Galati 3 - Bibeli do fee

Wooda ku jirima de, mà naanɛ ku dasi

¹ Iŋɛ inɛi Galati ŋau, i kù nɛ laakai ŋa. Iŋɛ iyi à sisia idei Jesu Kirisi iyi à kpakpa si jĩi ku gaau sãa sãa, yooi í kɔ̃ɔtɛ̃ ŋɛ.

² Ǹ bi i sɔ̃m ide icu akãu ihɛ̃ ŋa. Ì ba Hundei Ilaaɔ̃ na wooda ku jirima nŋɛi de, mà na laabaau jiidau iyi ì gbɔ ì dasi naanɛu ŋai.

³ Bɛirei í ce ì kua laakai bɛɛbɛ ŋa. Ì sinti do Hundei Ilaaɔ̃ ŋa nɔ ì waa bi i kpa iriɛ do gbugbãi ara nŋɛ?

⁴ Ijuukpã iyi ì yɛ wo ŋa na naanɛ ku dasi nŋɛ, nsɛi aa jɔ̀ ku jɛ ngbɛ ŋai? Ǹ tamaa i kaa jɔ̀ ku jɛ ngbɛ ŋa.

⁵ Iyi Ilaaɔ̃ í na ŋɛ Hundeɛ, nɔ wa ce maamaake ŋa si anini nŋɛ, wa cooi na wooda ku jirima nŋɛ? Mà si na iyi í jɔ̀ ì gbɔ idei laabaau jiida ì dasi naanɛ ŋai.

⁶ Ì mà ŋa iyi kukɔi idei Ilaaɔ̃ í ni, Aburahamu í dasi Ilaaɔ̃ naanɛ, nŋui í jɔ̀ Ilaaɔ̃ í dooɛ si amanɛ dee dee.

⁷ Na nŋu, i jɔ̀ i mà ŋa iyi woo dasi Jesu naanɛ ŋai à jɛ tɔkui Aburahamu ŋa do ntɔ.

⁸ Hai tako wo Ilaaɔ̃ í mà iyi nŋu á jɔ̀ dimi mmu ŋa a jɛ dee dee na naanɛ ku dasi nŋa. Ŋɔi í jɔ̀ í sisia Aburahamu laabaau jiidau hai ku kpɛ í ni, hai bi tɛɛi an weea inɛi andunya fei.

⁹ Aburahamu í dasi naanɛ nɔ í ba kuwee. Bɛɛbɛ mɔi inɛ ŋa iyi à dasi naanɛ aa ba kuwee do nŋu ajɔ.

¹⁰ Inɛ ŋa iyi à waa na gbugbã si wooda ku jirima ikpei í jɛ tu ŋa, domi à kɔɔ à ni, inɛ iyi kù jirima idei woodau ihɛ̃ nɔ kù ceò icɛ, lafɛ̃ɛ ilu ikpei.

¹¹ Nɔ nsɛi à yɔɔ mam mam iyi inɛ gɔ kaa jɛ dee dee si wajui Ilaaɔ̃ na wooda ku jirima, domi à kɔɔ à ni, inɛ dee dee á maa wɛɛi na naanɛ ku dasiɛ.

¹² Ntɔ ntɔ, icui wooda kù wa si naanɛ ku dasi. Amma à kɔɔ à ni, inɛ iyi í yɔkɔ wa jirima woodau dee dee, lafɛ̃ɛi á ba si kuwɛɛ.

¹³ Amma Kirisi í ya wa hai si ikpei wooda si waati iyi í na í jɛ ilu ikpe na iri nwa. Í na í jɛ ilu ikpe si na iyi í jɔ̀ kukɔi idei Ilaaɔ̃ wa fɔ í ni, inɛ iyi à kpakpa si antaii jĩi fei ilu ikpei.

¹⁴ Kirisi í ce bɛɛbɛi ku ba kuwee iyi Ilaaɔ̃ í weea Aburahamuu kú jɛ ti dimi mmu ŋa na saabui Jesu Kirisi. Nɔ si bɛɛbɛ awa fei aa ka ba Hunde iyi Ilaaɔ̃ í wãò wa na naanɛ ku dasi.

Wooda* ku jirima do idei kuwã

¹⁵ Iŋɛ inɛm ŋa, an so yaasei ide gɔ iyi inɛ fei í mà. Bii inɛ gɔ í dĩ akabuu do inɛ mmu gɔ nɔ à kɔɔ à jilɔɔ, inɛ gɔ kaa yɔkɔ ku ganji ideu hee má jɛ ku kɔ̃ɔsi, baa do iyi amanɛi í kɔɔ.

