Ilaalu 1, 22 - Bibeli do fee

Akabu wa bi ku gba ilui Ramɔti

¹ Adɔ̃ minjii í lɔ inɛi Siri ŋa do inɛi Izirɛli ŋa a kù ce igũ.

² Si adɔ̃ mɛɛtasiaɛ ŋɔi Zozafati ilaalui Zudaau í naa bi ilaalui Izirɛli.

³ Nɔ ilaalui Izirɛliu í sɔ̃ woo ce icɛɛ ŋa í ni, ì mà ŋa iyi ilui Ramɔti iyi í wa ilɛi Galaadiu tu wai. To, bɛirei í ce à waa sika si iluu ku bɔ ku gba hai bi ilaalui Siriu.

⁴ Ŋɔi í tɔɔ Zozafati í ni, i kaa sim igũ n koo n gba Ramɔtiu ba. Ŋɔi Zozafati í jɛaa í ni, an koo, awaɛ akãi, zamaam tɛɛi, acĩm ŋa mɔ tɛɛi.

Walii ŋa à waa fɔ idei igũ ku jɛ

⁵ Ŋɔi Zozafati í ni, jɔ̀ i ce kubee bi Aɔ̃ Lafɛ̃ɛ titã.

⁶ Ŋɔi ilaalui Izirɛli í tɔtɔɔ walii ŋa zakai aŋa cĩɔ mɛɛ nɔ í bee ŋa í ni, n bɔ igũ Ramɔti si ilɛi Galaadiu? Mà n jɔ̀ɔɛ. Ŋɔi à jɛaa à ni, koo, Aɔ̃ Lafɛ̃ɛ á daɛ iluu si awɔ.

⁷ Amma Zozafati í bee í ni, waliii Aɔ̃ Lafɛ̃ɛ gɔ kù wa ihɛ̃ bii aa ka ce kubee má?

⁸ Ŋɔi ilaalui Izirɛliu í jɛaa í ni, inɛ gɔ í wɛɛ má bii aa ka ceò kubee bi Aɔ̃ Lafɛ̃ɛ. Amma n kù buu, domi ci ya yɛɛm ide jiida kãma gɔ, í gbe laalɔɛ. Nŋui í jɛ Misee amai Yimila. Nɔ Zozafati í ni, maà fɔ bɛɛbɛ.

⁹ Ŋɔi ilaaluu í kpe woo ce icɛɛ gɔ wa í ni koo kpe Misee amai Yimila wa ńya ńya.

¹⁰ Ilaalui Izirɛli do Zozafati ilaalui Zudaau à waa buba si kitãi bomma nŋa ŋa si bantumai anu koofai Samariu. Aŋa fei à waa dasi ibɔi ilaalu nŋa. Nɔ walii ŋau fei à wasi ku fɔ mii iyi á na ku ce si waju nŋa.

¹¹ Inɛ akã nŋa Sedesiasi amai Kenaana í cea araɛ ngoi isɔ ŋa nɔ wa ni, Aɔ̃ Lafɛ̃ɛ í ni, do ngo ŋau ihɛ̃i aa kpaò inɛi Siri ŋa hee í tã ŋa.

¹² Nɔ walii ŋau fei à fɔ bɛɛbɛ, à ni, koo si Ramɔti si ilɛi Galaadiu, aa jɛ igũ. Aɔ̃ Lafɛ̃ɛ á daɛ iluu si awɔ.

Walii Misee í ni a kaa jɛ igũ

¹³ Ŋɔi inɛ iyi í bɔ Misee ku kpe wau í sɔ̃ɔ í ni, walii ŋau fei à ce anu akã à waa yɛa ilaaluu jiida. Jɔ̀ ide ku fɔi awɔ mɔ ku jɛ bɛi tu ŋa. Fɔ jiidaɛ.

¹⁴ Ŋɔi Misee í jɛaa í ni, hee do irii Aɔ̃ Lafɛ̃ɛ fei, ide iyi Aɔ̃ Lafɛ̃ɛ í sɔ̃m nii an fɔ.

¹⁵ Iyi í to wa ŋɔi ilaaluu í beeɛ í ni, Misee, ka bɔ igũ Ramɔti si ilɛi Galaadiu de mà ka buba. Ŋɔi í jɛaa í ni, koo, aa jɛ igũ. Aɔ̃ Lafɛ̃ɛ á daɛ iluu si awɔ.

¹⁶ Ŋɔi ilaalu í ni má, isɛ fɛloi an jɔ̀ i gbasi do irii Aɔ̃ Lafɛ̃ɛ n ba n mà iyi ntɔi ì waa sɔ̃m.

¹⁷ Ŋɔi Misee í ni, ǹ yɛ inɛi Izirɛli ŋau fei à fangaa si iri kuta ŋau bɛi angudã ŋa iyi a kù nɛ woo degbe. Aɔ̃ Lafɛ̃ɛ í ni, inɛ ŋau ihɛ̃ a kù nɛ inɛ ngbo. Inɛ fei ku sinda ku nyi ideɛ do laakai ku sũ.

