Ilaalu 1, 20 - Bibeli do fee

Ilaalui Siri í bu ilui Samari koe

¹ Bɛni-Hadadi ilaalui Siriu í tɔtɔɔ soogeɛ ŋa fei do ilaalu kuntaa do minji do acĩ nŋa ŋa do sarɛtii igũ nŋa ŋa à koo à bu ilui Samari koe ku ba a ce igũ do iluu.

² Ŋɔi í bɛ inɛ ŋa inɔ ilu bi Akabu ilaalui Izirɛliu

³ a koo a sɔ̃ɔ a ni, Bɛni-Hadadi í ni i na nŋu isɔ fũfũɛ do wuraɛ do aboɛ ŋa do amaɛ ŋa iyi à sĩa à re ŋau wa.

⁴ Ŋɔi ilaalui Izirɛliu í jɛ nŋa í ni, bɛi ilaalu lafɛ̃ɛm í fɔu ǹ jɛsi. Amu do mii iyi ǹ nɛ fei à jɛ titɛɛ.

⁵ Ŋɔi woo bɛ ŋau à nyi wa isɛ gbeejisia má nɔ à ni, Bɛni-Hadadi í ni a naa a sɔ̃ɛ a ni i na nŋu isɔ fũfũɛ do wuraɛ do aboɛ ŋa do amaɛ ŋa.

⁶ Na nŋu, í ni nŋu á bɛ woo ce icɛi nŋu ŋa wa ala suku bɛ ihɛ̃ bi tɛɛ a naa a gbogoo inɔ ileɛ do ti akaweɛ ŋa. Aa so mii jiida ŋa iyi ì nɛ fei a nɛò.

⁷ Ŋɔi ilaalui Izirɛliu í tɔtɔɔ inɛ ngboi ilɛɛ ŋau fei nɔ í sɔ̃ ŋa í ni, i cɔ ŋa, inɛɛu ihɛ̃ laalɔi wa bi ku ce nwa, domi í bɛ sim ama wa í ni nŋu í bi abom ŋa do amam ŋa do isɔ fũfũm do wuram nɔ n kù kɔ̀ɔ.

⁸ Ŋɔi inɛ ngbo ŋau do zamaau fei à sɔ̃ɔ à ni, maà gbɔa nɔ i maà jɛaa si.

⁹ Ŋɔi í sɔ̃ woo bɛi Bɛni-Hadadi ŋau í ni, i koo i sɔ̃ ilaalu lafɛ̃ɛm i ni ŋa, an jɛa si mii iyi í tako í beem ŋau fei, amma iyi ihɛ̃ n kaa n yɔkɔ n jɛsi. Ŋɔi woo bɛ ŋau à koo à sɔ̃ɔ ideu.

¹⁰ Ŋɔi Bɛni-Hadadi í bɛ ama bi Akabu má í ni a sɔ̃ɔ iyi nŋu á lɛgɛ ilɛi Samarii fei mam mam. Í ni iwɛ̃ ŋa a kpã nŋu iju dimi baa yooma fei, bii nŋu í jɔ̀ sãa si ilɛi Samarii iyi á to ku kɔ̃ awɔi zamaa iyi wa too nŋu.

¹¹ Ŋɔi ilaalui Izirɛliu í jɛaa wa í ni, inɛ iyi wa bɔ igũ ku maà tɔɔ fufu bɛi inɛ iyi í jɛ igũ wa baa.

¹² Bɛni-Hadadi í gbɔ ideui waati iyi wa mɔ atɛ̃ do ilaalu mmu gɔ ŋa si ilei acɔ ŋa. Ŋɔi í sɔ̃ inɛɛ ŋau í ni, i ce sɔɔlui igũ ŋa. Ŋɔi à dĩa iluu sɔɔlu.

Ilaalu Akabu í jɛ igũ

¹³ Ŋɔi walii gɔ í bɔ bi Akabu ilaalui Izirɛliu nɔ í sɔ̃ɔ í ni, Aɔ̃ Lafɛ̃ɛ í ni, cɔ bɛi akpɔi sooge ŋau ihɛ̃ í la í to. Do nŋu fei, an so ŋa n daaɛ si awɔ nnyi, nɔ awɔ aa mà iyi amui ǹ jɛ Aɔ̃ Lafɛ̃ɛ.

¹⁴ Ŋɔi Akabu í beeɛ í ni, do saabui yooi an jɛò ŋa igũ. Ŋɔi í jɛaa í ni, do saabui awaasũ ŋa iyi inɛ ngboi bubaai ilɛɛ ŋau aa cica. Nɔ í bee í ni, yooi á sinti igũu. Ŋɔi í jɛaa í ni, awɔ.

