Ilaalu 1, 12 - Bibeli do fee

Kutɔtɔɔi Sikɛmu

¹ Ŋɔi Roboamu í bɔ Sikɛmu, domi bɛi inɛi Izirɛli ŋau fei à bɔ ku biiɛ bomma.

² Zeroboamu amai Nebati í tako í saa Salomɔɔ wo í koo í wa ilɛi Ezibiti. Waati iyi í gbɔ baaui kutɔtɔɔi Sikɛmuu, í dasi idɔ nŋu ku gbe ilɛi Ezibiti bɛ.

³ Amma à bɛ inɛ ŋa a koo a kpoo wa. Ŋɔi Zeroboamu í baa, nɔ nŋu do inɛi Izirɛli ŋau fei à bɔ bi Roboamu à sɔ̃ɔ à ni,

⁴ baaɛ í ce nwai bɛi aru ŋa. Amma nsɛi, bii awɔ ì kaye nwa asou bɛ iyi í wo bɛi zuugu si kɔngɔ nwa ŋa à tã sɔɔlu ka ceɛ icɛ.

⁵ Ŋɔi í sɔ̃ ŋa í ni, i koo i bɔ ŋa nɔ i nyi wa bi tom si afei ajɔ mɛɛta ŋa. Ŋɔi zamaau í nɛ.

⁶ Ŋɔi ilaalu Roboamu í bee ikɔ bi mɔkɔ ngbo ŋa iyi à tako à wa bi baaɛ Salomɔɔ wo í ni, bɛirei í jɔ n jɛa zamaau ŋa.

⁷ Ŋɔi à sɔ̃ɔ à ni, bii ì jɛsi i ce nŋa icɛ nɔ i jɛ nŋa ide didɔ̃, aa jɛ woo ce icɛɛ ŋai hee do ajɔ fei.

⁸ Amma Roboamu í jɔ̀ ikɔi mɔkɔ ngbo ŋau nɔ í koo í bee awaasũ saaɛ ŋa iyi à wa bi tɛɛ

⁹ í ni, inɛ ŋau ihɛ̃ à naa à tɔɔm n kayea aŋa aso iyi baam í kã nŋau. Bɛirei iŋɛ mɔ ì bi n jɛ ŋa.

¹⁰ Ŋɔi awaasũ saaɛ ŋau à sɔ̃ɔ à ni, zamaau í naa í sɔ̃ɛ í ni baaɛ í kãa aŋa aso kuwo nɔ á sĩa awɔ i kayea aŋa. Sɔ̃ ŋa i ni, amu Roboamu amaawɔ kɛsɛɛdɛm í la í re gbankilii baam.

¹¹ Baam í kã nŋɛ aso kuwo, amma nsɛi amu an kɔ̃ɔ nŋɛ si ku re bɛɛbɛ má. Baam í tɛ nŋɛ kpɔtɔɔ, amu kpɔtɔɔi isɔi an tɛ nŋɛ.

¹² Ŋɔi Zeroboamu do zamaau fei à nyi wa si ajɔ mɛɛtasia bɛi ilaaluu í fɔ.

¹³ Nɔ ilaaluu í jɛa zamaau do kugaabu. Í jɔ̀ ikɔi mɔkɔ ngbo ŋau,

¹⁴ nɔ í sɔ̃ ŋa bɛi saaɛ ŋa à ni ku fɔu. Í sɔ̃ ŋa í ni, baam í kãa nŋɛ aso kuwo, amma amu an kɔ̃ɔ nŋɛ si ku re bɛɛbɛ má. Baam í tɛ nŋɛ kpɔtɔɔi, amu kpɔtɔɔi isɔi an tɛ nŋɛ.

¹⁵ Do yaase bɛɛbɛi ilaaluu í kɔ̀si idei zamaau, domi Aɔ̃ Lafɛ̃ɛi í jilɔɔ bɛɛbɛ ku ba ide iyi í sɔ̃ Ahiya inɛi Siloo koo sɔ̃ Zeroboamu amai Nebatiu ku ce.

Bommau í kpɛ̃

¹⁶ Iyi inɛi Izirɛli ŋa à yɛ iyi ilaaluu kù waa gbɔa aŋa, ŋɔi zamaau fei í koo í sɔ̃ ilaaluu í ni, baa yoomai à nɛ do Davidi. A kù nɛ ikpɛ̃ kãma do amai Izai. Iŋɛ inɛi Izirɛli ŋa, ka nɛ ide nwa. Nɔ bɛbɛi awɔ amai Davidi, wũa idei bommaɛ. Iyi à fɔ bɛɛbɛ à tã, ŋɔi inɛi Izirɛli ŋau fei à nɛ ide nŋa.

¹⁷ Nɔ inɛi Izirɛli ŋa iyi à wa ilɛi Zudaa aŋa akãi Roboamu í jɛ ilaalu nŋa.

