Ilaalu 1, 6 - Bibeli do fee

Kumai kpasɛ̃i Aɔ̃ Lafɛ̃ɛ

¹ Ilaalu Salomɔɔ í sinti kpasɛ̃i Aɔ̃ Lafɛ̃ɛ ku mai si anyii adɔ̃ cĩɔ mɛɛ do cinɛ iyi inɛi Izirɛli ŋa à fitaò wa hai ilɛi Ezibiti. Si adɔ̃ mɛɛsiai bomma ku jɛui icɛ ŋau í sinti si cukpa iyi à ya kpe Zivu waatɔ cukpa minjisiai adɔ̃.

² Kusɔi ile iyi Salomɔɔ wa maa Aɔ̃ Lafɛ̃ɛu í wɛɛi agbãawɔ kita, kucĩɛ mɔ agbãawɔ kɔnfia, kugbokaɛ mɔ agbãawɔ kuntaa.

³ À ma ile keeke gɔi wa gũsi kucĩi ileu takaɛ hai bii aa ya lɔò. Kusɔɛ í mungai do kucĩi ileu, kucĩɛ mɔ agbãawɔ mɛɛwa.

⁴ Nɔ ilaaluu í jɔ̀ à cea ileu fɛrɛntii annya ku nɛ gbugbã ŋa.

⁵ Ŋɔi í jɔ̀ à ma ile kukpɛkɛ ŋa à gũsi idĩi ile nlau à kaakoɛ.

⁶ Si ile kukpɛkɛu ilaawa ŋa iyi à wa ilɛu kucĩ nŋa í wɛɛi agbãawɔ miiu, ti aniniu agbãawɔ mɛɛfa, mɛɛtasiau mɔ agbãawɔ mɛɛje. Bɛɛbɛi à coo si na iyi í jɔ̀ sisimai idĩu í kaye wa kooi do lele, ku ba a maà lu idĩu na kaya ŋau.

⁷ Si waatii ileu ku ma, kuta ŋa iyi à ce sɔɔluɛ hai bii à ko ŋa waui à ceò icɛu. Na ŋɔi í jɔ̀ a kù gbɔ ibai mataaka kãma walakɔ dagba hee má jɛ jĩnɛi isɔ gɔ.

⁸ Andɛi ile kukpɛkɛu í wai do awɔ njɛi ileu, nɔ à ma bi ku gũ ku bɔò si kukpɛkɛ minjisia do mɛɛtasia.

⁹ Iyi Salomɔɔ í ma ileu í tã, nɔ í jɔ̀ à kɔɔ do kpatakui jĩi ndii sɛɛdi ŋa.

¹⁰ À ma ile mmu ŋa à masi ile kukpɛkɛu. Ile ŋau, akã nŋa fei, í wɛɛi agbãawɔ miiu, nɔ à lesi jĩi ndii sɛɛdi ŋa í koo í gũsi ileu í tɔtɔɔ ŋa.

¹¹ Ŋɔi Aɔ̃ Lafɛ̃ɛ í sɔ̃ Salomɔɔ í ni,

¹² awɔi ì waa maam ileu ihɛ̃. Bii ì waa nɛ si bɛi woodam í bi, nɔ ì waa ceò ŋa icɛ, nɔ ì waa dasi ŋa iju nɔ ì waa too ŋa, an jɔ̀ kuwã iyi ǹ cea Davidi baaɛu ku kɔ̃ bi tɛɛ.

¹³ An na n wa inɔi inɛi Izirɛli ŋa nɔ n kaa n fũsi ŋa awɔ pai.

Boodai inɔ ileu

¹⁴ Iyi Salomɔɔ í ma ileu í tã,

¹⁵ ŋɔi í jɔ̀ à bii idĩi inɔu do kpatakui sɛɛdi ŋa hai ilɛ hee ku bɔ laasiu, nɔ à bii ilɛu mɔ do kpatakui sipɛrɛɛsi.

¹⁶ Ŋɔi à nya agbãawɔ kɔnfia à kendi inɔi ileu do jĩi ndii sɛɛdi hai ilɛ hee ku bɔ si jĩi ndii laasi ŋau, nɔ à jɔ̀ afeu bɛi ku jɛ ile iyi í má í reu.

¹⁷ Agbãawɔ ciiji iyi í gbeui í jɛ inɔi ile kumáu.

¹⁸ Jĩi ndii sɛɛdi ŋa iyi à wa inɔi ileu à ce si boodai kaale ŋa do kokoi jĩi ŋa iyi à cĩ anu. Fei ndɛɛ à cooi do jĩi ndii sɛɛdi, a kaa yɛ kuta baa akã bɛ.