¹⁵ Ŋɔi Akabu í ka awaasũ ŋa iyi inɛ ngboi bubaai ilɛɛ ŋau à cica nɔ í ba kukpɔ nŋa í dede cĩɔ minji do kuntaa do minji (232). Si anyiɛ nɔ í tɔtɔɔ soogei inɛi Izirɛli ŋau fei, nɔ à dede aŋa dubu mɛɛje (7.000).

¹⁶ Ŋɔi à bɔ igũu zakai nunu antai. Waati bɛɛbɛ Bɛni-Hadadi í wa inɔ ilei acɔ wa mɔ atɛ̃ do ilaalu kuntaa do minji ŋa iyi à naa ku sobiɛ ŋau.

¹⁷ Awaasũ ŋaui à tako à koo si ŋa. Ŋɔi Bɛni-Hadadi í bee í ni, mii wa ce. Nɔ à sɔ̃ɔ à ni, inɛ ŋa à naa si wa wa hai ilui Samari.

¹⁸ Ŋɔi í ni, bii í jɛ laakai ku sũi à naa ku tɔɔ i mu ŋa wa njaawɛ. Bii í jɛ igũ mɔi à naa, i mu ŋa wa njaawɛ.

¹⁹ Ŋɔi iyi awaasũ ŋau do sooge ŋa iyi à waa too ŋa ŋau à fita hai inɔ iluu,

²⁰ inɛ akã fei í ba mbɛɛ iyi í kpa, nɔ inɛi Siri ŋau à waa sa. Ŋɔi inɛi Izirɛli ŋa à waa lele ŋa. Bɛni-Hadadi ilaalui Siriu í gũ acĩ í sa do masa gɔ ŋa.

²¹ Ŋɔi ilaalui Izirɛli í naa í kpa acĩ nŋa ŋa nɔ í lɛgɛ sarɛtii igũ nŋa ŋa. Do yaase bɛɛbɛi í kãmia ŋaò mam mam.

²² Ŋɔi waliiu í naa bi ilaalui Izirɛliu nɔ í sɔ̃ɔ í ni, koo kɔ̃ɔsi temua, nɔ i lasabu i cɔ bɛi aa ce, domi bii adɔ̃ í ka ilaalui Siri á nyi wa siɛ má.

Akabu í nyi í jɛ igũ má

²³ Ŋɔi woo ce icɛi ilaalui Siri ŋau à sɔ̃ɔ à ni, iwɛ̃i inɛi Izirɛli ŋau, lafɛ̃ɛi iri kuta ŋai, na ŋɔi í jɔ̀ à kãmia wa. Amma ka koo si ŋa igũ si lɔɔma nɔ aa ka cɔ bii í jɛ a kù re ŋaò gbugbã.

²⁴ Bɛi aa ce má wee. Nya ilaalu ŋau hai si icɛ nŋa nɔ i sãsi inɛ ngbo ŋa si agbɛ nŋa.

²⁵ Nɔ i dɛdɛ sooge zaka bɛi ì tako ì nɛu do acĩ do sarɛtii igũ zaka akãu, ka bɛi ka bɔ igũ si lɔɔmau, nɔ aa ka cɔ bii í jɛ a kaa ka nɔ ŋa. Ŋɔi í jɛsi ide nŋau nɔ í ce bɛi à fɔu.

²⁶ Adɔ̃ ku kaɛ wa, ŋɔi Bɛni-Hadadi í tɔtɔɔ soogei Siri ŋa, nɔ í bɔ ilui Afɛki koo ce igũ do inɛi Izirɛli ŋa.

²⁷ Ŋɔi Akabu mɔ í tɔtɔɔ soogeɛ ŋa. Nɔ à na ŋa sɔnda à bɛi à waa bɔ ku ko do inɛi Siri ŋau. Inɛi Izirɛli ŋau à koo à ce asɔ nŋa ikɔ minji si wajui mbɛɛ nŋa ŋa. Asɔ nŋa ŋau à yɛi bɛi iwo gaa keeke minji. Amma kukpɔi inɛi Siri ŋau í gba ilɛui fei.

²⁸ Ŋɔi waliii Ilaaɔ̃u í naa í sɔ̃ ilaalui Izirɛliu í ni, Aɔ̃ Lafɛ̃ɛ í ni, si na iyi í jɔ̀ inɛi Siri ŋa à ni amu Lafɛ̃ɛi iri kuta ŋai, n kù jɛ ti lɔɔma ŋa, an so akpɔ nla nla nŋau ihɛ̃ n daaɛ si awɔ ku ba i mà ŋa iyi amui ǹ jɛ Aɔ̃ Lafɛ̃ɛ do ntɔ.

²⁹ Ŋɔi à ce ajɔ mɛɛfa bi asɔ nŋa ŋa. Si ajɔ mɛɛjesiaɛ ŋɔi igũu í sinti, nɔ inɛi Izirɛli ŋau à kpa soogei Siri ŋa iyi à waa nɛ do kutɛ aŋa dubu cĩɔ (100.000) si ajɔ akã.

