Ilaalu 1, 7 - Bibeli do fee

Ilei ilaalu ku ma

¹ Salomɔɔ í ma ilei nŋu takaɛ. Adɔ̃ maatɛtai í ce í bɛi í kpa iriɛ mam mam.

² Titã í jɔ̀ à ma ile iyi à ya kpe ilei agboi Libãa. Kusɔɛ í wɛɛi agbãawɔ cĩɔ, kucĩɛ mɔ agbãawɔ ciitaa, kugbokaɛ mɔ agbãawɔ kuntaa. Ŋɔi à gũ jĩi ndii sɛɛdi ŋa fii mɛɛ à jɛ sɔbeɛ ŋa. Nɔ à tɛsi kpatakui sɛɛdi ŋa à bɛi à ce ileu si antaiɛ.

³ À ce laasii ileui do jĩi ndii sɛɛdi ŋa. Jĩi ŋau ara ciiji do miiui, nɔ à kpɛ̃ ŋa tuuba mɛɛta. Tuuba akã fei ara maatũ. Si antaii sɔbe ŋaui à lesi ŋa.

⁴ Si cingaai ileu akã fei, fɛrɛnti tuuba mɛɛtai à nya si. Fɛrɛnti ŋau fei à waa cɔ njɛi.

⁵ Fɛrɛnti ŋau do jĩi ndu ŋa ŋau fei, à ce ŋai gonta sisɔ do gonta kandaau fei à waa munga. À ce gambo ŋaui à waa cɔ njɛ tuuba mɛɛta.

⁶ Si anyiɛ nɔ à ce ile do sɔbe ŋa hai bii aa ya lɔò kabai ilaaluu. Kusɔɛ í wɛɛi agbãawɔ ciitaa, kucĩɛ mɔ agbãawɔ kuntaa. Nɔ à ceaa bi ku tɛ ku lɔò. Bi ku tɛ ku lɔòu mɔ í nɛ sɔbe ŋa. Nɔ à kɔ aŋa fei si sɔbe ŋau.

⁷ Nɔ à ce kabai ilaaluu do jĩi ndii sɛɛdi hai ilɛ hee ku bɔ si laasiu. Tengi bɛi ilaaluu á ya cea inɛ ŋa kiiti.

⁸ Í jɔ̀ à ma ile bii í waui si bantuma ikã, kù wa inya akã do kabai kiitiu. Dimi akãi í ma ŋa. Nɔ í jɔ̀ à ma ilei ama inaaboi Faraɔ̃ iyi wa jɛ aboɛ mɔ si yaase dimi akã.

⁹ À ma ile ŋau feii do kuta jiida kusĩa ŋa iyi à gbe. Kuta ŋau à gbe ŋai si bɛi kusɔ nŋa í nɛ ku jɛ. Nɔ arai kuta ŋau do inɔi ileu hee do anyiu fei à cooi í sĩa hai ilɛ hee ku bɔ lele. Bɛɛbɛi à coo hee ku koo si bindi nlau.

¹⁰ À nyɔ icu ŋaui do kuta jiida kusĩa ŋa iyi à la, kusɔ nŋa í wɛɛi agbãawɔ mɛɛwa, gɔgɔ ŋa mɔ mɛɛjɔ.

¹¹ Si antaii icuui à lesi kuta jiida kusĩa ŋa iyi à gbe si bɛi kusɔ nŋa í nɛ ku jɛu nɔ à kpa iriɛ do kpatakui jĩi ndii sɛɛdi ŋa.

¹² À ma bindii bantuma nlau à kaakoò kpasɛ̃u. Tuuba mɛɛta à maai do kuta ŋa iyi à gbe, tuuba akãu mɔ do kpatakui sɛɛdi si bɛi à cea bantumai kpasɛ̃i Aɔ̃ Lafɛ̃ɛu do bi ku lɔò kabai ilaaluu.

Icɛ ŋa iyi à jilɛa Hiramu

^13-14 Mɔkɔ gɔ í wa Tii à ya kpoo Hiramu. Mɔkɔu í ya ce icɛi isɔ nkpa. Baaɛ inɛi Tii, amma iyeɛ inɛi dimii Nɛfitalii, nɔ jaaɔ̃i. Í nɛ kumà ntɔ ntɔ nɔ í nɛ bisi. Í mà icɛi isɔ nkpa ku ce ntɔ ntɔ. Na ŋɔi í ce ilaalu Salomɔɔ í jɔ̀ à koo kpoo wa hai Tii ku na ku cea nŋu jĩnɛ ŋa iyi nŋu í nɛ bukaataɛ ŋau fei.

Sɔbei isɔ nkpa ŋa

¹⁵ Ŋɔi Hiramu í ce sɔbei isɔ nkpa minji. Kugboka nŋa í wɛɛi agbãawɔ mɛɛwa do mɛɛjɔ, nɔ kusɔi ikũ iyi á kaako ara akã fei í wɛɛi agbãawɔ maateeji.

¹⁶ Ŋɔi í yɔ isɔ nkpa í ceò booda minji má iyi aa lesi antaii sɔbe ŋau. Kugbokai booda akã fei, í wɛɛi agbãawɔ miiu.

