Ilaalu 1, 10 - Bibeli do fee

Inaabo ilaalui Seba í bɔ Salomɔɔ ku cɔ

¹ Inaabo ilaalui ilɛi Seba í gbɔ bɛi Salomɔɔ í nya iri do gbugbãi Aɔ̃ Lafɛ̃ɛ, ŋɔi í naa ku siiɛ do mɔnda kugaabu ŋa.

² Abou í to wa Zeruzalɛmu do akpɔ nla nla do kpookpo ŋa iyi à waa so tuae ŋa do wura nkpɔ nkpɔ do kuta kusĩa ŋa. Nɔ í bɔ bi Salomɔɔ í koo í beeɛ ide ŋa iyi í ce sɔɔluɛ wa fei.

³ Ŋɔi Salomɔɔ í jɛaa ide ŋa iyi í beeɛ fei, nɔ baa akã kù gaabuaa.

⁴ Inaabo ilaalui Sebau í yɛ bisii Salomɔɔu fei. Nɔ í yɛ ile iyi í mau,

⁵ do sɔndaɛ do bi kuwai akaweɛ ŋa do icɛi woo ce icɛɛ ŋa do jĩnɛ ŋa iyi à ya maa dasi, do woo buã atɛ̃ ŋau, do kuwee ŋa iyi í ya jo si ina fei sãa sãa si inɔ kpasɛ̃i Aɔ̃ Lafɛ̃ɛu. Fei ndɛɛ í muu biti hee í caa.

⁶ Ŋɔi í sɔ̃ ilaaluu í ni, ide ŋa iyi ǹ gbɔ wa hai ilɛm si gãmɛi ideɛ do bisiɛu ntɔi.

⁷ N ci ya n jɛsi wo, bii kù jɛ iyi ǹ naa ǹ yɔɔ do ijum. Nɔ ǹ ba wee a kù sisiim baa cingaa akãɛ. Bisiɛ do amaniɛ í la í re baa bɛi à sɔ̃m nɔu.

⁸ Inɔ didɔ̃i í jɛ ti inɛɛ ŋa do ti woo ce icɛɛ ŋa iyi à wa bi tɛɛ do ajɔ fei, aŋa iyi à ya maa gbɔ bisiɛ ŋa.

⁹ Ǹ saabu Aɔ̃ Lafɛ̃ɛɛ, nŋu iyi í bi i biiɛ bommai ilɛi Izirɛli. Aɔ̃ Lafɛ̃ɛ í bi inɛi Izirɛli ŋa hee do ajɔ fei. Na ŋɔi í jɔ̀ í soɛ ilaalu ku ba i mu ilɛu si ntɔ nɔ i ya kiiti nŋa dee dee.

¹⁰ Ŋɔi í mua ilaaluu wura tɔnu mɛɛta do bubu do tuae nkpɔ nkpɔ do kuta kusĩa ŋa. Hai ajɔ nŋu bɛ a kù naaò tuae nkpɔ bɛɛbɛ wa má si ilɛi Izirɛli bɛi iyi inaabo ilaalui Sebau í mua Salomɔɔ wa.

¹¹ Akɔi inyii ilaalu Hiramu ŋa iyi à so wura wa hai Ɔfiiu, à nyi à so jĩi ndii santali wa má hai Ɔfii nkpɔ nkpɔ do kuta kusĩa ŋa.

¹² Do jĩi ndii santaliui ilaaluu í ce bi ku tɛ ku gũ kpasɛ̃i Aɔ̃ Lafɛ̃ɛu do ti nŋu takaɛ. Do nŋui í ceò kitigbo ŋa do mɔɔlɔ ŋa ti woo kɔ̃ iri ŋau. Hai waati bɛɛbɛ a kù naaò jĩi ndii santali dimi bɛɛbɛ wa má nɔ a kù yɛ dimiɛ má hee ku baa nnyi.

¹³ Ŋɔi Salomɔɔ í mua inaabo ilaalui Sebau mii iyi í bi fei do iyi í tɔɔ fei, nɔ í ceaa amua mmu ŋa má si bɛi amboeɛ í to. Si anyiɛ ŋɔi abou í sinda í nɛ ilɛɛ, nŋu do woo ce icɛɛ ŋa.

