Ilaalu 1, 14 - Bibeli do fee

Ikui amai Zeroboamu

¹ Si waati nŋu bɛ, Abia amai Zeroboamu í so bɔ̃ɔ.

² Ŋɔi Zeroboamu í sɔ̃ aboɛ í ni, ǹ wa n tɔɔɛi, dede i kpaasi araɛ ku ba a maà mà iyi awɔ abom nii, nɔ i bɔ Siloo. Ahiya waliiu í wa bɛ. Nŋui í sɔ̃m í ni an jɛ ilaalui zamaau ihɛ̃ fei.

³ So pɛ̃ɛ ara mɛɛwa do kaa ŋa do nyikɔ̃ jɔlɔ akã i kooa kpasɛ̃ɛ. Á sɔ̃ɛ mii iyi á na ku ba amau.

⁴ Ŋɔi aboi Zeroboamu í ce bɛɛbɛ. Í dede í bɔ Siloo, nɔ í koo í lɔ kpasɛ̃i Ahiya. Ahiya wee kù waa yɛ ilu má na agboɛ.

⁵ Aɔ̃ Lafɛ̃ɛ í sɔ̃ɔ wo tã í ni, aboi Zeroboamu á naa ku bee bi tɛɛ si bɛi amaɛ wa ce bɔ̃ɔ. Waati iyi á na ku to wau á kpaasi araɛi bɛi inɛ mmu. Bii í to wa, sɔ̃ɔ i ni bɛ ihɛ̃ do bɛ ihɛ̃i á ce.

⁶ Iyi Ahiya í gbɔ ibai baataɛ waati iyi wa kua anu ileu wa, ŋɔi í ni, lɔ wa aboi Zeroboamu. Na mii í ce ì waa dɛ i kpaasi araɛ inɛ mmu. Amu de an sɔ̃ɛ laabaau sãmi gɔ.

⁷ Koo sɔ̃ Zeroboamu i ni, bɛi Aɔ̃ Lafɛ̃ɛi inɛi Izirɛli ŋa í fɔ wee. Í ni, amu Aɔ̃ Lafɛ̃ɛ ǹ soɛ lelei si inɔi zamaam inɛi Izirɛli ŋau i jɛ inɛ ngbo nŋa.

⁸ Ǹ gba bommau wa hai si kpasɛ̃i Davidi ǹ naɛ. Amma i kù too si kucei woo ce icɛm Davidi iyi í jirima woodam ŋa nɔ í toom do idɔɛ fei wa ceò iyi í jɛɛm dee dee fei.

⁹ Laalɔi awɔ í re ti inɛ ŋa iyi à cuaɛ wa fei. Ì koo ì cea araɛ iwɛ̃ ŋa iyi ì yɔ do isɔ ì dedeò idɔɔkɔ̃m, nɔ ì nyɔm do anyiɛ.

¹⁰ Nŋu bɛi á jɔ̀ n naaò laalɔ wa si kpasɛ̃ɛ. An kpa inɛmɔkɔ ŋa iyi à jɛ tɛɛ fei, hai aru ŋa hee do inɛ ŋa iyi à nɛ ara nŋa fei. Nɔ n kpa irii kpasɛ̃ɛ bɛi à ya kpã riisi hee koo tãò.

¹¹ Aja ŋai aa ŋɔ nyaanzeɛ iyi á ku inɔ ilu, yɛi ŋa mɔi aa jɛ inɛ iyi á ku inɔ sako. Bɛi Aɔ̃ Lafɛ̃ɛ í fɔ mbɛ.

¹² Awɔ aboi Zeroboamu, dede i bɔ ide. Amma hai ì waa lɔ inɔ iluu gbakã, amau á kui.

¹³ Nɔ inɛi Izirɛli fei á kpata akũɛ nɔ á suu. Nŋu akãu bɛi á ba ku si si kpasɛ̃i Zeroboamu si na iyi í jɔ̀ nŋu akãu bɛi Aɔ̃ Lafɛ̃ɛi inɛi Izirɛli ŋa í yɛ siɛ mii jiida si nyaanzei Zeroboamu fei.

¹⁴ Si anyiɛ Aɔ̃ Lafɛ̃ɛ á jilɛ ilaalu si ilɛi Izirɛli iyi á kpa kpasɛ̃i Zeroboamu fei. Ajɔui í nɔ í to wa bɛ tã.

