Ilaalu 1, 21 - Bibeli do fee

Akabu í jɔ̀ a kpa Nabɔti

¹ Si anyi nŋu ŋau mii iyi í ce wee. Mɔkɔ gɔ í wa Yizireɛli à ya kpoo Nabɔti. Í nɛ ikoi jĩi ndii rezɛ̃ɛ kɔkɔi kabai bommai Akabu ilaalui Samari.

² Ajɔ nŋu gɔ, ŋɔi Akabu í sɔ̃ Nabɔti í ni, nam ikoi jĩi ndii rezɛ̃ɛɛu ku ba n ceò lamboi jĩnɛi ayɛ ŋa domi í wa kɔkɔi kpasɛ̃m. Nɔ n sãɛ si iko jiida iyi í roo, bii bɛɛbɛ kù ceɛ mɔ, taam nɔ n sãɛ fia zaka bɛi í nɛ ku to.

³ Amma Nabɔti í sɔ̃ɔ í ni, Aɔ̃ Lafɛ̃ɛ ku maà jɔ̀ n naɛ tubui balam ŋa.

⁴ Ŋɔi Akabu í bɔ kpasɛ̃ɛ do inɔ kufɔ do idɔɔkɔ̃, si na iyi í jɔ̀ Nabɔti í sɔ̃ɔ í ni, n kaa n naɛ tubui balam ŋa. Ŋɔi í koo í gũ antaii daayiɛ í sũ í sinda wajuɛ ikpa bi idĩ nɔ í kɔ̀ sɔnda ku jɛ.

⁵ Ŋɔi Zezabɛli aboɛ í naa í baa nɔ í beeɛ í ni, na mii í ce inɔɛ í fɔ nɔ ì kɔ̀ ku jɛ.

⁶ Ŋɔi í jɛaa í ni, ǹ koo ǹ sɔ̃ Nabɔti inɛi Yizireɛliu ǹ ni ku taam ikoi jĩi ndii rezɛ̃ɛɛ, walakɔ n kpaasi do iyi í ce jiida í re titɛɛu. Amma í kɔ̀.

⁷ Ŋɔi aboɛu í sɔ̃ɔ í ni, debɛi kù jɛ awɔi ì jɛ ilaalui Izirɛliu bɛbɛi. Dede i jɛ do inɔ didɔ̃. Amu an naɛ ikoi Nabɔtiu.

⁸ Ŋɔi abou í kɔ tia ŋa do irii Akabu nɔ í ce si nyindai Akabu. Ŋɔi í samba ŋa bi inɛ ngbo ŋa do bi woo cuai ilui Nabɔti ŋa.

⁹ Ide iyi í kɔ si tiau wee. Í ni, i cã kɛsɛɛdɛ i sɔ̃ inɛ fei ku dĩ anu nɔ i jɔ̀ inɛ ŋa a tɔtɔɔ nɔ i tale si Nabɔti waju ŋa.

¹⁰ Nɔ i jilɛ inɛ laalɔ minji do wajuɛ a yɛ taaleɛ a ni, awɔi ì ceekpe Ilaaɔ̃ do ilaalu. Si anyiɛ i muu i bɔòɛ waduude i taa kuta i kpaa ŋa.

¹¹ Ŋɔi inɛ ngboi ilui Nabɔti ŋau do woo cua ŋa iyi à wa bɛu à ce bɛi Zezabɛli í sɔ̃ ŋa si tia ŋau.

¹² À tɔtɔɔ inɛ ŋa a ce anu ku dĩu, nɔ à tale si Nabɔti waju.

¹³ Inɛ laalɔ minji ŋau mɔ à koo à buba wajuɛ. Nɔ à yɛ taaleɛ si wajui zamaau à ni, Nabɔti í ceekpe Ilaaɔ̃ do ilaaluu. Bɛ gbakã à fitaɛ hai inɔ iluu à taa kuta à kpaa.

¹⁴ Ŋɔi à bɛ ama koo sɔ̃ Zezabɛli ku ni à ta Nabɔti kuta à kpaa.

¹⁵ Iyi Zezabɛli í gbɔ iyi à ta Nabɔti kuta à kpaa, ŋɔi í koo í sɔ̃ Akabu í ni, dede i koo i gba iko iyi Nabɔti inɛi Yizireɛli í kɔ̀ ku taɛu ku jɛ titɛɛ, domi Nabɔti í ku.

