Ɛsidarasi 6 - Bibeli do fee

Ide iyi ilaalu Dariusi í jɛ

¹ Ŋɔi ilaalu Dariusi í na wooda í ni a koo a dɛdɛ si inɔ ile bii à ya jilɛ tia ŋa do amanii Babilɔni ŋau.

² Nɔ si ilɛi Medi si ilu nla iyi à ya kpe Ebataniu à yɛ tia gɔ si bii à kɔ ide à ni,

³ Sirusi í fɔ si adɔ̃ sintei bomma ku jɛɛ í ni a teese a ma kpasɛ̃i Ilaaɔ̃ iyi í wa Zeruzalɛmu ku ba ku jɛ inya bii aa ya cea Ilaaɔ̃ kuwee ŋa, nɔ si icu nwou bɛi aa maa. Nɔ kugbokaɛ do kucĩɛ fei agbãawɔ kitai á jɛ.

⁴ Tuuba mɛɛtai aa maò kuta ŋa iyi à gbeu, nɔ a dasi jĩi ŋa mɔ tuuba akã. Si anyiɛ nɔ a maò kuta ŋau má tuuba mɛɛta, nɔ a dasi jĩi ŋau má tuuba akã. Bɛɛbɛi aa maò ileu hee koo bɔò. Fia ŋa iyi aa ceò fei kpasɛ̃i ilaalui á sãa.

⁵ Nɔ jĩnɛi wura ŋa do isɔ fũfũ iyi ilaalu Nebukanɛsaa í so wa hai kpasɛ̃i Ilaaɔ̃ iyi í wa Zeruzalɛmu í baaò wa Babilɔniu, aa nyiò fei ndɛɛ kpasɛ̃i Ilaaɔ̃ bɛ, nɔ aa jilɛ aŋa feii si agbɛ nŋa.

⁶ Bɛɛbɛi Dariusi í kɔa Tatenai do Setaa-Bɔzunai do kpaasi nŋa ŋa iyi à gbe í ni, i nya baa nŋɛ si ideu bɛ ŋa.

⁷ I jɔ̀ Zuifu ŋa a nɛ ara nŋa a teese a ma kpasɛ̃i Ilaaɔ̃u. Ilu ilɛu do inɛ ngboi Zuifu ŋau í sĩa a yɔkɔ a teese a maa si agbɛ nwoɛ.

⁸ Na nŋu, wooda iyi ǹ wa n na ŋɛ si yaase bɛi aa sobiò inɛ ngboi Zuifu ŋau si icɛi kpasɛ̃u ku teese ku ma ŋa wee. Fia iyi inɛ ŋa iyi à wa cingaai idou do ikpa ihɔ̃ à ya sãa ilaaluu, nŋui aa na inɛ ŋau ku ba icɛu ku maà leekĩ.

⁹ Ajɔò ajɔ iŋɛi aa ya baa woo weei Zeruzalɛmu ŋau bukaatai mii iyi à bi fei a ba a ceò kuwee nŋa ŋa, hai kɛtɛ kombo ŋa do angudã kombo ŋa do ama angudã ŋa do bilee do imu do vɛ̃ɛ do ikpo. Mii iyi aa bee fei i na ŋa i maà ce si atafii ŋa.

¹⁰ Si bɛɛbɛi aa yɔkɔ a cea Ilaaɔ̃ nŋu iyi í taka lele kuwee iyi í nɛ inunu didɔ̃ nɔ a cea amu ilaaluu do amam ŋa kutɔɔ si kuwɛɛ nwa.

¹¹ Wooda iyi ǹ jilɛ mbɛ. Inɛ iyi í nɔ í kua woodau fei aa nya jĩi kpalɔɛ akãi hai si ileɛ nɔ a bagãɛ si jĩi nɔu nɔ a lɛgɛ ileɛu.