³⁰ Inɛ ŋa iyi à gbe à sa à bɔ inɔ ilu Afɛki, amma bindii iluu í cuku si inɛ dubu kɔnfia do mɛɛje (27.000). Ŋɔi Bɛni-Hadadi í sa í lɔ inɔ iluu, í koo í wasi ku kpaasi kpaasi ilaawa bi ku manji.

Akabu kù kpa ilaalui Siriu

³¹ Ŋɔi woo ce icɛɛ ŋa à sɔ̃ɔ à ni, à gbɔ iyi ilaalui Izirɛli ŋa à ya nɛ araare. Na nŋu, aa ka dĩ saaki ŋa si gbankili nɔ ka dĩ ikũ ŋa si iri ka bɔò bi ilaalui Izirɛliu. Á yɔkɔ ku jɛ a jɔ̀ i wɛɛ.

³² Ŋɔi à dĩ saaki ŋa si gbankili do ikũ ŋa si iri à bɔò bi ilaalui Izirɛliu à sɔ̃ɔ à ni, woo ce icɛɛ Bɛni-Hadadi í ni i jɔ̀ nŋu ku wɛɛ. Ŋɔi í bee ŋa í ni, í wɛɛ si hunde? Baakɔɔm nii.

³³ Ŋɔi inɛ ŋau à yɛ í jɛa aŋa ide didɔ̃ nɔ à bɛɛgɛ si bɛ à niò, oo, baakɔɔɛu í wɛɛ. Ŋɔi í sɔ̃ ŋa í ni, i koo i gbãa wa ŋa. Ŋɔi Bɛni-Hadadi í naa bi tɛɛ, nɔ Akabu í jɔ̀ í gũ sarɛtiɛu.

³⁴ Ŋɔi Bɛni-Hadadi í sɔ̃ɔ í ni, an sindoɛ ilu ŋa iyi baam í gba si baaɛ ŋau fei, nɔ i ce bi ku ta iwò ŋa Damasi bɛi baam í ce si inɔ ilu Samari. Nɔ Akabu í ni, amu mɔ an jɔ̀ i nɛ bii à dĩ akabuu. Iyi à dĩ akabuuu à tã, ŋɔi í jɔ̀ɛ í nɛ.

Ilaaɔ̃ í yɛ taalei Akabu

³⁵ Ŋɔi Aɔ̃ Lafɛ̃ɛ í sɔ̃ inɛ akãi igbɛi walii ŋau koo tɔɔ kpaasiɛ gɔ ku cãa. Amma kpaasiu í kɔ̀.

³⁶ Ŋɔi í sɔ̃ɔ í ni, si bɛi ì kɔ̀ ku jirima idei Aɔ̃ Lafɛ̃ɛ, bii ì nɛ hai bi tom muusu nlai á kpaɛ. Iyi kpaasiu í nɛ hai bi tɛɛ, ŋɔi í ko muusu nla gɔ nɔ muusuu í kpaa.

³⁷ Ŋɔi waliiu í koo í ba inɛ mmu gɔ má, nɔ í ni, ǹ tɔɔɛi, naa í cãm. Ŋɔi inɛɛu í cãa í mɛɛɛ.

³⁸ Ŋɔi waliiu í koo í leekĩ si kpãai ilaaluu nɔ í bii wajuɛ do acɔ bɛi a kaa màa.

³⁹ Waati iyi ilaaluu wa lɔ ŋɔi í sɛ̃ɛɛ í ni, amu woo ce icɛɛ ǹ wa bi ku ce igũ. Bɛi inɛ gɔ í naa í daam mbɛɛ gɔ si awɔ í ni n maa n degbeɛ, nɔ bii nŋu kù na kù yɔɔ nŋu á kpam nii walakɔ n sãa nŋu fia kpɛkɛlɛ dubu mɛɛta (3.000).

⁴⁰ Nɔ waati iyi igũu í gbãa sim canga do njɛ mbɛɛu í sa. Ŋɔi ilaaluu í ni, awɔ takaɛ ì cea araɛ kiiti tã.

⁴¹ Gbakã waliiu í nya acɔ iyi í bii si wajuɛu nɔ ilaalui Izirɛliu í mà iyi inɛ akãi walii ŋaui.

⁴² Ŋɔi waliiu í ni, Aɔ̃ Lafɛ̃ɛ í ni si bɛi ì jɔ̀ inɛ iyi nŋu í ni a kpau í nɛ hai si awɔɛ, awɔi aa ku si agbɛɛ nɔ zamaaɛ ku ku si agbɛi zamaai inɛɛu mɔ.

⁴³ Ŋɔi ilaalui Izirɛliu í nyi Samari do inɔ kufɔ do idɔɔkɔ̃.