Ilaalu 1, 4 - Bibeli do fee

Salomɔɔ í teese í jilɛ bommaɛ

¹ Salomɔɔi í jɛ ilaalui ilɛi Izirɛli fei.

² Irii akawe woo ce icɛɛ ŋa wee. Azaria amai Sadɔkui í jɛ woo weeu.

³ Elihorɛfu do Ahiya amai Sisa ŋai à jɛ woo kɔ tia. Zozafati amai Ahiludui í jɛ woo singa tiai ilaalu.

⁴ Benaya amai Yehoyadai í jɛ inɛ ngboi sooge ŋau. Sadɔku do Abiataa ŋai à jɛ woo wee ŋa.

⁵ Azaria amai Natãai í jɛ inɛ ngboi woo mu ilɛ ŋau. Zabudu amai Natãai wa jɛ woo wee do woo mua ilaaluu ikɔ.

⁶ Ahisaai í jɛ inɛ ngboi kpasɛ̃i ilaaluu nɔ Adoniramu amai Abudai í jɛ inɛ ngboi woo ce icɛi tilasi ŋa.

⁷ Salomɔɔ í jilɛ woo mu ilɛ maateeji si ilɛi Izirɛli fei. Aŋai à ya naaa ilaaluu do inɛi kpasɛ̃ɛ ŋa ijɛ wa. Inɛ akã nŋa fei í nɛ cukpa akã si adɔ̃ akã fei iyi á ya naaa ilaaluu mii ku jɛ wa.

⁸ Iri nŋa wee. Amai Uui í jɛ woo mu ilɛi iri kutai Efaraimu.

⁹ Amai Dekɛɛi wa mu Makasi do Saabimu do Bɛti-Semɛsi do Elɔ̃ɔ ku bɔ Bɛti-Hanaa.

¹⁰ Amai Hesɛdii wa mu Arubɔti do Soko hee do ilɛi Efɛɛ fei.

¹¹ Amai Abinadabui í nɛ ilɛi Dɔɔ fei. Tafati amai Salomɔɔi í jɛ aboɛ.

¹² Baana amai Ahiludui í nɛ Taanaki do Mɛgido do ilɛi Bɛti-Seãa fei iyi í wa kɔkɔi Saatãa do ilɛ ilɛi Yizireɛli, hai Bɛti-Seãa wa hee ku bɔ Abɛli-Mehola, hee koo kua Yokimeamu.

¹³ Amai Gebɛɛ iyi í wa Ramɔti si ilɛi Galaadii í nɛ ilu ŋa iyi à jɛ ti Yaii amai Manasee iyi í wa ilɛi Galaadiu. Nŋui í nɛ ilɛi Aagobu má si ilɛi Basãa, ilu nla kita ŋa iyi à nɛ bindi ŋa nɔ à nɛ gambo ku nɛ sɔkɔi isɔ nkpa ŋau.

¹⁴ Ahinadabu amai Idoi í nɛ Mahanaimu.

¹⁵ Ahimatii í nɛ ilɛi Nɛfitali. Nŋui í so Basimati amai Salomɔɔ í ce abo.

¹⁶ Baana amai Usai í nɛ ilɛi Azɛɛ do Bealɔtu.

¹⁷ Zozafati amai Paruai í nɛ ilɛi Isakaa.

¹⁸ Simei amai Elai í nɛ ilɛi Bɛnzamɛɛ.

¹⁹ Gebɛɛ amai Uri í wa ilɛi Galaadi. Nŋui í nɛ ilu ŋa iyi à jɛ ti Sioni ilaalui inɛi Amɔre ŋa do ti Ɔgu ilaalui Basãa wo. Nŋu akãi wa mu ilɛ iyi bɛ.

²⁰ Inɛi Zudaa ŋa do inɛi Izirɛli ŋau à kpɔi bɛi sãa iyi í wa itĩ tenku. À ya jɛi a mɔ a maa wɛɛò inɔ didɔ̃.