Ilaalu 1, 19 - Bibeli do fee

Inɔi Elii í fɔ

¹ Ŋɔi Akabu í koo í sisia Zezabɛli mii iyi Elii í ce fei, do bɛi í kpa waliii Baali ŋau fei.

² Ŋɔi Zezabɛli í bɛ ama bi Elii koo sɔ̃ɔ ku ni, amu Zezabɛli ǹ ni iwɛ̃ ŋau a kpãm iju dimi ikã ikã baa yooma fei bii ala suku bɛ ihɛ̃ n kù kpaɛ bɛi awɔ mɔ ì kpa woo wee ŋau.

³ Iyi Elii í gbɔ bɛɛbɛ, ŋɔi í dede wa saò hundeɛ. Iyi í to Bɛɛseba si ilɛi Zudaa nɔ í jɔ̀ woo ce icɛɛ bɛ.

⁴ Nŋu takaɛ í nɛ si gbaa zakai ajɔ akã, nɔ í koo í buba si abɛi jĩi gɔ wa tɔɔ iku wa ni, í to bɛɛbɛ Aɔ̃ Lafɛ̃ɛ, so hundem bɛbɛi, domi n kù tia balam ŋa.

⁵ Ŋɔi í sũ si abɛ jĩi nɔu í sĩ njoo. Ŋɔi amaleka gɔ í naa í luu nɔ í sɔ̃ɔ í ni, dede i jɛ.

⁶ Nɔ Elii í dede. Iyi í cɔ bii wa to iri ŋɔi í yɛ kaa iyi à ya sɔ̃ si kuta gbãa do inyi jɔlɔ. Ŋɔi í jɛ nɔ í mɔ nɔ í sũ má.

⁷ Ŋɔi amalekai Aɔ̃ Lafɛ̃ɛu í nyi siɛ wa isɛ gbeejisia má, í naa í luu nɔ í ni, dede i jɛ, domi kpãaɛu í sɔ í caa.

⁸ Ŋɔi í dede í jɛ nɔ í mɔ. Nɔ do gbugbã iyi í ba si sɔndau, í nɛ dasã ciiji do idũ ciiji hee í toò Ɔrɛbu iri kutai Ilaaɔ̃.

Ilaaɔ̃ í kɔ̃ɔa Elii si temua

⁹ Iyi Elii í to iri kutau ŋɔi í lɔ inɔ isa gɔ í sũ bɛ. Ŋɔi Aɔ̃ Lafɛ̃ɛ í beeɛ í ni, mii ì waa ce ihɛ̃ Elii.

¹⁰ Ŋɔi í jɛ í ni, ǹ jabu ntɔ ntɔ na iriɛ, awɔ Aɔ̃ Lafɛ̃ɛi lele do ilɛ, domi inɛi Izirɛli ŋa à fũsi akabuuɛ awɔ, à kɛkɛ bi kuweeɛ ŋau nɔ à kpa waliiɛ ŋau fei do taakuba. Amu akãi ǹ gbe, nɔ à waa dɛ ku kpam.

¹¹ Ŋɔi Aɔ̃ Lafɛ̃ɛ í sɔ̃ɔ í ni, fita nɔ i koo i wa iri kutau si wajum. Ŋɔi í ba wee Aɔ̃ Lafɛ̃ɛ wa lɔ. Nɔ do wajui Aɔ̃ Lafɛ̃ɛ fufu nla nlai wa ce do gbugbã nɔ wa kɛkɛ iri kuta ŋa nɔ wa lɛgɛ kuta ŋa. Amma Aɔ̃ Lafɛ̃ɛ kù wa inɔi fufuu. Si anyii fufuu, nɔ ilɛ ku yaya í naa. Amma Aɔ̃ Lafɛ̃ɛ kù wa si ilɛ ku yayau.

¹² Si anyii ilɛ ku yayau, nɔ ina í naa, amma Aɔ̃ Lafɛ̃ɛ kù wa si inɔ inau. Iyi inau í lɔ, ŋɔi ibai fufu didɔ̃ fɛlɛ fɛlɛ gɔ í naa.

¹³ Iyi Elii í gbɔ ibau ŋɔi í bii wajuɛ do kumbooɛ nɔ í fita í naa í leekĩ andɛi isau. Ŋɔi í gbɔ ide ku fɔ wa beeɛ í ni, mii ì waa ce ihɛ̃ Elii.

¹⁴ Ŋɔi í jɛ í ni, ǹ jabu ntɔ ntɔ na iriɛ, awɔ Aɔ̃ Lafɛ̃ɛi lele do ilɛ, domi inɛi Izirɛli ŋa à fũsi akabuuɛ awɔ, à kɛkɛ bi kuweeɛ ŋau nɔ à kpa waliiɛ ŋau fei do taakuba. Amu akãi ǹ gbe, nɔ à waa dɛ ku kpam.

¹⁵ Ŋɔi Aɔ̃ Lafɛ̃ɛ í sɔ̃ɔ í ni, sinda i too kpãai gbaa iyi ì naaò wau i bɔ hee Damasi. Bii ì to bɛ, cica Hazaɛli i tontooa ikpo si iri ku jɛ ilaalui ilɛi Siri.

¹⁶ Nɔ i cica Yehu amai Nimusi mɔ i tontooa ikpo si iri ku jɛ ilaalui Izirɛli. Nɔ i cica Elizee amai Safati inɛi ilui Abɛli-Meholau i tontooa ikpo si iri ku jɛ walii si agbɛɛ.

¹⁷ Waati nŋu, inɛ iyi í ga hai bi Hazaɛli fei Yehui á kpaa, inɛ iyi í ba í ga hai bi Yehu mɔ, Elizeei á kpaa.

¹⁸ Amma an jɔ̀ amanɛ dubu mɛɛje (7.000) si ilɛi Izirɛli, aŋa iyi a kù gulɛ a kù tɔɔ Baali ŋa.

Elii í so Elizee i jɛ atɛkɛsiɛ

¹⁹ Ŋɔi Elii í nɛ hai bɛ nɔ í koo í ba bii Elizee amai Safati wa fa ilɛ. Í nɛ kɛtɛ kɔ̃ɔ maateeji iyi à waa fa ilɛ, nɔ nŋui wa ceò maateejisiau icɛ. Ŋɔi Elii í sɛkɛɛ siɛ nɔ í bɔ kumbooɛ í sɔaa.

²⁰ Ŋɔi Elizee í jɔ̀ kɛtɛɛ ŋau í sɛi í too fitiɛ nɔ wa ni, jɔ̀ n koo n tɔɔ iyeò baam ŋa sukudɔ̃ wa nɔ n naa n tooɛ. Ŋɔi Elii í jɛaa í ni, aa yɔkɔ i nyi si icɛɛ, mà ǹ beeɛ ide gɔi.

²¹ Ŋɔi Elizee í sinda hai bi Elii í nyi si ikoɛ, nɔ í mu kɛtɛ kɔ̃ɔ akã í koo í ceò kuwee. Zuugui kɛtɛ ŋaui í jɔ̀ à seò iŋau, nɔ í na inɛ ŋa à ŋɔ. Si anyiɛ nɔ í dede í too Elii wa ceaa icɛ.