¹⁷ Ŋɔi í ce annya ŋa do ama sesee ŋa iyi aa bii si antaii sɔbe ŋau. Í ce ŋai do isɔ nkpa. Sɔbe akã fei í nɛ ara mɛɛje.

¹⁸ Ŋɔi í ce boodai isoi jĩi ndii gerenadi tuuba minji si annya ŋau í kaakoò tengi bii sɔbeu í kpa iri.

¹⁹ Si antaii sɔbe ŋau à ce si booda mmu gɔ má iyi í jɔ kokoi jĩi ndii lisi. Kugboka nŋa í wɛɛi agbãawɔ mɛɛ.

²⁰ Si antaii bii annyau í kpante, tengi bɛi à lesi boodai gerenadi cĩɔ minji à kaakoɛò.

²¹ Ŋɔi í lɔ sɔbe minji ŋau si anu koofai kpasɛ̃i Aɔ̃ Lafɛ̃ɛu. Ti njɛu, í sɔɔ Yakɛ̃ɛ, waatɔ Ilaaɔ̃ í ya mua inɛ gbugbã, ti cangau mɔ í sɔɔ Boazi, waatɔ gbugbã í wa si Ilaaɔ̃.

²² Hee si antaii sɔbe ŋau boodai kokoi jĩi ndii lisi ŋaui à wa bɛ. Bɛɛbɛi à kpaò irii icɛi sɔbe ŋau.

Dangala nla iyi à ce do isɔ nkpa

²³ Ŋɔi Hiramu í yɔ isɔ nkpa í ceò dangala nla. Kucĩɛ í wɛɛi agbãawɔ mɛɛwa, kugbokaɛ mɔ agbãawɔ miiu, bokotoɛ mɔ agbãawɔ kuntaa.

²⁴ Do ilɛi itĩi dangalau, í ce si boodai kaale ŋa à kaakoɛò, agbãawɔ akã fei, booda ara mɛɛwai í ce si. Nɔ í cooi tuuba minji. Í yɔ boodaui ajɔ do dangalau.

²⁵ Dangalau wa lesii si antaii kɛtɛ maateeji ŋa iyi à ce do isɔ nkpa. Kɛtɛ mɛɛta wa cɔ awɔ njɛi kpãai inunu, mɛɛta mɔ awɔ cangaɛ, mɛɛta má nunui alɛ, mɛɛta má nunui daakɔ. Dangalau í wa antaii kɛtɛ ŋau, nɔ fiti nŋa fei í wa abɛɛ.

²⁶ Sisimaɛ í to kucĩi ataawɔ nɔ andɛu mɔ iyi í yɛ bɛi kɔɔfu, à cooi bɛi kokoi jĩi iyi í fũ anu. Á yɔkɔ ku gba zakai liiti dubu cinɛ (80.000).

Sarɛtii isɔ nkpa ŋa

²⁷ Ŋɔi Hiramu í ce sarɛtii isɔ nkpa mɛɛwa. Kusɔi akã fei í wɛɛi agbãawɔ mɛɛ, kucĩɛ mɔ agbãawɔ mɛɛ, kugbokaɛ agbãawɔ mɛɛta.

²⁸ Do yaase bɛi à ce ŋa wee. Do isɔ nkpa ŋai à ceò cingaa mɛɛ ŋau à bɛi à bɔsi ŋa si isɔi gonta ŋau.

²⁹ Isɔ ŋa iyi à wa aninii ti gonta ŋau, à ce si boodai muusu nla ŋa do kɛtɛ ŋa do serubɛ̃ɛ ŋa. Nɔ si lelei booda ŋau do si ilɛ nŋa à ce boodai kokoi jĩi ŋa má wa kɔa kɔa si isɔi gonta ŋau.

³⁰ Sarɛti akã fei í nɛ wuruui isɔ nkpa mɛɛ do isɔ nkpa iyi wa mu ŋa. Nɔ gonta mɛɛ ŋau à nɛ isɔ ŋa si bii dangalau wa lesi. Jĩnɛɛ ŋa iyi à ce à jɛ bɛi kutɛ ŋau, à tɔtɔɔ à yɔ ŋai do arau ajɔ, amma a kù to boodai kokoi jĩi ŋau.

³¹ Sarɛtiu takaɛ í nɛ gonta mɛɛ, nɔ si inɔɛ ikpa lele à nya si andɛ bokoto si bii dangalau á lesi. Kugbokaɛ í wɛɛi agbãawɔ akã nɔ bokotoɛ í wɛɛi agbãawɔ akã do bubu. Nɔ à ce si nŋu mɔ booda.

³² Kutɛ mɛɛ ŋau fei abɛi sarɛtiui à wa, nɔ isɔ iyi wa mu kutɛ ŋau, si sarɛtiui wa gũsi. Kutɛ akã fei, kugbokaɛ í wɛɛi agbãawɔ akã do bubu.

³³ À ce wuruu ŋaui bɛi ti sarɛti ku bɔ igũ. Wuruu ŋau, à ce jĩnɛ ikã ikã nŋa feii do isɔ nkpa iyi à yɔ.

