Galati 1 - Bibeli do fee

Í ce ŋa fɔɔ

¹ Amu Pɔlu woo bɛu, amui ǹ kɔ nŋɛ tiau ihɛ̃ wa. Kù jɛ amanɛi í kpem n jɛ woo bɛ, kù nɔ kù jɛ inɛ gɔi í bɛm. Jesu Kirisii í kpem, nŋu do Ilaaɔ̃ Baaba iyi í jũu hai si balɛ.

² Amu do kpaasi woo dasi naanɛ ŋa iyi à wa ihɛ̃ fei à ce iŋɛ igbɛi inɛi Jesu ŋa iyi ì wa ilɛi Galati fɔɔ.

³ Ilaaɔ̃ Baaba do Lafɛ̃ɛ Jesu Kirisi a mu nŋɛ didɔ̃ do laakai ku sũ.

⁴ Jesu Kirisi í na araɛ na irii dulum du wa ku ba ku nya wa hai si kuce laalɔi andunyau ihɛ̃. Bɛɛbɛi í ce í ceò idɔɔbii Ilaaɔ̃ Baa nwa.

⁵ Amboe ku jɛ ti Ilaaɔ̃ hee do ajɔ fei. Ami.

Laabaau jiida akãi í wɛɛ

⁶ Ideu í mum biti do iyi ì fũsi Ilaaɔ̃ awɔ gbãa gbãa bɛɛbɛ tã ŋa, nŋu iyi í kpe ŋɛ wa si didɔ̃i Kirisi, nɔ ì waa bi i too laabaau mmu gɔ má ŋa.

⁷ Ntɔ ntɔ, laabaau jiida kãma gɔ kù wɛɛ má. Amma inɛ gɔ ŋa à waa fɔ́ lasabu nŋɛ dei, nɔ à waa bi a kpaasi laabaau jiidai Kirisiu.

⁸ Amma baa bii awa taka nwai walakɔ amaleka iyi í naa hai lele, bii í ce nŋɛ waazoi laabaau mmu gɔ má, bii kù jɛ iyi à ce nŋɛu ihɛ̃, Ilaaɔ̃ ku ceekpe lafɛ̃ɛ.

⁹ À tako à fɔɔ wo ǹ nɔ ǹ wa n fɔɔ má, bii inɛ gɔ í ce nŋɛ waazoi ide mmu gɔ iyi kù jɛ iyi ì jɛsiu tã ŋa Ilaaɔ̃ ku ceekpe lafɛ̃ɛ.

¹⁰ Si ideu ihɛ̃ aa ni ǹ wa n dɛ saabui amanɛ ŋai? Aawo, saabui Ilaaɔ̃i ǹ bi. Ǹ wa n dɛ n ce mii iyi á dɔ̃a amanɛ ŋa si? Aawo, bii ǹ wa n dɛ n ce mii iyi á dɔ̃a amanɛ ŋa si, n kaa n jɛ woo ce icɛi Kirisi.

Bɛi Pɔlu í jɛò woo bɛ

¹¹ Iŋɛ kpaasim ŋa, ǹ bi i mà ŋa iyi laabaau jiida iyi ǹ sisi nŋɛu kù jɛ hai bi amanɛi í naa.

¹² Kù jɛ amanɛi í sɔ̃m, inɛ kãma sisi í ceem cioɛ, Jesu Kirisi nŋu akãi í nyisim.

¹³ Ì gbɔ bɛi kuwɛɛm í yɛ ŋa wo si waati iyi ǹ wa n tɔɔ Ilaaɔ̃ bɛi Zuifu ŋa. Iŋɛ fei ì mà ŋa kookaai iyi ǹ tako ǹ ce ǹ kpãò inɛi igbɛi Jesu ŋa iju ku ba n ce nfe nŋa.

¹⁴ Si kpãai Zuifu ŋa ku too ǹ wa si inɔi inɛ ŋa iyi à waa jɛ waju si inɔi saam ŋa, domi ǹ nɛ himma ntɔ ntɔ ǹ re ŋa si gãmɛi kucei dedembai bala nwa ŋa.

¹⁵ Amma Ilaaɔ̃ í cicam à bɛi à bím nɔ í kpem si didɔ̃ɛ n ceaa icɛ.

¹⁶ Si waati iyi í jilɛu, í nyisim Amaɛ ku ba n cea dimi mmu ŋa waazoi laabaau jiidaɛ. Nɔ n kù bɔ bi inɛ kãma ku muum bisi.

¹⁷ N kù nɔ n kù bɔ Zeruzalɛmu n koo n yɛ inɛ ŋa iyi à tako à jɛ woo bɛ ŋa ǹ bɛi ǹ jɛò woo bɛ. Amma iyi ǹ dede gbakã ilɛi Arabii ǹ bɔ. Hai bɛ nɔ ǹ nyi Damasi má.

¹⁸ Í kpɛ í to zakai adɔ̃ mɛɛta ǹ bɛi ǹ bɔ Zeruzalɛmu ǹ koo ǹ mà Piɛɛ, nɔ ǹ ce ajɔ maatũ bi tɛɛ.

¹⁹ N kù nɔ n kù yɛ woo bɛ mmu kãma bɛ má, bii kù jɛ Zaaki, ifɔi Lafɛ̃ɛ.

²⁰ Iyi ǹ wa n kɔu ihɛ̃ ntɔi. Ilaaɔ̃i í jɛ sɛɛdam, kù jɛ iboi ǹ wa n sɔ.

²¹ Si anyiɛ nɔ ǹ bɔ ilɛi Siri do Silisi ŋa.

²² Waati bɛɛbɛ igbɛi inɛi Kirisi ŋa iyi à wa ilɛi Zudee a kù yɛ wajum titã.

²³ Nŋu de à gbɔ iyi inɛ iyi í tako wa kpã ŋa ijuu, nsɛi wa waazo idei laabaau jiida iyi nŋu takaɛ wa bi ku ce nfeɛu wo.

²⁴ Nɔ à saabu Ilaaɔ̃ na irim.