Filipi 2 - Bibeli do fee

Kukayei Kirisi* do aláɛ

¹ Ì mà sãa sãa ŋa, naanɛ iyi ì dasi Kirisi ŋa wa mu nŋɛ gbugbã. Kubiɛ wa dasi ŋɛ himma. Hundei Ilaaɔ̃ í jɔ̀ ì nɛ anu akã ŋa. Araarei Kirisi do jiida ku jɛɛ í wa si anini nŋɛ.

² Na nŋu, ǹ wa n tɔɔ ŋɛ, i jɔ̀ i ya nɛ anu akã ŋa, do kubi akã, do idɔ akã, do lasabu akã. Iyi bɛi á jɔ̀ inɔ didɔ̃m ku kɔ̃.

³ I maà ya ce ngɔgɔ do njɛ ku wã ŋa walakɔ do fufu ku tɔɔ, amma i kaye ara nŋɛ i ya doo inɛ ŋa bɛi mii iyi à re ŋɛ.

⁴ Nɔ kãma nŋɛ gɔ ku maà ya ce lasabui iri nŋu akã, amma ku ya ce lasabui inɛ mmu ŋa mɔ má.

⁵ I jɔ̀ lasabu nŋɛ si gãmɛi njɛ ku yɛ bɛi Jesu Kirisi mɔ í ce.

⁶ Baa do iyi í to Ilaaɔ̃, kù dɛdɛ nŋu ku jɛ saai Ilaaɔ̃ do tilasi.

⁷ Amma andi mii iyi í nɛ fei í jɔ̀ɔ nɔ í baa í jɛ amanɛ, í naa í jɛ mɔm nii bɛi aru. Iyi í sinda amanɛ í tã,

⁸ í kaye araɛ má nɔ í jirima Ilaaɔ̃ hee í na araɛ í to siò iku si antaii jĩi ku gaau mɔm.

⁹ Na saabu nŋui Ilaaɔ̃ í soo lele ntɔ ntɔ nɔ í naa iri iyi í nɛ bɛɛrɛ í re iri fei,

¹⁰ ku ba inɛ fei ku gulɛ ku nyisiò bɛɛrɛi Jesu, hai inɛ ŋa iyi à wa lele do inɛ ŋa iyi à wa ilɛ hee do lɛlɛi ilɛ fei.

¹¹ Nɔ gɛlɛi inɛ fei ku jɛsi iyi Jesu Kirisii í jɛ Lafɛ̃ɛ. Nŋu bɛi á na Ilaaɔ̃ Baaba amboe.

I má inya ŋa bɛi fitila si andunya

¹² Iŋɛ baakɔɔm ŋa, ì ya jirimam ŋa si waati iyi ǹ wa inɔ nŋɛ wo. Nsɛi iyi ǹ jĩò ŋɛ í sĩa i ya maa jirimam ku re ŋa. I kookaai i ce icɛ do njo do kuyaya ku ba icɛ jiida nŋɛ ku jɔ̀ a mà iyi ì ba faaba ŋa,

¹³ domi Ilaaɔ̃i wa ce icɛ si ŋɛ ku ba ku mu nŋɛ idɔɔbi do gbugbã iyi aa yɔkɔ i cooò ŋa bɛi nŋu takaɛ í bi.

¹⁴ Mii iyi ì waa ce fei i coo ŋa kugbagba ku maà wa si walakɔ kakɔɔ,

¹⁵ ku ba i má dee dee ŋa nɔ i maà nɛ taale gɔ, iŋɛ iyi ì jɛ amai Ilaaɔ̃ ŋa. Kù sĩa i nɛ kurara gɔ si wajui inɛ laalɔi andunya ŋa iyi a kù waa too kpãa. Í sĩa i maa má inya ŋa si anini nŋa bɛi fitila ŋa,

¹⁶ nɔ i ya maa sɔ̃ ŋa idei kuwɛɛ ŋa. Bii ì waa ce bɛɛbɛ ŋa an tɔɔ fufu na iri nŋɛ si ajɔ iyi Kirisi á nyi wa, si na iyi í jɔ̀ icɛm iyi ǹ ce do kookaai kù jɛ ngbɛ.

