Ilaalu 1, 15 - Bibeli do fee

Abiyamu ilaalui Zudaa

¹ Si adɔ̃ mɛɛwa do mɛɛjɔsiai bomma ku jɛi Zeroboamu amai Nebatii Abiyamu mɔ í jɛ bomma si ilɛi Zudaa.

² Í ce adɔ̃ mɛɛta si bommau ilui Zeruzalɛmu. Iyeɛi à ya kpe Maaka, ama inaaboi Abisalɔmu.

³ Ŋɔi í lɔsi dulum iyi baaɛ í tako í ce ŋau fei ku ce. Nɔ idɔɛ fei kù wa si Aɔ̃ Lafɛ̃ɛɛ bɛi ti Davidi balaɛ í tako í wa si Aɔ̃ Lafɛ̃ɛɛ wo.

⁴ Amma na saabui Davidi, Aɔ̃ Lafɛ̃ɛɛ í jɔ̀ í ba ama iyi í tɛkɛ siɛ ku ba nyaanzei woo jɛ bomma ŋau ku maà ku nɔ Zeruzalɛmu ku jɛ ilu nlai bommau,

⁵ domi Davidi í ce iyi í tɛ si wajui Aɔ̃ Lafɛ̃ɛ, nɔ kù kua woodaɛ ŋa baa akã si kuwɛɛɛ fei, í gbe si gãmɛi idei Uri inɛi Hɛtiu.

⁶ Si kuwɛɛi Roboamu fei igũi í ce nŋu do Zeroboamu.

⁷ Bɛɛbɛ mɔi Abiyamu do Zeroboamu mɔ à ce igũ. Faajii Abiyamu do mii mmu ŋa iyi í ce fei í wa si tiai icɛi ilaalui Zudaa ŋa.

⁸ Abiyamu í ku nɔ à suu ilui Davidi. Ŋɔi Aza amaɛ í jɛ bommau si agbɛɛ.

Aza ilaalui Zudaa

⁹ Si adɔ̃ kɔnfiasiai Zeroboamu ilaalui Izirɛlii Aza í jɛ bommai Zudaa.

¹⁰ Nɔ í ce si bommau adɔ̃ ciiji do akã Zeruzalɛmu. Ayiɛi Maaka ama inaaboi Abisalɔmu.

¹¹ Aza í ce iyi í sĩaa Aɔ̃ Lafɛ̃ɛ si bɛi Davidi balaɛ.

¹² Í nya woo ta icu ŋa iyi à wa bi kuwee ŋau hai si ilɛu do iwɛ̃ ŋa iyi balaɛ ŋa à ceu fei.

¹³ Nɔ mɔm í nya ilaalu ku jɛi ayiɛ Maaka si na iyi í jɔ̀ í ce mii iyi í jɔ iwɛ̃ Asera. Aza í lɛgɛ bi kuweeu nɔ í koo í joo si lɔɔmai Sedorɔ̃ɔ.

¹⁴ Amma bi kuwee ŋa iyi à wa si geete ŋau a kù tã baa do iyi idɔi Aza í wa si Aɔ̃ Lafɛ̃ɛ si kuwɛɛɛ fei.

¹⁵ Í so isɔ fũfũ do wura do jɛɛ ŋa iyi nŋu do baaɛ à nya ikã a jɛ ti Aɔ̃ Lafɛ̃ɛ í koo í jilɛ ŋa si inɔ kpasɛ̃i Aɔ̃ Lafɛ̃ɛ.

¹⁶ Aza do Baesa ilaalui Izirɛli à ce igũi si kuwɛɛ nŋa fei.

¹⁷ Baesa í bɔ igũ si ilɛi Zudaa. Nɔ í koo wa ma bindii Rama ku ba ku ganji Aza do inɛi Zudaa ŋau a fita walakɔ a lɔ wa.

¹⁸ Aza í so isɔ fũfũ do wura iyi í gbe si inɔ kpasɛ̃i Aɔ̃ Lafɛ̃ɛu fei do si ti nŋu ilaaluu takaɛ í koo í daa woo ce icɛɛ ŋa si awɔ, í bɛ ŋaò bi Bɛni-Hadadi ilaalui Siri iyi í wa Damasiu. Bɛni-Hadadiu amai Tabirimɔɔi nɔ wa jɛ tɔkui Heziyɔ̃ɔ. Aza í ni a koo a sɔ̃ɔ a ni,

¹⁹ jɔ̀ akabuu ku wa aninii awaɛ, bɛi í wa aninii baam do baaɛ wo. Wee ǹ sambaɛ amuai isɔ fũfũ do wura wa. Koo fɛ akabuui iŋɛò Baesa ilaalui Izirɛliu ku ba ku saam.

