Galati 4 - Bibeli do fee

¹ Nsɛi ǹ wa n bi n na ŋɛ yaase gɔ. Yaaseu wee. Ama iyi á jɛ tubui baaɛ, si waati iyi wa jɛ amau kù tia aru gɔ, baa do iyi fei ndɛɛ á na ku jɛ titɛɛ.

² Si waati iyi wa jɛ amau, inɛ gɔ ŋa à wɛɛ iyi à waa muu nɔ à waa cea wũa hee koo tóò waati iyi baaɛ í jilɛaa.

³ Bɛɛbɛ mɔi do awa taka nwa. Waati iyi à tako à wɛɛ bɛi ama keeke ŋa, à jɛ arui mii ndii andunya ŋa wo.

⁴ Amma iyi waati iyi Ilaaɔ̃ í jilɛu í na í to, ŋɔi í bɛ Amaɛ wa. Inaaboi í búu, nɔ si woodai Zuifu ŋai wa nɛ

⁵ ku ba ku ya inɛ ŋa iyi à wa si awɔi wooda. Í ce bɛɛbɛi ku ba ka jɛ amai Ilaaɔ̃ ŋa.

⁶ Nɔ Ilaaɔ̃ í bɛ Hundei Amaɛ wa si idɔ nwa ku nyisiò iyi awai à jɛ amaɛ ŋa. Na saabui Hundeui í jɔ̀ si kutɔɔ nwa à ya ka ni, Baaba.

⁷ Si bɛɛbɛ i kù jɛ aru má ŋa, iŋɛ amu ŋai bɛbɛi. To, nsɛi iyi ì jɛ amai Ilaaɔ̃ ŋa, Ilaaɔ̃ í nyi í ce ŋɛ woo jɛ tubuɛ ŋa má.

Zigiida iyi Pɔlu í nɛ na inɛi Galati ŋa

⁸ Tako wo i kù mà Ilaaɔ̃ ŋa, nɔ ì jɛ arui iwɛ̃ ŋa iyi a kù jɛ Ilaaɔ̃.

⁹ Amma nsɛi ì mà Ilaaɔ̃ ŋa. Nɔ iyi í re mɔm Ilaaɔ̃ í mà ŋɛ. To, bɛirei í ce ì waa bi i sinda si mii ndii andunya ŋa má ŋa iyi a kù nɛ gbugbã nɔ a kù nɛ bɛɛrɛ. Na mii í ce ì waa bi i jɛ aru nŋa má ŋa.

¹⁰ Ì ya maa na ajɔi jingau gɔ ŋa gbugbã ŋa, do cukpa gɔ ŋa do waati gɔ ŋa do adɔ̃ gɔ ŋa.

¹¹ Nsɛi ǹ wa n ce njo icɛ iyi ǹ ce si gãmɛ nŋɛ ku maà ce nfe.

¹² Ǹ wa n tɔɔ ŋɛ, iŋɛ inɛm ŋa, i jilɛ ara nŋɛ si agbɛm bɛi amu mɔ ǹ jilɛ aram si agbɛ nŋɛ. Waati iyi ǹ wa bi tu ŋɛ, i kù ceem kurara gɔ ŋa.

¹³ Ì mà sãa sãa ŋa, waati iyi ǹ to Galati n kù wa n nɛ baani. Na ŋɔi í jɔ̀ ǹ ce nŋɛ waazoi laabaau jiidau.

¹⁴ Amma i kù dondam ŋa, i kù nɔ i kù kɔ̀sim ŋa, baa bii bɔ̃ɔm nɔu ku yɛɛ í cé ŋɛ. Do nŋu fei, ì gbam ŋai bɛi aa gba amalekai Ilaaɔ̃ ŋa, walakɔ bɛi Jesu Kirisi takaɛ.

¹⁵ Ì nɛ inɔ didɔ̃ wo ŋa. To, nsɛi, mii í ce ŋɛ. An yɔkɔ n jɛ sɛɛda na iri nŋɛ n ni bii á ce wo aa nya iju nŋɛ i nam ŋa.