¹⁶ Iyi Akabu í gbɔ ikui Nabɔtiu ŋɔi í dede í bɔ ikoi jĩi ndii rezɛ̃ɛɛu í koo í gbaa í jɛ titɛɛ.

Ilaaɔ̃ í yɛ taalei kucei Akabu do Zezabɛli

¹⁷ Ŋɔi Aɔ̃ Lafɛ̃ɛ í sɔ̃ Elii inɛi Tisibuu í ni,

¹⁸ dede i bɔ bi Akabu ilaalui Izirɛli iyi í wa Samari. Aa koo i baa si ikoi jĩi ndii rezɛ̃ɛi Nabɔti iyi í gba ndɛɛu.

¹⁹ Koo i sɔ̃ɔ i ni, Aɔ̃ Lafɛ̃ɛ í ni, awɔ woo kpa inɛ do woo ce ilei. Nɔ i sɔ̃ɔ má i ni, Aɔ̃ Lafɛ̃ɛ í ni, tengi bii aja ŋa à fá njɛi Nabɔtiu bɛ mɔi aa fá ti awɔ takaɛ.

²⁰ Iyi Elii í bɔ Akabu ku sɔ̃ ideu ŋɔi Akabu í ni, mbɛɛm, ì naa bi tom má ya. Ŋɔi í jɛaa í ni, ǹ naa bi tɛɛ má si na iyi í jɔ̀ ì ce mii laalɔ iyi kù dɔ̃a Aɔ̃ Lafɛ̃ɛ si.

²¹ Na nŋu Aɔ̃ Lafɛ̃ɛ á jɔ̀ laalɔ ku naa siɛ, á ce nfeɛ nɔ ku kpa inɛmɔkɔ iyi í jɛ tɛɛ fei, hai aru do inɛ iyi í nɛ araɛ si ilɛi Izirɛliu fei.

²² Nɔ á jɔ̀ kpasɛ̃ɛ ku ce bɛi ti Zeroboamu amai Nebati do bɛi kpasɛ̃i Baesa amai Ahiya si na iyi í jɔ̀ ì dede idɔɔkɔ̃ɛ nɔ ì dasi inɛi Izirɛli ŋa dulum ku ce.

²³ Aɔ̃ Lafɛ̃ɛ í fɔ idei Zezabɛli mɔ má í ni, aja ŋai aa ŋɔɔ kɔkɔi bindii Yizireɛli.

²⁴ Inɛi kpasɛ̃i Akabu iyi á ku si inɔ ilu fei aja ŋai aa ŋɔɔ, inɛ iyi á ku sako mɔ yɛi ŋai aa jɔɔ.

²⁵ Ntɔ ntɔ, inɛ kãma kù wɛɛ iyi í ce mii laalɔ iyi kù dɔ̃a Aɔ̃ Lafɛ̃ɛ si bɛi Akabu, nɔ Zezabɛli aboɛi í tale siɛ.

²⁶ Laalɔ ku ceɛ í kpeeò ku fɔ. Í koo wa tɔɔ iwɛ̃ ŋa dee dee bɛi inɛi Amɔɔ ŋa à ya ce, aŋa iyi Aɔ̃ Lafɛ̃ɛ í lele si wajui inɛi Izirɛli ŋa.

Inɔi Akabu í fɔò laalɔɛ

²⁷ Iyi Akabu í gbɔ idei Eliiu í tã ŋɔi í ga ibɔɛ í nyisiò ara ku kayeɛ. Í dasi saaki nɔ í dĩ anu. Do saakiu bɛi í ya sũ, nɔ do nŋui í ya maa nɛò kpɛlɛ kpɛlɛ.

²⁸ Ŋɔi Aɔ̃ Lafɛ̃ɛ í sɔ̃ Elii inɛi Tisibuu í ni,

²⁹ ì yɛ bɛi Akabu í kaye araɛ si wajum? Na nŋu, n kaa n jɔ̀ laalɔu ku naa si waatii kuwɛɛɛ, si waatii kuwɛɛi amaɛi an jɔ̀ laalɔu ku naa si kpasɛ̃ɛ.