Ilaalu 1, 5 - Bibeli do fee

¹ Bommai Salomɔɔ í sintii hai ido nlai Efarata ku bɔ ilɛi inɛi Filisi ŋa hee ku bɔ kɔɔi Ezibiti. Inɛi ilɛ ŋau bɛ à ya maa naaò amua ŋa wa, nɔ à waa cea Salomɔɔ icɛ si kuwɛɛɛ fei.

² Ajɔ akã fei, iyafũ tɔnu mɛɛsã do iyafũ tɔnu kɔnfia feeji kù wa sii í ya jɛ,

³ do kɛtɛ kombo ku nɛ kaato mɛɛwa do kɛtɛ ku bɔ degbe kɔnfia do angudã cĩɔ baka kabua ŋa do angbãi ŋa do ayɔ ŋa do ajɛɛ ŋa iyi à la à ce ikpo baasi.

⁴ Salomɔɔi í nɛ ilɛ ŋa iyi à wa ikpa nunui alɛi idoi Efarata do ilaalu nŋa ŋa fei hai Tifisa hee ku bɔ Gaza. Nɔ laakai ku sũ í wa si ilɛ ŋa iyi à kaakoɛ cingaa do cingaa fei.

⁵ Inɛi Zudaa do inɛi Izirɛli ŋa, hai Dãa hee ku bɔ Bɛɛseba à wɛɛ nŋai si laakai si kuwɛɛi Salomɔɔ fei. Inɛ fei í ya maa ce icɛi si ikoi jĩi ndii rezɛ̃ɛɛ do si ikoi jĩi ndii figiɛ do laakai ku sũ.

⁶ Aroi acĩ dubu mɛɛi (4.000) Salomɔɔ í nɛ iyi í jɛ ti acĩ ŋa iyi à ya fa sarɛtii igũɛ ŋa, nɔ í nɛ acĩ dubu maateeji (12.000) iyi à ya lea gaayi.

⁷ Woo mu ilɛ ŋaui à ya naaa Salomɔɔ sɔnda wa nŋu do inɛ ŋa iyi wa wo fei, inɛ fei í ya naaò sɔndau wai si cukpa iyi à jilɛaa, nɔ a ci ya jɔ̀ nkãma kù gaizia.

⁸ À ya naaa acĩɛ ŋa mɔ ɔɔzu do taka wa tengi bii à wa fei si bɛi à jilɛ nŋa. À ya naaa acĩ ŋa iyi à ya fa sarɛti ŋa do acĩ ŋa iyi à gbe fei sɔndau wa.

Salomɔɔ í re inɛ fei do bisi

⁹ Ilaaɔ̃ í mua Salomɔɔ bisi nla nla do laakai. Nŋui í jɔ̀ í nɛ kumà si ide ikã ikã iyi kukpɔɛ í re sãai itĩ tenku.

¹⁰ Bisii Salomɔɔ í re ti inɛi nunui daakɔ ŋau fei do ti inɛi Ezibiti ŋa fei.

¹¹ Nŋui í nɛ bisi í re amanɛ fei. Í re Etãa inɛi Ezira nɔ í re Emaa do Kalikoli do Daada amai Maholi ŋau, nɔ iriɛ í fita si ilɛ ŋa iyi à waa kaakoɛ fei.

¹² Í kpa mɔnda dubu mɛɛta (3.000) nɔ í nya iri ku kɔ̃ dubu do miiu (1.005).

¹³ Í fɔ idei jĩi ŋa, hai jĩi ndii sɛɛdii Libãa hee ku koo si jĩi ndii izɔpu iyi í ya fita si idĩi bindi. Í fɔ idei mɛɛmu ŋa mɔ do yɛi ŋa do mii ku cã ilɛ ŋa do cɛ̃ɛ ŋa.

¹⁴ Hai bii fei inɛ ŋa à ya naa bisiɛu ku gbɔi. Ilaalui andunya iyi í gbɔ baaui bisiɛu fei, í ya bɛ inɛ ŋa wai do iriɛ.

Salomɔɔ wa ce sɔɔlui kpasɛ̃i Ilaaɔ̃ ku ma

¹⁵ Hiramu ilaalui Tiiu, kpaasii ilaalu Davidii í jɛ wo ntɔ ntɔ. Waati iyi í gbɔ iyi Salomɔɔi à cica ilaalu ku sãsi agbɛi baaɛ Davidi, ŋɔi í bɛ inɛɛ ŋa a koo a coo fɔɔ.

