Galati 2 - Bibeli do fee

Pɔlu do woo bɛ ŋa iyi à gbe

¹ Iyi í kpɛ í to zakai adɔ̃ maatɛ̃ɛ ŋɔi ǹ nyi Zeruzalɛmu má, amu do Baanabasi. Nɔ à gbã Titee í si wa.

² Ǹ kooi si na iyi í jɔ̀ Ilaaɔ̃i í ni n koo. Ǹ kpe inɛ ngboi woo dasi naanɛ ŋa ikãi awaò ŋa à tɔtɔɔ nɔ ǹ sisi nŋa yaasei idei laabaau jiidau iyi ǹ ya n cea dimi mmu ŋa waazoɛu wo. Ǹ ce bɛɛbɛi si na iyi í jɔ̀ n kù bi icɛm iyi ǹ ce wo, walakɔ iyi ǹ wa n ce nsɛi ku ce nfe.

³ Nɔ inɛ ngbo ŋau a kù tilasi Titee iyi í wa bi tom nɔu ku ce bango baa do iyi í jɛ Gɛrɛki fei.

⁴ A kù tilasiɛ baa do iyi inɛ gɔ ŋa iyi a kù jɛ inɛ nwa ŋa do ntɔ à lɔ wa si igbɛu à waa bi a tilasi inɛ fei ku ce bango. Inɛ ŋau woo zamba inɛ ŋai. À naai do bisi ku ba a bɛjɛ ara ku nɛ nwa si anu akã nwa do Jesu Kirisi nɔ a ce wa aru.

⁵ Amma awa a kù jɛ ide nŋa baa keeke domi à bi ka leekĩ si ntɔi laabaau jiidaui na iri nŋɛ.

⁶ Nɔ inɛ ngbo ŋau, aŋa iyi à nɛ jirima à re a kù kɔ̃ɔsi ide kãma má si ide iyi ǹ fɔu. Ntɔi, baa bii aŋai à jɛ ilu jirima ŋa kù jɛɛm nkãma, domi bi Ilaaɔ̃ inɛ gɔ kù re njɛ. Inɛ ngbo ŋau bɛ a kù kɔ̃ɔm si ide kãma.

⁷ Amma à yɛ iyi Ilaaɔ̃ í daam laabaau jiidau si awɔ n sisia dimi mmu ŋa, si bɛi í daa Piɛɛ si awɔ ku sisia Zuifu ŋa.

⁸ Ilaaɔ̃i í na Piɛɛ gbugbã ku jɛò woo bɛɛ bi Zuifu ŋa, mà irei. Nŋu mɔi í nɔ í nam gbugbã n jɛò woo bɛɛ bi dimi mmu ŋa.

⁹ Nɔ Zaaki do Piɛɛ do Zãa, aŋa iyi à jɛ bɛi sɔbe si igbɛi inɛi Jesu ŋa, à yɛ iyi Ilaaɔ̃i í daam icɛu ihɛ̃ si awɔ na didɔ̃ɛ. Ŋɔi à jɛsi ka ce anu akã, amu do Baanabasi ka bɔ bi dimi mmu ŋa nɔ aŋa mɔ a bɔ bi Zuifu ŋa.

¹⁰ Amma à tɔɔ wa ka ye gigii ilu are nŋa ŋa. Nɔ bɛɛbɛ mɔi amu takam ǹ dasi idɔ tã.

Pɔlu wa gbagba si Piɛɛ Antiɔsi

¹¹ Si waati iyi Piɛɛ í naa Antiɔsi bɛ ǹ gbagba siɛ si bantuma si na iyi í jɔ̀ wa ce taale.

¹² Taaleɛu wee. Inɛ gɔ ŋa iyi à wa bi Zaaki à naa Antiɔsi. Inɛ ŋaui à ya na gbugbã si bango ku ce. Hee a maa to wa Piɛɛ í ya maa jɛ do dimi mmu woo dasi Jesu naanɛ ŋa ajɔ. Amma iyi inɛ ŋau à na à to wa, í fa araɛ ci ya jɛ aŋaò ŋa má domi wa ce njo nŋa.

¹³ Ŋɔi Zuifu woo dasi Jesu naanɛ ŋa iyi à wa bɛu, gɔgɔ ŋa mɔ à ce bɛi Piɛɛ í ceu hee à fa Baanabasi mɔ si muafiti nŋau.

¹⁴ Iyi ǹ yɛ a kù waa nɛ do inɔ akã si kpãai laabaau jiidau, ŋɔi ǹ sɔ̃ Piɛɛ si wajui aŋa fei ǹ ni, awɔ Zuifui nɔ ì waa ce bɛi dimi mmu ŋa, i kù waa ce kucei Zuifu ŋa. To, bɛirei aa ce i tilasi dimi mmu ŋa a ce kucei Zuifu ŋa.

Zuifu* ŋa do dimi mmu ŋa à ba faaba na naanɛ ku dasi

¹⁵ Ntɔi, awa Zuifu ŋai, a kù jɛ dimi mmu ŋa iyi à ya kpe ilu dulum ŋa, domi Zuifu ŋai à bí wa.

¹⁶ Do nŋu fei, à mà iyi amanɛ kaa jɛ dee dee si wajui Ilaaɔ̃ na wooda ku too, bii kù jɛ na naanɛ iyi á dasi Jesu Kirisi. Na nŋu, awa mɔ à dasi Jesu Kirisi naanɛ ku ba ka jɛ dee dee na naanɛ iyi à dasi Kirisi, kù jɛ na wooda ku too. Ilaaɔ̃ kaa ce inɛ gɔ dee dee si na iyi í jɔ̀ wa jirima wooda.

¹⁷ Nsɛi, bii à waa dɛ ka jɛ dee dee na saabui Kirisi, nɔ à ba wee awa mɔ ilu dulum ŋai bɛi hai jɛ Zuifu ŋa, aa ka jɛ ka ni icɛi Kirisii í jɔ̀ dulum wa kɔ̃ɔsi? Aawo, ka maà lasabu bɛɛbɛ.

¹⁸ Nsɛi, bii ǹ teese ǹ wa n ma mii iyi ǹ tako ǹ lɛgɛ wo, ǹ baa ǹ jɛ ilu taalei.

¹⁹ Ntɔ ntɔ, woodau takaɛ í jɔ̀ ǹ yɛ bɛi iku si wajuɛ, ku ba n ce kuwɛɛm na Ilaaɔ̃.

²⁰ À kpakpam si jĩi do Kirisi ajɔ. Na nŋu, kù jɛ na aram nii ǹ wɛɛ má, bɛbɛi Kirisii wa ce kuwɛɛɛ sim. Nɔ kuwɛɛ iyi ǹ wa n wɛɛ nsɛi, ǹ wa n wɛɛi do naanɛ iyi ǹ dasi Amai Ilaaɔ̃, nŋu iyi í bim nɔ í na kuwɛɛɛ na irim.

²¹ N kaa n fũsi didɔ̃i Ilaaɔ̃ awɔ n maa n jirima wooda, domi bii í jɛ amanɛ á yɔkɔ ku jɛ dee dee na wooda ku jirima, debɛi ikui Kirisiu ngbɛi.