¹⁶ To, Aburahamu do dimiɛi Ilaaɔ̃ í cea kuwã. Bii à ni dimiɛ ŋa, inɛ nkpɔi à fãa. Amma à ni dimiɛi, waatɔ inɛ akãi, nɔ nŋui í jɛ Kirisiu.

¹⁷ Na nŋu, ide iyi ǹ wa n bi n fɔ wee. Ilaaɔ̃ í dĩ akabuui si gãmɛi ideu í jilɔɔ. Nsɛi, wooda iyi í naa si anyii adɔ̃ cĩɔ cĩɔ mɛɛ do kuntaa, kaa yɔkɔ ku ganji ideu hee ku jɔ̀ ide iyi Ilaaɔ̃ í wãu ku jɛ ngbɛ.

¹⁸ Amma bii na wooda ku jirimai à jɛ tubu, kù jɛ na idei kuwã má. Nɔ wee do kuwãi Ilaaɔ̃ í ceaò Aburahamu didɔ̃ɛ.

¹⁹ Debɛi, na mii í ce Ilaaɔ̃ í na wooda. Í naai ku ba kookoosu iyi kù jɛ tɛɛ ku fita gbugbãa. Nɔ woodau wa ce icɛɛi hee dimii Aburahamuu koo tóo wa. Dimiɛui à cea kuwãɛu. Woodau amaleka ŋai Ilaaɔ̃ í jɔ̀ à na Moizi, nŋu iyi í wa si gãmɛi Ilaaɔ̃ do amanɛ ŋa, nɔ nŋu mɔ ku sɔ̃ inɛ ŋau.

²⁰ Amma waati iyi Ilaaɔ̃ í ce kuwãu, kù nɛ bukaatai inɛ iyi á wa si gãmɛi nŋu do amanɛ ŋa, domi nŋu akãi í ce kuwãu.

Mii iyi wooda* wa lele

²¹ Debɛi, woodau wa jã ide iyi Ilaaɔ̃ í ce kuwãɛui mɛɛ. Aawo, kù jɛ bɛɛbɛ. Ntɔ ntɔ, bii í jɛ à na wooda wo iyi á yɔkɔ ku mua amanɛ kuwɛɛ, Ilaaɔ̃ á jɔ̀ amanɛ ku jɛ dee dee wo na woodau.

²² Amma kukɔi idei Ilaaɔ̃ wa nyisi iyi inɛ fei í wa si awɔ gbugbãi dulum, ku ba do saabui naanɛ ku dasi, kuwãu ku jɛ ti woo dasi Jesu Kirisi naanɛ ŋa.

²³ Tako wo wooda wa mu wai bɛi aru wa gbã wa hee Kirisi ku maa to wa ku na ku nyisi wa kpãai naanɛ ku dasi.

²⁴ Do yaase bɛɛbɛi woodau á maa degbe wa hee Kirisi koo to wa ku ba Ilaaɔ̃ ku jɔ̀ ka jɛ dee dee na naanɛ ku dasi.

²⁵ Nsɛi iyi waatii naanɛ ku dasiu í to, a kù nɛ bukaatai woodau ku maa degbe wa má.

²⁶ Do yaase bɛɛbɛi iŋɛ fei ì jɛ amai Ilaaɔ̃ ŋa na naanɛ iyi ì dasi Jesu Kirisi ŋa.

²⁷ Ntɔ ntɔ, iŋɛ iyi ì ce inyi ku dasi ì ceò anu akã do Kirisi ŋa fei, ì baa ì yɛ bɛi Kirisi ŋai.

²⁸ Iŋɛ fei ì jɛ akã si anu akã nŋɛ iyi ì ce do Jesu Kirisi ŋa. Na nŋu, inɛ gɔ kù jɛ ikã, hai Zuifu ŋa hee do dimi mmu ŋa, hai aru ŋa do inɛ ŋa iyi à nɛ ara nŋa, hai inaabo ŋa hee do inɛmɔkɔ ŋa.

²⁹ Bii ì nɔ ì jɛ ti Kirisi ŋa, ì jɛ dimii Aburahamu ŋai. Nɔ aa jɛ tubu ŋa bɛi Ilaaɔ̃ takaɛ í ce kuwãɛu.