Filipi 4 - Bibeli do fee

Ide iyi Pɔlu í jilɛ

¹ Na nŋu iŋɛ baakɔɔm ŋa, iŋɛ iyi ǹ wa n bi ku yɛ jiida jiida má, iŋɛ iyi ì ya jɔ̀ n nɛ inɔ didɔ̃, nɔ ǹ ya n tɔɔ fufu na iri nŋɛ, i jɔ̀ i leekĩ bɛɛbɛ ŋa dim dim si Lafɛ̃ɛ.

² Ǹ wa n tɔɔ inaabo minji ŋau ihɛ̃ Efodi do Sɛntiki a ya jɔ̀ anu nŋa ku jɛ akã si idei Lafɛ̃ɛ.

³ Awɔ mɔ woo ce icɛ kpaasim, awɔ iyi ì jɛ ilu naanɛ, ǹ wa n tɔɔɛi i sobi inaabo minji ŋau bɛ. Aŋai à bam kujabu wo si laabaau jiidau ku sisiɛ, aŋa do Kelema do woo ce icɛ kpaasim ŋa iyi à gbe fei, aŋa iyi iri nŋa í wa si tiai kuwɛɛ.

⁴ I ya jɔ̀ inɔ nŋɛ ku maa dɔ̃ si Lafɛ̃ɛu do ajɔ fei ŋa, ǹ nyi ǹ fɔ ǹ wa n sisi má, i ya jɔ̀ inɔ nŋɛ ku maa dɔ̃.

⁵ I jɔ̀ inɛ fei ku yɛ daa didɔ̃ nŋɛ ŋa, domi kunyii Lafɛ̃ɛ í maai wa.

⁶ I maà ya jɔ̀ zigi nŋɛ ku da do ngɔgɔ. Amma si mii fei i ya tɔɔ Ilaaɔ̃ do saabu nɔ i beeɛ bukaatai mii iyi ì bi ŋa.

⁷ Nɔ laakai ku sũi Ilaaɔ̃ iyi í re kumài amanɛ fei á degbe idɔ nŋɛ do lasabu nŋɛ si anu akã iyi ì nɛ do Jesu Kirisi ŋa.

⁸ Iyi í gbe nŋɛ, iŋɛ inɛm ŋa, i ya ce lasabu ŋa si mii iyi í sĩa, iyi Ilaaɔ̃ á saabu. Mii ŋaui í jɛ mii iyi í jɛ ntɔ fei, do mii iyi í nɛ bɛɛrɛ fei, do iyi wa too kpãa fei, do iyi í maaju fei, do iyi í dɔ̃ fei, do iyi í jɔ amanɛ ku saabu fei.

⁹ Ide iyi ǹ kɔ nŋɛ si nɔ ì jɛsi ŋau, do iyi ǹ sɔ̃ ŋɛ do iyi ì yɛ ǹ ce ŋa, i ya coo ŋa. Nɔ Ilaaɔ̃, nŋu iyi wa mu nwa laakai ku sũ á wɛɛ do iŋɛ.

Pɔlu wa saabu inɛi Filipi ŋa na amua nŋa

¹⁰ Ǹ nɛ inɔ didɔ̃ ntɔ ntɔ do iyi ǹ yɛ ì waa ce lasabum má ŋa, nɔ ǹ wa n saabu Lafɛ̃ɛ. N kaa n yɔkɔ n ni i ci ya ce lasabum ŋa, faya dei i ci ya ba ŋa.

¹¹ Kù jɛ a ni ǹ nɛ bukaatai ngɔgɔi í jɔ̀ ǹ wa n fɔ bɛɛbɛ, domi ǹ kɔkɔ inɔ didɔ̃ ku nɛ si mii iyi í bam fei.

¹² Ǹ mà bɛi ǹ ya n jɛ kuwɛɛm si waatii are, ǹ nɔ ǹ mà bɛi ǹ ya n jɛ kuwɛɛm si waatii ayo. Bii fei do iyi í bam fei, ǹ ya n wɛɛ do inɔ didɔ̃i, si waatii ayo do si waatii ari. Ǹ nɔ ǹ mà bɛi an ce bii ǹ nɛ nla nla do bii n kù nɛ.

¹³ An yɔkɔ n ce fei ndɛɛ do saabui Kirisi iyi wa muum gbugbã.

¹⁴ Do nŋu fei, ì ce í sĩa ŋa do iyi ì kpɛ̃ wahalam nɔu ŋa.

¹⁵ Iŋɛ inɛi Filipi ŋa, iŋɛ taka nŋɛ ì mà sãa sãa ŋa iyi hai ǹ sinti laabaau jiidau ku sìsì si waati iyi ǹ nɛ hai Masedɔni, igbɛi inɛi Jesu gɔ kù sobim bii kù jɛ iŋɛ akã, awaɛ ŋai à sobi njɛ.

¹⁶ Waati iyi ǹ wa Tɛsalonika, ì sobim si bukaatam ŋa, iyi kù jɛ baa gbakã akã mɔm.

¹⁷ Kù jɛ a ni amuai ǹ wa n tɔɔ, amma ǹ wa n bi riba nŋɛ ku kɔ̃ɔsii.

¹⁸ Andi mii iyi ì sambaam wa fei ŋa ǹ yɔɔ. Í nɔ í to hee í gbe. Bɛi Epafoditi í naam amua nŋɛ wa í ceem zaka. Amua nŋɛu í yɛɛm nii bɛi kuwee iyi í nɛ inunu jiida iyi Ilaaɔ̃ í gba í dɔ̃aa si.

¹⁹ Do saabui Jesu Kirisi Ilaaɔ̃ á mua iŋɛ fei bukaatai mii iyi ì nɛ ŋa si bɛi amanii amboeɛ í to.

²⁰ Amboei Ilaaɔ̃ Baa nwa ku wɛɛ do ajɔ fei. Ami.

Fɔɔi ankãanyi

²¹ I ce inɛ ŋa iyi Jesu Kirisi í cica à jɛ tɛɛu fei fɔɔ ŋa. Amu do inɛ ŋa iyi à wa bi tom à ce iŋɛ fei fɔɔ.

²² Inɛ ŋa iyi Jesu í cica à jɛ tɛɛu, aŋa iyi à wa ihɛ̃ fei à ce ŋɛ fɔɔ. Ti inɛi kpasɛ̃i ilaalu nlai inɛi Romu ŋau, inɛ nŋu í re mɔm.

²³ Didɔ̃i Lafɛ̃ɛ nwa Jesu Kirisi ku wɛɛ do iŋɛ fei. Ami.