Ɛsidarasi 7 - Bibeli do fee

Ɛsidarasi woo weeu í bɔ Zeruzalɛmu

¹ Si anyii adɔ̃ nkpɔ, si waati iyi Aatakusɛɛsi wa jɛ ilaalu si ilɛi Pɛɛsi, inɛ gɔ í to wa Zeruzalɛmu à ya kpoo Ɛsidarasi. Amai Serayai wa jɛ, Seraya mɔ amai Azariai, Azaria mɔ amai Hilikiyai.

² Hilikiya mɔ amai Salumui wa jɛ, Salumu mɔ amai Sadɔkui, Sadɔku mɔ amai Ahitubui,

³ Ahitubu mɔ amai Amariai, Amaria mɔ amai Azariai, Azaria mɔ amai Merayɔtii,

⁴ Merayɔti mɔ amai Zerayai, Zeraya mɔ amai Uzii, Uzi mɔ amai Bukii,

⁵ Buki mɔ amai Abisuai, Abisua mɔ amai Fineɛzii, Fineɛzi mɔ amai Eleazaai, Eleazaa mɔ amai Arɔ̃ɔ woo wee nlaui.

⁶ Ɛsidarasiu hai ilɛi Babilɔnii í naa. Í jɛ inɛ gɔ iyi í ce cio í nɛ kumài wooda iyi Aɔ̃ Lafɛ̃ɛi inɛi Izirɛli ŋa í na Moiziu sãa sãa. Mii ŋa iyi í tɔɔ fei ilaaluu í naa si bɛi awɔi Ilaaɔ̃ í wa siɛ.

⁷ Inɛi Izirɛli nkpɔ do woo wee ŋau do inɛi Levii ŋau do woo kɔ̃ iri ŋau do woo degbe andɛ koofa ŋau do woo ce icɛi kpasɛ̃i Ilaaɔ̃ ŋau, aŋa mɔ à naa Zeruzalɛmu si adɔ̃ mɛɛjesiai bomma ku jɛi ilaalu Aatakusɛɛsi.

^8-9 À fita hai si ilɛi Babilɔnii si ajɔ sintei cukpa sinteu nɔ Ɛsidarasi í cua nŋa wa. Si bɛi awɔ gbugbãi Aɔ̃ Lafɛ̃ɛɛ í wa siɛ, à to Zeruzalɛmu si ajɔ sintei cukpa miiusiau.

¹⁰ Wee Ɛsidarasi í jɛ inɛ gɔ iyi í ce cioi woodai Ilaaɔ̃ dee dee nɔ wa ceò icɛ, nɔ wa kɔa inɛi Izirɛli ŋa si wooda ŋau.

Icɛ ŋa iyi Aatakusɛɛsi í dasi Ɛsidarasi

¹¹ Ilaalu Aatakusɛɛsi í cea Ɛsidarasi tia. Ɛsidarasiu woo weei í jɛ. Nɔ í nɛ kumài wooda iyi Ilaaɔ̃ í na inɛi Izirɛli ŋa. Nŋui í jɛ woo kɔ inɛ ŋa si woodau. Idei tia iyi Aatakusɛɛsi í naau wee.

¹² Amu Aatakusɛɛsi ilaalui ilaalu ŋa, ǹ kɔɛ tiau ihɛ̃ wai Ɛsidarasi awɔ woo wee do woo mà woodai Aɔ̃ Lafɛ̃ɛi lele.

¹³ Woo wee ŋa do inɛi Levii ŋa hee do inɛi Izirɛli ŋa iyi à wa si ilɛm nɔ à bi a tooɛ a bɔ Zeruzalɛmu fei ǹ na wooda a jɔ̀ i nɛ ŋa.

¹⁴ Amu takam do inɛ mɛɛje ŋa iyi à jɛ woo kɔm ŋa, awai à waa bɛɛ Zeruzalɛmu si ilɛi Zudaa ku ba i koo i yɛ yaase bɛi woodai Aɔ̃ Lafɛ̃ɛɛ iyi awɔ takaɛ ì waa mu kukɔɛu wa nɛ.

¹⁵ Bii ì waa nɛ aa ka naɛ isɔ fũfũ do wura iyi amu do woo kɔm ŋau à waa bi ka na Aɔ̃ Lafɛ̃ɛi inɛi Izirɛli ŋa nŋu iyi í nɛ kpasɛ̃ɛ Zeruzalɛmu.

¹⁶ I so isɔ fũfũ do wura iyi inɛi Babilɔni ŋau aa na ŋɛ fei do amua ŋa iyi inɛi Izirɛli ŋa do woo wee ŋau aa na do inɔ akã fei i nɛò Zeruzalɛmu ŋa na icɛi kpasɛ̃i Ilaaɔ̃ iyi í wa bɛu.

