do inɛ njoo gɔ iyi kù jɛ inɛi Izirɛli zamaaɛ, aa gbɔ nɔ a naa a tɔɔɛ si inɔ ileu ihɛ̃.

⁴³ Jɔ̀ i gbɔ kutɔɔ nŋa wa hai lele bi kuwaɛ, nɔ i muu nŋa mii iyi à tɔɔɛ fei ku ba inɛi andunya fei ku gbɔ iriɛ nɔ a jirimaɛ bɛi inɛi Izirɛli zamaaɛ ŋa. Nɔ aŋa fei a mà iyi iriɛi à ya kpe si ile iyi ǹ ma ǹ nyaa ikãu ihɛ̃.

⁴⁴ Waati iyi zamaaɛ á na ku fita ku bɔ igũ si mbɛɛɛ ŋa si bɛi awɔ takaɛ ì jilɛ nŋa, bii à tɔɔ awɔ Aɔ̃ Lafɛ̃ɛ à waa cɔò ilu iyi ì cicau do ile iyi ǹ ma do iriɛu ihɛ̃ wa,

⁴⁵ jɔ̀ i gbɔ kutɔɔ nŋa wa hai lelei Aɔ̃ nɔ i sobi ŋa a jɛ igũ.

⁴⁶ Ntɔ ntɔ inɛ kãma kù wɛɛ iyi ci ya ce dulum. Waati iyi aa na a ce dulum bi tɛɛ, bii idɔɔkɔ̃ɛ í dede si ŋa nɔ ì dasi ŋa si awɔi mbɛɛ ŋa à mu ŋa aru à nɛò ŋa ilɛ mmu jĩijĩ walakɔ amɛɛ,

⁴⁷ bii à kpaasi idɔ nɔ à sinda wa bi tɛɛ nɔ à waa tɔɔɛ suuru hai ilɛi inɛ ŋa iyi à mu ŋau à waa ni, à ce kurara, à ce dulum nɔ à ce laalɔ ŋa,

⁴⁸ bii à nyi wa bi tɛɛ do idɔ nŋa fei do lasabu nŋa fei, bii à waa tɔɔɛ hai ilɛ bii à waa mu ŋa aruu à waa cɔò ikpa ilɛ iyi ì mua bala nŋa ŋa do ilu iyi ì cica do ile iyi ǹ ma do iriɛu,

⁴⁹ jɔ̀ i gbɔ kutɔɔ nŋa wa hai lele bi kuwaɛ, nɔ i sobi ŋa.

⁵⁰ Kpa idei dulum dii zamaaɛ ŋau do kurara iyi à ceɛ fei, nɔ jɔ̀ inɛ ŋa iyi à waa mu ŋa aruu a ce araare nŋa,

⁵¹ domi zamaaɛ ŋai aŋa iyi ì nya wa hai ilɛi Ezibiti hai si inyai wahala nla nlau.

⁵² Cea amu do zamaaɛu fei didɔ̃ nɔ i gbɔ kutɔɔ nwa ku ba i ce nwa amuai mii iyi à tɔɔɛ fei,

⁵³ domi awɔ Aɔ̃ Lafɛ̃ɛ awɔi ì cica wa hai si dimii andunya fei í jɔ̀ à jɛ tɛɛ, si bɛi ì sɔ̃ Moizi woo ce icɛɛu, waati iyi ì nya bala nwa ŋa wa hai ilɛi Ezibiti.

Salomɔɔ wa tɔɔ kuweei Ilaaɔ̃

⁵⁴ Waati iyi Salomɔɔ wa ce kutɔɔu bɛ fei, wa gulɛi si wajui bi kuweeu nɔ í to awɔ lele. Waati iyi í tɔɔ Aɔ̃ Lafɛ̃ɛ í tã, ŋɔi í dede

⁵⁵ í leekĩ, nɔ í weea zamaai Izirɛli iyi í tɔtɔɔ bɛ fei wa ni,

⁵⁶ ǹ saabu Aɔ̃ Lafɛ̃ɛ iyi í mua zamaaɛ kusĩmi si bɛi í ce kuwãɛ ŋau. Kuwã didɔ̃ɛ ŋa iyi Moizi woo ce icɛɛ í sɔ̃ wa fei, baa akã kù gbe iyi kù ce.

