Galati 5 - Bibeli do fee

I leekĩ dim dim ŋa si ara ku nɛ nŋɛ

¹ Kirisi í jɔ̀ à nɛ ara nwa ku ba ka nɛ ara nwa do ntɔ. Na nŋu, i leekĩ dim dim ŋa si ara ku nɛ nŋɛ, i maà jɔ̀ i na i jɛ aru má ŋa.

² I de itĩ i gbɔ. Amu Pɔlui ǹ wa n sɔ̃ ŋɛ ideu ihɛ̃. Bii ì jɔ̀ à dasi ŋɛ bango, icɛi Kirisi kù nɛ aranfãani kãma bi tu ŋɛ.

³ Ǹ nyi ǹ sisi ǹ wa n fɔ má, inɛ iyi í jɔ̀ à dasiɛ bango, tilasii lafɛ̃ɛ ku jirima wooda fei.

⁴ Iŋɛ iyi ì waa bi i jɛ dee dee si wajui Ilaaɔ̃ na wooda ku jirima, ì fɛɛfɛ ara nŋɛ do Kirisii nɔ ì fũsi didɔ̃i Ilaaɔ̃ awɔ ŋa.

⁵ Amma awa, Hundei Ilaaɔ̃ wa sɔ̃ wa mam mam iyi Ilaaɔ̃ á jɔ̀ ka jɛ dee dee na naanɛ ku dasi nwa.

⁶ Ntɔ ntɔ, bii à nɛ anu akã do Jesu Kirisi, à ce bango, a kù ce bango, kù jɛ ide kãma. Ide iyi í nɛ amboe í re nŋui í jɛ naanɛ ku dasi iyi wa ce icɛ do kubi.

⁷ Ì waa ce kuwɛɛ nŋɛ wo dee dee ŋa. Yooi í ganji ŋɛ í jɔ̀ i kù waa jirima ntɔu má ŋa.

⁸ Ikɔ iyi à na ŋɛu bɛ kù waa naa hai bi Ilaaɔ̃, nŋu iyi í kpe ŋɛ.

⁹ Na nŋu, i ce laakai ŋa, domi à ya fɔ a ni levɛ̃ɛ keekei í ya dede pɛ̃ɛ fei.

¹⁰ Amma Lafɛ̃ɛ í jɔ̀ ǹ wa n naanɛ ŋɛ iyi i kaa ce lasabu gɔ iyi í jɛ ikã do lasabu iyi ǹ ceu bɛ ŋa. Inɛ mɔ iyi wa bitandi ŋɛ, baa bii yooi Ilaaɔ̃ á kpãa iju.

¹¹ Iŋɛ inɛm ŋa, bii í jɛ amu takam ǹ wa n waazo hee nsɛi ǹ ni inɛ ŋa a ce bangoi, na mii í ce à ya maa kpãm iju. Bii í jɛ bɛɛbɛ mɔm nii ǹ wa n ce, ikui Jesu si jĩi kàa jɛa inɛ ŋa bi ku koosɛ.

¹² Inɛ ŋa iyi à waa bitandi ŋɛu bɛ, bii à bi mɔm a bantãm ara nŋa gbakã.

¹³ Iŋɛ inɛm ŋa, à kpe ŋɛi i na i nɛ ara nŋɛ. Do nŋu fei, i maà jɔ̀ ara ku nɛ nŋɛ ku mua daai iŋɛ taka nŋɛ kpãa i ceò idɔɔbii ara nŋɛ. Amma i ya maa sobi njɛ do kubi ŋa,

¹⁴ domi wooda fei í wa si ide akãu ihɛ̃ iyi í ni, bi inɛ mmu ŋa bɛi ì bi araɛ.

¹⁵ I maà ya maa ŋɔ njɛ ŋa bɛi mɛɛmui sako ŋa. I ce laakai ŋa ku ba i maà ce nfei njɛ ŋa.

Ka jɔ̀ Hundei Ilaaɔ̃ ku nɛò wa

¹⁶ Ide iyi ǹ wa n fɔu wee. Ǹ ni, i jɔ̀ Hundei Ilaaɔ̃ ku maa nɛò ŋɛ. Bii ì waa ce bɛɛbɛ ŋa, i kaa ce kubi nfe nfei ara nŋɛ má,

¹⁷ domi mii iyi ara nwa í bi, ci ya jɛ dimi akã do iyi Hundei Ilaaɔ̃ í bi. Kubii ara do ti Hundei Ilaaɔ̃u à ya maa jai hee a kaa ka yɔkɔ ka ce bɛi à bi.

¹⁸ Amma bii Hundei Ilaaɔ̃ wa nɛò ŋɛ i kù wa si awɔi wooda má ŋa.

¹⁹ Inɛ fei í mà daai amanɛ sãa sãa. Daa ŋaui à jɛ sɛ̃ɛ ku tɔtɔɔ hai nɛ yaase, do daa sãmi do daa bɛɛtɛkɛ,

²⁰ do iwɛ̃ ku tɔɔ, do dobu dobu ku ce, do mbɛɛtɛ, do ija, do igu, do idɔɔkɔ̃ yaamɔ, do njɛ ku wã, do kakɔɔ, do njɛ ku fɛɛfɛ,

²¹ do kɔdɛɛ, do atɛ̃ ku kpa inɛ, do ijɛ ku bi, do mii iyi í jɔ bɛɛbɛ fei. Ǹ wa n sɔ̃ ŋɛ bɛi ǹ tako ǹ fɔ ǹ ni, inɛ ŋa iyi à waa ce dimi bɛɛbɛ a kaa ba tubu kãma si bommai Ilaaɔ̃.

²² Amma mii iyi Hundei Ilaaɔ̃ í ya bí, nŋui í jɛ kubi, do inɔ didɔ̃, do laakai ku sũ, do temua, do jiida ku jɛ, do inɔ akã, do naanɛ,

²³ do daa didɔ̃, do ara ku mu. Mii ŋau bɛ fei, wooda kù ganji ŋa.

²⁴ Nɔ inɛ ŋa iyi à jɛ ti Jesu Kirisi í yɛ bɛi à kpa kucei daai ara nŋa si jĩi ku gaauu, do binɛɛ do kubiɛ fei.

²⁵ Si bɛi Hundei Ilaaɔ̃i wa mu nwa kuwɛɛ, ka jɔ̀ ku nɛò wa.

²⁶ Kù sĩa ka jɛ ilu faau, walakɔ woo kosi inɛ ŋa, walakɔ ka maa ce igu si awa duusɔ̃ɔ.