Filipi 3 - Bibeli do fee

Bɛi aa jɛò dee dee si wajui Ilaaɔ̃

¹ Nsɛi iŋɛ inɛm ŋa, i ya jɔ̀ i wɛɛ do inɔ didɔ̃ ŋa do iyi ì jɛ ti Lafɛ̃ɛ ŋa. Bi tom, n kaa n gbɛɛjiò ide akãu ku kɔ nŋɛ wa, domi ǹ mà iyi á mu nŋɛ gbugbã.

² I ya maa ce laakaii woo ce icɛ laalɔ ŋa iyi à nɛ daa sãmi bɛi aja ŋa. Inɛ ŋau à waa kaaba bango iyi à bu si ara.

³ Awai à ce bango do ntɔ, awa iyi à waa tɔɔ Ilaaɔ̃ do gbugbãi Hundeɛ, nɔ à waa tɔɔ fufu na irii Jesu Kirisi, kù nɔ kù jɛ kuce nwai à waa kaaba.

⁴ Nɔ bii amu takam ǹ bi an yɔkɔ n kaaba kuce nwau. Bii inɛ gɔ wa tamaa si nŋu á yɔkɔ ku kaaba kuce nwau, aa fɔ idei amu má?

⁵ Si ajɔ mɛɛjɔsiai à dasim bango, amu amai Izirɛliu, si dimii Bɛnzamɛɛ. Amu alalai Zuifu ŋai, bii si woodai Zuifu ŋa ku jirimai ǹ jɛ Farisi.

⁶ Ǹ nɛ himma ntɔ ntɔ hee ǹ kpã inɛi igbɛi Jesu ŋa iju. Inɛ gɔ kaa yɛ taalem do yaase bɛi ǹ jirima idei wooda ǹ wa n dɛdɛ n jɛò inɛ dee dee.

⁷ Amma mii ŋa iyi ǹ wa n tamaa à nɛ riba tako fei wo, nsɛi ǹ wa n cɔɔi bɛi mii hai nɛ bɛɛrɛ na saabui Kirisi.

⁸ Ǹ doo fei ndɛɛ fei mɔm bɛi mii hai nɛ bɛɛrɛ na ide iyi í nɛ amboe í re. Ideu nŋui í jɛ Jesu Kirisi Lafɛ̃ɛm iyi ǹ mà. Na iriɛi ǹ jɔ̀ mii fei, ǹ doo aŋa fei bɛbɛi bɛi riisi iyi à kpã ku ba n nɛ Kirisi,

⁹ nɔ n wɛɛ do nŋu. Nɔ ǹ wa n mà n kaa n yɔkɔ n jɛ dee dee na wooda ku jirima, amma ǹ jɛ dee deei si na iyi í jɔ̀ ǹ dasi Kirisi naanɛ. Dee dee ku jɛu wa naai hai bi Ilaaɔ̃ na saabui naanɛ iyi à dasiu.

¹⁰ Iyi ǹ bi, nŋui í jɛ n mà Kirisi, do gbugbã iyi í jĩò hai si balɛ nɔ n nɛ ikpɛ̃ si ijuukpãɛu hee ku yɛ bɛi amu mɔ ǹ ku do nŋu ajɔ,

¹¹ ku ba n nɛ kpãa ku cɔ iyi amu mɔ an jĩ hai si balɛ.

Amanii lele ku sɛi si

¹² Kù jɛ ǹ mà Kirisi bɛɛbɛ titã n kù toò awɔ kù nɔ kù jɛ ǹ kɔ̃. Amma ǹ wa n ce kookaai fei ku ba n màa, domi Jesu Kirisi í cem titɛɛ.

¹³ Iŋɛ inɛm ŋa, n kù wa n cɔ aram bɛi mii iyi n toò awɔ titã, amma mii akãi ǹ wa n ce. Ǹ ya n maa n gbɛjɛ mii iyi í wa do anyim nii, nɔ n ce kookaai n maa n lele ti waju.

¹⁴ Bɛɛbɛi ǹ ce ǹ wa n bɔò waju bɛi inɛ iyi wa ce gaasai kusɛi, ku ba n ba riba iyi Ilaaɔ̃ wa kpe wa ka na ka gba lele do saabui Jesu Kirisi.

¹⁵ Na nŋu, awa iyi à jĩa si kpãai naanɛ ku dasi, ka ce lasabu bɛɛbɛ. Amma bii ì waa ce lasabu gɔ iyi kù waa too kpãa ŋa, Ilaaɔ̃i á nyisi ŋɛ iyi kù jɛ dee dee.

¹⁶ Si bɛi í jɛu fei, awa de ka maa bɔ waju si kpãa akã iyi à waa toou.

¹⁷ Iŋɛ inɛm ŋa, iŋɛ fei i sìsìim ŋa. À nyisi ŋɛ kuce jiida. Na nŋu, i ya maa cɔ inɛ ŋa mɔ iyi à yɔkɔ à waa ce bɛɛbɛ.

¹⁸ Ǹ sɔ̃ ŋɛ tã isɛ fɛɛfɛlo, nɔ ǹ nyi ǹ wa n sisi nŋɛ má do kukpata, inɛ nkpɔ í wɛɛ iyi wa jɛ mbɛɛi idei ikui Kirisi si jĩi ku gaauu.

¹⁹ Nfe ku cei aa kpaò iriɛ, domi inɔ nŋai à ya maa cea icɛ si agbɛi Ilaaɔ̃. Iyi í jɔ̀ ku jɛ nŋa anyɔ nŋui à ya maa tɔɔò fufu. Mii ndii andunya ihɛ̃ nŋu akãi à waa lasabu si.

²⁰ Amma awa, lelei Aɔ̃i í jɛ ilu nwa. Hai bɛi à waa degbe woo faaba nwa Lafɛ̃ɛ Jesu Kirisi ku nyi wa.

²¹ Do gbugbãɛ iyi á jɔ̀ mii fei ku jirimaɛò nŋui á kpaasiò ara hai nɛ bɛɛrɛ nwau ku jɔ arai nŋu takaɛ iyi í nɛ amboe.