¹⁸ Ŋɔi ilaalui Izirɛliu í sɔ̃ Zozafati í ni, n kù sɔ̃ɛ wo tã ba. Ci ya yɛɛm mii jiida kãma, í gbe laalɔ.

¹⁹ Ŋɔi Misee í ni, i sotĩ i gbɔ ide iyi Aɔ̃ Lafɛ̃ɛ wa fɔ. Ǹ yɛ Aɔ̃ Lafɛ̃ɛ wa buba si kitãi bommaɛ nɔ soogei lelei Aɔ̃ ŋau fei à wa kɔkɔɛ canga do njɛɛ.

²⁰ Nɔ Aɔ̃ Lafɛ̃ɛ í bee ŋa í ni, yooi á koo lɛlɛ Akabu ku tale siɛ ku bɔ Ramɔti si ilɛi Galaadi igũ ku ce ku ba ku ce nfe. Nɔ aŋa fei à jɛ do yaase ikã ikã.

²¹ Ŋɔi inɛi inɔɔko gɔ í naa í leekĩ si wajui Aɔ̃ Lafɛ̃ɛ nɔ í ni, amu an koo n lɛlɛɛ.

²² Ŋɔi Aɔ̃ Lafɛ̃ɛ í beeɛ í ni, do yaase bɛire. Ŋɔi í ni, an koo nɔ n tale si waliiɛ ŋau fei ibo ku sɔ. Nɔ Aɔ̃ Lafɛ̃ɛ í ni, awɔi aa yɔkɔ i lɛlɛɛ hee i toò kɔɔ. Koo nɔ i ce bɛɛbɛ.

²³ Wee nsɛi bɛbɛi Aɔ̃ Lafɛ̃ɛ í jɔ̀ inɛi inɔɔko gɔ í lɔ si waliiɛ ŋau fei ku ba a maa sɔɛ ibo. Amma ntɔ ntɔ, laalɔi Aɔ̃ Lafɛ̃ɛ í dasi idɔ ku jɔ̀ ku baɛ.

²⁴ Ŋɔi Sedesiasi amai Kenaana í naa í sambala Misee, nɔ í ni, hai do iwoi hundei Aɔ̃ Lafɛ̃ɛ í fita hai bi tom nɔ í naa í sɔ̃ɛ ide wa.

²⁵ Ŋɔi Misee í jɛaa í ni, aa na i yɔɔ waati iyi aa na i sa i koo i maa manji ilaawa do ilaawa.

²⁶ Ŋɔi ilaalui Izirɛliu í sɔ̃ woo ce icɛɛ gɔ í ni, mu Misee i bɔòɛ bi Amɔɔ inɛ ngboi iluu do bi amam Zoasi.

²⁷ Nɔ i sɔ̃ ŋa i ni, ǹ ni a dasi mɔkɔu ihɛ̃ ile piisɔ̃ɔ nɔ a ya maa naa pɛ̃ɛ keeke do inyi keeke hee n koo n baaò wa do laakai ku sũ hai si igũu.

²⁸ Ŋɔi Misee í sɔ̃ɔ í ni, bii ì baa do laakai ku sũ, kù jɛ Aɔ̃ Lafɛ̃ɛi í ni n fɔ ideu. Nɔ Misee í ni má zamaa fei ku gbɔ ideu.

À kpa ilaalu Akabu si igũ

²⁹ Ŋɔi ilaalui Izirɛliu do Zozafati ilaalui Zudaau à bɔ igũ Ramɔti si ilɛi Galaadiu.

³⁰ Ŋɔi ilaalui Izirɛliu í sɔ̃ Zozafati í ni, an kpaasi aram n bɔ igũu. Amma awɔ, so jĩnɛi ilaalu ku jɛɛ i dasi. Ŋɔi ilaalui Izirɛliu í kpaasi araɛ bɛi a kaa màa í bɛi í bɔò igũu.

³¹ Nɔ wee ilaalui Siri í sɔ̃ inɛ ngbo kuntaa do minjii woo mu sarɛtii igũɛ ŋau tã í ni, i maà dɛdɛ inɛ mmu kãma ŋa, bii kù jɛ ilaalui Izirɛliu nŋu akã.

³² Iyi inɛ ngbo ŋau à hɔ̃nnɛ Zozafati ŋɔi à ni, kãm kãm á jɛ ilaalui Izirɛliu mbɛ. Ŋɔi à kaakoɛ ku ba a kpaa. Ŋɔi Zozafati í dɔ̃ anu í tɔɔ faaba.

³³ Iyi à yɛ kù jɛ ilaalui Izirɛliu bɛ, ŋɔi à jɔ̀ɔ.

