Ɛsidarasi 9 - Bibeli do fee

Zuifu nkpɔ í so abo isɛ mmu

¹ Si anyii mii ŋau bɛ fei ŋɔi inɛ ngbo gɔ ŋa à naa à sɔ̃m à ni, inɛi Izirɛli ŋa hee do woo wee ŋau do inɛi Levii ŋau a kù fɛɛfɛ ara nŋa do inɛi ilɛ ŋau ihɛ̃. À waa ce laalɔ bɛi inɛi Kanaã ŋa do inɛi Hɛti ŋa do inɛi Ferɛzi ŋa do inɛi Yebusi ŋa do inɛi Amɔɔ ŋa do inɛi Moabu ŋa do inɛi Ezibiti ŋa do inɛi Amɔre ŋa.

² Aŋa taka nŋa do ama nŋa ŋa à so abo ŋa si dimii inɛ ŋau, nɔ à jɔ̀ dimi kumáu í tɔtɔɔ do inɛi ilɛ ŋau ihɛ̃. Nɔ inɛi waju ŋau do inɛ ngbo ŋau aŋai à tako à lɔ si dulum nɔu.

³ Iyi ǹ gbɔ ideu ŋɔi ǹ ga kumboom do jĩnɛm ŋa nɔ ǹ tu ntoi irim gɔ ŋa do ti agbãm, ŋɔi ǹ buba do inɔ kufɔ nla nla.

⁴ Bɛɛbɛ mɔi ǹ nɔ ǹ wɛɛ bɛ hee í koo í toò waati iyi à waa ce kuweei alɛu. Nɔ inɛ ŋa iyi à waa ce njo kiitii Ilaaɔ̃ ku maa naa si inɛi Izirɛli ŋa na dulum du ŋa à naa à tɔtɔɔ bi tom.

Ɛsidarasi wa ce kutɔɔ na irii inɛ ŋa iyi à ce dulum

⁵ Waati iyi à ce kuweei alɛu ŋɔi ǹ dede hai tengi bii ǹ buba do inɔ kufɔu ǹ koo ǹ gulɛ do jĩnɛm do kumboo ku gam ǹ to awɔm ikpa bi Aɔ̃ Lafɛ̃ɛm.

⁶ Ǹ ce kutɔɔ ǹ ni, Ilaaɔ̃ Lafɛ̃ɛm, ǹ wɛɛò inɔ kufɔ, nɔ anyɔ wa mum hee í jɔ̀ n kaa n jɛ n wu iju lele n cɔɛ. Laalɔ ku ce nwa í la í caa í to hee lele mɔm.

⁷ Hai waati iyi bala nwa ŋa à wɛɛ hee do nnyi fei, laalɔ ku cei inɛ nwa ŋa í la í caa. Nŋui í jɔ̀ ilaalu inɛ njoo ŋa à kãmia inɛ nwa ŋa hee do ilaalu nwa ŋa do woo wee nwa ŋa fei, à jɛ wa igũ à kpa wa à mu wa aru, à ce wa ile à ko mii ndu wa ŋa fei, nɔ à kaye wa bɛi à wɛɛò hee nnyi.

⁸ Do nŋu fei, si waati keekeu ihɛ̃ ì ce nwa didɔ̃ ì jɔ̀ inɛ gɔ nwa ŋa à nyi wa à buba si ilɛ iyi ì cica í jɛ titɛɛu ku ba iju nwa ku má, nɔ ì jɔ̀ à nɛ kpãa ku cɔ keeke si aru ku jɛ nwa.

⁹ Baa do iyi à jɛ aru i kù fũsi wa awɔ. Ì jɔ̀ ilaalui Pɛɛsi ŋau à ce nwa jiida à jɔ̀ wa à wɛɛ si hunde nɔ à teese à waa ma kpasɛ̃ɛ iyi í bɛjɛu, ku ba ka ba bi kuwa Zeruzalɛmu do si ilɛi Zudaa.

¹⁰ To, nsɛi Ilaaɔ̃ Lafɛ̃ɛ nwa, a kù nɛ bɛi aa ka fɔ má, domi a kù jirima woodaɛ ŋa

¹¹ iyi à gbɔ hai si gɛlɛi walii woo ce icɛɛ ŋau. Ì sɔ̃ ŋa ì ni, ilɛ iyi an mu nŋɛu í jɛ ilɛ gɔ iyi í nɛ riisi. Inɛ ŋa iyi à wa bɛ ŋau aŋa taka nŋa à riisi, nɔ hai bii ilɛu í sinti hee ku bɔ iri ku kpaɛ laalɔ ku ce nŋa í caa.

¹² Na nŋu, i maà mua inɛmɔkɔi bɛ ŋa ama inaabo nŋɛ ŋa a ce abo. Nɔ i maà dɛdɛa ama inɛmɔkɔ nŋɛ ŋa abo si inɔ nŋa. I maà ti i jɔ̀ kɔdɛɛ nŋɛ ku lɔ si amani nŋa ŋa do si inɔ didɔ̃ nŋa. Si bɛɛbɛ aa na i nɛ gbugbã ŋa nɔ aa ya maa jɛ mii jiidai ilɛu bɛ ŋa, nɔ ilɛu á na ku jɛ ti tɔku nŋɛ ŋa hee do ajɔ fei.

¹³ Ilaaɔ̃ Lafɛ̃ɛ nwa, laalɔ ku ce nwa do kurara nla nwa nŋui í jɔ̀ laalɔ ŋau ihɛ̃ fei í naa si wa. Amma do nŋu fei i kù kpã wa iju kù to bɛi dulum ku ce nwa í to, nɔ ì jɔ̀ à waa wɛɛ, awa iyi à wa ihɛ̃.

¹⁴ To, wee à nyi à waa kua woodaɛ ŋa má à waa so abo si inɔi inɛ laalɔ ŋau. Bii idɔɔkɔ̃ɛ í na í dede aa kpa wa, nɔ i kaa jɔ̀ baa inɛ akã ku fita si.

¹⁵ Awɔ Aɔ̃ Lafɛ̃ɛi awa inɛi Izirɛli ŋa, si dee dee ku jɛɛ ì jɔ̀ awa iyi à gbeu ihɛ̃ nnyi à wɛɛ si hunde. Awa wee à wɛɛ à waa leekĩ si wajuɛ do dulum nla nla, nɔ wee si laalɔ dimi bɛɛbɛ ku ce inɛ kãma kù nɛ kpãa ku wɛɛ si hunde ku maa leekĩò si wajuɛ.