Ilaalu 1, 18 - Bibeli do fee

Elii í fɔ kɔɔi agbɛ nlau

¹ Si anyiɛ, ŋɔi Aɔ̃ Lafɛ̃ɛ í sɔ̃ Elii si adɔ̃ mɛɛtasiai agbɛu í ni, koo bi Akabu domi an jɔ̀ ijĩ ku wɔ.

² Ŋɔi Elii í bɔ bi Akabu. Waati bɛɛbɛ ari í caa si ilɛi Samari.

³ Nɔ Akabu í ni a koo a kpe Abudiasi inɛ ngboi kpasɛ̃ɛu wa. Wee Abudiasi wa jirima Aɔ̃ Lafɛ̃ɛi ntɔ ntɔ.

⁴ Waati iyi Zezabɛli wa kpa waliii Aɔ̃ Lafɛ̃ɛ ŋau, Abudiasii í so walii cĩɔ í singa ŋa ciitaa ciitaa si inɔ isai kuta nɔ í wo ŋaò pɛ̃ɛ do inyi.

⁵ Iyi Abudiasi í to wa, ŋɔi Akabu í sɔ̃ɔ í ni, jɔ̀ kaa dabii si ilɛu ka cɔ isɔ̃ ŋau do acãi inyi ŋau fei. Á yɔkɔ ku jɛ aa ka ba fɔfɔ ka woò acĩ ŋau do mulee nwa ŋa ku ba a maà ku, nɔ ka maà nɛ ka kpa mɛɛmu nwa ŋa má.

⁶ Ŋɔi à kpɛ̃ ilɛu ku ba a dabii si. Akabu í too kpãaɛ nŋu akã nɔ Abudiasi mɔ í too kpãa mmuɛ nŋu akã.

⁷ Si bɛi Abudiasi í dasi kpãa wa nɛ, ŋɔi í koo í ko Elii. Ŋɔi í màa, nɔ í sɛɛbata í ni, awɔi lafɛ̃ɛm Elii?

⁸ Ŋɔi í jɛaa í ni, amui, koo sɔ̃ mɛɛtuɛ Akabu i ni, ǹ yɛ Elii.

⁹ Ŋɔi Abudiasi í ni, dulum yoomai ǹ ce í jɔ̀ ì som ì waa daa Akabu si awɔ koo kpam.

¹⁰ Do irii Aɔ̃ Lafɛ̃ɛɛ fei, kù nɛ si ilɛ do si bomma iyi Akabu kù jɔ̀ a kù bɔ ku dɛdɛɛ. Nɔ tengi bii à bɔ fei nɔ à ni i kù wa bɛ, í ya jɔ̀ inɛ ŋa a ce kugbasii a ni i kù wa bi ti aŋa.

¹¹ Nɔ bɛbɛi ì waa ni n koo n sɔ̃ɔ n ni, ǹ yɛ Elii.

¹² Bii ǹ sɛkɛɛ ǹ jɔ̀ɛ má nsɛi, hundei Aɔ̃ Lafɛ̃ɛ á na ku soɛ ku bɔòɛ bii n kù mà. Waati iyi ǹ koo n sɔ̃ Akabu nɔ kù na ku yɛɛ á kpam. Nɔ wee amu woo ce icɛɛ ǹ wa n jirima Aɔ̃ Lafɛ̃ɛi jiida jiida hai awaasũm.

¹³ Lafɛ̃ɛm, a kù sɔ̃ɛ mii iyi ǹ ce si waati iyi Zezabɛli wa kpa waliii Aɔ̃ Lafɛ̃ɛ ŋaui? Ǹ singa waliii Aɔ̃ Lafɛ̃ɛ cĩɔ aŋa ciitaa ciitaa si inɔ isai kuta ŋa, nɔ ǹ wo ŋaò pɛ̃ɛ do inyi.

¹⁴ Ŋɔi bɛbɛi ì waa ni n koo n sɔ̃ mɛɛtum n ni, ǹ yɛ Elii. Bii ǹ koo á kpam nii.

¹⁵ Amma Elii í ni, do irii Aɔ̃ Lafɛ̃ɛi lele do ilɛ iyi ǹ wa n cea icɛ, nnyi mɔm an bɔ bi Akabu.

Elii í bɔ bi Akabu

¹⁶ Ŋɔi Abudiasi í koo í sɔ̃ Akabu ideu, nɔ Akabu í bɔ Elii ku ko.

¹⁷ Iyi Akabu í hɔ̃nnɛ Elii gbakã ŋɔi í beeɛ í ni, kù jɛ awɔi i waa naaò laalɔ wa si ilɛi Izirɛli?

