Ilaalu 1, 13 - Bibeli do fee

¹ Ŋɔi Ilaaɔ̃ í bɛ walii gɔ bi Zeroboamu hai ilɛi Zudaa. Waliiu í to Betɛli waati iyi Zeroboamu í wa bi kuweeu nɔ wa bi ku jo tuae ŋa.

² Ŋɔi waliiu í lasi bi kuweeu í ni, bi kuwee, bi kuwee, ide iyi Aɔ̃ Lafɛ̃ɛ í fɔ wee. Í ni, aa na a bí ama gɔ si nyaanzei Davidi nɔ a kpoo Zoziasi. Nŋui á kpa woo ce kuwee ŋa si antaii geete ŋau, aŋa iyi à ya maa jo tuae ŋau, nɔ nŋui á jo kũkũi amanɛ ŋa si antaiɛ.

³ Nɔ í ni má, bi kuweeu ihɛ̃ á lɛgɛ nɔ ilúlu iyi í wa antaiɛu ku fangaa ilɛ. Nŋui á jɛ nŋɛ nyinda iyi Aɔ̃ Lafɛ̃ɛi í fɔ ideu ihɛ̃ do ntɔ.

⁴ Iyi ilaaluu í gbɔ ide iyi waliiu í fɔa bi kuweeu, ŋɔi í to siɛ awɔ wa hai lelei bi kuweeu nɔ í ni, i muu wa ŋa. Ŋɔi awɔ iyi í to siɛu í gbɛ nɔ í mɔngɔ ku kaa wa má.

⁵ Ŋɔi bi kuweeu í lɛgɛ nɔ ilúlu iyi í wa antaiɛu í fangaa si bɛi waliiu í fɔ nyinda iyi Aɔ̃ Lafɛ̃ɛ í ni á ceu.

⁶ Gbakã, ilaaluu í so ide, nɔ í sɔ̃ waliiu í ni, tɔɔm Aɔ̃ Lafɛ̃ɛɛ ku ceem suuru ku ba n ka awɔm. Ŋɔi waliiu í tɔɔ Aɔ̃ Lafɛ̃ɛ nɔ ilaaluu í baaò awɔɛ wa nɔ í baa si agbɛɛ bɛi tako.

⁷ Ŋɔi ilaaluu í sɔ̃ waliiu í ni, ka bɔ kpasɛ̃m i jɛ sɔnda gɔ nɔ n ceɛ amua.

⁸ Amma waliiu í jɛaa í ni, baa bii í jɛ bubui kpasɛ̃ɛi aa muum, n kaa n tooɛ n bɔ kpasɛ̃. N kaa n jɛ pɛ̃ɛ hee má jɛ n mɔ inyi si inyau ihɛ̃,

⁹ domi Aɔ̃ Lafɛ̃ɛ í jilɛɛm wooda í ni n maà n jɛ pɛ̃ɛ walakɔ n mɔ inyi, nɔ n maà n too kpãa iyi n kooò n baaò wa má.

¹⁰ Iyi í fɔ bɛɛbɛ í tã ŋɔi í too kpãa mmu wa nɛ.

Waliiu í kua wooda

¹¹ Wee walii mɔkɔ ngbo gɔ í wa Betɛli bɛ. Ŋɔi amaɛ ŋa à naa à sisiaa bɛi waliiu í naa í ce Betɛli ajɔ nŋu fei do ide ŋa iyi í sɔ̃ ilaaluu. Iyi à sisia baa nŋau ideu à tã,

¹² ŋɔi í bee ŋa í ni, kpãa yoomai í too. Amu ŋau à sɔ̃ɔ kpãa iyi í too í nɛò.

¹³ Ŋɔi í ni amu ŋau a dĩa gbankɛlɛi nŋu gaayi. Ŋɔi à dĩa gbankɛlɛu gaayiu nɔ í gũ antaiɛ.

¹⁴ Ŋɔi wa da hãmɛi waliiu, nɔ í koo baa wa buba abɛ jĩi nla gɔ. Ŋɔi í beeɛ í ni, awɔi ì jɛ walii iyi í naa hai Zudaau? Nɔ í jɛaa í ni, oo, amui.

¹⁵ Ŋɔi í sɔ̃ɔ í ni, toom wa ka bɔ kpasɛ̃ i koo i jɛ sɔnda gɔ.

¹⁶ Amma waliiu í jɛaa í ni, n kaa n yɔkɔ n sinda n tooɛ hee má jɛ n bɔ kpasɛ̃ɛ. N kù nɛ n jɛ hee má jɛ n mɔ inyi si inyau ihɛ̃,

¹⁷ domi Aɔ̃ Lafɛ̃ɛ í sɔ̃m í ni n maà n jɛ pɛ̃ɛ walakɔ n mɔ inyi, nɔ n maà n too kpãa iyi n kooò n baaò wa má.