⁵⁷ Aɔ̃ Lafɛ̃ɛ nwa ku wɛɛ do awa bɛi í wɛɛ do bala nwa ŋa tako. Ku maà kɔ̀si wa má nɔ ku maà fũsi wa awɔ,

⁵⁸ amma ku sinda idɔ nwa ŋa bi tɛɛ ku ba ka ce isɛɛnɛ nwa bɛi í bi, nɔ ka maa jirima ideɛ ŋa do woodaɛ ŋa do asaiya ŋa iyi í jilɛa bala nwa ŋau.

⁵⁹ Aɔ̃ Lafɛ̃ɛ ku ya maa ye gigii mii ŋa iyi ǹ tɔɔɛu dasãò idũ, ku ba waati kãma fei ku ya maa sobi wa, hai iŋɛ do amu takam fei, domi awa zamaaɛ ŋai.

⁶⁰ Nɔ inɛi andunya fei ku mà iyi Aɔ̃ Lafɛ̃ɛ nŋu akãi í jɛ Ilaaɔ̃, nɔ mmuɛ gɔ kù wɛɛ má.

⁶¹ Na nŋu, i jɔ̀ idɔ nŋɛ ku wa si Aɔ̃ Lafɛ̃ɛ mam mam bɛi í wa siɛ nnyi ku ba i ya maa jirima ideɛ do woodaɛ ŋa.

Kuwee ŋa iyi à cea Aɔ̃ Lafɛ̃ɛ

⁶² Ŋɔi ilaaluu do inɛi Izirɛli ŋau fei à cea Aɔ̃ Lafɛ̃ɛ kuwee ŋa.

⁶³ Salomɔɔ í jɔ̀ à kpa kɛtɛ kombo dubu kɔnfia do minji (22.000) do angudã ŋa do iwo ŋa dubu cifa (120.000) à ceò kuweei anu akã. Bɛɛbɛi ilaaluu do inɛi Izirɛli ŋau à jɛò jingaui kpasɛ̃i Aɔ̃ Lafɛ̃ɛu ku cĩ.

⁶⁴ Ajɔ nŋu bɛ ilaaluu í ce kuwee ku ba aninii bantumau ku jɛ ti Ilaaɔ̃ má, si na iyi í jɔ̀ bi kuweei isɔ nkpa iyi í wa wajui kpasɛ̃i Aɔ̃ Lafɛ̃ɛu í kere, nɔ kù yɔkɔ kù gba kuwee ŋau fei. Tengi bɛi à ce kuwee iyi à ya jo si ina fei sãa sãa do ti anu akã do ti amaajɛ ŋa.

⁶⁵ Si waatiu bɛ Salomɔɔ í jɛ jingauu do inɛi Izirɛli ŋa fei. Akpɔ nla nlai í naa hai Lebo-Amati ikpa awɔ njɛi kpãai inunu hee ku bɔ acãi inyii Ezibiti ikpa awɔ cangai kpãai inunu. À ce jingauui ajɔ maatɛ̃ɛ. À ce ajɔ mɛɛje titã, si anyiɛ, nɔ à ce ajɔ mɛɛje mmuɛ má.

⁶⁶ Iyi à jɛ jingauu à tã ŋɔi Salomɔɔ í ni zamaau ku nɛ. Ŋɔi à weea ilaaluu, nɔ à nɛ ide nŋa ŋa do inɔ didɔ̃ na jiida iyi Aɔ̃ Lafɛ̃ɛ í cea Davidi woo ce icɛɛ do inɛi Izirɛli zamaaɛ ŋau.