¹⁷ Bii ì to bɛ, do fia ŋau ihɛ̃ aa ba i ra kɛtɛ kombo ŋa do angudã kombo ŋa do ama angudã ŋa do andi mii iyi í gbe iyi aa ceò kuwee ŋa fei hee do kuweei atɛ̃ vɛ̃ɛ si inɔ kpasɛ̃i Aɔ̃ Lafɛ̃ɛ nŋɛ iyi í wa Zeruzalɛmu.

¹⁸ Si anyiɛ awɔ do kpaasiɛ ŋa i so mbɔi isɔ fũfũu do wura ŋau i ceò mii iyi í sĩa ŋa iyi á jɛ ti idɔɔbii Aɔ̃ Lafɛ̃ɛ nŋɛ.

¹⁹ Nɔ i jilɛ jĩnɛi kuwee ŋa iyi à naɛu si kpasɛ̃i Ilaaɔ̃ i maa ceò icɛ ŋa.

²⁰ Bii ì bi mii mmuɛ gɔ ku ce si kpasɛ̃u, jɔ̀ a naɛ fiam iyi í wa bɛu i raò.

²¹ Amu ilaalu Aatakusɛɛsi ǹ wa n na woo mu fia ŋau fei wooda, aŋa iyi à wa ikpa nunui alɛi idoi Efaratau a ce bɛi awɔ Ɛsidarasi woo weeu do woo mà woodai Ilaaɔ̃i lele aa ni a ceu dee dee.

²² Aa yɔkɔ a naɛ isɔ fũfũ iyi kuwoɛ á to hee zakai kiloo dubu mɛɛta (3.000) do bilee kiloo dubu kuntaa (30.000) do vɛ̃ɛ liiti dubu mɛɛ (4.000) do ikpo liiti dubu mɛɛ (4.000) do imu zaka bɛi ì bi.

²³ Wooda ŋa iyi Ilaaɔ̃i lele í na si gãmɛi kpasɛ̃u í sĩa a coo dee dee ku ba idɔɔkɔ̃ɛ ku maà na ku dede si bomma nwau, walakɔ si amu takam do amam ŋa do tɔkum ŋa.

²⁴ Nɔ bɛɛbɛ mɔi ǹ wa n na wooda a maà gba si woo wee ŋau do inɛi Levii ŋau do woo kɔ̃ iri ŋau do woo degbe andɛ koofa ŋau do woo ce icɛi kpasɛ̃i Ilaaɔ̃ ŋau fiai adɔ̃ do fiai lɛmpoo do fia iyi inɛ í ya sã ku bɛi ku lɔ.

²⁵ Nɔ awɔ Ɛsidarasi, jilɛ woo kiiti ŋa do inɛ ngbo ŋa si bisii Ilaaɔ̃ iyi ì nɛ. Aŋai aa maa kiiti inɛ ŋa ikpa nunui alɛi idoi Efarata, inɛ ŋa iyi à mà woodai Ilaaɔ̃ Lafɛ̃ɛɛ. Inɛ ŋa mɔ iyi a ku màa i kɔ ŋa si.

²⁶ Inɛ iyi í kɔ̀ ku jirima woodai Ilaaɔ̃ Lafɛ̃ɛɛ do ti amu ilaaluu, aa yɛ taalei lafɛ̃ɛi a kpaa walakɔ a nyaa ilɛ, walakɔ a gba mii ndɛɛ ŋa, walakɔ a dasiɛ piisɔ̃ɔ.

Ɛsidarasi wa saabu Ilaaɔ̃

²⁷ Ŋɔi Ɛsidarasi í ni, ka saabu Ilaaɔ̃ Lafɛ̃ɛi bala nwa ŋa si bɛi í ce icɛ si idɔi ilaaluu í jɔ̀ í mà bɛɛrɛi kpasɛ̃ɛ iyi í wa Zeruzalɛmu.

²⁸ Nɔ í jɔ̀ ilaaluu do woo kɔɛ ŋa do inɛ ngbo ku nɛ gbugbã ŋa iyi à waa kaakoɛu à nyisi jiida ku jɛ nŋa. Nɔ ǹ ba gbugbã do saabui Aɔ̃ Lafɛ̃ɛm iyi í wɛɛ do amu. Ŋɔi í jɔ̀ ǹ yɔkɔ ǹ tɔtɔɔ inɛ ngboi Izirɛli ŋa ku ba awaò ŋa ka nɛ.