¹⁸ Ŋɔi í sɔ̃ɔ í ni, amu mɔ waliii bɛi awɔ, nɔ amaleka gɔ í naa í sɔ̃m ide iyi Aɔ̃ Lafɛ̃ɛ í bɛɛò wa. Í sɔ̃m í ni, gbãa bɔòɛ kpasɛ̃ ku jɛ pɛ̃ɛ nɔ ku mɔ inyi. Amma iboi wa sɔaa.

¹⁹ Ŋɔi waliiu í sinda í tooɛ, nɔ í koo í jɛ pɛ̃ɛ nɔ í mɔ inyi kpasɛ̃ɛ.

Ilaaɔ̃ í yɛ taalei waliiu

²⁰ Si bɛi à waa jɛ, ŋɔi Aɔ̃ Lafɛ̃ɛ í sɔ̃ walii mɔkɔ ngbo iyi í baaɛ wau ide.

²¹ Nɔ nŋu mɔ í sɔ̃ walii iyi í naa hai Zudaau í ni, bɛi Aɔ̃ Lafɛ̃ɛ í fɔ wee. Si bɛi ì donda idei Aɔ̃ Lafɛ̃ɛ nɔ i kù jirima wooda iyi Aɔ̃ Lafɛ̃ɛɛ í jilɛɛ,

²² nɔ ì nyi wa ì naa ì jɛ pɛ̃ɛ nɔ ì mɔ inyi si inya bii í ni, maà na i jɛ pɛ̃ɛ hee má jɛ i mɔ inyi, na nŋu, a kaa si ikuɛ si balɛi baaɛ ŋa.

²³ Waati iyi walii iyi í sinda wau í jɛ nɔ í mɔ í tã, ŋɔi mɔkɔ ngbou í dĩa gbankɛlɛɛ gaayi í náa.

²⁴ Si anyiɛ waliiu í dasi kpãa í nɛ. Ŋɔi í koo í ko muusu nla si kpãa, nɔ muusuu í kpaa. Ikuɛ í wa si kpãau, nɔ gbankɛlɛu wa leekĩ cingaaɛ, nɔ muusu nlau mɔ í wa kɔkɔi ikuu.

²⁵ Inɛ ŋa iyi à waa lɔ bɛ à yɛ ikuu si kpãau nɔ muusuu í wa cingaaɛ. Ŋɔi à koo à waa nya faajiɛ iyi à to ilui walii mɔkɔ ngbou.

²⁶ Iyi mɔkɔ ngbo iyi í sinda waliiu wa hai kpãau í gbɔ ideu, ŋɔi í ni, walii iyi kù jirima idei Aɔ̃ Lafɛ̃ɛu mbɛ. Aɔ̃ Lafɛ̃ɛ í soo í daa muusu nla si awɔ í bataɛ í gagagaɛ í kpaa si bɛi Aɔ̃ Lafɛ̃ɛ í sɔ̃ɔu.

²⁷ Ŋɔi í ni amai nŋu ŋa a dĩa gbankɛlɛi nŋu gaayi. Nɔ à dĩa gbankɛlɛu gaayiu,

²⁸ nɔ í dasi kpãa. Ŋɔi í koo í ba ikuu wa sũ si kpãau, nɔ gbankɛlɛu do muusu nlau à wa kɔkɔɛ. Muusu nlau kù ŋɔ ikuu nɔ kù kpa gbankɛlɛu.

²⁹ Ŋɔi mɔkɔ ngbou í so ikui waliiu í lesi antaii gbankɛlɛ í baaɛ wa inɔ iluu ku na ku kpata akũɛ nɔ ku suu.

³⁰ Ŋɔi í naa í suu si isa iyi nŋu takaɛ í cea araɛ sɔɔluɛu, nɔ à kpataa à waa ni, inɔ kufɔi kpaasim.

³¹ Iyi à suu à tã, ŋɔi mɔkɔ ngbou í sɔ̃ amaɛ ŋa í ni, bii ǹ ku, i sim inɔ balɛi waliiu ihɛ̃ ŋa, i jilɛ kũkũm kɔkɔi kũkũɛ ŋa.

³² Ide iyi Aɔ̃ Lafɛ̃ɛ í ni ku na ku fɔ si gãmɛi bi kuweei Betɛli do bi kuwee ŋa iyi à wa si geete ŋa si ilui Samari ŋau, ideu á cei.

³³ Baa do iyi Zeroboamu í gbɔ ide ŋau bɛ fei, kù kpaasi hai si laalɔ ku ceɛ. Nɔ si zamaau inɛ ŋa iyi à bi aŋa a jɛ woo wee si geete ŋau fei í ya tontoo nŋa ikpo si irii ku nya ŋa ikã.

³⁴ Iyi bɛi í jɛ dulum dii kpasɛ̃i Zeroboamu. Na ŋɔi í jɔ̀ Ilaaɔ̃ í kpa kpasɛ̃u í nyaa si andunya.