¹⁷ Naanɛ ku dasi nŋɛ í yɛi bɛi kuwee iyi ì waa cea Ilaaɔ̃ ŋa. Nɔ baa bii í jɛ à kpam nii, nɔ ǹ nikã njɛm bɛi kuweei atɛ̃ vɛ̃ɛ iyi à nikã si antaii kuwee nŋɛu, do nŋu fei inɔm á dɔ̃, nɔ awaɛ ŋa ka kpɛ̃ inɔ didɔ̃u.

¹⁸ Bɛɛbɛ mɔi í sĩa iŋɛ mɔ i wɛɛò inɔ didɔ̃ nɔ inɔ didɔ̃ nŋɛu i kpɔ̃ɔ ŋa do amu.

Timɔtee do Epafoditi

¹⁹ Bii Lafɛ̃ɛ Jesu í jɛ, si ajɔ gbeejiu ihɛ̃ an bɛ Timɔtee wa bi tu ŋɛ ku ba amu mɔ n gbɔ laabaau nŋɛ nɔ ku muum gbugbã.

²⁰ Inɛ kãma kù wa bi tom ihɛ̃ má iyi awaò à nɛ lasabu akã bii kù jɛ nŋu akã, nɔ nŋu akãi lasabuɛ í wa si ŋɛ ntɔ ntɔ.

²¹ Inɛ ŋa iyi à gbe fei, lasabui idei aŋa taka nŋai à waa ce, lasabu nŋa kù wa si idei Jesu Kirisi.

²² Iŋɛ taka nŋɛ ì mà ŋa iyi Timɔtee í nyisi araɛ ilu naanɛ nɔ í na araɛ si icɛi laabaau jiidau ku ce do amu bɛi ama do baaɛ.

²³ Ŋɔi í jɔ̀ ǹ wa n bi n bɔɔ wa bi tu ŋɛ si waati iyi an mà bii ǹ wa.

²⁴ Ǹ nɛ naanɛ iyi Lafɛ̃ɛ á jɔ̀ amu takam n naa bi tu ŋɛ bɛ si ajɔ gbeejiu ihɛ̃.

²⁵ Amma nsɛi, ǹ yɛ í sĩa n jɔ̀ kpaasim Epafoditi ku nyi wa bi tu ŋɛ, nŋu iyi ì tako ì bɛ sim wa ŋa do sobi iyi ǹ biu. Nŋui í jɛ kpaasi woo ce icɛm nɔ wa bam ku jabu.

²⁶ Ǹ wa n sindaɛ wai si na iyi í jɔ̀ wa bi iŋɛ fei ku yɛ ntɔ ntɔ, nɔ laakaiɛ í dede do iyi ì gbɔ ŋa kù waa nɛ baani.

²⁷ Í ce bɔ̃ɔi ntɔ ntɔ hee í maai iku, amma Ilaaɔ̃ í ce araareɛ. Nɔ kù jɛ araarei Epafoditi nŋu akã, do ti amu takam nii, ku ba inɔ kufɔm nɔu ku maà kɔ̃ɔsi má.

²⁸ Ŋɔi í jɔ̀ ǹ wa n saasa n ba n sinda nŋɛ wa ku ba inɔ nŋɛ ku dɔ̃ má bii ì yɔɔ ŋa, nɔ inɔ kufɔi amu takam ku kaye.

²⁹ Na nŋu, i gbaa ŋa do irii Lafɛ̃ɛ do inɔ didɔ̃ nla nla. Í sĩa i mà bɛɛrɛi inɛ dimi bɛɛbɛ ŋa,

³⁰ domi í maai iku si icɛi Kirisi. Í ta hundeɛ í naaò sobi iyi iŋɛ taka nŋɛ i kù ba fayaɛ i naam wa ŋa wo.