Ilaalu 1, 16 - Bibeli do fee

¹ Ŋɔi Aɔ̃ Lafɛ̃ɛ í sɔ̃ walii Yehu amai Hanani koo sɔ̃ Baesa ku ni,

² amu Aɔ̃ Lafɛ̃ɛi ǹ soɛ lele waati iyi i kù jɛ ngɔgɔ, nɔ ǹ jɔ̀ ì jɛ inɛ ngboi zamaam inɛi Izirɛli ŋa. Amma awɔ mɔ ì waa too kucei Zeroboamu nɔ ì tale si zamaam dulum ku ce ku ba i dedeò idɔɔkɔ̃m.

³ Na nŋu, an kpaɛ do nyaanzeɛ feii nɔ n jɔ̀ kpasɛ̃ɛ ku yɛ bɛi kpasɛ̃i Zeroboamu amai Nebatiu.

⁴ Inɛi kpasɛ̃ɛ iyi á ku inɔ ilu fei aja ŋai aa ŋɔɔ, inɛ mɔ iyi á ku inɔ sako fei, yɛi ŋai aa jɔɔ.

⁵ Faajii Baesa do mii mmu ŋa iyi í ce fei do igũ ŋa iyi í jɛ, à kɔɔ si tiai icɛi ilaalui Izirɛli ŋa.

⁶ Baesa í ku nɔ à suu Tirisa. Nɔ Ela amaɛ í jɛ bomma si agbɛɛ.

⁷ Si waatii kuwɛɛi Baesa Aɔ̃ Lafɛ̃ɛ í bɛ walii Yehu amai Hanani wa koo sɔ̃ɔ mii iyi á na ku baa. Aɔ̃ Lafɛ̃ɛ í ce bɛɛbɛi si na iyi í jɔ̀ Baesa do nyaanzeɛ ŋa à ce mii iyi kù dɔ̃a Aɔ̃ Lafɛ̃ɛ si à dedeò idɔɔkɔ̃ɛ bɛi Zeroboamu do nyaanzeɛ ŋa à tako à ce wo, do si na iyi í jɔ̀ í kpa inɛi Zeroboamu ŋa fei.

Ela ilaalui Izirɛli

⁸ Si adɔ̃ kɔnfia do mɛɛfasiai bomma ku jɛi Aza ilaalui Zudaau, Ela amai Baesa í jɛ bommai Izirɛli ilui Tirisa. Nɔ í ce si bommau adɔ̃ minji.

⁹ Ŋɔi Zimiri inɛ ngboi bubui woo mu sarɛtii igũ ŋau í dĩaa sɔɔlui zamba wa. Ajɔ nŋu gɔ Ela í wa kpasɛ̃i Arisa inɛ ngboi kabaɛ nɔ í mɔ atɛ̃ hee wa kpaa.

¹⁰ Ŋɔi Zimiri í koo í lɔ inɔ kpasɛ̃u nɔ í gũu í kpaa si adɔ̃ kaafɛtũ do minjisiai bomma ku jɛi Aza ilaalui Zudaau. Nɔ í jɛ bommau si agbɛɛ.

¹¹ Iyi í buba si kitãi bommau í jɛ ilaalu gbakã, í kpa inɛi kpasɛ̃i Baesa ŋai fei, kù jɔ̀ inɛ baa akã, hai nyaanzeɛ hee do kpaasiɛ ŋa fei.

¹² Zimiri í kpa inɛi kpasɛ̃i Baesa ŋau si bɛi Aɔ̃ Lafɛ̃ɛ í sɔ̃ walii Yehuu

¹³ na dulum ŋa iyi Baesa do Ela amaɛ à ceu fei do iyi à jɔ̀ inɛi Izirɛli ŋau à ce à dedeò idɔɔkɔ̃i Aɔ̃ Lafɛ̃ɛi inɛi Izirɛli ŋa na iwɛ̃ ku tɔɔ nŋa ŋa.

¹⁴ Faajii Ela do mii mmu ŋa iyi í ce fei à kɔɔ si tiai icɛi ilaalui Izirɛli ŋa.

Zimiri ilaalui Izirɛli

¹⁵ Si adɔ̃ kɔnfia do mɛɛjesiai Aza ilaalui Zudaaui Zimiri í ba ajɔ mɛɛje si bomma ilui Tirisa. Waati nŋu, soogei Izirɛli ŋa à waa ce igũ Gibetɔ̃ɔ ilui inɛi Filisi ŋau.

¹⁶ Hai bɛ, ŋɔi à gbɔ baau iyi Zimiri í dĩa ilaaluu sɔɔlui zamba nɔ mɔm í kpaa. Ŋɔi ajɔ nŋu bɛ, aŋa fei à so Ɔmuri inɛ ngboi aŋa sooge ŋau í jɛ ilaalui Izirɛli.

