Ɛsidarasi 8 - Bibeli do fee

Inɛ ŋa iyi à too Ɛsidarasi

¹ Irii inɛ ngboi kpasɛ̃ ŋa do nyaanze nŋa ŋa iyi amu Ɛsidarasi awaò ŋa à nɛ hai ilɛi Babilɔni à baa Zeruzalɛmu si waati iyi Aatakusɛɛsi wa jɛ ilaaluu wee.

² Si tɔkui Fineɛzi Gɛɛsomui, si tɔkui Itamaa Daniɛlii. Si tɔkui Davidi mɔ Hatusi

³ inɛ akãi amai Sekania ŋai. Si tɔkui Pareosi mɔ Zakarii. Inɛmɔkɔ cijeò fɛɛwai (150) wa too fitiɛ hai si kpasɛ̃ɛ.

⁴ Si tɔkui Pahati-Moabu mɔ Elioenai amai Zerayai. Inɛmɔkɔ cĩɔ minjii (200) í too fitiɛ wa.

⁵ Si tɔkui Zatu mɔ Sekania amai Yaziɛlii. Inɛmɔkɔ cĩɔ mɛɛtai (300) í too fitiɛ wa.

⁶ Si tɔkui Adini mɔ Ebɛdi amai Yonatãai. Inɛmɔkɔ ciitaai (50) í too nŋu mɔ wa.

⁷ Si tɔkui Elamu mɔ Ezai amai Ataliai. Inɛmɔkɔ kitaò fɛɛwai (70) í too nŋu mɔ wa.

⁸ Si tɔkui Sefatia mɔ Zebadia amai Mikaɛlii. Inɛmɔkɔ cinɛi (80) í too nŋu mɔ wa.

⁹ Si tɔkui Yoabu mɔ Abudiasi amai Yeɛlii. Inɛmɔkɔ cĩɔ minji do kɔnfia feeji kù wa sii (218) í tooɛ wa.

¹⁰ Si tɔkui Bani mɔ Selomiti amai Yosifiai. Inɛmɔkɔ cijɔi (160) í too nŋu mɔ wa.

¹¹ Si tɔkui Bebai mɔ Zakari amai Bebaii. Inɛmɔkɔ kɔnfia do mɛɛjɔi (28) í too nŋu mɔ wa.

¹² Si tɔkui Azigadi mɔ Yohanaai amai Akatanii. Inɛmɔkɔ cĩɔ do mɛɛwai (110) í too nŋu mɔ wa.

¹³ Si tɔkui Adonikamu mɔ Elifelɛti do Yeuɛli do Semayai, aŋa iyi à jɛ keeke si dimi nŋa. Inɛmɔkɔ kitai (60) í too aŋa mɔ wa.

¹⁴ Si tɔkui Biguvai mɔ Utai do Zabudii. Inɛmɔkɔ kitaò fɛɛwai (70) í too aŋa mɔ wa.

Sɔɔlui Zeruzalɛmu ku nɛ

¹⁵ Ǹ tɔtɔɔ inɛ ŋaui kɔkɔi ido iyi í cã wa bɔ ikpa Ahava nɔ à buba bɛ ajɔ mɛɛta. Iyi ǹ cɔ inɛ ŋau do woo wee ŋau nɔ ǹ ba wee inɛi Levii kãma kù wa si inɔ nŋa.

¹⁶ Nɔ ǹ kpe inɛ ngbo ŋau. Inɛ ngbo ŋa iyi ǹ kpe ŋau wee. Eliezɛɛ do Ariɛli do Semaeya do Elinatãa do Yaribu do Elinatãa do Natãa do Zakari do Mesulamu. Nɔ ǹ kpe Yoyaribu do Elinatãa má, aŋa iyi à jɛ woo mà wooda ŋau.

¹⁷ Nɔ ǹ bɛ ŋa bi Ido ilaalui ilɛi Kasifia, nɔ ǹ sɔ̃ ŋa ide iyi aa koo a sɔ̃ ilaaluu do kpaasi ŋa iyi aŋaò ŋa à ya ce icɛi kpasɛ̃i Ilaaɔ̃ iyi à wa Kasifia bɛu, ku ba a naa nwa inɛ ŋa iyi aa ce icɛi kpasɛ̃i Aɔ̃ Lafɛ̃ɛ nwa wa.

¹⁸ Nɔ si bɛi awɔ gbugbãi Aɔ̃ Lafɛ̃ɛ nwa í wɛɛ do awa, à naa nwa Serebia wa hai si dimii Mali, inɛ iyi í nɛ yaase jiida. Tɔkui Leviii wa jɛ, Levii mɔ amai Izirɛlii. Nŋu do amaɛ ŋa do nyaanzeɛ ŋa à wɛɛi aŋa mɛɛwa do mɛɛjɔ.

¹⁹ Nɔ à naa nwa Hasabia mɔ wa do Ezai hai si dimii Merari. Hasabia do amaɛ ŋa do nyaanzeɛ ŋa fei à wɛɛi aŋa kɔnfia.

²⁰ Nɔ hai si woo ce icɛi kpasɛ̃i Ilaaɔ̃ ŋa iyi ilaalu Davidi do inɛ ngbo ŋa à jilɛa inɛi Levii ŋau a maa sobi ŋa si icɛ wo, à cica amanɛ cĩɔ minji do kɔnfia (220) à naa nwa wa.