³⁴ Sarɛtiu í nɛ gonta mɛɛ. Si gonta akã fei à dasi isɔ gɔ í koo í gũsi arau aŋaò à tɔtɔɔ à jɛ akã.

³⁵ À kpa irii sarɛtiu do bokoto gɔ iyi kugbokaɛ í to bubui agbãawɔ, nɔ wa lesi antaii isɔi arai sarɛtiu. Si antaii bii wa lesiu do araui fei, à tɔtɔɔ ŋai à jɛ akã.

³⁶ Nɔ à ce si arau mɔ boodai serubɛ̃ɛ ŋa do muusu nla ŋa do amaawɔi kpakpa ŋa si bii inya í wa fei.

³⁷ Bɛɛbɛi à ce sarɛti mɛɛwa ŋau. Isɔ nŋa do yaase nŋa fei dimi akãi í jɛ.

³⁸ Hiramu í ce jɛɛ nantaa mɛɛwa do isɔ nkpa má iyi aa lesi antaii sarɛti akã fei. Kugbokai akã fei í wɛɛi agbãawɔ mɛɛ, nɔ í ya gba liiti dubu do cĩɔ mɛɛfa (1.600).

³⁹ Ŋɔi í jilɛ sarɛti miiu do awɔ njɛi ileu, miiu mɔ do awɔ canga. Dangala nlau mɔ í jilɔɔ awɔ njɛi ileu si gontai bantumau do ikpa awɔ cangai kpãai inunu ikpa nunui daakɔ.

Mii ŋa iyi à ce do isɔ

⁴⁰ Ŋɔi Hiramu í ce bi ku kosi ilúlu ŋau do pɛɛu ŋau do kɔɔfu ŋau. Nɔ í kpa irii icɛi kpasɛ̃i Aɔ̃ Lafɛ̃ɛ iyi ilaalu Salomɔɔ í dasiɛ ku ce.

⁴¹ Mii ŋa iyi í ceu wee. Sɔbe minji ŋau do isɔ nkpa minji iyi à lesi antaii sɔbe ŋau, nɔ í dasi annya tuuba minji í biiò antaii sɔbeu.

⁴² Si annya tuuba minji iyi à biiò antaii sɔbe ŋaui à mási boodai gerenadi cĩɔ mɛɛ (400).

⁴³ Nɔ í ce icu bi ku lesi mɛɛwa do jɛɛ nantaa mɛɛwa si antaii icu ŋau,

⁴⁴ do dangala nlau do kɛtɛ maateeji ŋa iyi à wa abɛɛ,

⁴⁵ do bi ku kosi ilúlu ŋau do pɛɛu ŋau do kɔɔfu ŋau. Jĩnɛ ŋau bɛ fei, ilaalu Salomɔɔ í jɔ̀ Hiramu í cooi do isɔ nkpa iyi à yɔrɔ na kpasɛ̃i Aɔ̃ Lafɛ̃ɛu.

⁴⁶ Ilaaluu í jɔ̀ à yɔ isɔ ŋau wai hai lɔɔmai idoi Zuudɛ̃ɛ, si ilɛi amà gɔ si afei Sukɔtu do Saritãa.

⁴⁷ Salomɔɔ í jilɛ jĩnɛ ŋau nkpɔ nkpɔ hee í jɔ̀ a kù dɛ a mà kuwoi isɔ nkpa zaka bɛi à ceò ŋa.

⁴⁸ Salomɔɔ í nyi í jɔ̀ à ce mii ŋa iyi kpasɛ̃i Aɔ̃ Lafɛ̃ɛu í nɛ bukaataɛ má fei. Í jɔ̀ à ma bi kuwee do wura, do taabui wura bii à ya lesi pɛ̃ɛ iyi à jilɛa Ilaaɔ̃,

⁴⁹ do bi ku lesi fitila ŋau. Bii ku lesi fitila ŋau à ce ŋai do wura alala nɔ à jilɛ ŋa si wajui ile iyi í má í reu, miiu do awɔ njɛ, miiu do awɔ canga. Nɔ à ce nŋa boodai kokoi jĩi ŋa do fitila ŋa do akpa ku kpa fitila ŋau. À ce ŋai do wura.

⁵⁰ Nɔ à ce dangala ŋa do kasɛ ŋa do kɔɔfu ŋa do ama jɛɛ ŋa do ama caka ŋau fei do wura. Bi ku bɔsi gamboi ile iyi í má í reu do ti gamboi ile kumáu, à ce ŋai do wura.

⁵¹ Bɛɛbɛi icɛi kpasɛ̃i Aɔ̃ Lafɛ̃ɛ iyi Salomɔɔ wa ceu fei í kpa iri. Ŋɔi í so isɔ fũfũ do wura ŋa do mii ŋa iyi Davidi baaɛ í jilɛa Aɔ̃ Lafɛ̃ɛ nɔ í naa í dasi bi ku jilɛ amanii kpasɛ̃i Aɔ̃ Lafɛ̃ɛu.