¹⁶ Si na iyi í jɔ̀ ǹ sɔ̃ ŋɛ ntɔui i jɔ̀ n jɛ mbɛɛ nŋɛ nsɛi?

¹⁷ Inɛ ŋau, à waa na ŋɛ ara amma kù jɛ do yaase jiida. À waa bi a fa ŋɛi hai bi tu wa ku ba i na ŋa ara ŋa.

¹⁸ Í sĩa i nɛ himma si mii jiida ku ce ŋa waati kãma fei, nɔ ku maà jɛ bii ǹ wa inɔ nŋɛ nŋu akã.

¹⁹ Iŋɛ amam ŋa, bɛi inaabo iyi wa bi ku bí í ya gbɔ ara kuro, bɛɛbɛ mɔi amu mɔ ǹ wa n gbɔ ara kuro má hee i koo i jɛò mɔcɔi Kirisi ŋa ntɔ ntɔ.

²⁰ Ǹ bi n wa inɔ nŋɛ nsɛi ku ba n maà n fɔ ide bɛ ihɛ̃ má, amma do nŋu fei ǹ nɛ zigiida na iri nŋɛ.

Idei Agaa do Sara

²¹ I jɔ̀ n bee ŋɛ, iŋɛ iyi ì bi i wa si awɔi wooda ŋa, i kù gbɔ iyi wooda wa fɔ ŋai?

²² À kɔɔ à ni Aburahamu í bí ama inɛmɔkɔ minji, akã do abo aru gɔ, akã mɔ do abo iyi í nɛ araɛ.

²³ Aruu, í bí amaɛi bɛi à ya bí inɛ fei, amma inɛ iyi í nɛ araɛu í bí amaɛi do kuwãi Ilaaɔ̃.

^24-25 Ideu ihɛ̃ í yɛi bɛi mɔnda. Inaabo minji ŋau aŋai à jɛ bɛi akabuu minji. Agaa nŋui í jɛ bɛi akabuu iyi Ilaaɔ̃ í na inɛ ŋa tako wo si geetei Sinai si ilɛi Arabi. Nŋu bɛi í jɛ wooda iyi wa dasi inɛ ŋa aru. Nɔ Agaa í yɛi má bɛi ilui Zeruzalɛmu iyi í wɛɛ nsɛi, domi í wa si aru do inɛɛ ŋa fei.

²⁶ Amma Sara í yɛi bɛi Zeruzalɛmu iyi í wa leleu iyi í nɛ araɛ. Nŋui í jɛ iye nwa.

²⁷ Nɔ à kɔɔ à ni, jɔ̀ inɔɛ ku dɔ̃, awɔ inaabo gbɛnda iyi i kù bí. La, i dɔ̃ anu do inɔ didɔ̃, awɔ iyi i kù mà ara kuroi kubí, domi inaabo iyi à kɔ̀si á na ku bí ama ku re inaabo iyi í wa idei mɔkɔ.

²⁸ Nsɛi iŋɛ inɛm ŋa, iŋɛi ì jɛ amu ŋa iyi Ilaaɔ̃ í ce kuwãɛu bɛi Izaaki í yɛu.

²⁹ Waati nŋu, ama iyi à bí bɛi à ya bí inɛ fei í kpã inɛ iyi à bí do gbugbãi Hundei Ilaaɔ̃u iju. Bɛɛbɛ mɔi í yɛ nsɛi.

³⁰ Amma kukɔi idei Ilaaɔ̃ wa fɔ í ni, lele aruu do amaɛ fei, domi amai aru kaa jɛ tubu do amai abo iyi í nɛ araɛu ajɔ.

³¹ Bɛɛbɛ mɔi iŋɛ inɛm ŋa, ì mà ŋa iyi a kù jɛ amai aru, amma amai inɛ iyi í nɛ araɛi à jɛ.