¹⁹ Salomɔɔ í jɔ̀ à teese ile iyi í re do kumáu ku ba ku jilɛ kpakoi akabuui Aɔ̃ Lafɛ̃ɛ tengi bɛ.

²⁰ Kusɔi ileu do kucĩɛ do kugbokaɛ í wɛɛi agbãawɔ kɔnfia. Nɔ à biiɛ do wura alala. Do wajuɛ nɔ à ma bi kuwee do jĩi ndii sɛɛdi, nɔ à biiɛ do wura.

²¹ Ŋɔi à bii inɔi ileu do wura alala, nɔ à dasi ama seseei wura gɔ si andɛi ile iyi í má í reu.

²² Bɛɛbɛi à bii ileu fei do wura do bi kuwee iyi í wa wajui ile iyi í má í reu fei.

²³ À gbe jĩi ndii olivii sako à ceò serubɛ̃ɛ minji iyi aa dasi ile iyi í má í reu. Kugboka nŋa agbãawɔ mɛɛwai.

²⁴ Ikpa akãi serubɛ̃ɛ akã fei í wɛɛi agbãawɔ miiu, waatɔ serubɛ̃ɛ akã fei, kusɔi ikpaɛ ŋa í wɛɛi agbãawɔ mɛɛwa hai kɔɔ ihɛ̃ ku bɔ kɔɔ do ihɔ̃.

²⁵ Serubɛ̃ɛ minji ŋau fei à waa mungai nɔ à jɔ njɛi mam mam.

²⁶ Kugbokai serubɛ̃ɛ akã fei í wɛɛi agbãawɔ mɛɛwa.

²⁷ Ŋɔi Salomɔɔ í jɔ̀ à jilɛ ŋa hee aninii inɔi ileu. Nɔ ikpa nŋa wa fũ. Ikpai inɛ sinteu wa lu idĩ akã, ti minjisiau mɔ wa lu idĩ cingaa iyi ihɔ̃. Nɔ imɔi ikpa ŋa iyi à gbe ŋau à kò si aninii ileu.

²⁸ Nɔ à bii serubɛ̃ɛ ŋau do wura.

²⁹ Nɔ à ce si arai idĩi inɔ minji ŋau fei boodai serubɛ̃ɛ ŋa do ti kpakpa ŋa do ti kokoi jĩi ŋa iyi à fũ anu.

³⁰ Ŋɔi à bii ilɛi inɔ minji ŋau fei do wura.

³¹ Salomɔɔ í jɔ̀ à cea anui ile iyi í má í reu gambo ku nɛ ku cĩ minji do jĩi ndii olivii sako. Kulai gambo ŋau do jĩi si bii à waa kãsi í gba ikɔ akãi kukpɛ̃ miiui idĩu.

³² À ce si gambo ku nɛ ku cĩ minji ŋau boodai serubɛ̃ɛ ŋa do kpakpa ŋa do kokoi jĩi ŋa iyi à fũ anu. Nɔ à jɔ́si gambo ŋau do booda ŋau fei wura.

³³ Bɛɛbɛi à ce gamboi ile kumáu mɔ, à ce itĩ minjii gambo ŋau do jĩi ndii olivii sako, gambo ŋau mɔ do jĩi ndii sipɛrɛɛsi. Kulai gambo ŋau do jĩi si bii à waa kãsi í gba ikɔ akãi kukpɛ̃ mɛɛi idĩu.

³⁴ Akãi gambo ŋau fei à cooi do kpataku minji. Bii à cũu nɔ ku ka si araɛ.

³⁵ Nɔ à ce si boodai serubɛ̃ɛ ŋa do kpakpa ŋa do kokoi jĩi ŋa iyi à fũ anu. Nɔ à jɔ́ nŋa si wura.

³⁶ Nɔ à ma idĩ í kaakoò bantumai ileu. Í maai tuuba mɛɛta do kuta ŋa iyi à gbe. Tuuba akãu í maai do kpatakui sɛɛdi.

³⁷ Si adɔ̃ mɛɛsiai bomma ku jɛi Salomɔɔ, si cukpai Zivui à nyɔ icui kpasɛ̃i Aɔ̃ Lafɛ̃ɛu.

³⁸ Nɔ si adɔ̃ maatakãsiai bomma ku jɛɛu, si cukpai Bulu iyi í jɛ cukpa mɛɛjɔsiaui à ma kpasɛ̃u à tã mam mam si bɛi í nɛ ku yɛ. Adɔ̃ mɛɛjei Salomɔɔ í ce si kpasɛ̃i Aɔ̃ Lafɛ̃ɛu ku ma.