Ilaalu 1, 17 - Bibeli do fee

Walii Elii wa fɔ idei agbɛ nla gɔ

¹ Elii inɛi ilui Tisibu si ilɛi Galaadi í sɔ̃ Akabu í ni, do irii Aɔ̃ Lafɛ̃ɛi inɛi Izirɛli ŋa iyi ǹ wa n cea icɛ, si adɔ̃ ŋa iyi wa baau ihɛ̃ ikpã kaa le hee má jɛ ijĩ ku wɔ bii kù jɛ ǹ ni ku naa.

Elii í bɔ itĩ idoi Keriti

² Ŋɔi Aɔ̃ Lafɛ̃ɛ í sɔ̃ Elii í ni,

³ dede i nɛ hai ihɛ̃. Bɔ ikpa nunui daakɔ i koo i manji kɔkɔi idoi Keriti iyi wa cɔ idoi Zuudɛ̃ɛu.

⁴ Inyii idoui aa maa mɔ nɔ n ni gaagaa ŋa a maa woɛ bɛ.

⁵ Ŋɔi í nɛ í ce bɛi Aɔ̃ Lafɛ̃ɛ í sɔ̃ɔu. Í koo í wa kɔkɔi idoi Keriti iyi wa cɔ idoi Zuudɛ̃ɛu.

⁶ Ŋɔi gaagaa ŋau à ya maa naa pɛ̃ɛ do iŋa wa alɛò daakɔ nɔ wa mɔ inyii idou.

Elii í wa kpasɛ̃i jaaɔ̃i Sarɛpita

⁷ Amma si anyii waati gɔ, idou í gbɛ domi ijĩ kù waa wɔ si ilɛu.

⁸ Ŋɔi Aɔ̃ Lafɛ̃ɛ í sɔ̃ Elii í ni,

⁹ dede i bɔ ilui Sarɛpita si ilɛi Sidɔ̃ɔ nɔ i buba bɛ. Jaaɔ̃ gɔ í wa bɛ ǹ sɔ̃ɔ ǹ ni ku maa woɛ.

¹⁰ Ŋɔi í dede í bɔ Sarɛpita. Iyi wa to anu koofai iluu ŋɔi í ba wee abo jaaɔ̃ gɔ wa dɛ jĩi. Ŋɔi í kpoo í sɔ̃ɔ í ni, ǹ wa n tɔɔɛi, koo buum inyi wa si jɛɛ gɔ baa keeke n mɔ.

¹¹ Iyi wa bɔ ku buã inyiu wa, ŋɔi í sisi í kpoo má í sɔ̃ɔ í ni, nɔ i muum pɛ̃ɛ akã wa.

¹² Ŋɔi jaaɔ̃u í jɛaa í ni, do irii Aɔ̃ Lafɛ̃ɛɛ fei n kù nɛ ijɛ kãma iyi í jĩa, í gbe iyafũ awɔ kutu akã gɔ iyi ǹ nɛ si kaale do ikpo keeke iyi í wa si jɔlɔ. Na andi nŋu bɛi ǹ naa jĩi ŋau ihɛ̃ ku dɛ n bɔ n koo n ceò sɔndai amu do amam. Bii à jɛ inɛ nŋu bɛ à tã nɔ ka ku.

¹³ Ŋɔi Elii í sɔ̃ɔ í ni, maà ce njo, bɔ i koo i ce bɛi ì fɔu. Amma ceem kaa keeke akã i naam wa titã si anyiɛ nɔ i koo i ce ti awɔ do amaɛ,

¹⁴ domi Aɔ̃ Lafɛ̃ɛi inɛi Izirɛli ŋa í ni, iyafũ iyi í wa si kaaleu kaa tã nɔ ikpoi jɔlɔu mɔ kaa kaye hee ijĩ koo naaò wa.

¹⁵ Ŋɔi jaaɔ̃u í koo í ce bɛi Elii í sɔ̃ɔu. Nɔ à ba ijɛ à waa jɛ si waati nkpɔ nkpɔ nŋu do nyaanzeɛ do Elii takaɛ fei.

¹⁶ Iyafũi kaaleu kù tã nɔ ikpoi jɔlɔu kù kaye si bɛi Elii í ni Aɔ̃ Lafɛ̃ɛ í fɔu.

Elii í jĩ ama inɛmɔkɔi jaaɔ̃u

¹⁷ Si anyii mii ŋau bɛ, ŋɔi amai abo jaaɔ̃ ilu kpasɛ̃u í so bɔ̃ɔ. Nɔ bɔ̃ɔu í la siɛ hee í ku.

¹⁸ Ŋɔi abou í sɔ̃ Elii í ni, mii í wa gãmɛi awaɛ, awɔ inɛi Ilaaɔ̃. Kù jɛ ì naa bi tom ku ba i ye Ilaaɔ̃ gigii dulum dom i kpaò amam nii?

¹⁹ Ŋɔi Elii í jɛaa í ni, nam amaɛu wa. Nɔ í gbaa hai bi iyeu í bɔòɛ ilaawa lele bii í ya sũ. Nɔ í tɔɔ si daayiɛ.

²⁰ Ŋɔi í tɔɔ Aɔ̃ Lafɛ̃ɛ í ni, Aɔ̃ Lafɛ̃ɛm, laalɔi aa cea abo jaaɔ̃u ihɛ̃ iyi ǹ naa ǹ sɔ bi tɛɛ? Aa jɔ̀ amaɛ ku kui?

²¹ Ŋɔi í sɛɛbata isɛ gbɛɛta si amau í tɔɔ Aɔ̃ Lafɛ̃ɛ í ni, Aɔ̃ Lafɛ̃ɛm, ǹ wa n tɔɔɛi, jɔ̀ hundei amau ku baa siɛ.

²² Ŋɔi Aɔ̃ Lafɛ̃ɛ í gbɔ kutɔɔi Elii, nɔ hundei amau í nyi wa siɛ, nɔ í baa si kuwɛɛ má.

²³ Ŋɔi Elii í so amau í kitaò wa hai lelei ileu, í na í na iyeɛ. Ŋɔi í sɔ̃ abou í ni, cɔ amaɛ í wɛɛ.

²⁴ Ŋɔi abou í sɔ̃ Elii í ni, ǹ mà bɛbɛi iyi awɔ inɛi Ilaaɔ̃i nɔ idei Aɔ̃ Lafɛ̃ɛ iyi wa fita wa hai si gɛlɛɛ ntɔi.