³⁴ Ŋɔi soogei Siri gɔ í ta afa wa, kù wã inɛ kãma mɔm, nɔ afau í koo í mu ilaalui Izirɛliu si afei akonkoi ibɔ iyi wa dasiu. Ŋɔi í sɔ̃ inɛ iyi wa mu sarɛtii igũu í ni, sinda i fitaòm hai inɔi igũu domi ǹ ba kumɛɛ mbɛ.

³⁵ Ajɔ nŋu bɛ igũu wa gbãai ntɔ ntɔ. Nɔ inɛ gɔ wa mu ilaaluu wa leekĩɛ si inɔ sarɛtii igũɛ bɛ si igũi aŋaò inɛi Siri ŋau. Nɔ alɛu í ku. Njɛi kumɛɛu í dikã si inɔ sarɛtii igũu.

³⁶ Iyi inunu wa lɔ ŋɔi à dɔ̃ anu si asɔu fei à ni inɛ fei ku bɔ ideɛ.

³⁷ Bɛɛbɛi ilaaluu í ku nɔ à baaɛ wa Samari à na à suu.

³⁸ Waati iyi à koo à waa wiɛ sarɛtii igũi ilaalu Akabu si idoi Samariu, ŋɔi aja ŋa à naa à waa fa njɛu, nɔ inaabo à ce sakara ŋa à naa à waa wɛò inyiu si bɛi Aɔ̃ Lafɛ̃ɛ í tako í fɔu.

³⁹ Faajii Akabu do mii mmu ŋa iyi í ce fei, do ile iyi í ma í ce si booda do inyíi jua ŋa, do ilu ŋa iyi í ma fei à kɔɔ si tiai icɛi ilaalui Izirɛli ŋa.

⁴⁰ Iyi í ku nɔ amaɛ Ahazia í jɛ bomma si agbɛɛ.

Zozafati í jɛ ilaalui Zudaa

⁴¹ Zozafati amai Aza í jɛ bommai Zudaa si adɔ̃ mɛɛsiai bomma ku jɛi Akabu ilaalui Izirɛli.

⁴² Í nɛi adɔ̃ kuntaa do miiu waati iyi í jɛ bommau. Nɔ í ce si bommau adɔ̃ kaafɛtũ ilui Zeruzalɛmu. Iyeɛi à ya kpe Azuba amai Sili.

⁴³ Ŋɔi í too si kucei baaɛ Azau fei, nɔ kù yaa bii kãma, wa ceò mii iyi í dɔ̃a Aɔ̃ Lafɛ̃ɛ si.

⁴⁴ Nŋu de, kù lɛgɛ bi kuweea iwɛ̃ ŋa si geete ŋau. Zamaau í ya maa ce kuwee ŋa nɔ ku maa jo tuae ŋa si antaii iri kuta ŋau.

⁴⁵ Zozafati do ilaalui Izirɛli à wɛɛò laakai ku sũ si kuwɛɛ nŋa.

⁴⁶ Faajii icɛ mmui Zozafati do himmaɛ do igũ ŋa iyi í ce à kɔɔ si tiai icɛi ilaalui Zudaa ŋa.

⁴⁷ Nŋui í nya woo ta icu ŋa bi kuwee ŋau iyi à gbe si ilɛu hai waatii Aza baaɛu.

⁴⁸ Waati bɛɛbɛ ilaalu kãma kù wa ilɛi Edɔmu. Amma ilaalui Zudaa í jilɛ inɛ gɔ bɛ ku maa mu ilɛu.

⁴⁹ Zozafati í jɔ̀ à ce akɔi inyi ŋai wo ku ba a ya bɔ Ɔfii wura ku so wa. Amma akɔi inyi ŋau a kù koo si na iyi í jɔ̀ à lɛgɛ Ɛsiɔ̃-Gebɛɛ.

⁵⁰ Ŋɔi Ahazia amai Akabu í bee Zozafati í ni, ì bi woo ce icɛm ŋa a ya too titɛɛ ŋa do akɔi inyi ŋau? Amma Zozafati kù jɛ.

⁵¹ Si anyiɛ Zozafati í ku nɔ à suu bi balɛi balaɛ ŋa si ilui Davidi balaɛu. Nɔ amaɛ Yoramu í jɛ bomma si agbɛɛ.

Ahazia ilaalui Izirɛli

⁵² Ahazia amai Akabu í jɛ bomma Samari si ilɛi Izirɛli si adɔ̃ mɛɛwa do mɛɛjesiai bomma ku jɛi Zozafati ilaalui Zudaa. Nɔ í ce adɔ̃ minji si bommau.

⁵³ Ŋɔi í ce mii iyi kù sĩaa Aɔ̃ Lafɛ̃ɛ si nɔ í too si kucei baaɛ do iyeɛ do ti Zeroboamu amai Nebati iyi í tale si inɛi Izirɛli ŋa dulum ku ceu.

⁵⁴ Nŋui wa cea Baali icɛ nɔ wa weea. Nɔ í dede idɔɔkɔ̃i Aɔ̃ Lafɛ̃ɛi inɛi Izirɛli ŋa bɛi baaɛ í ce.