²¹ Tengii itĩi idoi Ahavau, tengi bɛi ǹ ni a ce anu ku dĩ ka sũa Aɔ̃ Lafɛ̃ɛ nwa iri ilɛ ku ba ku jɔ̀ ka ce isɛɛnɛ nwa do laakai ku sũ, hai awa taka nwa do nyaanze nwa ŋa do mii ndu wa ŋa fei.

²² Anyɔ á mum bii ǹ ni ilaaluu ku jɔ̀ sooge ŋa do masa ŋa a si wa si isɛɛnɛ nwau na irii mbɛɛ nwa ŋa, domi à tako à sɔ̃ɔ wo à ni, Aɔ̃ Lafɛ̃ɛ nwa í ya cea inɛ ŋa iyi à waa tɔɔɛ fei jiida, amma idɔɔkɔ̃ɛ í ya dedei do gbugbã si inɛ ŋa iyi à kɔ̀siɛ.

²³ Na ŋɔi í jɔ̀ à ce anu ku dĩ, nɔ à tɔɔ Aɔ̃ Lafɛ̃ɛ nwa ku wɛɛ do awa nɔ í gbɔ kutɔɔ nwa.

²⁴ Si anyiɛ ŋɔi ǹ cica inɛ ngboi woo wee maateeji gɔ ŋa, waatɔ Serebia do Hasabia do kpaasi mɛɛwa gɔ ŋa má.

²⁵ Ŋɔi ǹ wã kuwoi isɔ fũfũ do wura do jĩnɛ ku nɛ bɛɛrɛ ŋa iyi ilaaluu do woo kɔɛ do akaweɛ ŋa do inɛi Izirɛli ŋa à na na icɛi kpasɛ̃i Ilaaɔ̃u si wajuɛ.

²⁶ Bɛɛbɛ mɔi ǹ na ŋa isɔ fũfũ tɔnu kɔnfia do jĩnɛi isɔ fũfũ ŋa tɔnu mɛɛta do wura tɔnu mɛɛta

²⁷ do kɔɔfui wura ara kɔnfia iyi jiai fiaɛ í to kpɛkɛlɛi wura dubu do ama caka minji gɔ ŋa iyi à ce do isɔ nkpa ku daana, aŋa mɔ à nɛ bɛɛrɛi bɛi wura.

²⁸ Nɔ ǹ sɔ̃ ŋa ǹ ni, si bɛi iŋɛ mɔ ì jɛ inɛ ŋa iyi à cica à nya ŋɛ ikã i jɛ woo ce icɛi Ilaaɔ̃ ŋa, bɛɛbɛ mɔi jĩnɛ ŋau à jɛ ti Ilaaɔ̃. Isɔ fũfũu do wurau í jɛ amua iyi inɛ ŋa à na Ilaaɔ̃ Lafɛ̃ɛi bala nŋɛ ŋa do idɔɔbi nŋa.

²⁹ I dasi mii ŋau bɛ fei iju hee i koo i toò Zeruzalɛmu nɔ i wã fei ndɛɛ si wajui inɛ ngboi woo wee ŋau do inɛi Levii ŋau do si wajui inɛ ngboi kpasɛ̃ ŋau si inɔ kpasɛ̃i Ilaaɔ̃u.

³⁰ Ŋɔi woo wee ŋau do inɛi Levii ŋau à so isɔ fũfũ do wura do jĩnɛ ŋa iyi à wã kuwo nŋa ŋau fei à waa nɛò Zeruzalɛmu bi kpasɛ̃i Ilaaɔ̃ Lafɛ̃ɛ nwau.

Zeruzalɛmu ku to nŋa

³¹ Si ajɔ maateejisiai cukpa sinteu à dede hai ido iyi à ya kpe Ahavau à waa nɛ ikpa Zeruzalɛmu. Si isɛɛnɛ nwau Ilaaɔ̃ í wɛɛ do awa nɔ í nya wa hai si awɔi mbɛɛ ŋa do inɛ ŋa iyi à bi a zamba wa a ce wa ile.

³² Iyi à to Zeruzalɛmu à sĩmi ajɔ mɛɛta.

³³ Si ajɔ mɛɛsiau nɔ à wã kuwoi isɔ fũfũ do wura do jĩnɛ ŋau si kpasɛ̃i Ilaaɔ̃ à bɛi à daa Meremɔti woo wee amai Uriu si awɔ. Nŋu do Eleazaa amai Fineɛzi à wa bɛ do inɛi Levii gɔ ŋa iyi à ya kpe Yozabadi amai Zozue, do Noadia amai Binui.

³⁴ À ce doai fei ndɛɛ nɔ à wãa, nɔ zaka bɛi kuwoɛ fei í dede à kɔɔ si tia.

³⁵ Inɛ ŋa iyi à baa hai bii à tako à waa jɛ aruu fei à cea Ilaaɔ̃ kuwee. À jo kɛtɛ kombo maateeji si ina fei sãa sãa na inɛi Izirɛli fei, do angudã kombo cinɛò fɛɛwa do mɛɛfa (96) do ama angudã kitaò fɛɛwa do mɛɛje (77). Nɔ à jo iwo kombo maateeji má si ina fei sãa sãa na dulum du ŋa.

³⁶ Si anyiɛ nɔ à sisia ilu ilɛ ŋa do inɛ ngbo ŋa iyi à wa ikpa nunui alɛi idoi Efaratau ide ŋa iyi ilaaluu í sɔ̃ ŋa wau. Ŋɔi inɛ ŋau à sobi inɛi Izirɛli ŋau si kpasɛ̃i Ilaaɔ̃u ku ma.