²⁰ Ŋɔi Bɛni-Hadadi í jɛsi idei Aza. Nɔ í bɛ inɛ ngboi soogeɛ ŋau à bɔ igũ si ilui Izirɛli ŋa, nɔ à koo à jɛ Iyɔ̃ɔ igũ do Dãa do Abɛli-Bɛti-Maaka do ilɛi Kinerɔti fei do ilɛi Nɛfitali fei.

²¹ Iyi Baesa í gbɔ ideu, ŋɔi í jɔ̀ bindii Rama ku ma, nɔ í koo í wa Tirisa.

²² Ŋɔi Aza í tɔtɔɔ inɛi Zudaa ŋau fei, kù jɔ̀ inɛ baa akã. Inɛ ŋau à koo à so kuta ŋa do jĩi ŋa iyi Baesa wa maò bindii Ramau à koo à waa maò bindii Geba do Misipa si ilɛi Bɛnzamɛɛ.

²³ Faajii icɛi Aza ŋa fei do igũ ŋa iyi í jɛ fei do mii mmu ŋa iyi í ce fei, do ilu ŋa iyi í ma fei à kɔɔ si tiai icɛi ilaalui Zudaa ŋa. Si agboɛ, í na í ba bɔ̃ɔi isɛ.

²⁴ Aza í ku nɔ à suu bi balaɛ ŋa si ilui Davidi balaɛ. Nɔ Zozafati amaɛ í jɛ bomma si agbɛɛ.

Nadabu ilaalui Izirɛli

²⁵ Nadabu amai Zeroboamu í jɛ bommai Izirɛli si adɔ̃ minjisiai bomma ku jɛi Aza ilaalui Zudaa. Nɔ í ce si bommai Izirɛliu adɔ̃ minji.

²⁶ Nadabu í ce mii iyi kù sĩaa Aɔ̃ Lafɛ̃ɛ si, nɔ wa too kpãa iyi baaɛ mɔ í too. Í na araɛ si dulum ŋa iyi baaɛu í jɔ̀ inɛi Izirɛli ŋa à ceu.

²⁷ Ajɔ nŋu gɔ Nadabu do inɛi Izirɛli ŋa fei à bɔ igũ Gibetɔ̃ɔ, ilui inɛi Filisi ŋa. Ŋɔi Baesa amai Ahiya si dimii Isakaa í dĩaa sɔɔlu nɔ í koo í kpaa Gibetɔ̃ɔ bɛ.

²⁸ Í kpaai si adɔ̃ mɛɛtasiai bomma ku jɛi Aza ilaalui Zudaa, nɔ í jɛ bommau si agbɛɛ.

²⁹ Waati iyi í jɛ ilaalu, í kpa inɛi kpasɛ̃i Zeroboamu ŋai fei, kù jɔ̀ baa tɔkuɛ akã ku fita si. Í ce nfe ŋai fei, si bɛi Aɔ̃ Lafɛ̃ɛ í sɔ̃ Ahiya woo ce icɛɛ inɛi ilui Siloou,

³⁰ na irii dulum iyi Zeroboamu í ce do iyi í jɔ̀ inɛi Izirɛli ŋa à ce à dedeò idɔɔkɔ̃i Aɔ̃ Lafɛ̃ɛ nŋa.

³¹ Faajii Nadabu do mii mmu ŋa iyi í ce fei à kɔɔ si tiai icɛi ilaalui Izirɛli ŋa.

³² Igũi í wa si aninii Aza do Baesa ilaalui Izirɛliu si kuwɛɛ nŋa fei.

Baesa ilaalui Izirɛli

³³ Si adɔ̃ mɛɛtasiai bomma ku jɛi Aza ilaalui Zudaa, Baesa amai Ahiya í jɛ bomma si ilɛi Izirɛliu fei ilui Tirisa. Nɔ í ce si bommau adɔ̃ kɔnfia do mɛɛ.

³⁴ Ŋɔi í ce mii iyi kù dɔ̃a Aɔ̃ Lafɛ̃ɛ si, nɔ wa too kpãa iyi Zeroboamu í toou. Í na araɛ si dulum ŋa iyi Zeroboamu í jɔ̀ inɛi Izirɛli ŋa à ceu fei.