Amanii Salomɔɔ

¹⁴ Kuwoi wura iyi Salomɔɔ í ya ba si adɔ̃ akã fei í wɛɛi tɔnu kɔnfia,

¹⁵ baka iyi í ya gba hai bi woo nya sĩa ŋa do hai bi ilaalui ilɛ mmu ŋa fei do hai bi ilu ilɛ ŋau baasi.

¹⁶ Ŋɔi ilaalu Salomɔɔ í jɔ̀ à cã wura à ceò tɛli nla nla ŋa ara cĩɔ minji (200), nɔ akã fei í ya jɛ wura kiloo mɛɛfa.

¹⁷ Nɔ í ce keekeɛ gɔ ŋa má ara cĩɔ mɛɛta (300) iyi akã fei í jɛ wura kiloo akã do bubu. Ŋɔi í koo í jilɛ ŋa inɔ ilei agboi Libãa.

¹⁸ Ŋɔi ilaaluu í ce kitãi bomma nla nla gɔ do inyíi jua. Nɔ í biiɛ do wura alala.

¹⁹ Kitãu í nɛ bi ku tɛ ku gũ mɛɛfa. Nɔ à ka bi ku gbesiu do inɔ. Nɔ à ce bi ku lesi awɔ si cingaa minji ŋau, nɔ à jilɛ boodai muusu nla minji à waa leekĩ kɔkɔi kitãu cingaa do cingaa.

²⁰ Nɔ muusu nla maateeji í wa si antaii bi ku tɛ ku gũ mɛɛfa ŋau, mɛɛfa do ikpa awɔ canga, mɛɛfa má do ikpa awɔ njɛ. Nɔ a kù yɛ dimiɛ bii kãma si bomma mmu gɔ.

²¹ Do wurai à ceò kɔɔfui ilaalu Salomɔɔ ŋau fei do jɛɛ ku jɛɛ ŋa iyi à wa inɔ ilei agboi Libãau. A kù ce mii ndɛɛ baa akã do isɔ fũfũ, si na iyi í jɔ̀ si waatii Salomɔɔ isɔ fũfũ kù jɛ nŋa nyau.

²² Ilaaluu í nɛ akɔi inyi ŋa iyi à ya bɔ Taasi do akɔi inyii ilaalu Hiramu ŋa. Nɔ adɔ̃ mɛɛta do adɔ̃ mɛɛta fei, akɔi inyi ŋau à ya koo a so wura ŋa wa do isɔ fũfũ ŋa do inyíi jua ŋa do bee ŋa do dimii yɛi kusĩa gɔ ŋa wa.

²³ Nɔ ilaalu Salomɔɔ í re ilaalui andunya fei do amani do bisi.

²⁴ Inɛ ŋa à ya maa naai hai bii fei ku ba a yɛ Salomɔɔ nɔ a gbɔ bisi iyi Ilaaɔ̃ í daa si idɔ.

²⁵ Ŋɔi aŋa fei à ya naaò amua nŋa ŋa wa, do mii ŋa iyi à ce do isɔ fũfũ do ti wura do jĩnɛ ku dasi ŋa do jĩnɛi igũ ŋa do tuae ŋa do acĩ ŋa do mulee ŋa. Nɔ bɛɛbɛi à ya maa naaò wa adɔ̃ fei.

²⁶ Ŋɔi Salomɔɔ í tɔtɔɔ sarɛtii igũ ŋa do acĩ ŋa. À dede sarɛtii igũ dubu akã do cĩɔ mɛɛ (1.400) do acĩ dubu maateeji (12.000). Nɔ í jilɛ ŋa si ilu ŋa bii sarɛtii igũ ŋau à wa do Zeruzalɛmu bi nŋu takaɛ bɛ.

²⁷ Ŋɔi í jɔ̀ isɔ fũfũ í kpɔ Zeruzalɛmu bɛi kuta, nɔ jĩi ndii sɛɛdi mɔ í kpɔ bɛi jĩi ndii sikomɔɔ iyi í ya fita si lɔɔma.

²⁸ Woo nya sĩai Salomɔɔ ŋa à ya bɔ Ezibiti do Kevee à koo à raa acĩ ŋa wa

²⁹ do sarɛtii igũ ŋa. Sarɛti akã fei sikilii cĩɔ mɛɛfai (600) à ya sã, acĩ akã mɔ cĩɔ do ciitaa (150). Bɛɛbɛ mɔi à ya kooa ilaalui Hɛti ŋau fei do ilaalui Siri ŋa.