Ɛsidarasi 5 - Bibeli do fee

¹ Adɔ̃ nŋu bɛi walii Azee do walii Zakari tɔkui Ido à sɔ̃ Zuifu ŋa iyi à wa ilɛi Zudaa do si ilui Zeruzalɛmu idei Aɔ̃ Lafɛ̃ɛi inɛi Izirɛli ŋa.

² Ŋɔi gbakã Zorobabɛli amai Seatiɛli do Zozue amai Yosadaki à dede à lɔsi kpasɛ̃i Ilaaɔ̃ ku ma Zeruzalɛmu má. Nɔ waliii Ilaaɔ̃ ŋau à sobi ŋa.

³ Waati bɛɛbɛ mɔi Tatenai iyi wa jɛ inɛ ngbo si agbɛi Rehumu, do Setaa-Bɔzunai do kpaasi nŋa ŋa à koo bi tu ŋa nɔ à bee ŋa à ni, yooi í na ŋɛ wooda í ni i teese i ma ileu ihɛ̃ ŋa.

⁴ Bɛirei à ya kpe inɛ ŋa iyi à waa ma ileu ihɛ̃.

⁵ Amma Ilaaɔ̃ í wɛɛ do inɛ ngboi Zuifu ŋau. Na ŋɔi í jɔ̀ inɛ ŋau a kù ganji icɛu, à waa degbe hee à sambaa ilaalu Dariusi tia ku ba a gbɔ bɛi nŋu mɔ á dɔ̃ si ideu.

Kɔɔmɔtɔ iyi à cea Zuifu ŋa bi ilaalu Dariusi

⁶ Tia iyi Tatenai inɛ ngboi ilɛ ŋa iyi à wa ikpa nunui alɛi idoi Efaratau do Setaa-Bɔzunai do akawe kpaasi nŋa ŋa iyi à gbe à sambaa ilaalu Dariusi wee.

⁷ À ni, awɔ ilaalu Dariusi à waa ceɛ fɔɔ.

⁸ À waa sɔ̃ɛ iyi awa à bɔ ilɛi Zudaa bi kpasɛ̃i Ilaaɔ̃. Inɛ ŋa à teese à waa ma kpasɛ̃u do kuta ŋa iyi à gbe, nɔ à masi jĩi ŋa si idĩu. Icɛu wa gbãa nɔ wa ce jiida jiida.

⁹ Nɔ à bee inɛ ngbo ŋau à ni, yooi í na ŋɛ wooda í ni i teese i ma ileu ihɛ̃ ŋa.

¹⁰ Nɔ à bee bɛi à ya kpe ŋa ku ba i mà iri nŋa, nɔ à kɔ irii inɛ ŋa iyi à jɛ irii icɛu.

¹¹ Ide iyi à jɛ nwa wee. À ni, awai à jɛ woo ce icɛi Ilaaɔ̃ nŋu iyi í taka lele do ilɛ, nɔ à teese à waa ma kpasɛ̃ iyi ilaalu nlai Izirɛli gɔ í ma í kpa iriɛ wo hai ku kpɛ.

¹² Amma si bɛi bala nwa ŋa à dede idɔɔkɔ̃i Ilaaɔ̃, na ŋɔi í jɔ̀ nŋu mɔ í dasi ŋa si awɔi Nebukanɛsaa ilaalui Babilɔni inɛi Kaladeeu. Ilaalu nŋui í lɛgɛ kpasɛ̃u, nɔ í mu inɛ ŋa aru í nɛò ŋa Babilɔni.

¹³ Do nŋu fei, si adɔ̃ sinte iyi Sirusi í jɛ bomma ilɛi Babilɔni, í na wooda í ni a teese a ma kpasɛ̃i Ilaaɔ̃u.

¹⁴ Nɔ baa jĩnɛi wura ŋa do ti isɔ fũfũ ŋa iyi Nebukanɛsaa í so hai kpasɛ̃i Ilaaɔ̃u, Sirusi takaɛ í sindo nwa. Nebukanɛsaa í tako í koo í jilɛ ŋa ilei iwɛ̃ iyi í wa Babilɔni, amma Sirusi í koo í nya fei ndɛɛ í so í na inɛ gɔ iyi à ya kpe Sɛsibasaa, nŋu iyi Sirusi takaɛ í cica ku jɛ ilu ilɛi Zudaa,

¹⁵ í sɔ̃ɔ í ni, i koo i teese i ma kpasɛ̃i Ilaaɔ̃ iyi í wa Zeruzalɛmu si agbɛ nwoɛ, nɔ i gba mii ŋau ihɛ̃ i koo i sindo si bɛ ŋa.

¹⁶ Ŋɔi Sɛsibasaau í bɔ Zeruzalɛmu í koo í nyɔ icui kpasɛ̃u. Hai waati bɛɛbɛi à sinti ku mau amma hee nsɛi kù kpa iri.

¹⁷ Na nŋu, nsɛi bii awɔ ilaalu ì bi, wusɛ tiai ide ŋa iyi í ce si bommau i cɔ bii í jɛ Sirusi ilaalui Babilɔnii í na wooda í ni a teese a ma kpasɛ̃i Ilaaɔ̃ Zeruzalɛmu. Si anyiɛ nɔ i sɔ̃ wa bɛi ì waa lasabu si ideu.