¹⁸ Do nŋu fei Roboamu í bɛ Adoramu iyi à so í jɛ inɛ ngboi icɛi tilasi ŋau bi inɛi Izirɛli ŋa iyi à wa ikpa awɔ njɛi kpãai inunuu. Amma inɛ ŋau à taa kuta à kpaa. Ŋɔi Roboamu í ce gbãa gbãa í gũ sarɛtiɛ í sa í nɛ Zeruzalɛmu.

¹⁹ Do yaase bɛɛbɛi inɛi Izirɛli ŋa iyi à wa ikpa awɔ njɛi kpãai inunuu à dedeò ide ku kɔ̀ si gãmɛi inɛi kpasɛ̃i Davidi ŋa hee ku baa nnyi.

²⁰ Iyi inɛi Izirɛli ŋau à gbɔ iyi Zeroboamu í baa, ŋɔi à ce kutɔtɔɔ, nɔ à kpoo à soo í jɛ ilaalui ilɛi Izirɛli. Dimii Zudaa nŋu akãi í too kpasɛ̃i Davidi.

²¹ Waati iyi Roboamu í to Zeruzalɛmu ŋɔi í tɔtɔɔ inɛi Zudaa ŋa fei do inɛi Bɛnzamɛɛ ŋa woo ja igũ aŋa dubu cĩɔ do cinɛ (180.000) ku ba a bɔ igũ bi inɛi Izirɛli ŋa nɔ a baaò ŋa wa si bommai nŋu amai Salomɔɔ.

²² Amma Ilaaɔ̃ í sɔ̃ walii Semaya í ni,

²³ koo sɔ̃ Roboamu amai Salomɔɔ ilaalui Zudaau do inɛi Zudaa do Bɛnzamɛɛ ŋa hee do zamaa iyi í gbe fei

²⁴ i ni amu Aɔ̃ Lafɛ̃ɛ ǹ ni, i maà bɔ igũ bi inɛi Izirɛli nyaanze nŋɛ ŋau ŋa. Iŋɛ fei i nyi ide nŋɛ ŋa, domi hai bi tom nii fei ndɛɛ wa naa. Ŋɔi à jirima idei Aɔ̃ Lafɛ̃ɛu nɔ à nyi ide nŋa ŋa si bɛi Aɔ̃ Lafɛ̃ɛ í fɔu.

²⁵ Ŋɔi Zeroboamu í koo í ma bindi í kaako ilui Sikɛmu si iri kutai Efaraimu ŋau, nɔ í ce kpasɛ̃ɛ bɛ. Si anyiɛ nɔ í fita í koo í ma bindi í kaako ilui Penuɛli mɔ.

Dulum dii Zeroboamu

²⁶ Ŋɔi Zeroboamu wa fɔ si inɔɛ wa ni, bommau á yɔkɔ ku nyi wa si kpasɛ̃i Davidi ŋa.

²⁷ Bii zamaau ihɛ̃ í bɔ Zeruzalɛmu nɔ í koo wa ce kuwee si inɔ kpasɛ̃i Aɔ̃ Lafɛ̃ɛu fei, idɔ nŋa á na ku nyi si lafɛ̃ɛ nŋa Roboamu ilaalui Zudaau. Nɔ aa kpam nii a nyi bi tɛɛ.

²⁸ Ŋɔi ilaaluu í koo í bee bɛi nŋu á ce, nɔ inɛ ŋa à náa ikɔ. Ŋɔi í ce ama kɛtɛ minji do wura, nɔ í sɔ̃ zamaau í ni, iŋɛ inɛi Izirɛli ŋa, Zeruzalɛmu ku bɔ nŋɛ í tã mbɛ. Lafɛ̃ɛ nŋɛ wee ihɛ̃. Nŋui í fitaò ŋɛ wa hai ilɛi Ezibiti.

²⁹ Nɔ í koo í jilɛ ama kɛtɛ akã Betɛli, akã mɔ Dãa.

³⁰ Do yaase bɛɛbɛi í tale si inɛ ŋa dulum ku ce. Zamaau í ya bɔ hee Dãa iwɛ̃u akã ku weea.

³¹ Ŋɔi Zeroboamu í ma ile bi ku wee ŋa si iri kuta ŋa, nɔ í cica woo wee ŋa hai si zamaau fei, aŋa iyi a kù jɛ tɔkui Levii ŋa.

³² Ŋɔi í jilɛ jingau si ajɔ maatũsiai cukpa mɛɛjɔsia bɛi jingau iyi à ya jɛ ilɛi Zudaau. Nɔ nŋu takaɛ í bɔ Betɛli í koo í cea ama kɛtɛ ŋa iyi í ceu kuwee ŋa si antaii bi kuweeu. Nɔ í jilɛ woo wee ŋa si ilei iwɛ̃ ŋa iyi í mau.

Ilaaɔ̃ kù bi kuweei Betɛli

³³ Ŋɔi í bɔ bi iwɛ̃ iyi í ce Betɛliu si ajɔ maatũsiai cukpa mɛɛjɔsiau si bɛi nŋu takaɛ í jilɛ ndɛɛ. Ŋɔi í nyaa inɛi Izirɛli ŋa jingau, nɔ í bɔ bi kuweeu koo jo tuae ŋa.