¹⁵ Aɔ̃ Lafɛ̃ɛ á kpa inɛi Izirɛli ŋa nɔ a maa yaya do njo bɛi fɔfɔ iyi í wa si acãi inyi. Á nya ŋa hai si ilɛ jiidau ihɛ̃ iyi í na bala nŋa ŋa nɔ koo fangaa ŋa do alalai idoi Efarata do ikpa ihɔ̃, si na iyi í jɔ̀ à gũ jĩi gɔ na iwɛ̃ nŋa ŋa Asera à dedeò idɔɔkɔ̃ɛ.

¹⁶ Á to nŋa anyi na dulum dii Zeroboamu do iyi í jɔ̀ inɛi Izirɛli ŋa mɔ à ce.

¹⁷ Si anyii nŋu, ŋɔi aboi Zeroboamu í dede í nɛ. Ŋɔi í to Tirisa. Iyi wa to wa andɛ koofai kpasɛ̃u gbakã ŋɔi amau í ku.

¹⁸ Ŋɔi à koo à suu, nɔ inɛi Izirɛli fei í kpataa si bɛi Aɔ̃ Lafɛ̃ɛ í sɔ̃ walii Ahiya woo ce icɛɛu.

¹⁹ Faajii icɛ mmu ŋa iyi Zeroboamu í ce, yaase bɛi í ce igũ do bɛi í jɛ bommaɛ, à kɔɔi si tiai icɛi ilaalui Izirɛli ŋa.

²⁰ Zeroboamu í ce si bommaui adɔ̃ kɔnfia do minji í bɛi í ku. Nɔ amaɛ Nadabu í jɛ bomma si agbɛɛ.

Kumɔsii bomma ku jɛi Roboamu ilaalui Zudaa

²¹ Roboamu amai Salomɔɔ í nɛi adɔ̃ ciiji do akã waati iyi í jɛ bomma si ilɛi Zudaa. Iyeɛi à ya kpe Naama inɛi Amɔɔ. Nɔ í ce si bommau adɔ̃ mɛɛwa do mɛɛje Zeruzalɛmu, ilu iyi Aɔ̃ Lafɛ̃ɛ í cica si inɔi ilui dimii Izirɛli ŋau fei ku jɛ bii á ya maa wau.

²² Inɛi Zudaa ŋa à ce mii iyi kù sĩaa Aɔ̃ Lafɛ̃ɛ si. À dede idɔɔkɔ̃ɛ í re baa ti bala nŋa ŋa wo.

²³ Aŋa mɔ à ma geete bi kuwee ŋa, à gũ kuta ŋa, nɔ à gũa Asera iwɛ̃u jĩi ŋa si antaii iri kuta fei do si icui jĩi tũtũ fei.

²⁴ Nɔ si waatii iwɛ̃ ku tɔɔ nŋa à ya maa ce sakarai, à maa sisiò laalɔi dimi ŋa iyi Aɔ̃ Lafɛ̃ɛ í lele si waju nŋa.

²⁵ Si adɔ̃ miiusiai bomma ku jɛi Roboamui Sisaki ilaalui Ezibitiu í naa igũ ku ce Zeruzalɛmu.

²⁶ Ŋɔi í ko amanii kpasɛ̃i Aɔ̃ Lafɛ̃ɛ ŋau do ti ilei ilaaluu fei. Í so tɛlii wura ŋa iyi Salomɔɔ í ceu fei.

²⁷ Ŋɔi Roboamu í jɔ̀ à ce tɛlii isɔ nkpa à sãsi, nɔ í jɔ̀a inɛ ngboi sooge ŋa iyi à ya maa degbe anu koofaɛ à maa cɔɔ.

²⁸ Waati iyi ilaaluu í fita wa bɔ kpasɛ̃i Aɔ̃ Lafɛ̃ɛ fei, woo degbe anu koofa ŋau à ya so tɛli ŋaui, nɔ à nyiò wa ilaawa nŋa bɛ má.

²⁹ Faajii icɛ mmu ŋa iyi Roboamu í ce, à kɔɔi si tiai icɛi ilaalui Zudaa ŋa.

³⁰ Nɔ Roboamu do Zeroboamu à ya maa ce igũi waati kãma fei.

³¹ Roboamu í ku nɔ à suu bi balaɛ ŋa si ilui Davidi. Iyeɛi Naama inɛi Amɔɔu. Nɔ amaɛ Abiyamu í jɛ bomma si agbɛɛ.