Ilaalu 1, 11 - Bibeli do fee

Dulum dii Salomɔɔ

¹ Baka ama inaaboi Faraɔ̃u baasi Salomɔɔ í so abo dimi mmu ŋa má bututu hai bi inɛi Moabu ŋa do inɛi Amɔɔ ŋa do inɛi Edɔmu ŋa do inɛi Sidɔ̃ɔ ŋa do inɛi Hɛti ŋa.

² Aŋai à jɛ dimi ŋa iyi Aɔ̃ Lafɛ̃ɛ í ganji inɛi Izirɛli ŋa a so. Aɔ̃ Lafɛ̃ɛ í ni, i maà so inaaboi dimi ŋau bɛ ŋa, nɔ aŋa mɔ a maà so inaabo nŋɛ ŋa. Do ntɔ, aa na a sinda laakai nŋɛ ikpa bi iwɛ̃ nŋa ŋa. Nɔ si dimi nŋu ŋau bɛi Salomɔɔ í na araɛ fei, nŋu iyi kubii inaabo ŋau wa faa.

³ Í so ama inaaboi ilaalu ŋa aŋa cĩɔ mɛɛje (700) í ce ŋa abo nɔ í nɛ abo cĩɔ mɛɛta (300) má iyi aŋaò ŋa a kù ce abɔdɔ̃. Ŋɔi aboɛ ŋau à sinda idɔɛ.

⁴ Waati iyi Salomɔɔ í gbo, ŋɔi aboɛ ŋa à sinda idɔɛ si iwɛ̃ ŋa. Nɔ laakaiɛ fei kù wa si Aɔ̃ Lafɛ̃ɛɛ má bɛi ti baaɛ Davidi í tako í wa siɛ wo.

⁵ Ŋɔi Salomɔɔ wa tɔɔ Asitaate iwɛ̃i inɛi Sidɔ̃ɔ ŋa do Milikɔmu iwɛ̃ laalɔi inɛi Amɔɔ ŋau.

⁶ Ŋɔi Salomɔɔ í ce mii iyi kù dɔ̃a Aɔ̃ Lafɛ̃ɛ si, domi kù waa tooɛ dee dee bɛi baaɛ Davidi.

⁷ Waati nŋu bɛbɛi, Salomɔɔ í ma bi kuwee gɔ si iri kuta iyi í wa tengii Zeruzalɛmu suusuu iyi í jɛ bi kuweea Kɛmɔsi iwɛ̃ laalɔi inɛi Moabu ŋau do ti Milikɔmu iwɛ̃ laalɔi inɛi Amɔɔ ŋau.

⁸ Nɔ í cea aboɛ ŋa fei bi kuweea iwɛ̃ nŋa ŋa, nɔ à ya maa jo si tuae ŋa a maa cea iwɛ̃ nŋa ŋau kuwee ŋa.

^9-10 Wee Aɔ̃ Lafɛ̃ɛi inɛi Izirɛli ŋa í tako í naa si Salomɔɔ isɛ gbeeji nɔ í sɔ̃ɔ í ni ku maà bɔ iwɛ̃ kãma ku tɔɔ. Amma Salomɔɔ í sinda idɔɛ hai si Aɔ̃ Lafɛ̃ɛ í kɔ̀ ku jirima ideɛ. Ŋɔi idɔi Aɔ̃ Lafɛ̃ɛ í kɔ̃ siɛ,

¹¹ nɔ í sɔ̃ɔ í ni, si bɛi ì ce daa dimi bɛ ihɛ̃, nɔ i kù jirima akabuum do woodam ŋa iyi ǹ jilɛɛ, an gba bommau hai si awɔɛ nɔ n na inɛ mmu gɔ.

¹² Do nŋu fei, n kaa n coo si waati iyi ì wɛɛ na saabui baaɛ Davidi. Hai si awɔi amaɛi an gbaa.

¹³ Amma n kaa n gba bommau fei, an jɔ̀a amaɛ dimi akã na saabui Davidi woo ce icɛm nɔu, do na irii Zeruzalɛmu iyi ǹ cicau.