¹⁷ Nɔ Ɔmuri do sooge ŋau fei à dede hai Gibetɔ̃ɔ à koo à kaako ilui Tirisau.

¹⁸ Iyi Zimiri í yɛ à gba iluu, ŋɔi í koo í lɔ inɔ ilei ilaaluu í bɛi í dasi ileu ina. Nɔ í jo araɛ si inɔ ileu bɛ.

¹⁹ Do yaase bɛɛbɛi í ku na dulum ŋa iyi í ce iyi kù dɔ̃a Aɔ̃ Lafɛ̃ɛ si. Í too si kucei Zeroboamu í na araɛ si dulum ŋa iyi Zeroboamu í ce í tale siò inɛi Izirɛli ŋa dulum.

²⁰ Faajii Zimiri ŋa do sɔɔlui zamba iyi í dĩ fei à kɔɔ si tiai icɛi ilaalui Izirɛli ŋa.

²¹ Si anyii ikui Zimiri, inɛi Izirɛli ŋau à kpɛ̃ minji. Bubu nŋa wa bi a bii Tibuni amai Ginati bomma, inɛ bubu ŋa mɔ Ɔmuri.

²² Ŋɔi inɛi Ɔmuri ŋa à kãmia inɛi Tibuni amai Ginati ŋau. Tibuni í ku nɔ Ɔmuri í jɛ bommau.

Ɔmuri ilaalui Izirɛli

²³ Si adɔ̃ kuntaa do akãsiai bomma ku jɛi Aza ilaalui Zudaaui Ɔmuri í jɛ bommai Izirɛli. Í ce si bommaui adɔ̃ maateeji. Iyi í ce si bommau adɔ̃ mɛɛfa Tirisa,

²⁴ ŋɔi í bɔ bi Semɛɛ í ra iri kutai Samari do isɔ fũfũ kpɛkɛlɛ dubu mɛɛfa (6.000). Ŋɔi í ma ilu si iri kutau nɔ í sɔɔ Samari bɛi à ya kpe Semɛɛ inɛ iyi í taa iri kutau.

²⁵ Ɔmuri í ce mii iyi kù sĩaa Aɔ̃ Lafɛ̃ɛ si. Í ce mii laalɔ í re baa inɛ ŋa iyi à tako à cuaau má.

²⁶ Wa too si kucei Zeroboamu amai Nebatiu fei. Í na araɛ si dulum ŋa iyi Zeroboamu í jɔ̀ inɛi Izirɛli ŋa à ce à dedeò idɔɔkɔ̃i Aɔ̃ Lafɛ̃ɛi inɛi Izirɛli ŋa na iwɛ̃ ku tɔɔ nŋa ŋa.

²⁷ Faajii Ɔmuri ŋa do mii mmu ŋa iyi í ce do bɛi í jɛ igũ, à kɔɔ si tiai icɛi ilaalui Izirɛli ŋa.

²⁸ Ɔmuri í ku nɔ à suu Samari. Ŋɔi Akabu amaɛ í jɛ bomma si agbɛɛ.

Akabu ilaalui Izirɛli

²⁹ Akabu amai Ɔmuri í jɛ bommai Izirɛli si adɔ̃ kuntaa do mɛɛjɔsiai Aza ilaalui Zudaa. Nɔ í ce adɔ̃ kɔnfia do minji si bommau Samari.

³⁰ Amma í ce mii iyi kù sĩaa Aɔ̃ Lafɛ̃ɛ si í re baa inɛ ŋa iyi à takoɛ wa fei.

³¹ Dulum iyi balaɛ Zeroboamu amai Nebati í ce iyi wa too siu kù too, domi í koo í so Zezabɛli ama inaaboi Etibaali ilaalui inɛi Sidɔ̃ɔ ŋau í coo abo. Nɔ í koo wa cea Baali iwɛ̃u icɛ wa sɛɛbataa.

³² Ŋɔi í maa Baaliu ile Samari, nɔ í ma bi kuwee si inɔ ileu

³³ nɔ í gũ jĩi gɔ iyi í jɔ iwɛ̃ nŋa Asera. Í ce dulum má í dedeò idɔɔkɔ̃i Aɔ̃ Lafɛ̃ɛi inɛi Izirɛli ŋa í re ilaalui Izirɛli ŋa iyi à cuaa fei.

³⁴ Si waatiu bɛi Hiɛli inɛi Betɛliu í teese wa ma ilui Zeriko. Nɔ ide iyi Aɔ̃ Lafɛ̃ɛ í ni Zozue amai Nunu ku fɔu í ce. Iyi à nyɔ icui bindiu ŋɔi Abiramu ama yemmaɛ í ku, iyi à dasi gambo ŋau nɔ Segubu kɔdaaɛ í ku.