¹² Ilaaɔ̃ wa nyisi araɛ si ilui Zeruzalɛmu bɛ. Nɔ ilaalu ŋa do inɛ baa yooma fei iyi aa na a bi a kua idem nɔu a kɛkɛ kpasɛ̃i Ilaaɔ̃u bɛ, Ilaaɔ̃ takaɛ ku kpã ŋa iju. Amu ilaalu Dariusi, amui ǹ na woodau bɛ, nɔ Ilaaɔ̃ ku jɔ̀ ku ce bɛɛbɛ.

¹³ Ŋɔi Tatenai inɛ ngboi ilɛ ŋa iyi à wa do ikpa nunui alɛi Efarata do Setaa-Bɔzunai do kpaasi nŋa ŋa iyi à gbeu à jirima wooda iyi ilaalu Dariusi í na ŋau sãa sãa.

¹⁴ Nɔ walii Azee do Zakari tɔkui Idou à mua inɛ ngboi Zuifu ŋau gbugbã a teese a mɔsi icɛi ileu ku maɛ nɔ à kpa iriɛ. À maai si bɛi Aɔ̃ Lafɛ̃ɛi inɛi Izirɛli ŋau í fɔ do si bɛi Sirusi do Dariusi do Aatakusɛɛsi ilaalui Pɛɛsi ŋau à jilɛ wooda.

Jingaui kpasɛ̃i Ilaaɔ̃u

¹⁵ Icɛi kpasɛ̃i Ilaaɔ̃u í kpa irii si ajɔ mɛɛtasiai cukpai Adaa, si adɔ̃ mɛɛfasiai bomma ku jɛi ilaalu Dariusi.

¹⁶ Zuifu woo wee ŋau do inɛi Levii ŋau do inɛ ŋa iyi aŋaò ŋa à baa bɛu, à jɛ jingaui kpasɛ̃i Ilaaɔ̃ ku cĩ do inɔ didɔ̃.

¹⁷ Si ajɔ iyi à waa jɛa ileu jingauu, à ce kuwee do kɛtɛ kombo cĩɔ do angudã kombo cĩɔ minji do ama angudã cĩɔ mɛɛ. Si anyiɛ à so iwo kombo maateeji à ceò kuwee na dulum dii inɛi Izirɛli ŋa si bɛi à wɛɛ dimi maateeji.

¹⁸ Bɛɛbɛ mɔi à kpɛ̃ woo wee ŋau do inɛi Levii ŋau wuaa ikã ikã, inɛ fei do icɛɛ iyi aa cea Ilaaɔ̃ si ilui Zeruzalɛmu bɛ si bɛi Moizi í kɔ si tiaɛ.

Zuifu ŋa à waa jɛ jingaui Iku ku kua

¹⁹ Inɛ ŋa iyi à baa hai bii à tako à waa jɛ aruu fei, à jɛ jingaui Iku ku kua si ajɔ maatɛ̃ɛsiai cukpa sinteu.

²⁰ Woo wee ŋau do inɛi Levii ŋau aŋa fei à wɛ à ceò buki iyi í jɔ̀ à maaju ajɔ. Ŋɔi à kpa angudã ŋa iyi aa jɛò jingauu na irii inɛi Izirɛli ŋa fei do kpaasi woo wee ŋau do aŋa taka nŋa.

²¹ Inɛi Izirɛli ŋa iyi à baa hai bii à tako à waa jɛ aruu à jɛ ijɛi jingauu do inɛ ŋa mɔ iyi à jɔ̀ laalɔ ku cei inɛi ilɛ nŋa ŋau à ba ŋa anu akã ku ce à waa tɔɔ Ilaaɔ̃ Lafɛ̃ɛ nŋa.

²² Si anyiɛ nɔ à jɛ jingaui Pɛ̃ɛ hai nɛ levɛ̃ɛu ajɔ mɛɛje do inɔ didɔ̃. Ilaaɔ̃ í jɔ̀ à wɛɛò inɔ didɔ̃ si bɛi í jɔ̀ ilaaluu í cɔ ŋa do iju jiida í mu nŋa gbugbã si icɛi kpasɛ̃i Ilaaɔ̃ Lafɛ̃ɛi inɛi Izirɛli ŋa ku ma.