¹⁶ Ŋɔi Salomɔɔ í ni a koo a sɔ̃ Hiramu a ni,

¹⁷ ì mà iyi baam Davidi kù yɔkɔ ku maa Aɔ̃ Lafɛ̃ɛɛ kpasɛ̃ na igũ ŋa iyi mbɛɛ ŋa à kaakoɛò hee í koo í to bii Aɔ̃ Lafɛ̃ɛ í jɔ̀ í tɛ ŋa isɛ.

¹⁸ Bɛbɛi Aɔ̃ Lafɛ̃ɛm í muum laakai ku sũ si kɔɔi ilɛ ŋau fei. Mbɛɛ kãma kù wɛɛ má, wahala kãma kù wɛɛ má.

¹⁹ Wee ǹ wa n lasabu n ma kpasɛ̃i Aɔ̃ Lafɛ̃ɛ si bɛi Aɔ̃ Lafɛ̃ɛ í sɔ̃ baam Davidi í ni, amaɛ iyi an sãsi agbɛɛ si bommau, nŋui á ma ile do irim.

²⁰ Bɛbɛi, jɔ̀ a koo a daam jĩi ndii sɛɛdii Libãa ŋa wa. Woo ce icɛm ŋa aa tɔtɔɔ do tɛɛ ŋa nɔ an sãa woo ce icɛɛ ŋau bɛi ì ni, domi ì mà iyi inɛ kãma kù wa si inɔ nwa iyi í mà jĩi ku da bɛi iŋɛ inɛi Sidɔ̃ɔ ŋa.

²¹ Iyi Hiramu í gbɔ idei Salomɔɔ, ŋɔi inɔɛ í dɔ̃ hee í caa nɔ í ni, ǹ saabu Aɔ̃ Lafɛ̃ɛ, nŋu iyi í mua Davidi ama ilu bisi wa gbãò zamaa nla nlau ihɛ̃.

²² Ŋɔi í jɛa Salomɔɔ í ni, ǹ gbɔ mii iyi ì tɔɔm wa sãa sãa. An ce bɛi ì bi fei si gãmɛi jĩi ndii sɛɛdi do ti sipɛrɛɛsi ŋau.

²³ Woo ce icɛm ŋa aa so ŋa wa hai Libãa a bɔò hee tenku. Hai bɛ aa ba ŋai bɛi à ya ba kpokpoo nɔ à tale si ŋa inɔ tenkuu wa hee à toò wa tengi bii ì bi. Hai bɛ nɔ n jɔ̀ a fũ ŋa, nɔ i jɔ̀ a naa a so ŋa. Mii iyi ǹ bi, nŋui í jɛ i ya maa baa kpasɛ̃m sɔnda wa.

²⁴ Ŋɔi Hiramu í mua Salomɔɔ jĩi ndii sɛɛdi ŋau do ti sipɛrɛɛsi ŋau zaka bɛi í bi.

²⁵ Nɔ Salomɔɔ mɔ í ya muaa bilee tɔnu dubu mɛɛfa (6.000) do ikpoi olivi jiida liiti dubu mɛɛjɔ (8.000) si adɔ̃ akã fei iyi a maa woò kpasɛ̃ɛ.

²⁶ Aɔ̃ Lafɛ̃ɛ í mua Salomɔɔ bisiui bɛi í wãaò. Nɔ laakai ku sũ í wa si aninii nŋu do Hiramu, nɔ à dĩ akabuu.

Salomɔɔ í jilɛ icɛi tilasi

²⁷ Ŋɔi Salomɔɔ í jilɛ icɛi tilasi ŋa nɔ í cica amanɛ dubu kuntaa (30.000) si ilɛi Izirɛli fei iyi aa coo.

²⁸ Si cukpa akã fei à ya nya amanɛ dubu mɛɛwai (10.000) à bɛ ŋa Libãa. Bɛi à ya ce icɛ cukpa akã nɔ a baa a naa a ce cukpa minji ide má. Adoniramui í jɛ inɛ ngboi icɛi tilasi ŋau.

²⁹ Salomɔɔ í nɛ inɛmɔkɔ dubu kitaò fɛɛwa (70.000) má iyi à ya so aso kuwo ŋa do amanɛ dubu cinɛ (80.000) iyi à waa gbe kuta ŋa si iri kutau,

³⁰ baka inɛ ngbo dubu mɛɛta do cĩɔ mɛɛta (3.300) iyi Salomɔɔ í jilɛ a maa cɔ woo ce icɛ ŋau.

³¹ Nɔ ilaaluu í ni a cica kuta nla kusĩa ŋa a gbe ŋa a nyɔò icui kpasɛ̃i Ilaaɔ̃u.

³² Ŋɔi woo ce icɛi Salomɔɔ ŋa do ti Hiramu ŋa do inɛi Gebali ŋa à gbe ŋa, nɔ à ce sɔɔlui jĩi do kuta ŋa iyi aa maò ileu.