Mbɛɛi Salomɔɔ ŋa

¹⁴ Ŋɔi Aɔ̃ Lafɛ̃ɛ í jɔ̀ mbɛɛ gɔ í naa si Salomɔɔ. Mbɛɛui à ya kpe Hadadi. Inɛi Edɔmui si dimii ilaalui Edɔmu.

¹⁵ Si waati iyi Davidi í jɛ inɛi Edɔmu ŋa igũ, nɔ Zoabu inɛ ngboi soogeɛ ŋau í bɔ soogei inɛi Izirɛli ŋa iyi à ku si igũu ku si, ŋɔi í kpa inɛmɔkɔi ilɛi Edɔmu ŋau fei.

¹⁶ Cukpa mɛɛfai à ce bɛ hee à kpa inɛmɔkɔi Edɔmu ŋau fei.

¹⁷ Amma Hadadi í ba í saò woo ce icɛi baaɛ gɔ ŋa í bɔò ŋa Ezibiti. Waati bɛɛbɛ í wɛɛ ama awaasũ.

¹⁸ Ŋɔi à nɛ hai Madiãa à too do gbaai Parãa, nɔ inɛmɔkɔi Parãa gɔ ŋa à too ŋa aŋaò ŋa à to Ezibiti bi ilaalu Faraɔ̃. Ŋɔi Faraɔ̃ í na Hadadi kpasɛ̃ gɔ, nɔ wa baa mii ku jɛ. Nɔ í muaa ilɛ ŋa.

¹⁹ Hadadi í nɛa Faraɔ̃ bɛɛrɛ hee í jɔ̀ í muaa ifɔi aboɛ Tapenɛsi.

²⁰ Ŋɔi abou í bíaa ama inɛmɔkɔ. Amau Genubatii à ya kpoo. Tapenɛsi í jɔ̀ à bíi amau kpasɛ̃i Faraɔ̃ bɛ, nɔ í dede wa la do amai Faraɔ̃ ŋa ajɔ.

²¹ Waati iyi Hadadi í gbɔ iyi Davidi do Zoabu inɛ ngboi sooge ŋau à ku, ŋɔi í sɔ̃ Faraɔ̃ í ni, jɔ̀ n nɛ ilɛm.

²² Ŋɔi Faraɔ̃ í beeɛ í ni, mii wa gaiziaɛ bi tom iyi í jɔ̀ ì waa bi i nyi ilɛɛ. Ŋɔi í jɛaa í ni, nkãma kù waa gaiziam, amma jɔ̀ n nɛ.

²³ Ilaaɔ̃ í dɛdɛa Salomɔɔ mbɛɛ mmu. Mbɛɛui à ya kpe Rezɔ̃ɔ amai Eliada, iyi í sai hai bi mɛɛtuɛ Hadadezɛɛ ilaalui Soba.

²⁴ Nŋui í tɔtɔɔ inɛ ŋa bi tɛɛ nɔ í jɛ nŋa inɛ ngbo waati iyi Davidi í kpa soogei mɛɛtuɛ ŋau. Ŋɔi à sa à bɔ Damasi nɔ à koo à buba bɛ, nɔ à jɛ bomma Damasi bɛ.

²⁵ Rezɔ̃ɔ í jɛ mbɛɛi inɛi Izirɛli ŋai si kuwɛɛi Salomɔɔ fei, bɛi Hadadi í tako í ce nŋa laalɔ wo. Rezɔ̃ɔ í cé inɛi Izirɛli ŋai ntɔ ntɔ waati iyi wa jɛ ilaalui Siri.

Ide ku kɔ̀i Zeroboamu

²⁶ Zeroboamu woo ce icɛi Salomɔɔu mɔ í dedeò ija do nŋu. Zeroboamuu amai Nebati inɛi Efaratai si ilui Sereda. Iyeɛi à ya kpe Serua nɔ jaaɔ̃i.

²⁷ Bɛi í ce í baò kpãai ijau wee. Salomɔɔ wa ma Miloo, nɔ wa dĩ fooi idĩi ilui Davidi baaɛu.

²⁸ Zeroboamuu, kaasãanɛ ilu himmai. Iyi Salomɔɔ í yɛ bɛi wa ce icɛ, ŋɔi í dasiɛ ku jɛ woo cɔ woo ce icɛi dimii Zozɛfu ŋau fei.