¹⁸ Ŋɔi Elii í jɛaa í ni, kù jɛ amui ǹ wa n naaò laalɔ wa si ilɛi Izirɛli, amma awɔ do nyaanzei baaɛ ŋai, domi ì fũsi woodai Aɔ̃ Lafɛ̃ɛ ŋau awɔ ŋa nɔ ì koo ì waa tɔɔ Baali ŋa.

¹⁹ Bɛbɛi, jɔ̀ a tɔtɔɔ inɛi Izirɛli ŋau fei si iri kutai Kaamɛli bi tom do waliii Baali cĩɔ mɛɛ do ciitaa ŋau (450) do ti Asera cĩɔ mɛɛ ŋa (400) iyi Zezabɛli wa wo ŋau fei.

Elii do waliii Baali ŋa

²⁰ Ŋɔi Akabu í bɛ inɛ ŋa si inɛi Izirɛli ŋau fei nɔ í tɔtɔɔ walii ŋau si iri kutai Kaamɛli.

²¹ Ŋɔi Elii í sɛkɛɛ si zamaau nɔ í ni, hee waati yoomai aa jɔ̀ idɔ minji nŋɛ ŋa. Bii í jɛ ì yɔɔ iyi Aɔ̃ Lafɛ̃ɛi í jɛ ntɔ ŋa i tɔɔɛ, bii Baali mɔi i tɔɔɛ ŋa. Amma zamaau kù jɛaa ide kãma.

²² Ŋɔi í sɔ̃ ŋa má í ni, amu akãi ǹ gbe si inɔi waliii Aɔ̃ Lafɛ̃ɛ ŋau nɔ waliii Baali ŋa à wɛɛi aŋa cĩɔ mɛɛ do ciitaa (450).

²³ Na nŋu a na wa kɛtɛ kombo minji. Waliii Baali ŋa a so akã a buu nɔ a lesi antaii jĩi. Nɔ a maà dasi ina. Amu mɔ n so akã n buu, n lesi antaii jĩi nɔ n maà n dasi ina.

²⁴ Si anyiɛ i tɔɔ Baali ŋa nɔ amu mɔ n tɔɔ Aɔ̃ Lafɛ̃ɛ. Si gãmɛi Baali do Aɔ̃ Lafɛ̃ɛ, inɛ iyi í naaò ina wa nŋui í jɛ Ilaaɔ̃ do ntɔ. Ŋɔi zamaau fei í ni, í sĩa.

²⁵ Ŋɔi Elii í sɔ̃ waliii Baali ŋau í ni, i so kɛtɛ kombo akã i tako i buu i ce ŋa, domi iŋɛi ì kpɔ ì re ŋa. Nɔ i kpe irii iwɛ̃ nŋɛ ŋa. Amma i maà dasi ina ŋa.

²⁶ Ŋɔi à so kɛtɛ kombo iyi à na ŋau, nɔ à ce icɛɛ à bɛi à wasi irii Baali ku kpe hai daakɔ hee dasã à waa ni, Baali, jɛ nwa. Amma ide kãma kù ce hee ku jɛ nŋa. Ŋɔi à lɔsi ku fo ku dingaa si wajui bi kuwee iyi à mau.

²⁷ Zakai dasãu ŋɔi Elii wa yaako ŋa wa ni, i dɔ̃ anu ku la ŋa. Si bɛi Ilaaɔ̃i á yɔkɔ ku jɛ wa lasabu si ngɔgɔi walakɔ wa ce icɛ gɔ, walakɔ í bɔ ilu. Á yɔkɔ ku jɛ wa sĩ njooi, i jũu ŋa.

²⁸ Ŋɔi à dɔ̃ anu hee lele, nɔ à wasi ku bu ara nŋa ŋa do taakuba do kaka ŋa hee njɛ wa fita wa si bɛi à ya ce si dedemba nŋa.

²⁹ Ŋɔi à dasi himma hee nunu yaa si waati iyi à ya ce kuwee má. Amma ide kãma kù ce, kù jɛ nŋa hee má jɛ ku ce nyinda gɔ iyi á jɔ̀ a nɛ kpãa ku cɔ.

³⁰ Ŋɔi Elii í sɔ̃ zamaau fei í ni, i sɛkɛɛ wa kɔkɔm ŋa. Ŋɔi zamaau fei í naa kɔkɔɛ. Ŋɔi í teese í ce bi kuweei Aɔ̃ Lafɛ̃ɛ iyi í cukuu.

³¹ Í so kuta maateeji zaka bɛi dimii amai Zakɔbu ŋau í to, nŋu iyi Aɔ̃ Lafɛ̃ɛ í weea í ni, Izirɛlii á jɛ iriɛ.

³² Do kuta ŋaui í ma bi kuweeu do irii Aɔ̃ Lafɛ̃ɛ. Ŋɔi í tu isa iyi á yɔkɔ ku gba inyi liiti kuntaa í kaakoɛ.

³³ Ŋɔi í teese jĩi ŋau nɔ í bu kɛtɛu í lesi antaii jĩi ŋau,

³⁴ í bɛi í ni, i koo i kpã inyi wa si jɔlɔ mɛɛ i naa i tuu si antaii iŋau do jĩi nɔu ŋa. Nɔ í ni a coo isɛ gbeejisia. Ŋɔi à coo isɛ gbeejisia. Nɔ í ni a coo isɛ gbɛɛtasia. Ŋɔi à coo isɛ gbɛɛtasiau.

³⁵ Ŋɔi inyiu í cã í bii ilɛi bi kuweeu fei, nɔ isau mɔ í kɔ̃.

³⁶ Iyi waatii kuweeu í to, ŋɔi Elii waliiu í sɛkɛɛ si bi kuweeu nɔ í ni, Aɔ̃ Lafɛ̃ɛi Aburahamu do Izaaki do Izirɛli, jɔ̀ inɛ ŋa a mà nnyi iyi awɔi ì jɛ Ilaaɔ̃ nɔ ì jɛ Lafɛ̃ɛi Izirɛli. Jɔ̀ a mà iyi amui ǹ jɛ woo ce icɛɛ nɔ a mà iyi awɔi ì ni n ce mii ŋau ihɛ̃ fei.

³⁷ Jɛɛm, Aɔ̃ Lafɛ̃ɛ, jɛɛm ku ba zamaau ihɛ̃ ku mà iyi awɔi ì jɛ Ilaaɔ̃ do ntɔ nɔ i sinda idɔ nŋa wa bi titɛɛ.

³⁸ Ŋɔi Aɔ̃ Lafɛ̃ɛ í naaò ina wa hai lele, nɔ í jo iŋau do jĩi ŋau do kuta ŋau do ilɛu nɔ í mɔ inyi iyi í wa inɔ isau.

³⁹ Iyi zamaau fei í yɔɔ ŋɔi aŋa fei à sɛɛbata à wasi ku ni, Aɔ̃ Lafɛ̃ɛi í jɛ ntɔ, Aɔ̃ Lafɛ̃ɛi í jɛ ntɔ.

⁴⁰ Ŋɔi Elii í ni a mu waliii Baali ŋau wa fei, a maà jɔ̀ baa akã nŋa ku ba ku sa. Ŋɔi à mu ŋa wa. Nɔ Elii í bɔò ŋa idoi Kisɔ̃ɔ í koo í saka ŋa bɛ.

Ijĩ í baa má

⁴¹ Ŋɔi Elii í sɔ̃ Akabu í ni, koo i jɛ nɔ i mɔ, domi ǹ wa n gbɔ ibai ijĩ.

⁴² Ŋɔi Akabu í bɔ ku jɛ nɔ ku mɔ. Nɔ Elii í gũ iri kutai Kaamɛli í gulɛ í dasi iriɛ si afei ilugũɛ ŋa,

⁴³ nɔ í ni awaasũ woo ce icɛi nŋu koo gũ iri kutau ku cɔ ikpa bi tenkuu. Ŋɔi woo ce icɛɛu í gũ, í cɔ ilu nɔ í ni, n kù yɛ nkãma. Elii í ni ku nyi bɛɛbɛ hee isɛ gbɛɛje.

⁴⁴ Si isɛ gbɛɛjesiau ŋɔi awaasũu í ni, kudũi ijĩ keeke gɔ wa dede wa hai si tenkuu, nɔ kù re ataawɔi amanɛ. Ŋɔi Elii í ni, koo sɔ̃ Akabu ku dĩa acĩɛ ŋa sarɛti nɔ koo bɔ ku ba ijĩ ku maà kpaa.

⁴⁵ Hee a maa fɔ, lelei Aɔ̃ í kuku do kudũi ijĩu. Ŋɔi fufu í dede, nɔ ijĩu wa wɔ do gbugbã. Nɔ Akabu í gũ sarɛtiɛ wa nɛ Yizireɛli.

⁴⁶ Ŋɔi Aɔ̃ Lafɛ̃ɛ í mua Elii gbugbã. Nɔ Elii í dĩ kpakaɛ nɔ í sɛi wa cuaa Akabu hee à toò anu koofai Yizireɛli.