²⁹ Si waati nŋu bɛ, Zeroboamu í fita hai Zeruzalɛmu, nɔ í ko walii Ahiya inɛi Siloou si kpãa, wa kɔtɔ ibɔ titɔ̃ gɔ. Aŋa minji nŋai à ko sako bɛ.

³⁰ Ŋɔi Ahiya í mu ibɔ titɔ̃ iyi wa kɔtɔu í gaa ikɔ maateeji,

³¹ nɔ í sɔ̃ Zeroboamu í ni, so titɛɛ ara mɛɛwa, domi Aɔ̃ Lafɛ̃ɛi inɛi Izirɛli ŋa í ni, amu Aɔ̃ Lafɛ̃ɛ an gba bommau hai si Salomɔɔ, nɔ n naɛ dimi mɛɛwa.

³² Amma an jɔ̀aa dimi akã na saabui woo ce icɛm Davidi do Zeruzalɛmu ilu iyi ǹ cica si dimii inɛi Izirɛli ŋa feiu.

³³ An ce bɛɛbɛi si na iyi í jɔ̀ inɛi Izirɛli ŋau à kɔ̀sim nɔ à waa tɔɔ Asitaate iwɛ̃i inɛi Sidɔ̃ɔ ŋau do Kemɔsi ti inɛi Moabu ŋa do Milikɔmu ti inɛi Amɔɔ ŋa. A kù too kpãa iyi ǹ nyisi ŋa nɔ a kù ce mii iyi í sĩam si. Ntɔ ntɔ a kù jirima woodam ŋa do ide ŋa iyi ǹ jilɛ nŋa bɛi Davidi baai Salomɔɔ í ce.

³⁴ Amma n kaa n gba bommau siɛ titã. An jɔ̀ ku jɛ amanlui si kuwɛɛɛ fei na saabui woo ce icɛm Davidi iyi ǹ cica nɔ í jirima woodam ŋa do ide ŋa iyi ǹ jilɛaa.

³⁵ Hai si amaɛi an gba bommau nɔ n naɛ dimi mɛɛwa.

³⁶ An jɔ̀a amaɛu dimi akã ku ba Davidi woo ce icɛm nɔu ku nɛ inɛ gɔ iyi á maa jɛ ilaalu waati kãma fei si wajum Zeruzalɛmu ilu iyi ǹ cica n maa n wau.

³⁷ Zeroboamu, an soɛ i jɛ bomma bɛi ì bi. Awɔi aa jɛ ilaalu si ilɛi Izirɛli fei.

³⁸ Bii ì waa jirima ide iyi ǹ jilɛɛ fei, nɔ ì waa nɛ si woodam ŋa nɔ ì waa ce iyi í jɛɛm dee dee nɔ ì waa jirimaò woodam ŋa bɛi woo ce icɛm Davidi í ce, an wɛɛ do awɔ. An jɔ̀ dimiɛ ku maa jɛ ilaalu hee do ajɔ fei bɛi ǹ cea Davidi, nɔ n naɛ ilɛi Izirɛli.

³⁹ Do yaaseu bɛi an kaye bɛɛrɛi dimii Davidi, amma kaa jɛ hee do ajɔ fei.

⁴⁰ Ŋɔi Salomɔɔ wa dɛ Zeroboamu ku kpa. Nɔ Zeroboamu í dede í sa í nɛ ilɛi Ezibiti bi Sisaki ilaalui Ezibitiu. Ŋɔi í wa bɛ hee Salomɔɔ í koo í kuò.

⁴¹ Faajii icɛ mmu ŋa iyi Salomɔɔ í ce, í wa si tia iyi à ya kpe icɛi Salomɔɔ ŋa. Bɛi à fɔ idei bisiɛ do mii iyi í ce fei.

⁴² Salomɔɔ í ce si bommai ilɛi Izirɛli fei adɔ̃ ciiji Zeruzalɛmu bɛ.

⁴³ Nɔ í ku. Ŋɔi à suu ilui Davidi baaɛu. Nɔ Roboamu amaɛ í jɛ bomma si agbɛɛ.